An Tataramon nin Dios Naggigibo nin “mga Milagro”

ISINAYSAY NI THÉRÈSE HÉON

Sarong aldaw kan 1965, ako naglaog sa sarong kompaniya asin iinalok an mga kopya kan magasin na An Torrengbantayan asin Awake! sa mga negosyante. Kan minatalikod ako tanganing humale, nakadangog ako nin putok. Sarong bala an tuminama sa salog harani sa bitis ko. “Iyan an paagi nin pag-atubang sa Mga Saksi ni Jehova,” an pagtuya kan saro sa mga negosyante.

NATAKOT ako sa eksperyensiang idto​—alagad bakong igo na magpangyari sa sako na bayaan an pambilog na panahon na ministeryo. An mga katotoohan sa Biblia na nanodan ko mahalagang marhay tanganing togotan an ano man na papangyarihon akong bayaan an sakong ministeryo. Togoti nindo akong ipaliwanag kun taano ta sinasabi ko ini.

Pagkamundag ko kan Hulyo 1918, an sakong mga magurang nag-istar sa Cap-de-la-Madeleine, sarong sadit na baryo sa Quebec, Canada, na midbid na An Lugar nin mga Milagro. May mga nagbibisita digdi tanganing magtao nin onra sa altar ni Birhen Maria. Minsan ngani dai mapatunayan an soboot mga milagro ni Maria, an Tataramon nin Dios ginibo an haros milagroso sa buhay nin dakol na tawo mantang an baryo nagdakulang magin banwaan na may labing 30,000 na habitante.

Kan ako mga 20 anyos, naheling kan ama ko an sakong interes sa relihiosong mga bagay asin itinao nia sa sako an saiyang Biblia. Kan ponan kong basahon iyan, nabigla akong manodan sa Exodo kapitulo 20 na an pagsamba sa imahen malinaw na kinokondenar. Ako tolos-tolos na nawaran nin kompiansa sa mga katokdoan kan Iglesya Katolika asin puminondo sa pag-atender sa Misa. Habo kong sumamba sa mga estatuwa. Nagigirumdoman ko pa si Tatay na nagsasabi: “Thérèse, dai ka masimba?” “Dai po,” an simbag ko, “nagbabasa ako nin Biblia.”

An pagbasa sa Biblia nagpadagos na magin kabtang kan buhay ko dawa kan ako naagom na kan Setyembre nin 1938. Mantang an agom ko, si Rosaire, parateng banggi an trabaho, inugali kong basahon an Biblia kun sia nasa trabaho. Dai nahaloy nagkonklusyon ako na an Dios seguradong igwa nin banwaan, asin pinonan kong hanapon sinda.

An Sakong Paghanap sa Banwaan nin Dios

Huli sa nanodan ko sa simbahan, kan hoben pa ako, natatakot akong matorog huli sa takot na magimata sa impierno. Tanganing labanan an siring na takot, permi kong sinasabi sa sakong sadiri na an Dios nin pagkamoot dai totogotan na mangyari an sarong bagay na makatatakot. May kompiansang ipinadagos ko an pagbasa sa Biblia, na hinahanap an katotoohan. Kapareho ako kan kapon na Etiope na nagbabasa alagad dai nakasasabot.​—Gibo 8:​26-39.

An tugang kong si André asin an saiyang agom, na nag-iistar sa sarong apartment sa iskalon sa ibaba mi, nagpoon na mag-adal sa Biblia kaiba kan Mga Saksi ni Jehova kan mga 1957. Sinabihan ko an hipag ko na patanidan ako paagi sa pagtoktok sa kisame kun umabot an mga Saksi tanganing maghulit sa laog kan edipisyo. Paagi kaiyan maaaraman ko na dai dapat buksan an pinto. Sarong aldaw dai nia ako napatanidan.

Kan aldaw na idto binuksan ko an pinto asin nakamidbid si Kay Munday, sarong payunir, na apod sa pambilog na panahon na mga ministro kan Mga Saksi ni Jehova. Ipinakipag-olay nia sa sako an manongod sa ngaran nin Dios, na ipinaliliwanag na an Dios igwa nin personal na ngaran, an Jehova. Pagkahale nia, hineling ko an sakong Biblia tanganing patunayan na an sinabi nia talagang suportado nin mga teksto sa Biblia. An sakong pagsiyasat nagpaogmang marhay sa sako.​—Exodo 6:​3, Douay Version, nota sa ibaba; Mateo 6:​9, 10; Juan 17:6.

Kan sumongko liwat si Kay, pinag-olayan mi an Katolikong doktrina nin Trinidad, na nagsasabi na an Dios tolong persona sa sarong Dios. Kan huri siniyasat ko nin maingat an sakong sadiring Biblia tanganing makombensir ako na iyan dai nagtotokdo kan Trinidad. (Gibo 17:11) Pinatunayan kan sakong pag-adal na si Jesus bakong kapareho kadakula nin Dios. Sia linalang. Igwa siang kapinonan, mantang si Jehova mayo. (Salmo 90:​1, 2; Juan 14:28; Colosas 1:​15-17; Kapahayagan 3:14) Nakombensir sa sakong nanonodan, naogma akong ipadagos an pag-orolay sa Biblia.

Sarong aldaw kan 1958, durante nin bagyo nin niebe sa Nobyembre, inimbitaran ako ni Kay na umatender sa sarong pansirkitong asamblea na ginigibo kan mismong bangging idto sa sarong arkiladong hall. Inako ko an imbitasyon asin nagustohan ko an programa. Pakatapos kaiyan, sa pakipag-olay sa sarong Saksi na duminolok sa sako, naghapot ako, “Dapat daw na an sarong tunay na Kristiano maghulit sa harong-harong?”

“Iyo,” sabi nia, “an maogmang bareta dapat na ibalangibog, asin ihinahayag kan Biblia na an pagsongko sa mga tawo sa saindang harong sarong mahalagang paagi nin paghuhulit.”​—Gibo 20:20.

Naogma nanggad ako sa saiyang simbag! Nakombensir ako kaiyan na nanompongan ko na an banwaan nin Dios. Kun sinabi niang, “Dai, dai iyan kaipuhan,” nagduda kutana ako na nanompongan ko na an katotoohan, ta aram ko kun ano an sinasabi kan Biblia manongod sa paghuhulit sa harong-harong. Poon kaidto, marikas akong nag-oswag sa espirituwal.

Pakalihis kan pansirkitong asamblea na idto, pinonan kong umatender sa mga pagtiripon kan Mga Saksi ni Jehova na ginigibo sa kataed na banwaan nin Trois-Revières. Si Kay asin an saiyang kaibaiba, si Florence Bowman, an solamenteng mga Saksi na nag-iistar kaidto sa Cap-de-la-Madeleine. Sarong aldaw sinabi ko, “Maiba ako sa saindo sa paghuhulit nuodma.” Naogma sinda na makaiba ako.

Paghuhulit sa Sadiri Kong Banwaan

Hinona ko na an gabos maako sa mensahe kan Biblia, alagad naaraman ko tolos na bako ining totoo. Kan si Kay asin Florence idestino sa ibang lugar, ako na sana an yaon sa banwaan na naghuhulit kan mga katotoohan kan Biblia sa harong-harong. Dai natatakot, nagpadagos akong maghulit na solo sa laog nin mga duwang taon sagkod na ako mabautismohan kan Hunyo 8, 1963. Kan mismong aldaw na idto nagpalista ako sa inaapod kaidto na paglilingkod bilang bakasyon payunir.

Nagpadagos ako bilang bakasyon payunir sa laog nin sarong taon. Dangan, si Delvina Saint-Laurent nanuga na sia maduman sa Cap-de-la-Madeleine asin maiba sa sako sarong beses kada semana kun ako magin regular payunir. Kaya ginibo ko an sakong aplikasyon sa pagpapayunir. Pero, makamomondo na duwang semana sana bago ko ponan an pambilog na panahon na ministeryo, nagadan si Delvina. Ano an gigibohon ko? Bueno, nagibo ko na an aplikasyon asin habo ko nang umatras. Kaya kan Oktubre 1964, pinonan ko an sakong karera sa pambilog na panahon na ministeryo. Sa laog kan sunod na apat na taon, solo akong nagharongharong.

An debotadong mga Katoliko sa Cap-de-la-Madeleine parateng bakong makikatood. An iba nag-apod nin pulis sa pagprobar na olangon ako sa paghuhulit. Sarong aldaw, siring kan sakong nasambitan sa enotan, prinobaran nin sarong negosyante na takoton ako paagi sa pagpaputok sa may pamitisan ko. Bueno, medyo nakapukaw ini nin atension sa banwaan. An lokal na istasyon nin telebisyon inapod iyan na krusada tumang sa Mga Saksi ni Jehova. An bilog na insidente nagbunga nin marahay na patotoo. Kulibat palan, pakalihis nin sampulong taon, an sarong paryente kan negosyante na buminadil sa sako nagin Saksi.

“Mga Milagro” na Ginibo kan Tataramon nin Dios

Sa uminaging mga taon, naheling kong luway-luway na narurumpag an lanob nin pagtumang sa mga katotoohan kan Biblia sa Cap-de-la-Madeleine. Kan mga 1968, an ibang Saksi buminalyo digdi, asin an lokal na mga residente nagpoon na maghimate sa mga katotoohan kan Biblia. Sa pagpoon kan mga taon nin 1970, nagkaigwa nin biglang dakulang pagdakol nin mga pag-adal sa Biblia bilang resulta. Uminabot iyan sa kamugtakan na kinaipuhan kong makiolay sa ibang mga Saksi na iyong magkondukta sa nagkapirang inaadalan ko sa Biblia tanganing makapadagos ako sa pakikikabtang sa ministeryo sa harong-harong.

Sarong aldaw an sarong hoben na babae nag-ako sa sako kan pantabang sa pag-adal sa Biblia na An Katotoohan na Minagiya Pasiring sa Buhay na Daing Sagkod. An saiyang kaiba kan panahon na idto sarong hoben na lalaki na an ngaran André, sarong garo parapakiiwalon na kriminal na nakiayon sa orolay. An pakipag-olay ki André nakapukaw sa saiyang interes, asin naponan an sarong pag-adal sa Biblia. Dai nahaloy pakatapos kaidto pinonan niang makipag-olay sa saiyang mga amigo manongod sa saiyang nanonodan.

Sarong beses, inaadalan ko sa Biblia an apat na miembro nin gang, na an saro daing gayo nagtataram alagad naghinanyog na gayo. An saiyang ngaran Pierre. Sarong aga na mga alas dos, nakadangog kami mag-agom nin toktok sa pinto. Imahinara an eksenang ini: Apat na miembro nin gang an nakatindog duman na may mga ihahapot sa sako. Marahay sana ta nungkang nagreklamo si Rosaire manongod sa siring na dis-oras na pagsongko.

Kan primero nag-aatender sa mga pagtiripon an apat na lalaki. Minsan siring, si André asin Pierre sana an nagpadagos. Iinoyon ninda an saindang buhay sa mga pamantayan nin Dios asin nabautismohan. Sa laog nin labing 20 taon na ngonyan, an duwang lalaki fiel na naglilingkod ki Jehova. Kan sinda pumoon sa pag-adal, sinda bantog sa saindang krimen asin sinusubaybayan kan mga pulis. May mga panahon na minaabot an mga pulis na hinahanap sinda pakatapos nin saro sa samong mga pag-adal sa Biblia o durante nin sarong pagtiripon sa kongregasyon. Naoogma ako na ako naghulit sa “gabos na klase nin tawo,” asin sa siring maheling mismo kun paano an Tataramon nin Dios nagpapangyari nin mga pagliliwat na tunay nanggad na garo milagroso.​—1 Timoteo 2:4.

Kun sa kapinonan kan sakong ministeryo sinabihan ako na magkakaigwa nin Kingdom Hall sa Cap-de-la-Madeleine asin na iyan mapapano nin banwaan nin Dios, dai kutana ako nagtubod dian. Sa sakong pagkaogma an sarong sadit na kongregasyon sa kataed na siudad nin Trois-Revières uminabot na sa anom na nag-ooswag na kongregasyon na nagtitiripon sa tolong Kingdom Hall, kabale na an yaon sa Cap-de-la-Madeleine.

Personalmenteng napasakuya an kagayagayahan sa pagtabang sa mga 30 katawo na makaabot sa pagdusay asin bautismo. Ngonyan, sa edad na 78, tunay nanggad na masasabi ko na ako maogma na idinusay ko ki Jehova an sakong buhay. Minsan siring, dapat kong akoon na nagkaigwa ako nin mga panahon nin pagkadisganar. Tanganing makayang labanan an siring na mga panahon, permi kong binubuksan an sakong Biblia asin binabasa an nagkapirang teksto na nakapagiginhawang marhay sa sako. Imposibleng mapalihis ko an sarong aldaw na dai nababasa an Tataramon nin Dios. Espesyalmenteng nakaparirigon sa boot an Juan 15:​7, na nagsasabi: “Kun kamo magdanay na kasaro ko asin an sakong mga tataramon magdanay dian sa saindo, hagada nindo an ano man na boot nindo asin iyan gigibohon para sa saindo.”

Linalaoman kong maheling si Rosaire sa madali nang dumatong na bagong kinaban. (2 Pedro 3:13; Kapahayagan 21:​3, 4) Bago sia magadan kan 1975, marahay an saiyang pag-oswag pasiring sa bautismo. Para sa ngonyan, determinado akong magpadagos sa pambilog na panahon na ministeryo asin padagos na maggayagaya sa gibohon ni Jehova.