Kun Ano an Puedeng Itokdo sa Sato kan mga Linalang na “Natural na Madonong”

AN PAGPALIPOT nin aire, pagkontrol sa pagyelo, paghale sa asgad, asin sonar mga imbension na napabantog sa katawohan sa ika-20 siglo. Pero, yaon na iyan sa mga hayop rinibong taon na an nakaagi. Iyo, nakikinabang an katawohan paagi sa pag-adal sa siring na mga linalang na “natural na madonong.” (Talinhaga 30:​24-28; Job 12:​7-9) An nagkapirang hayop garo baga nagin dai nagtataram na mga paratokdo sa katawohan, asin manonompongan niato na interesanteng marhay an pagsiyasat sa sainda.

Puede daw na makinabang kita sa pagkonsiderar sa mga ugale nin nagkapirang hayop? Bueno, an saiyang mga parasunod iinagid ni Jesu-Cristo sa mga karnero, halas, salampati, asin pati sa doron. Ano an nasa isip nia kan ikomparar nia an saiyang mga parasunod sa mga linalang na ini? Helingon ta.

“An Sakong mga Karnero Naghihinanyog sa Sakong Tingog”

An mga karnero nasasambitan sa Biblia nin labing 200 na beses. Siring sa paliwanag kan Smith’s Bible Dictionary, “an karnero sarong simbolo nin kahoyoan, pasensia, asin pagpasakop.” Sa Isaias kapitulo 53, si Jesus mismo makahulang iinagid sa karnero. Angay nanggad na ikomparar nia an saiyang mga parasunod sa iyo man sanang hayop! Alagad arin na partikular na mga karakteristiko nin karnero an nasa isip ni Jesus?

“An sakong mga karnero naghihinanyog sa sakong tingog, asin midbid ko sinda, patin sinda nagsusunod sa sako,” sabi ni Jesus. (Juan 10:27) Sa siring itinampok nia an kahoyoan kan saiyang mga disipulo asin an saindang pagkagalaga na sumunod sa saiya. An literal na mga karnero naghihinanyog sa saindang pastor asin andam na nagsusunod sa saiya. An pastor man igwa nin dayupot na relasyon sa aripompon.

An aripompon tibaad magkawararak sa tahaw nin kaawagan kun nananabsab, alagad an lambang karnero nagdadanay na harani sa grupo sa kabilogan. Sa siring, kun an mga hayop nasa pag-alaman o natatakot, “puede sindang magtiripon tolos-tolos,” an sabi kan librong Alles für das Schaf (Gabos na Bagay Para sa Karnero). Kun an mga karnero dumalagan tanganing dumulag sa peligro, minadalagan sinda bilang sarong aripompon, na kun beses minapondo tanganing helingon giraray an situwasyon. “An pagdulag na may mga pagpondo nagpapangyari sa mga kordero asin mas maluyang mga hayop na makadungan. An pastor nagtatao pa ngani sa sainda nin espesyal na proteksion.” Ano an satong manonodan sa gaweng ini?

An tunay na mga Kristiano ngonyan bakong wararak sa tahaw kan mga denominasyon asin sekta nin Kakristianohan. Imbes, sinda tiniripon sa sarong aripompon. An lambang Kristiano nakamamate nin personal na relasyon sa aripompon na ini nin Dios, asin ini nakakokontribwir sa pagkasararo kan organisasyon kan Mga Saksi ni Jehova. Kun may mangyaring krisis​—baga man iyan grabeng helang, guerra, o natural na kalamidad—​saen naghahanap nin giya asin proteksion an lambang parasamba? Sa organisasyon ni Jehova, na nagtatao nin espirituwal na katiwasayan.

Paano itinatao an hatol kan Biblia? Paagi sa mga publikasyon na arog kan An Torrengbantayan asin an kaiba kaiyan na magasin, an Awake! An mga magasin na ini asin an Kristianong mga pagtiripon nagtatao pa ngani nin espesyal na tabang sa mga nangangaipo nin dugang na pag-ataman, arog kan mga kordero asin mas maluyang mga karnero sa sarong aripompon. Halimbawa, itinatao an atension sa nagsosolong mga magurang asin sa mga may depresyon. Madonong nanggad, kun siring, na basahon an kada magasin, umatender sa gabos na pagtiripon kan kongregasyon, asin iaplikar an satong nanonodan! Sa siring ipinaheheling ta an kahoyoan asin makosog na relasyon sa aripompon nin Dios.​—1 Pedro 5:2.

“Maingat Siring sa mga Halas Pero Inosente Siring sa mga Salampati”

An Smith’s Bible Dictionary nagsasabi: “Sa bilog na Sirangan an halas ginamit bilang simbolo kan maraot na prinsipyo, kan espiritu nin kasumbikalan.” Sa ibong na kampi, an “sakuyang salampati” sarong termino nin pagkamoot. (Awit ni Salomon 5:2) Kun siring, ano an nasa isip ni Jesus kan parigonon nia an boot kan saiyang mga parasunod na magin “maingat siring sa mga halas pero inosente siring sa mga salampati”?​—Mateo 10:16.

Si Jesus nagtatao kaidto nin mga instruksion sa paghuhulit asin pagtotokdo. An saiyang mga disipulo makalalaom nin magkalaen na reaksion. An nagkapira mapaheling nin interes, mantang an iba hahaboan an maogmang bareta. An iba lalamagon pa ngani an tunay na mga lingkod na ini nin Dios. (Mateo 10:​17-23) Ano an maninigong magin reaksion kan mga disipulo sa paglamag?

Sa Das Evangelium des Matthäus (An Ebanghelyo ni Mateo), si Fritz Rienecker nagsasabi mapadapit sa Mateo 10:16: “An pagkaalisto nin isip . . . dapat na may kaibang integridad, sinseridad, asin pagkaprangka, ta tibaad may ano man na mangyari na matao sa mga kaiwal nin balidong dahelan na magreklamo. An mga embahador ni Jesus nasa tahaw nin daing pakundangan na mga kaiwal, na dai nagpapaheling nin konsiderasyon asin sinasalakay an mga apostol sa daing herak na paagi asin sa bakong gayong risang oportunidad. Huli kaini, kinakaipuhan​—arog nin halas—​na magdanay na nagbabantay sa mga kaiwal, asin repasohon an situwasyon na alisto an mga mata asin isip; na kontrolon an situwasyon na dai naggagamit nin katusohan o pandadaya, na magin dalisay asin totoo sa tataramon asin gibo asin sa siring patunayan an saindang sadiri na arog sa salampati.”

Ano an manonodan kan mga lingkod nin Dios sa modernong aldaw sa mga tataramon ni Jesus na yaon sa Mateo 10:16? Ngonyan, an reaksion kan mga tawo sa maogmang bareta arog nanggad kan ginibo ninda kan enot na siglo. Kun napapaatubang sa paglamag, an tunay na mga Kristiano kaipuhan na ibanan nin kadalisayan kan salampati an pagkaalisto nin isip kan halas. An mga Kristiano nungkang naggagamit nin pandadaya o pagkabakong sadiosan kundi sinda marahay, tunay, asin sadiosan sa pagbalangibog kan mensahe nin Kahadean sa iba.

Sa pag-ilustrar: An mga katrabaho, mga hoben sa eskuelahan, o minsan mga miembro nin pamilya nindo mismo tibaad gumibo nin mapagtuyang mga komento manongod sa saindong mga paniniwala bilang sarong Saksi ni Jehova. An biglang reaksion tibaad bumalos paagi sa pagtuya man manongod sa saindang pagtubod. Alagad inosente daw iyan? Bako nanggad. Kun ipaheling nindo sa mga nagkikritika sa saindo na an mga komento ninda daing epekto sa saindong marahay na paggawe, tibaad magbago na sana sinda. Kamo kun siring magigin alisto an isip asin daing kanawayan​—‘maingat siring sa halas pero inosente siring sa salampati.’

“An mga Doron Garo mga Kabayo na Inandam sa Pakilaban”

Ibinareta kan magasin na GEO na kan 1784, an Aprika del Sur rinaot kan “pinakadakol na doron na ikinasurat kasuarin pa man sa nakarekord na kasaysayan.” An mga doron nakalakop sa sarong lugar na 5,200 kilometro kuadrado, na mga limang beses kan kadakulaan kan Hong Kong. Sinasabi kan Smith’s Bible Dictionary na an mga doron “naggigibo nin teribleng panraraot sa mga pananom sa mga nasyon na inaagihan kaiyan.”

Sa saiyang itinao nin Dios na kapahayagan nin mga bagay na mangyayari durante kan “aldaw kan Kagurangnan,” ginamit ni Jesus an sarong bisyon nin mga doron. Sinabi mapadapit kaiyan: “An mga doron garo mga kabayo na inandam sa pakilaban.” (Kapahayagan 1:​1, 10; 9:​3-7) Ano an kahulogan kan simbolismong ini?

Kaidto pa nasabotan na kan Mga Saksi ni Jehova na an mga doron sa Kapahayagan kapitulo 9 naglaladawan sa linahidan na mga lingkod nin Dios digdi sa daga sa siglong ini.a An mga Kristianong ini inasignaran nin sarong partikular na trabaho​—ihulit an mensahe nin Kahadean sa bilog na daga asin gumibo nin mga disipulo. (Mateo 24:14; 28:​19, 20) Hinahagad kaini sa sainda na daogon an mga kaolangan asin magdanay sa saindang gibohon. Ano an mas marahay na makaiilustrar kaini kisa sa dai madadaog na doron?

Minsan ngani labi sanang diit sa limang sentimetro an laba, an doron sa parate nagbibiahe sa pag-oltanan nin 100 asin 200 kilometros kada aldaw. An doron sa timog-solnopan na Asia asin amihanan na Aprika tibaad malihisan pa ngani ini sagkod sa 1,000 kilometro. Ipinaliliwanag kan GEO na “an mga pakpak kaiyan nagkukupadkupad nin 18 beses kada segundo asin sa laog nin sagkod sa 17 oras kada aldaw​—sarong bagay na mayo nang ibang insekto na nakagigibo.” Kanigoan kadakulang trabaho para sa siring kasadit na linalang!

Bilang grupo, an Mga Saksi ni Jehova marigon sa pagpalakop kan maogmang bareta kan Kahadean. Sinda ngonyan naghuhulit sa labing 230 kadagaan. Pinapangganahan kan mga lingkod na ini nin Dios an dakol na kadepisilan tanganing makapakikabtang sa pag-otob sa gibohon. Anong klaseng mga problema an inaatubang ninda? An prehuwisyo, legal na mga pagbabawal, helang, pagkadisganar, asin pagtumang nin mga paryente nagkapira sana. Alagad mayong nakapaontok sa saindang pag-abante. Nagdadanay sinda sa gibohon na itinao sa sainda nin Dios.

Padagos na Ipaheling an Kristianong mga Kualidad

Iyo, iinagid ni Jesus an saiyang mga parasunod sa mga karnero, halas, salampati, asin doron. Tunay na angay ini sa satong aldaw. Taano? Huli ta an katapusan kan palakaw na ini nin mga bagay madali nang dumatong, asin orog na nagigin masakit an mga problema kisa kasuarin pa man.

Nasa isip an nag-iilustrar na mga tataramon ni Jesus, an tunay na mga Kristiano nagdadanay na dayupot sa aripompon nin Dios asin may kahoyoan na inaako an hatol gikan sa organisasyon ni Jehova. Sinda mapagbantay asin alisto sa mga situwasyon na puedeng makaolang sa saindang Kristianong mga aktibidad, mantang sinda nagdadanay na daing kasagwean sa gabos na bagay. Saro pa, nagpapadagos sinda sa paggibo kan kabotan nin Dios sa atubangan nin mga kaolangan. Asin sinda padagos na nakanonood sa nagkapirang linalang na “natural na madonong.”

[Nota sa Ibaba]