Si Jehova​—Dios na Naghahayag nin mga Hilom

“Igwa nin sarong Dios sa kalangitan na Parahayag nin mga hilom.”​—DANIEL 2:28.

1, 2. (a) Paano napapalaen si Jehova sa saiyang dakulang Kaiwal? (b) Paano ipinababanaag nin mga tawo an pagkakalaen na ini?

SI Jehova, an supremo asin mamomoton na Dios kan uniberso, an kaiyoiyohing Kaglalang, Dios nin kadonongan asin hustisya. Dai nia kaipuhan na itago kun siisay sia, an saiyang mga gibo, o an saiyang mga katuyohan. Sa saiyang sadiring panahon asin sa saiyang sadiring kagustohan, ihinahayag nia an saiyang sadiri. Sa paaging ini napapalaen sia sa saiyang Kaiwal, si Satanas na Diablo, na naghihingoang itago kun siisay sia sa aktuwal asin kun ano an saiyang mga intension.

² Kun paanong magkalaen si Jehova asin si Satanas, iyo man an mga nagsasamba sa sainda. An mga nagsusunod sa pangengenot ni Satanas mamimidbid sa panloloko asin pandadaya. Hinihingoa nindang paluwason na sinda marahay, mantang mga gibo nin kadikloman an ginigibo. An mga Kristianong taga-Corinto sinabihan na dai magngalas sa katunayan na ini. “Huli ta an siring na mga tawo mga falsong apostol, madayang mga trabahador, na nagmamalemale na mga apostol ni Cristo. Asin bakong makangangalas, huli ta minsan si Satanas nagmamalemale na anghel nin liwanag.” (2 Corinto 11:​13, 14) Sa ibong na kampi, an mga Kristiano minimidbid si Cristo bilang Namomoon sa sainda. Kan yaon digdi sa daga ipinabanaag nia sa sangkap na paagi an personalidad kan saiyang Ama, si Jehova Dios. (Hebreo 1:​1-3) Sa siring, paagi sa pagsunod ki Cristo, inaarog kan mga Kristiano si Jehova, an Dios nin katotoohan, pagkadaing itinatago, asin liwanag. Dai man ninda kaipuhan na itago kun siisay sinda, an saindang mga gibo, o an saindang mga katuyohan.​—Efeso 4:​17-19; 5:​1, 2.

 3. Paano niato mapahihimutikan an sahot na an mga tawong nagigin Saksi ni Jehova pinirit na umayon sa sarong “hilom na sekta”?

³ Sa mga panahon na aram niang iyo an pinakamarahay, ibinubuyagyag ni Jehova an mga detalye manongod sa saiyang mga katuyohan asin manongod sa ngapit na dati dai aram nin mga tawo. Sa sentidong ini sia Dios na naghahayag nin mga hilom. Sa siring, an mga tawo na gustong maglingkod sa saiya iniimbitaran​—iyo, sinasadol—​na adalan an ihinayag na impormasyon na iyan. An sarong surbey kan 1994 sa labing 145,000 na Saksi sa sarong nasyon sa Europa naghayag na, sa promedyo, an kada saro sa sainda personal na siniyasat an mga katokdoan kan Mga Saksi ni Jehova sa laog nin tolong taon bago nagdesisyon na magin Saksi. Nagdesisyon sinda sono sa saindang sadiring libreng kabotan na dai pinipirit. Asin padagos sindang nagkaigwa nin katalingkasan nin kabotan asin paghiro. Halimbawa, huli ta an nagkapira bako nang oyon sa halangkaw na mga pamantayan sa moralidad para sa mga Kristiano, an mga ini paghaloyhaloy nagdesisyon na habo na nindang magpadagos bilang Saksi. Pero interesante na durante kan nakaaging limang taon, an dakol sa mga dating Saksi na ini naggibo nin mga paagi na ponan liwat an saindang pakikiasosyar asin aktibidad bilang Saksi.

 4. Ano an dai dapat na ikaribok nin isip kan fiel na mga Kristiano, asin taano ta dai?

⁴ Siempre, bakong gabos na dating Saksi minabalik, asin kabilang sa sainda an nagkapira na dati igwa nin mga katongdan nin paninimbagan sa laog kan Kristianong kongregasyon. Dai ini maninigong ipagngalas, huli ta maski an saro sa pinakadayupot na mga parasunod ni Jesus, an apostol na si Judas, tuminalikod. (Mateo 26:​14-​16, 20-​25) Alagad saro daw ining dahelan na maribok an isip manongod sa Kristianismo mismo? Ginigibo daw kaining imbalido an kapangganahan kan Mga Saksi ni Jehova sa saindang aktibidad na pagtotokdo? Dai nanggad, kun paanong an traydor na gawe-gawe ni Judas Iscariote dai nakapaontok sa mga katuyohan nin Dios.

Makakamhan sa Gabos Pero Mamomoton

 5. Paano niato naaaraman na namomotan ni Jehova asin ni Jesus an mga tawo, asin paano ninda ipinaheling an pagkamoot na ini?

⁵ Si Jehova Dios nin pagkamoot. May pagmakolog sia sa mga tawo. (1 Juan 4:​7-11) Sa ibong kan saiyang halangkaw na posisyon, naoogma siang makikatood sa mga tawo. Manongod sa saro kan saiyang suanoy na mga lingkod, satong mababasa: “‘Si Abraham nagtubod ki Jehova, asin iyan ibinilang sa saiya na katanosan,’ asin sia inapod na ‘katood ni Jehova.’” (Santiago 2:23; 2 Cronica 20:7; Isaias 41:8) Kun paanong an mga magkatood na tawo nagtitinugaan nin kompidensial na mga bagay, o hilom, iyo man si Jehova sa saiyang mga katood. Sa bagay na ini inarog ni Jesus an saiyang Ama, huli ta sia nakikatood sa saiyang mga disipulo asin nagsabi sa sainda nin mga hilom. “Dai ko na kamo inaapod na mga oripon,” sabi nia sa sainda, “huli ta an oripon dai nakakaaram kan ginigibo kan saiyang kagurangnan. Kundi inapod ko kamong mga katood, huli ta an gabos na bagay na nadangog ko sa sakong Ama ipinaaram ko sa saindo.” (Juan 15:15) An pribadong impormasyon, o “mga hilom,” na aram ni Jehova, kan saiyang Aki, asin kan saindang mga katood pinagsasararo sinda sa dai napapatod na bogkos nin pagkamoot asin debosyon.​—Colosas 3:​14.

 6. Taano ta dai kaipuhan na itago ni Jehova an saiyang mga intension?

⁶ An kahulogan kan ngaran na Jehova, “Saiyang Pinapangyayari,” nagpaparisa kan saiyang kakayahan na magin an ano man na kaipuhan tanganing magibo an saiyang katuyohan. Bakong arog nin mga tawo, dai kaipuhan na itago ni Jehova an saiyang mga intension huli sa takot na tibaad maolang sia nin iba sa pag-otob kaiyan. Dai nanggad sia masusudya, kaya daing tago-tago na ihinahayag nia sa saiyang Tataramon, an Biblia, an dakol na katuyohan niang gibohon. Sia nanunuga: ‘An sakong tataramon dai mabalik sa sako na daing laog, kundi gigibohon nanggad kaiyan an sakong boot, asin iyan siertong magigin mapanggana sa sakuyang sinobolan kaiyan.’​—Isaias 55:11.

 7. (a) Ano an ihinula ni Jehova sa Eden, asin paano pinatunayan ni Satanas na an Dios totoo? (b) Paano perming totoo an prinsipyo sa 2 Corinto 13:8?

⁷ Dai nahaloy pakatapos kan pagrebelde sa Eden, nakasumaryong ihinayag ni Jehova an ultimong resulta kan nangyayaring kontrobersia sa pag-oltanan nia asin kan saiyang Kaiwal, si Satanas. An ipinanuga nin Dios na Banhi lulugadon nin makolog, alagad bakong sa mapanlaglag na paagi, mantang si Satanas sa katapustapusi lulugadon na ikagagadan nia. (Genesis 3:​15) Kan 33 C.E., aktuwal na linugad kan Diablo an Banhi, si Cristo Jesus, paagi sa pagpangyari kan saiyang kagadanan. Sa paaging ini, inotob ni Satanas an Kasuratan asin kadungan kaiyan pinatunayan na si Jehova Dios nin katotoohan, minsan ngani siertong bako ini an intension ni Satanas. An saiyang pagkaongis sa katotoohan asin katanosan, siring man an saiyang mapalangkaw, daing pagsolsol na kaisipan, nagbunga kan paggibo nia kan eksaktong ihinula nin Dios na gigibohon nia. Iyo, para sa gabos na nagtutumang sa katotoohan, minsan ki Satanas mismo, totoo an prinsipyo: “Dai kami makagigibo nin ano man tumang sa katotoohan, kundi para sana sa katotoohan.”​—2 Corinto 13:8.

8, 9. (a) Ano an aram ni Satanas, alagad isinasapeligro daw kan pakaaram na ini an paghaman kan mga katuyohan ni Jehova? (b) Anong malinaw na patanid an iniignoro kan mga nagtutumang ki Jehova, asin taano?

⁸ Poon kan an Kahadean nin Dios itindog sa dai naheheling na paagi kan 1914, uminaplikar an Kapahayagan 12:12: “Huli kaini mag-ogma, kamo kalangitan asin kamo na nag-eerok dian! Herak man kan daga asin kan dagat, huli ta huminilig na dian sa saindo an Diablo, na may dakulang kaanggotan, sa pakaaram na halipot na sana an saiyang panahon.” Pero, liniwat daw ni Satanas an saiyang gawe-gawe huli sa pakaaram na halipot na sana an saiyang panahon? Iyan magigin pag-admitir ni Satanas na si Jehova Dios nin katotoohan asin na bilang an Supremong Namamahala, sia sana an maninigong sambahon. Minsan siring, habong mag-ako nin pagkadaog an Diablo, apisar na aram nia ini.

⁹ Daing tago-tago na ihinahayag ni Jehova kun ano an mangyayari kun si Cristo dumatong na tanganing hokoman an palakaw sa kinaban ni Satanas. (Mateo 24:​29-​31; 25:​31-​46) Sa bagay na ini, an saiyang Tataramon nagpapaisi mapadapit sa mga namamahala sa kinaban: “Kun noarin sinda nagsasarabi: ‘Katoninongan asin katiwasayan!’ dangan an biglang pagkalaglag maabot tolos sa sainda siring sa kolog nin bados na babae.” (1 Tesalonica 5:3) An mga nagsusunod sa halimbawa ni Satanas iniignoro an malinaw na patanid na ini. Nabuta sinda huli sa saindang maraot na puso, asin inoolang sinda kaini na magsolsol sa saindang maraot na dalan patin liwaton an saindang mga plano saka estratehiya na nagpoprobar na olangon an mga katuyohan ni Jehova.

10. (a) Sagkod sa anong sokol na tibaad naotob na an 1 Tesalonica 5:​3, alagad ano an maninigong magin reaksion kan banwaan ni Jehova? (b) Taano an mga tawong daing pagtubod ta tibaad magin mas agresibo sa ngapit sa pagtumang sa banwaan nin Dios?

¹⁰ Partikularmente poon 1986, kan ideklarar kan Naciones Unidas an Internasyonal na Taon nin Katoninongan, kadakol kan pag-orolay sa kinaban manongod sa katoninongan asin katiwasayan. Ginibo an depinidong mga aksion sa paghihingoang seguradohon an katoninongan sa kinaban, na minalataw na may kapangganahan man. Ini daw an bilog na kaotoban kan hulang ini, o igwa daw kitang malalaoman na nakakukubhan na paisi sa maabot? Lilinawon ni Jehova an bagay na iyan sa saiyang itinalaan na panahon. Mientras tanto, magdanay kitang puka sa espirituwal, “na naghahalat asin naggigirumdom sa presensia kan aldaw ni Jehova.” (2 Pedro 3:12) Mantang padagos na nag-aagi an panahon na dakol pa an orolay manongod sa katoninongan asin katiwasayan, an nagkapira na nakaaaram kan patanid na ini, alagad piniling ignorohon iyan, tibaad magin mas pangahas sa pag-isip na dai ootobon, o dai kayang otobon, ni Jehova an saiyang tataramon. (Ikomparar an Eclesiastes 8:​11-13; 2 Pedro 3:​3, 4.) Alagad aram kan tunay na mga Kristiano na ootobon ni Jehova an saiyang katuyohan!

Tamang Paggalang sa mga Ahensia na Ginagamit ni Jehova

11. Ano an nanodan ni Daniel asin Jose manongod ki Jehova?

¹¹ Kan si Hadeng Nabucodonosor, na namamahala sa Imperyo nin Bagong Babilonya, mangatorogan nin nakapupurisaw na dai nia magirumdoman, nagpatabang sia. Dai ikasabi sa saiya kan saiyang mga saserdote, salamangkero, asin paratoodtood kun ano an saiyang pangatorogan ni ikapaliwanag an kahulogan kaiyan. Minsan siring, nahimo iyan kan lingkod nin Dios na si Daniel, minsan ngani daing pag-alangan na inadmitir nia na an paghayag kan pangatorogan asin kan kahulogan kaiyan bakong resulta kan saiyang sadiring kadonongan. Si Daniel nagsabi: “Igwa nin sarong Dios sa kalangitan na Parahayag nin mga hilom, asin ipinaisi nia ki Hadeng Nabucodonosor kun ano an mangyayari sa huring kabtang kan mga aldaw.” (Daniel 2:​1-30) Nagkapirang siglo bago kaini, naeksperyensiahan man ni Jose, saro pang propeta nin Dios, na si Jehova Parahayag nin mga hilom.​—Genesis 40:8-22; Amos 3:​7, 8.

12, 13. (a) Siisay an pinakadakulang propeta nin Dios, asin taano ta siring an simbag nindo? (b) Siisay ngonyan an naglilingkod bilang “mga pinaniniwalaan kan sagradong mga hilom nin Dios,” asin paano niato sinda maninigong mansayon?

¹² An pinakadakulang propeta ni Jehova na naglingkod digdi sa daga iyo si Jesus. (Gibo 3:​19-24) Si Pablo nagpaliwanag: “An Dios, na kaidtong haloy nang panahon nagtaram sa dakol na pangyayari asin sa dakol na paagi sa satong mga apoon paagi sa mga propeta, sa katapusan kan mga aldaw na ini nagtaram sa sato paagi sa sarong Aki, na ninombrahan niang paramana kan gabos na bagay, asin paagi sa saiya ginibo nia an mga palakaw nin mga bagay.”​—Hebreo 1:​1, 2.

¹³ Si Jehova nagtaram sa enot na mga Kristiano paagi sa saiyang Aki, si Jesus, na nagpahayag sa sainda kan mga hilom nin Dios. Si Jesus nagsabi sa sainda: “Itinao sa saindo an pakasabot kan sagradong mga hilom kan kahadean nin Dios.” (Lucas 8:​10) Kan huri inapod ni Pablo an linahidan na mga Kristiano bilang “mga sakop ni Cristo asin mga pinaniniwalaan kan sagradong mga hilom nin Dios.” (1 Corinto 4:1) Ngonyan, an linahidan na mga Kristiano padagos na naglilingkod bilang siring, na minakompuesto nin sarong grupong fiel asin madonong na oripon na paagi sa Namamahalang Grupo kaiyan nagtatao nin espirituwal na kakanon sa igong panahon. (Mateo 24:​45-47) Kun halangkaw an paggalang niato sa pinasabngan na mga propeta nin Dios kan nakaaging mga aldaw, asin partikularmente sa Aki nin Dios, bako daw na maninigo ta man na igalang an ahensiang tawo na ginagamit ngonyan ni Jehova sa paghayag nin impormasyon sa Biblia na kaipuhan na marhay kan saiyang banwaan sa delikadong mga panahon na ini?

Pagkadaing Itinatago o Paghilom?

14. Noarin an mga Kristiano naggigibo nin aktibidad sa hilom, sa siring sinusunod an halimbawa niisay?

¹⁴ An pagkadaing itinatago daw ni Jehova sa paghayag nin mga bagay nangangahulogan na an mga Kristiano maninigo na ihayag permi asin sa gabos na kamugtakan an gabos nindang aram? Bueno, sinusunod kan mga Kristiano an sadol ni Jesus sa saiyang mga apostol na magin “maingat siring sa mga halas pero inosente siring sa mga salampati.” (Mateo 10:16) Kun sinasabihan na dai sinda puedeng sumamba sa Dios siring sa hinahagad kan saindang konsensia, an mga Kristiano padagos na ‘nagkukuyog sa Dios,’ huli ta aram ninda na mayo nin ahensiang tawo na may diretsong iprohibir an pagsamba ki Jehova. (Gibo 5:29) Ipinaheling mismo ni Jesus an pagigin tama kaini. Satong mababasa: “Ngonyan pakalihis kan mga bagay na ini si Jesus nagpadagos sa paglibot sa Galilea, huli ta habo siang maglakaw sa palibot nin Judea, huli ta an mga Judio naghihingoang gadanon sia. Minsan siring, an kapiestahan kan mga Judio, an kapiestahan nin mga tabernakulo, harani na. Kaya si Jesus nagsabi sa sainda [an saiyang daing pagtubod na mga tugang sa laman]: . . . ‘Tumukad kamo pasiring sa kapiestahan; dai pa ako matukad pasiring sa kapiestahan na ini, huli ta an sakong itinalaan na panahon dai pa lubos na minadatong.’ Kaya pakatapos niang sabihon sa sainda an mga bagay na ini, nagdanay sia sa Galilea. Alagad kan an saiyang mga tugang makatukad na pasiring sa kapiestahan, dangan sia tuminukad man, bakong sa hayag kundi sa hilom.”​—Juan 7:​1, 2, 6, 8-10.

Sabihon o Dai Sabihon?

15. Paano ipinarisa ni Jose na an paghilom kun beses iyo an mamomoton na gibohon?

¹⁵ Sa nagkapirang kamugtakan, an pagpadanay na pribado sa sarong bagay bako sanang madonong kundi mamomoton man. Halimbawa, ano an nagin reaksion ni Jose, an kag-ampon na ama ni Jesus, kan maaraman nia na an saiyang katratong magin agom, si Maria, “bados paagi sa banal na espiritu”? Mababasa niato: “Minsan siring, an agom niang si Jose, huli ta sia matanos asin habo na gibohon siang dadalanon kan publiko, nagplano na idiborsio sia nin hilom.” (Mateo 1:​18, 19) Kanigoan kabakong mamomoton kutana na gibohon si Maria na dadalanon kan publiko!

16. Ano an paninimbagan kan kamagurangan, siring man kan gabos na iba pang miembro kan kongregasyon, kun mapadapit sa kompidensial na mga bagay?

¹⁶ An kompidensial na mga bagay na puedeng magbunga nin kasosopgan o kolog nin boot maninigo na dai ihayag sa mga tawong bakong autorisado. Ginigirumdom ini nin Kristianong kamagurangan kun kaipuhan na tawan ninda nin personal na hatol o pagranga an mga kapwa Kristiano o disiplinahon pa ngani sinda huli sa magabat na pagkakasala tumang ki Jehova. Kaipuhan na asikasohon an mga bagay na ini sa Makakasuratan na paagi; dai kaipuhan asin bakong mamomoton na ihayag an kompidensial na mga detalye duman sa mga bakong kalabot. Sierto nanggad, an mga miembro kan Kristianong kongregasyon dai magpoprobar na piriton na aramon sa kamagurangan an kompidensial na impormasyon kundi igagalang ninda an paninimbagan kan kamagurangan na ihilom an kompidensial na mga bagay. An Talinhaga 25:9 nagsasabi: “Ipaglaban mo an saimong katanosan sa saimong kapwa, asin dai mo ihayag an hilom nin iba.”

17. Taano ta sa kadaklan na kaso ihinihilom kan mga Kristiano an kompidensial na mga bagay, alagad taano ta dai ninda iyan perming magigibo?

¹⁷ Totoo man an prinsipyong ini sa laog kan pamilya o sa tahaw nin dayupot na magkakatood. Mahalagang marhay an pagpadanay na kompidensial sa nagkapirang bagay tanganing malikayan an mga dai pagkasinabotan asin naraot na mga relasyon. “An doros hale sa amihanan garo pinagpoporosan na nagdadara nin oran; asin an dila na nagbubuyagyag nin hilom, nin lalauogon na pinagdenunsiar.” (Talinhaga 25:23) Siempre, huli sa kaimbodan ki Jehova asin sa saiyang matanos na mga prinsipyo, siring man sa pagkamoot sa nagkasalang mga indibiduwal, tibaad may beses na kaipuhan na sabihon sa mga magurang, Kristianong kamagurangan, o iba pang mga autorisado an minsan kompidensial na mga bagay.a Alagad sa kadaklan na kaso, iniingatan nin mga Kristiano na kompidensial an personal na mga hilom nin iba, na binabantayan iyan siring sa pagbantay ninda sa saindang sadiring mga hilom.

18. Anong tolong Kristianong kualidad an makatatabang sa sato na determinaran kun ano an maninigo niatong sabihon asin kun ano an maninigo na dai niato sabihon?

¹⁸ Bilang sumaryo, inaarog nin Kristiano si Jehova paagi sa pagpadanay na kompidensial sa nagkapirang bagay kun kinakaipuhan, na ihinahayag sana iyan kun angay. Sa pagdesisyon kun ano an maninigo o dai maninigong sabihon, sia ginigiyahan nin kapakumbabaan, pagtubod, asin pagkamoot. Inoolang sia kan kapakumbabaan sa pagpasobra sa saiyang sadiring importansia, na naghihingoang pahangaon an iba magsalang paagi sa pag-estorya sa sainda kan gabos na aram nia o paagi sa papagpatilamtilam sa sainda sa mga hilom na dai nia puedeng sabihon. An pagtubod sa Tataramon ni Jehova asin sa Kristianong kongregasyon nagmomotibar sa saiya na ihulit an itinao nin Dios na impormasyon sa Biblia mantang nag-iingat tanganing malikayan an pagsabi nin mga bagay na tibaad ikakolog kan boot nin iba sa kapinonan. Iyo, minomotibar sia nin pagkamoot na daing tago-tago na sabihon an mga bagay na nagpapamuraway sa Dios asin kinakaipuhan na maaraman nin mga tawo tanganing magkamit nin buhay. Sa ibong na lado, iniingatan nia an kompidensial na personal na mga bagay, na nakaaaram na sa kadaklan na kaso an paghayag kaiyan magpapaheling nin kadaihan nin pagkamoot.

19. Anong paggawe an nakatatabang na mamidbid an tunay na mga Kristiano, asin ano an ibinubunga kaiyan?

¹⁹ An timbang na pamamaaging ini nakatatabang na mamidbid an tunay na mga Kristiano. Dai ninda itinatago kun siisay an Dios paagi sa dai paggamit kan saiyang ngaran o paagi sa paggamit nin misteryoso, dai ikapaliwanag na doktrina nin Trinidad. An dai midbid na mga dios karakteristiko nin falsong relihion, bakong kan tunay. (Helingon an Gibo 17:​22, 23.) Tunay na inaapresyar kan linahidan na mga Saksi ni Jehova an pribilehio na pagigin “mga pinaniniwalaan kan sagradong mga hilom nin Dios.” Paagi sa daing tago-tago na paghayag kan mga hilom na ini sa iba, nakatatabang sinda na pahiroon an mga sadiosan an puso na magmaigot na kamtan an pakikikatood ni Jehova.​—1 Corinto 4:1; 14:​22-25; Zacarias 8:​23; Malaquias 3:​18.

[Nota sa Ibaba]

Ano an Isisimbag Nindo?

◻ Taano ta dai kaipuhan na itago ni Jehova an saiyang mga intension?

◻ Kiisay ihinahayag ni Jehova an saiyang mga hilom?

◻ Ano an paninimbagan nin mga Kristiano kun mapadapit sa kompidensial na mga bagay?

◻ Anong tolong kualidad an makatatabang sa mga Kristiano na maaraman kun ano an sasabihon asin kun ano an dai sasabihon?

[Mga retrato sa pahina 8, 9]

Naghahayag si Jehova nin mga hilom paagi sa saiyang Tataramon