Dukha Pero Mayaman—Paano Mangyayari Iyan?

Kaidtong mga siglo na an nakaagi an sarong madonong na tawo namibi na dai man logod sia magin dukha. Taano ta siring an hinagad? Huli ta natakot sia na an kadukhaan tibaad magin dahelan nin mga aktitud asin hiro na magsasapeligro kan saiyang relasyon sa Dios. Maririsa ini sa saiyang mga tataramon: “Ipakakan mo sa sakuya an kakanon na maninigo sa sako . . . tanganing dai ako magin dukha asin maghabon ako patin magduhagi sa ngaran kan sakuyang Dios.”—TALINHAGA 30:​8, 9.

BOOT sabihon daw kaini na an sarong dukha imposibleng makapaglingkod nin fiel sa Dios? Dai nanggad! Sa bilog na kasaysayan dai mabilang na mga lingkod ni Jehova Dios an nagpadanay nin integridad sa saiya sa ibong kan kasakitan na bunga nin kadukhaan. Si Jehova namomotan man an mga nagtitiwala sa saiya asin nagtatao nin probisyon sa sainda.

Mga Fiel kan Suanoy

Si apostol Pablo mismo nakaeksperyensia nin mga panahon nin pangangaipo. (2 Corinto 6:​3, 4) Ilinadawan man nia an sarong “dakulang panganoron” nin fiel na mga saksi kaidtong mga panahon bago kan mga Kristiano, na an nagkapira “naggurubing . . . nin anit nin karnero, nin anit nin kanding, mantang sinda nasa kadukhaan . . . Sinda naglagawlagaw sa mga desierto asin kabukidan asin mga lungib patin mga kueba kan daga.”​—Hebreo 11:​37, 38; 12:1.

Saro sa mga fiel na ini si propeta Elias. Durante nin tolo may kabangang taon na tigmara, si Jehova regular na nagtao sa saiya nin pagkakan. Enot, pinahahatodan nin Dios sa mga uwak nin tinapay asin karne an propeta. (1 Hade 17:​2-6) Kan huri, milagrosong pinahaloy ni Jehova an suplay nin harina asin lana na ipinansustento nin sarong balo ki Elias. (1 Hade 17:​8-​16) Simpleng marhay an pagkakan, alagad nakasustenir iyan sa buhay kan propeta, kan babae, asin kan aking lalaki kaini.

Sinustentohan man ni Jehova an fiel na propetang si Jeremias durante nin masakit na mga panahon sa pagbuhay. Nakaligtas si Jeremias sa pagsalikop kan Babilonya sa Jerusalem, kan an mga tawo kinaipuhan na ‘magkakan nin tinapay na tinimbang asin may hadit na pag-iingat.’ (Ezequiel 4:16) Sa kahurihurihi, naggrabeng marhay an gutom sa siudad kaya an nagkapirang babae kinakan an laman kan saindang sadiring mga aki. (Lamentacion 2:​20) Minsan ngani detenido si Jeremias huli sa saiyang daing takot na paghuhulit, sinierto ni Jehova na natatawan sia nin “sarong bilog na tinapay” aroaldaw “sagkod na naubos an gabos na tinapay sa siudad.”​—Jeremias 37:21.

Kaya kadikit an kakanon ni Jeremias, kapareho ni Elias. Dai sinasabi sa sato kan Kasuratan kun ano an kakanon o gurano kaparate nagkakan si Jeremias kan maubosan na nin tinapay an Jerusalem. Pero, aram ta na sinustentohan sia ni Jehova asin na nakaligtas sia sa teribleng panahon na idto nin gutom.

Ngonyan, igwa nin kadukhaan sa gabos na parte kan kinaban. Sono sa Naciones Unidas, an Aprika an may pinakadakol na dukha. An sabi nin sarong report sa media kan NU kan 1996: “Kisuerra kabanga kan gabos na Aprikano an nagtitios.” Apisar kan orog na nagigin masakit na mga kamugtakan sa ekonomiya, nagdadakol an mga Aprikano na nag-aaplikar sa buhay kan mga prinsipyo sa Biblia asin fiel na naglilingkod sa Dios, na kompiadong aatamanon nia sinda. Estudyare an nagkapirang halimbawa hale sa sarong parte kan satong purisaw na kinaban.

Pagdadanay na Onesto

Si Michael,a na taga-Nigeria, sarong paraoma na may sinusustentohan na anom na aki. “Masakit magin onesto kun mayo kang kuarta tanganing maataman an saimong pamilya,” an sabi nia. “Minsan siring, kun ako nasusugotan na magdaya, ipinagigirumdom ko sa sakong sadiri an Efeso 4:​28, na nagsasabi: ‘An parahabon dai na maghabon, kundi marahay pa na sia magpagal, na naggigibo nin marahay na gibo paagi sa saiyang mga kamot.’ Kaya kun may sugot sa sako, hinahapot ko an sakong sadiri, ‘Pinagpagalan ko daw an kuartang ini?’”

“Halimbawa,” sabi pa ni Michael, “mantang ako naglalakaw sarong aldaw, naheling ko an sarong bag na naholog sa sarong motorsiklo. Dai ko napapondo an siklista, kaya pinurot ko an bag asin naheling ko na iyan pano nin kuarta! Ginagamit an identipikasyon na nasa bag, nanompongan ko an kagsadiri asin iinuli ko sa saiya an bag.”

Paglaban sa Depresyon

An sarong lalaki sa Aprika del Norte nagkomento: “An kadukhaan [kapareho nin] pagkalaom sa sarong hararom na kalot, na naheheling an liwanag sa itaas asin an mga tawo na nag-aaragi, alagad mayo kan boses sa pagkurahaw para sa tabang o nin eskalera na masasakatan.” Bakong makangangalas na an kadukhaan parateng nagbubunga nin mga pakamate nin depresyon asin pagkasudya kan mawot! Pati an mga lingkod nin Dios tibaad maheling an mga kayamanan nin iba asin magpoon na mag-isip na an buhay na may integridad bakong kapakipakinabang. (Ikomparar an Salmo 73:​2-​13.) Paano daw madadaog an siring na mga pagmate?

Si Peter, sarong taga-Solnopan na Aprika, nagretiro pakalihis nin 19 taon sa serbisyo sa gobyerno. Sa ngonyan an pangenot na ikinabubuhay nia sadit na pension. “Sa mga panahon na pinanluluyahan ako nin boot,” sabi ni Peter, “ipinagigirumdom ko sa sakong sadiri an mga nabasa ko sa Biblia asin sa mga publikasyon kan Watch Tower Society. An daan na palakaw na ini mawawara na, asin may hinahalat kitang sarong mas marahay na palakaw.

“Siring man, hinohorophorop ko an 1 Pedro 5:​9, na nagsasabi: ‘Tumangon . . . nindo [si Satanas], na marigon sa pagtubod, sa pakaaram na an siring man na mga pagtios nangyayari sa bilog na kasararoan nin saindong mga tugang sa kinaban.’ Kaya bako sanang ako an nag-aagi nin mga kasakitan. An mga pagirumdom na ini nakatatabang sa sako na isikwal an mga kaisipan na nakapanluluya sa boot asin nagtatao nin makuring kamondoan.”

“Apuera kaiyan,” sabi pa ni Peter, “si Jesus naggibo nin dakol na milagro kan yaon digdi sa daga, pero dai nia ginibo an siisay man na mayaman sa materyal. Taano ta lalaoman ko sia na payamanon ako?”

An Puersa nin Pamibi

An pagrani ki Jehova Dios sa pamibi saro pang paagi na malabanan an negatibong kaisipan. Kan si Mary magin saro sa Mga Saksi ni Jehova kan 1960, binayaan sia kan saiyang pamilya. Daing agom asin ngonyan labi nang 50, sia maluya asin tikapo sa materyal. Minsan siring, sia maigot sa Kristianong ministeryo.

An sabi ni Mary: “Kun nanluluya an sakong boot, minadolok ako ki Jehova sa pamibi. Aram ko na dai nang orog na makatatabang sa sako kisa sa saiya. Nanodan ko na kun ika magtitiwala ki Jehova, tatabangan ka nia. Permi kong ginigirumdom an mga tataramon na ini ni Hadeng David, na yaon sa Salmo 37:25: ‘Ako dati hoben na lalaki, naggurang man ako, alagad ta dai ako nakaheling nin siisay man na matanos na lubos na pinabayaan, ni an saiyang mga aki na nakikilimos nin tinapay.’

“Naparirigon man an boot ko kan mga eksperyensia nin mas maedad nang espirituwal na mga tugang na lalaki asin babae na isinasaysay sa An Torrengbantayan. Tinabangan sinda ni Jehova Dios, kaya aram ko na padagos man nia akong tatabangan. Binebendisyonan nia an sakong sadit na trabahong pagtinda nin fufu [giniling na kamoteng-kahoy], asin nakukua ko an mga kaipuhan ko sa aroaldaw. Kun beses na mayo na akong kakurukuarta asin nag-iisip-isip kun ano an gigibohon, si Jehova may isinusugo na nagreregalo sa sako asin nagsasabi, ‘Tugang, kuana tabi ini.’ Dai pa noarin man nasudya an paglaom ko ki Jehova.”

An Halaga nin Pag-adal sa Biblia

Pinahahalagahan kan Mga Saksi ni Jehova an pag-adal sa Tataramon nin Dios, an Biblia, asin bakong puera an mga dukhang kabilang sa sainda. An 60 anyos na si John naglilingkod bilang payunir (bilog na panahon na parahulit kan Kahadean) asin ministeryal na lingkod sa kongregasyon. Nag-iistar sia sa sarong garo magagaba nang duwang eskalon na edipisyo na may 13 pamilya. An saiyang kuarto sarong kabtang kan pasilyo sa enot na eskalon, na linipodan nin playwud. Igwa dian nin duwang lumang tukawan asin sarong lamesa na pano nin dakol na pantabang sa pag-adal sa Biblia. Banig na ohot an higdaan nia.

Si John dati naggaganar nin mga sarong dolyar kada aldaw sa pagtinda nin tinapay, alagad kan ibawal an pag-importar nin trigo, nawara an hanapbuhay niang ini. Sabi nia: “Nasasakitan akong marhay kun minsan, alagad nagpapadagos ako sa pagpayunir. Si Jehova an nag-aataman sa sako. Ginigibo ko an maski anong trabaho na makua ko asin dai ako nagsasarig sa kiisay man na tawo na sustentohan o pakakanon ako, minsan ngani nagtatabang na marhay an mga tugang sa kongregasyon. Tinatabangan ninda akong makakua nin trabaho asin kun beses rineregalohan ninda ako nin kuarta.

“Tinatawan ko nin panahon an pagbasa kan Biblia asin mga publikasyon kan Watch Tower Society. Nag-aadal ako nin amay na aga na silensio pa sa harong asin nagbabasa ako pagkabanggi kun igwa kaming koryente. Aram ko na dapat akong magpadagos sa sakong personal na pag-adal.”

Pagpatood sa mga Aki Para sa Buhay

Si Daniel sarong balo na anom an aki. Kan 1985 nawara an trabaho na 25 taon niang kinapotan, alagad nakakua sia nin trabaho bilang tindero. “Masakit an pagbuhay kan pamilya,” an sabi nia. “An pagkakan mi ngonyan sarong beses na sana kada aldaw. Sarong beses, tolong aldaw na dai kami nagkakakan. Tubig sana an naiinom mi tanganing mabuhay.”

Si Daniel naglilingkod bilang magurang sa kongregasyon. “Dai ako noarin man nagpapalta sa Kristianong mga pagtiripon, asin nagmamasibot ako sa teokratikong mga asignasyon,” an sabi nia. “Basta may tatrabawohon sa Kingdom Hall, sinisierto ko na presente ako. Asin kun masakit an situwasyon, ipinagigirumdom ko sa sakong sadiri an mga tataramon ni Pedro ki Jesus, na nasusurat sa Juan 6:68: ‘Kagurangnan, siisay pa an samong dudumanan?’ Kun maontok ako sa paglilingkod ki Jehova, saen ako maduman? An mga tataramon ni Pablo na manonompongan ta sa Roma 8:​35-​39 nagtatao man sa sako nin determinasyon huli ta ipinaheheling kaiyan na mayo nin makabubulag sa sato sa pagkamoot nin Dios asin ni Cristo. Ini an kaisipan na idinodoon ko sa sakong mga aki. Dayaday na sinasabihan ko sinda na dapat na dai niamo noarin man pagbayaan si Jehova.” An kaigotan ni Daniel, kaiba an regular na pampamilyang pag-adal sa Biblia, nagkaigwa nin positibong impluwensia sa saiyang mga aki.

Espiritu nin Pagtao

Tibaad isipon nin saro na an mga grabe an kadukhaan dai nanggad makakokontribwir sa pinansial sa pagpalakop kan intereses kan Kahadean. Alagad bako iyan na totoo. (Ikomparar an Lucas 21:​1-4.) An nagkapirang Saksi sa Ghana na an pangenot na ikabubuhay pag-oma nganing may makakan sana itinatagama an sarong kabtang kan saindang daga tanganing gamiton sa pagpalakop kan intereses kan Kahadean nin Dios. Pakapabakalan kan ani sa parteng iyan kan saindang daga, an kuarta ginagamit para sana sa katuyohan na iyan, na kabale an pagdonar sa lokal na Kingdom Hall kan Mga Saksi ni Jehova.

Si Joan, na taga-Aprika Sentral, sarong payunir. Tanganing maasikaso an paralisadong agom asin apat na iba pang sinusustentohan, sia nagtitinda nin tinapay. Kan an kongregasyon na inaatenderan nia mangaipo nin mga bangko para sa Kingdom Hall, an pamilya ni Joan nagdesisyon na idonar an gabos na kuarta ninda. Daing natada sa sainda. Minsan siring, kan sunod na aldaw, may dai linalaoman na nagbayad nin haloyon nang utang, na nagtao sa sainda nin kuarta na dai na ninda linaoman pang mareresibi!

Maogma si Joan asin dai naghahadit nin labi-labi manongod sa kuarta. “Ipinaliliwanag ko ki Jehova an sakong situwasyon paagi sa pamibi, dangan minaluwas ako sa ministeryo sa langtad. Aram mi na daing gayo nin malalaoman na mas marahay na mga panahon sa palakaw na ini nin mga bagay. Pero, narerealisar mi na itatao ni Jehova an samong mga pangangaipo.”

Pagpaheling nin Kahigosan

An Mga Saksi ni Jehova mamimidbid sa saindang pagkamoot sa kada saro. (Juan 13:35) An mga may kuarta tinatabangan an saindang mga kapwa Kristiano na nangangaipo. Parate na ini bilang regalo asin kun beses bilang tabang na makalaog sa trabaho.

Si Mark, na taga-Congo, may lepra. Pinudpod kaiyan an saiyang mga moro sa bitis asin kamot. Kun siring, tanganing makalakaw nagsasaklay sia. Kan magdesisyon si Mark na maglingkod ki Jehova, pinonan niang gumibo nin dakulang mga pagbabago sa saiyang buhay. Imbes na makilimos tanganing may makakan arog kan dati niang ginigibo, pinonan niang magtanom nin sadiring makakakan. Naggibo man sia nin mga adobe, na ipinapabakal nia.

Sa ibong kan saiyang kabyadian sa pisikal, si Mark nagpadagos sa mahigos na pagtrabaho. Pag-abot nin panahon nakabakal sia nin daga asin tinogdokan nia iyan nin simple sanang harong. Ngonyan, si Mark naglilingkod bilang magurang sa kongregasyon asin iginagalang na marhay sa iniistaran niang banwaan. Nagtatabang sia ngonyan sa ibang mga nangangaipo.

Siempre, sa dakol na lugar haros imposibleng makakua nin trabaho. An sarong Kristianong magurang sa kongregasyon na naglilingkod sa saro sa mga sangang opisina kan Watch Tower Society sa Aprika Sentral nagsurat: “Dakol na tugang digdi an mayo nin trabaho. Pinoprobaran kan iba na mag-establisar nin sadiring trabaho, alagad masakit ini. Dakol an nangangatanosan na mantang magtitios man sana sinda ano man an gibohon ninda, isasakripisyo ninda an materyal na mga bentaha bilang payunir na mga ministro. Sa paggibo kaiyan, nadiskobre nin dakol na mas abunda an bendisyon sa sainda kisa kun may trabaho sinda na kadikit o mayo nin sueldo.”

Inaataman ni Jehova an Saiyang Banwaan

Si Jesu-Cristo nagsabi dapit sa saiyang sadiri: “An mga amid igwa nin mga lungib asin an mga gamgam nin langit igwa nin mga hapunan, alagad an Aki nin tawo mayo man lamang nin mahihigdaan.” (Lucas 9:58) Kaagid kaiyan, si apostol Pablo nagsurat: “Sagkod sa mismong oras na ini padagos kaming nagugutom saka napapaha asin kulang nin gubing asin napagsususuntok patin daing harong.”​—1 Corinto 4:11.

Si Jesus asin Pablo pareho ginustong mamuhay na limitado an pagbuhay tanganing mas lubos nindang magibo an saindang ministeryo. An dakol na Kristiano sa presenteng panahon dukha huli ta dai sindang ibang magigibo. Minsan siring, iinaaplikar ninda sa buhay an mga prinsipyo sa Biblia asin maigot na naghihingoang maglingkod sa Dios. Aram ninda na namomotan sindang marhay ni Jehova mantang naeeksperyensiahan ninda an pagigin totoo kan garantiya ni Jesus: “Kun siring, padagos na hanapon nguna an kahadean asin an saiyang katanosan, asin ini gabos na ibang [materyal na bagay] idadagdag na sana sa saindo.” (Mateo 6:​25-33) Saro pa, an dukhang mga lingkod na ini nin Dios igwa nin ebidensia na “an bendisyon ni Jehova​—iyan an nakapayayaman.”​—Talinhaga 10:22.

[Nota sa Ibaba]

[Kahon sa pahina 6]

Sairisay an “mga Paragibo kan Tataramon”?

SUSOG sa sarong surbey nin Gallup kan 1994, an 96 porsiento kan mga Amerikano “nagtutubod sa Dios o sa sarong unibersal na espiritu.” Igwa man nin “mas dakol na simbahan kada sarong tawo sa Estados Unidos kisa sa arin man na iba pang nasyon digdi sa Daga,” sabi kan U.S.News & World Report. Sa ibong kan siring na panluwas na mga itsura nin kabanalan, an beteranong parasurbey na si George Gallup, Jr., nagsasabi: “An makosog na katotoohan iyo na, an kadaklan na Amerikano dai nakaaaram kun ano an saindang tinutubod o kun taano.”

Ipinaheheling man nin estadistika na igwa nin dakulang kalaenan sa pag-oltanan kan relihiosong mga kombiksion kan dakol na tawo asin kan saindang mga ginigibo. Halimbawa, “naririsa nin mga sosyologo na an nagkapira sa mga lugar sa nasyon na pinakadakol an krimen iyo man an mga lugar na pinakamakosog an relihiosong paniniwala asin gibo,” an sabi kan parasurat na si Jeffery Sheler.

Dai ini maninigong ipagngalas. Taano? Huling kaidto pang enot na siglo, an apostol na si Pablo nagpatanid sa mga kapwa Kristiano na mag-ingat sa mga “nagpapahayag sa publiko na midbid ninda an Dios, alagad ta . . . nagpapainda sa saiya paagi sa saindang mga gibo.” (Tito 1:​16) Apuera kaiyan, sinabihan ni Pablo an hoben na si Timoteo na sa “huring mga aldaw” magkakaigwa nin mga tawo “na may porma nin diosnon na debosyon alagad nagpapainda sa kapangyarihan kaiyan.”​—2 Timoteo 3:​1, 5.

Minsan siring, ginigibo kan tunay na mga Kristiano an bilog na makakaya ninda na sunodon an pagboot ni Jesus na ‘paduman asin gumibo nin mga disipulo sa mga tawo kan gabos na nasyon.’ (Mateo 28:19) Sa paaging ini sinda ‘nagigin mga paragibo kan tataramon, asin bakong mga paradangog sana.’​—Santiago 1:​22.

[Retrato sa pahina 7]

An pag-adal sa Biblia pinahahalagahan nin mga tawo sa bilog na kinaban