Pagtaros sa Puso Paagi sa Abilidad na Pangongombensir

AN DAKOL na tawo pinagsususpetsahan an tataramon na “pangongombensir.” Puedeng isuherir kaiyan sa isip nin saro an sarong sobra kaagresibong ahente o anunsio na dinisenyo tangani na dayaon o hinohinoon an konsumidor. Dawa sa Biblia, an ideyang pangongombensir kun beses may negatibong mga kahulogan, na nagpaparisa nin pandadanyar o panlalagalag. Halimbawa, an Kristianong si apostol Pablo nagsurat sa mga taga-Galacia: “Kamo kaidto nagdadalagan nin marahay. Siisay an nag-olang sa saindo sa padagos na pagkuyog kan katotoohan? An pangongombensir na ini bakong hale sa Saro na nag-apod sa saindo.” (Galacia 5:​7, 8) Pinatanidan man ni Pablo an mga taga-Colosas tumang sa pagtogot sa siisay man na ‘dayaon sinda paagi sa nakakokombensir na mga pangangatanosan.’ (Colosas 2:4) An siring na pangongombensir depende sa madonong na mga argumento na basado sa falsong mga pundasyon.

Minsan siring, sa saiyang ikaduwang surat ki Timoteo, ginamit ni apostol Pablo an ideyang pangongombensir sa laen na kahulogan. Sia nagsurat: “Magpadagos sa mga bagay na saimong nanodan asin nakombensir na paniwalaan, mantang aram mo kun kiisay mo iyan nanodan.” (2 Timoteo 3:14) Sa pagigin ‘nakombensir na maniwala,’ si Timoteo dai hininohino kan saiyang ina asin kan saiyang lola, na sa sainda nanodan nia an Makakasuratan na mga katotoohan.​—2 Timoteo 1:5.a

Mantang nakabilanggo sa sadiring harong sa Roma, si Pablo lubos na nagpatotoo sa dakol, na ‘nangongombensir sa sainda manongod ki Jesus hale sa ley ni Moises asin sa Mga Propeta, magpoon aga sagkod sa banggi.’ (Gibo 28:23) Dinadaya daw ni Pablo an mga nagdadangog sa saiya? Dai nanggad! Kun siring, malinaw na an pangongombensir bakong pirmeng sala.

Ginagamit sa positibong sentido, an pinakagamot na termino sa Griego na trinadusir na “kombensiron” nangangahulogan na patubodon, liwaton an isip paagi sa marahay, lohikong pangangatanosan. Sa siring an sarong paratokdo makapaglalaag nin Makakasuratan na pundasyon, na ginagamit an pangongombensir sa pagtadom sa iba nin kombiksion manongod sa katotoohan sa Biblia. (2 Timoteo 2:15) Sa katunayan, ini an nagin midbidan kan ministeryo ni Pablo. Maski si Demetrio na platero, na ibinibilang na falso an Kristianong mga katokdoan, nagsabi: “Bako sanang sa Efeso kundi sa haros bilog na distrito nin Asia an Pablong ini nakakombensir nin dakulang kadaklan asin dinara sinda sa ibang opinyon, na sinasabi na an mga ginibo nin kamot bakong mga dios.”​—Gibo 19:26.

Pangongombensir sa Ministeryo

Si Jesu-Cristo tinawan nin instruksion an saiyang mga parasunod: “Kun siring paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo. Asin, uya! ako danay na nasa saindo sagkod sa pagtatapos kan palakaw nin mga bagay.” (Mateo 28:​19, 20) Sa labing 230 nasyon, kinukuyog kan Mga Saksi ni Jehova an pagboot na ini. Kada bulan durante kan saindang 1997 taon nin paglilingkod, sinda nagkondukta nin promedyong 4,552,589 pag-adal sa Biblia sa harong sa bilog na kinaban.

Kun may pribilehio kamong magkondukta nin pag-adal sa Biblia sa harong, puede nindong antisiparon an mga angat na magkakaipong gamitan nin abilidad na pangongombensir. Halimbawa, ipamugtak na sa saindong masunod na sesyon nin pag-adal, maglataw an sarong hapot mapadapit sa Trinidad. Kumusta kun aram nindong naniniwala an saindong estudyante sa doktrinang ini? Puede nindong tawan sia nin sarong publikasyon na nagpapaliwanag kan temang iyan. Pakabasa nia kaiyan, tibaad manompongan nindo na nakombensir na sia na an Dios asin si Jesus bakong pareho. Alagad kun may nagkapira pang hapot, paano kamo makapadadagos?

Maghinanyog nin maingat. Tatabangan kamo kaini na maaraman kun ano an dati nang paniniwala kan saindong estudyante dapit sa sarong tema. Halimbawa, kun magsabi an saindong estudyante, “Naniniwala ako sa Trinidad,” puede nindong ponan tolos an sarong paliwanag sa Kasuratan tangani na pahimutikan an doktrinang ini. Alagad may laen-laen na paniniwala mapadapit sa Trinidad. Tibaad an saindong estudyante iba man na marhay an paniniwala kisa sa itatao nindong kahulogan kan doktrina nin Trinidad. Masasabi man iyan manongod sa iba pang mga paniniwala, siring baga kan reenkarnasyon, inmortalidad kan kalag, asin kaligtasan. Kaya maghinanyog nin maingat bago magtaram. Dai mag-asumir dapit sa paniniwala kan estudyante.​—Talinhaga 18:13.

Maghapot. Puedeng kaiba digdi an: ‘Haloy na daw kamong naniniwala sa Trinidad? Maingat na daw nindong pinag-adalan an sinasabi kan Biblia manongod sa temang ini? Kun an Dios kabtang nin sarong trinidad, dai daw iyan malinaw asin direktang sasabihon sa sato kan saiyang Tataramon, an Biblia?’ Sa pagtokdo sa estudyante, paminsanminsan pumondo tanganing ihapot an siring kaini: ‘An pinag-olayan daw niato sagkod ngonyan rasonable para sa saindo?’ ‘Minaoyon daw kamo sa paliwanag na ini?’ Paagi sa saindong ekspertong paggamit nin mga hapot, iiniiba nindo an estudyante sa proseso nin pakanood. Maninigo na dai sana sia naghihinanyog sa saindo na nagpapaliwanag nin detalyado manongod sa sarong tema.

Gumamit nin marahay na pangangatanosan. Halimbawa, sa pagpaliwanag kan doktrina nin Trinidad, puede nindong sabihon sa saindong estudyante: ‘Kan bautismohan si Jesus, may tingog na naghale sa langit, na nagsasabi: “Ika an sakuyang Aki, an namomotan.” Kun an Dios totoong nasa daga na binabautismohan, paaaboton pa daw nia an saiyang tingog sagkod sa langit asin pababalikon iyan tangani na an mga tataramon na iyan madangog digdi sa daga? Bako daw na iyan nakadadaya? An Dios daw “na dai makakapagputik,” magibo nin siring kamapandayang bagay?’​—Lucas 3:​21, 22; Tito 1:​1, 2.

An marahay na pangangatanosan na iinatubang sa mataktikang paagi parateng epektibo nanggad. Konsiderara an halimbawa nin sarong babae na aapodon niatong Barbara. Sa bilog niang buhay, naniwala sia na si Jesus Dios asin kabtang nin sarong trinidad na kaiba an banal na espiritu. Alagad ta kan panahon na idto saro sa Mga Saksi ni Jehova an nagsabi sa saiya na an Dios asin si Jesus duwang magkalaen na indibiduwal, asin ipinaheling kaini sa saiya an mga teksto na masuportar sa mga tataramon nia.b Dai mapahihimutikan ni Barbara an Biblia. Kadungan kaiyan, sia desganado. Mahal pa man giraray nia sa saiyang puso an doktrina nin Trinidad.

An Saksi mapasensiang nangatanosan ki Barbara. “Kun hinihingoa nindong itokdo sa sako na magkapantay an duwang tawo,” an hapot nia, “anong relasyon sa pamilya an gagamiton nindo tanganing iilustrar iyan?” Nag-isip sia nin kadikit dangan nagsimbag: “Puede kong gamiton an magtugang na lalaki.” “Tama,” an simbag kan Saksi. “Tibaad kambal na magkalalauogon pa ngani. Alagad sa pagtokdo sa sato na mansayon an Dios bilang an Ama asin sia mismo bilang an Aki, anong mensahe an ipinaaabot ni Jesus?” “Nasabotan ko na,” an simbag ni Barbara, na napapabuklat an saiyang mga mata. “Ilinaladawan nia an saro bilang mas may edad asin igwa nin mas dakol na autoridad.”

“Iyo,” an simbag kan Saksi, “asin an mga nagdadangog na Judio ki Jesus, na nag-iistar sa sarong sosyedad nin mga patriarka, espesyalmenteng nakaabot sa konklusyon na iyan.” Sa pagdoon kan saiyang punto, nagkonklusyon an Saksi: “Kun nagin angay an ilustrasyon niatong iyan tanganing itokdo an pagkakapantay​—kan magtugang na lalaki o kambal pa ngani—​siertong si Jesus, an Dakulang Paratokdo, ginibo man iyan. Imbes, ginamit nia an mga terminong ‘ama’ asin ‘aki’ tangani na iladawan an relasyon nia asin nin Dios.”

Sa katapustapusi nasabotan ni Barbara an punto, asin inako nia iyan. Nataros an saiyang puso paagi sa abilidad na pangongombensir.

Pag-atubang sa mga Emosyon

An marigonon an pundasyon na relihiosong mga paniniwala parateng kalabot an emosyonal na aspekto. Isip-isipa an situwasyon ni Edna, sarong debotong Katoliko. An saiyang tinedyer na mga makoapong lalaki iinatubang sa saiya paagi sa malinaw na prueba sa Kasuratan na an Dios asin si Jesus bakong sasarong persona. Nasabotan ni Edna an nadangog nia. Minsan siring, maboot alagad marigon niang sinabi: “Naniniwala ako sa banal na Trinidad.”

Tibaad nagkaigwa na kamo nin kaagid na eksperyensia. An dakol minamansay an mga doktrina kan saindang relihion na garo baga kabtang ini kan sainda mismong karakter. Tangani na makombensir an siring na mga estudyante sa Biblia, orog pa an kaipuhan kisa sa indiperenteng pangangatanosan o sunod-sunod na mga teksto pa ngani na pinatutunayan na sala an punto de vista kan sarong iyan. Mareresolberan nanggad an siring na mga situwasyon kun an abilidad na pangongombensir titimbangan nin pakikidamay. (Ikomparar an Roma 12:​15; Colosas 3:12.) Totoo, an sarong epektibong paratokdo maninigong igwa nin makosog na mga kombiksion. Halimbawa, naggamit si Pablo nin mga tataramon na siring kan “ako kombensido” asin “ako nakakaaram asin nakokombensir sa Kagurangnan na Jesus.” (Roma 8:​38; 14:14) Minsan siring, sa pagpahayag kan satong mga kombiksion, dai kita maninigong magkaigwa nin dogmatiko, nagpapakangmatanos sa sadiring estilo, ni na maninigo kitang magin mapagtuya o mapagmenus sa pag-atubang kan mga katotoohan sa Biblia. Siertong habo niatong maanggot o mainsulto pa ngani an estudyante.​—Talinhaga 12:18.

Orog pang epektibo na igalang an mga paniniwala kan estudyante asin rekonoseron an saiyang diretso na magkaigwa kaiyan. Kapakumbabaan an liabe. An paratokdo na may kababaan nin boot dai nakamamate na sia talagang nakalalabi sa saiyang estudyante. (Lucas 18:​9-​14; Filipos 2:​3, 4) Kabale sa diosnon na pangongombensir an kapakumbabaan na garo man sana nagsasabi: ‘May pagkaherak na tinabangan ako ni Jehova na masabotan ini. Togotan nindo akong ihiras iyan sa saindo.’

Sa saiyang mga kapwa Kristiano sa Corinto, nagsurat si Pablo: “An mga hamo kan samong pakikilaban bakong sa laman, kundi makapangyarihan paagi sa Dios sa pagtumba sa mga bagay na marigonon an pundasyon. Huli ta itinutumba niamo an mga pangangatanosan asin lambang halangkaw na bagay na pinatitindog tumang sa kaaraman nin Dios; asin dinadara niamo an lambang kaisipan sa pagkabihag tanganing iyan magin makinuyog ki Cristo.” (2 Corinto 10:​4, 5) Ngonyan, ginagamit kan Mga Saksi ni Jehova an Tataramon nin Dios tangani na itumba an marigonon an pundasyon na falsong mga doktrina siring man an hararom nang nakagamot na mga kaugalean asin karakteristiko na ikinaaanggot nia. (1 Corinto 6:​9-​11) Sa paggibo kaini, ginigirumdom kan mga Saksi na si Jehova haloy nang mamomoton na nagpapasensia sa sainda. Kanigoan an kaogmahan ninda na magkaigwa kan saiyang Tataramon, an Biblia, asin na gamiton an mapuersang kasangkapan na ini sa paggabot sa falsong mga katokdoan asin pagtaros sa puso paagi sa abilidad na pangongombensir!

[Mga nota sa ibaba]

[Kahon sa pahina 23]

Pagtaros sa Puso kan Saindong Estudyante

◻ Mamibi na logod giyahan ni Jehova sa pagtaros sa puso kan estudyante sa Biblia.​—Nehemias 2:​4, 5; Isaias 50:4.

◻ Mansayon kun ano an pinaniniwalaan kan estudyante asin kun taano ta naaakit sia sa falsong paniniwala.​—Gibo 17:​22, 23.

◻ Sa maboot, mapasensiang paagi, magkaigwa nin lohiko, Makakasuratan na argumento mantang pinagdadanay na igwa nin puntong mapagkakaoyonan.​—Gibo 17:​24-​34.

◻ Kun posible, pasarigon an mga katotoohan sa Biblia paagi sa epektibong mga ilustrasyon.​—Marcos 4:​33, 34.

◻ Ipaheling sa estudyante an mga pakinabang sa pag-ako nin tamang kaaraman hale sa Biblia.​—1 Timoteo 2:​3, 4; 2 Timoteo 3:​14, 15.