‘Ginibo Niamo an Dapat Niamong Gibohon’

ISINAYSAY NI GEORGE COUCH

Pagkatapos Kan Aga Mi Sa Ministeryong Pagharongharong, Ilinuwas Kan Kaiba Ko An Duwang Sanwits. Pagkakakan Mi, Hinulbot Ko An Sarong Sigarilyo. “Gurano Ka Na Kahaloy Na Nasa Katotoohan?” An Hapot Nia. “Kasubanggi An Kaenot-enote Kong Pagtiripon Na Naatenderan,” Sabi Ko Sa Saiya.

NAMUNDAG ako kan Marso 3, 1917, sa sarong oma mga 50 kilometros sa sirangan nin Pittsburgh, Pennsylvania, E.U.A., harani sa sadit na banwaan nin Avonmore. Duman pinadakula kan sakong mga magurang an sakong apat na tugang na lalaki, sarong tugang na babae, asin ako.

Daing gayo kami pinatood sa relihion. Kaidto nagsisimba an mga magurang ko, alagad nagpondo sinda sa pag-atender kan kaming mga aki saradit pa. Pero nagtutubod kami sa Kaglalang, asin an samong buhay pampamilya nagsusunod sa pundamental na mga prinsipyo na yaon sa Biblia.

An pinakamarahay na pagpatood na inako ko sa sakong mga magurang mapadapit sa paninimbagan​—kun paano iyan aakoon asin ootobon. Iyan an kalabot sa buhay sa oma. Alagad bako man na gabos trabaho an buhay niamo. Igwa kami nin nakararahay na pag-aling-aling, arog baga kan pagkawat nin basketbol saka beisbol, pangangabayo, asin paglangoylangoy. Kadikit an kuarta kan mga panahon na idto, pero nakaoogma an buhay sa oma. Nag-eskuela kami sa sasaro an kuartong eskuelahan kan nasa elementarya asin nag-eskuela sa banwaan kaidtong samong mga taon sa haiskul.

Sarong banggi naglalakawlakaw ako sa banwaan kaiba an saro kong katood. May magayon na daragita na nagluwas sa saiyang harong tanganing kumustahon an sakong katood. Ipinamidbid nia ako ki Eroeng Prugh. Tamang-tama, sia nag-iistar sa bloke na namumugtakan kan haiskul. Parate na kun minaagi ako sa harong nia, si Fern nasa luwas na may ginigibo. Malinaw na sia mahigos, na ikinagulat ko. Tinuboan kami nin dayupot na pagkakatood saka pagkaminootan asin nagpakasal kan Abril nin 1936.

Pakadangog kan Katotoohan sa Biblia

Bago ako namundag, may gurang na babae na minaltrato kan mga taga banwaan huli sa saiyang relihion. Sinosongko sia kan sakong ina kun Sabado kun pasiring sia sa banwaan sa pananaod. Linilinigan ni Nanay an saiyang harong asin tinatabangan sia sa mga lakaw, na ginigibo iyan sagkod na nagadan an babae. Nagtutubod ako na binendisyonan ni Jehova si Nanay ta mabooton sia sa babaeng ini, na sarong Estudyante sa Biblia, na apod kaidto sa Mga Saksi ni Jehova.

Pagkatapos kaidto, biglang nagadan an hoben pang aking babae kan sakong inaon. An iglesia daing gayo nin ikinataong karangahan sa sakong inaon, alagad an sarong kataed na Estudyante sa Biblia igwa. Ipinaliwanag sa saiya kan Estudyante sa Biblia kun ano an nangyayari kun an tawo magadan. (Job 14:​13-​15; Eclesiastes 9:​5, 10) Ini nagin gikanan nin dakulaon na karangahan. An inaon ko man kinaolay si Nanay manongod sa paglaom na pagkabuhay liwat. Ini nakapukaw sa interes ni Nanay, ta nagadan an saiyang mga magurang kan aki pa sia asin gusto niang marhay na maaraman kun ano an nangyayari sa tawo kun magadan. Ikinatudok sa isip ko kan eksperyensiang iyan an halaga nin pirmeng pag-aprobetsar sa mga oportunidad na magpatotoo sa impormal na paagi.

Kan mga taon nin 1930, nagpoon si Nanay na maghinanyog sa mga brodkast sa radyo kun Domingong aga ni Joseph F. Rutherford, an presidente kaidto kan Watch Tower Bible and Tract Society. Kan mga taon na idto, pinonan man kan mga Saksi an pagharongharong sa lugar mi. Ipinupuesto ninda an sarong aroalsang ponograpo sa natad sa sirong nin malimpoy na kahoy asin pinatotokar an isinaplakang mga sermon ni Tugang na Rutherford. An mga isinaplakang idto asin an mga magasin na An Torrengbantayan saka Golden Age (ngonyan Awake!) nagpadanay na buhay sa interes ni Nanay.

Pakalihis nin pirang taon, kan 1938, may ipinadarang postkard sa mga suskritor sa Torrengbantayan na iniimbitaran sinda sa sarong espesyal na pagtiripon sa sarong pribadong harong mga 25 kilometros an rayo. Gusto ni Nanay na umatender, kaya inibanan niamo sia ni Fern saka kan duwa kong tugang na lalaki. Si John Booth asin Charles Hessler, nagbibiaheng mga paraataman kan Mga Saksi ni Jehova, nagpahayag sa samo na mga sarong dosena. Pagkatapos, pinonan nindang organisaron an sarong grupo na makikabtang sa ministeryo pagkaaga. Mayo nin nagboluntaryo na umiba sa sainda, kaya napili ako ni Tugang na Hessler asin hinapot, “Taano ta dai ka mag-iba samo?” Dai ko aram nin eksakto kun ano an gigibohon ninda, alagad mayo akong maisip na dahelan na dai ko sinda tabangan.

Nagharongharong kami sagkod sa odto, dangan ilinuwas ni Tugang na Hessler an duwang sanwits. Nagtukaw kami sa hagyan kan simbahan asin nagpoon na magkakan. Pakahulbota ko kan sigarilyo na naaraman ni Tugang na Hessler na sasaro pa sanang pagtiripon an naatenderan ko. Nakipamanggi sia samo kan mismong bangging idto asin pinaimbitaran samo an samong kataraed para sa orolay sa Biblia. Pakapamanggi, nakipag-adal sia samo sa Biblia asin nagdiskurso sa grupo nin mga sampulo na nag-abot. Sinabihan nia kami na maninigo kaming mag-adal sa Biblia serosemana. Minsan ngani dai nag-oyon digdi an samong kataraed, kami ni Fern nag-areglo na magkaigwa nin semanal na pag-adal sa Biblia sa harong.

Pag-oswag sa Katotoohan

Dai nahaloy pagkatapos, kami ni Fern nagluwas sa ministeryo sa langtad. Yaon kami sa likod na tukawan kan kotse, asin bago pa sana kaming sumolo nin sigarilyo kan salingoyon kami kan tugang ko asin sabihon: “Naaraman ko pa sana na an mga Saksi dai naninigarilyo.” Tolos-tolos, itinapok ni Fern sa bintana an saiyang sigarilyo​—tinapos ko an sako. Dawa ngani nasiraman kami sa paninigarilyo, nungka pa kaming kuminapot nin sigarilyo.

Pagkatapos kan samong bautismo kan 1940, kami ni Fern yaon sa sarong pagtiripon na duman pinag-adalan niamo an sarong artikulo na nag-eenkaminar nin pagpayunir, na apod sa bilog na panahon na paghuhulit. Kan papuli na kami, an sarong tugang naghapot: “Taano ta dai kamo magpayunir ni Fern? Mayo man nin nakaoolang sa saindo.” Mayo kami nin ikakontra sa saiya, kaya nagpresentar kami. Nagtao ako nin 30 aldaw na abiso sa sakong pinagtatrabawohan, asin ginibo niamo an mga areglo na magpayunir.

Nagkonsulta kami sa Watch Tower Society manongod sa kun saen kami maninigong maglingkod, dangan nagbalyo kami sa Baltimore, Maryland. Duman may minamantener na harong para sa mga payunir, asin an bayad sa pagkasera $10 sarong bulan. May nadamot kami na sa paghona mi magkakaigo na sa samo sagkod sa Armagedon. (Kapahayagan 16:​14, 16) Total, pirme niamong iniisip na haranihon na an Armagedon. Kaya kan pumoon kaming magpayunir, binayaan mi an samong harong asin pinondo an gabos na ibang bagay.

Nagpayunir kami sa Baltimore poon 1942 sagkod 1947. Grabe an pagtumang sa gibohon kan Mga Saksi ni Jehova kan mga taon na idto. Imbes na darahon an kotse mi sa harong kan samong mga inaadalan sa Biblia, kun beses nagpapahatod kami. Sa siring dai malalaslas an goma kan samong kotse. Mayo nin gusto sa siring na pagtumang, alagad masasabi ko na ikinaoogma niamo kaidto an ministeryo sa langtad sa gabos na panahon. Sa katunayan, inaantisipar niamo kaidto an kadikit na pampagana nin boot sa paggibo kan gibohon kan Kagurangnan.

Dai nahaloy nagasto mi na an gabos na kuartang nadamot mi. Naluma an mga goma kan samong kotse, asin iyo man an samong mga gubing saka sapatos. Nagkahelang kami nin duwa o tolong beses sa haralawig na panahon. Depisil an pagpadagos, alagad nungka niamong inisip na pumondo. Nungka mi ngani iyan na pinag-olayan. Nag-ekonomiya kami sa ibang bagay sa buhay tangani na makapagdanay kami sa pagpapayunir.

Mga Pagkaliwat nin Asignasyon

Kan 1947 nagduman kami sa kombension sa Los Angeles, California. Mantang yaon duman, an tugang kong si William asin ako tinawan nin tigsarong surat na nag-asignar sa samo sa gibohon na nagbibiahe tanganing sumongko saka tumabang sa mga kongregasyon. Dai kami tinawan nin ano man na espesyal na pagpatood para sa gibohon na iyan kaidto. Basta na sana kami naglarga. Durante kan suminunod na pitong taon, kami ni Fern naglingkod sa Ohio, Michigan, Indiana, Illinois, asin Nueva York. Kan 1954 inimbitaran kaming umatender sa ika-24 klase kan Gilead, sarong paadalan para sa pagpatood sa mga misyonero. Mantang yaon duman, si Fern nagkapolio. Marahay sana ta naomayan sia asin iinasignar kami sa gibohon na nagbibiahe sa Nueva York asin Connecticut.

Kan kami naglilingkod sa Stamford, Connecticut, inagda kami ni Nathan H. Knorr, an presidente kaidto kan Watch Tower Society, na magpalipas kan katapusan kan semana kaiba nia asin kan agom nia, si Audrey. Inandaman ninda kami nin masiram na pamanggihan na bistik na kompleto sa kakombinasyon. Nakamidbid mi na sinda kaidto, asin igo na an pagkamidbid ko ki Tugang na Knorr tanganing marealisar na may iba siang nasa isip apuera sa samong asosasyon asin pamanggihan. Sa huri kan bangging idto hinapot nia ako, “Magustohan daw nindo na lumaog sa Bethel?”

“Dai ko segurado; dai kong gayo aram an buhay sa Bethel,” an simbag ko.

Pakapag-isip-isipa kaini sa laog nin pirang semana, sinabi mi ki Tugang na Knorr na malaog kami kun gusto nia. Kan sumunod na semana, nakaresibi kami nin surat na magreport sa Bethel kan Abril 27, 1957, an ika-21 anibersaryo kan samong kasal.

Kan enot na aldaw na idto sa Bethel, tinawan ako ni Tugang na Knorr nin malinaw na instruksion sa kun ano an linalaoman. Sabi nia sako: “Bako ka nang lingkod sa sirkito; uya ka digdi tanganing magtrabaho sa Bethel. Ini an pinakaimportanteng trabaho na kaipuhan mong gibohon, asin gusto mi na gamiton mo an saimong panahon saka kosog sa pag-aplikar kan pagpatood na aakoon mo digdi sa Bethel. Gusto ming magdanay ka.”

Makahulogan an Buhay sa Bethel

An enot kong asignasyon sa mga Departamento nin Magasin asin Pagpadara sa Koreo. Sa huri, pakalihis nin mga tolong taon, pinatogonan ako ni Tugang na Knorr na magduman sa opisina nia. Sinabi nia kaidto sako na an tunay na dahelan na ako pinalaog sa Bethel tanganing magtrabaho sa erokan. Diretsong marhay an saiyang instruksion, “Uya ka digdi tanganing pamahalaan an Erokan na Bethel.”

An pamamahala sa Erokan na Bethel nagpagirumdom sa sako kan mga leksion na itinokdo sa sako kan sakong mga magurang kan ako nagdadakula sa oma. An Erokan na Bethel parehong-pareho sa normal na pamilya. May mga gubing na lalabhan, pagkakan na lulutoon, kinakanan na huhugasan, kamang aareglaron, asin iba pa. An organisasyon sa erokan hinihingoa na gibohon an Bethel na komportableng istaran, saro na maaapod nin saro na saiyang istada.

Naniniwala ako na dakol na leksion an manonodan nin mga pamilya sa paagi nin pagpunsionar kan Bethel. Nagmamata kami nin amay sa aga asin pinoponan an samong aldaw na may pagkaespirituwal paagi sa pag-estudyar sa pan-aroaldaw na teksto sa Biblia. Linalaoman kaming magmahigos asin mamuhay nin timbang alagad masibot. An Bethel bakong arog sa monasteryo, arog kan tibaad paghona nin nagkapira. Dakol an nahahaman mi huli sa samong nakaiskedyul na pamumuhay. Dakol an nagsabi na an pagpatood na inako ninda digdi sa huri nakatabang sa sainda na mag-ako nin mga paninimbagan sa saindang pamilya asin sa Kristianong kongregasyon.

An hoben na mga lalaki asin babae na minalaog sa Bethel tibaad iasignar na maglinig, maglaba, o magtrabaho sa pabrika. Tibaad pinapaniniwala kita kan kinaban na an siring na pisikal na trabaho nakakapamenus asin dai bagay sato. Pero, nasasabotan kan mga hoben sa Bethel na an siring na mga asignasyon sa trabaho kaipuhan tangani na an samong pamilya magpunsionar nin tama asin maogma.

Tibaad pinalalakop man kan kinaban an ideya na kaipuhan nindo nin katongdan asin prestihio tangani na magin talagang maogma. Sala iyan. Kun ginigibo niato an ipinagigibo sa sato, ‘ginigibo niato an dapat niatong gibohon,’ asin inaako niato an bendisyon ni Jehova. (Lucas 17:10) Magkakaigwa sana kita nin tunay na pagkakontento asin kaogmahan kun gigirumdomon niato an katuyohan kan satong trabaho​—otobon an kabotan ni Jehova asin paoswagon an intereses kan Kahadean. Kun iyan isasaisip niato, an arin man na asignasyon puedeng magin nakagagayagaya asin nakakokontento.

Pribilehiadong Kabtang sa Pagpahiwas

Sa kombension kan 1942 sa Cleveland, Ohio, labing sarong dekada bago kami naglaog sa Bethel, si Tugang na Knorr nagtao kan pahayag na “Peace​—Can It Last?” (sa Bicol, “Katoninongan​—Makapagpapadagos daw Iyan?”) Liniwanag nia na an Guerra Mundial II, na nangyayari kaidto, matatapos asin na magkakaigwa nin panahon nin katoninongan na matao nin oportunidad para sa mas mahiwas na kampanya nin paghuhulit. Inestablisar kan 1943 an Paadalan nin Gilead sa pagpatood sa mga misyonero asin an Teokratikong Paadalan sa Pagmiministro sa pagpaoswag sa abilidad kan mga tugang sa pagpahayag sa publiko. Inorganisar man an darakulang kombension. Nangorognang prominente kaidtong mga taon nin 1950 an mga kombension sa Yankee Stadium, Nueva York. May koneksion sa mga kombension duman kan 1950 asin 1953, nagkaoportunidad ako na tumabang sa pag-areglo para sa dakulaon na Siudad nin mga Harong na de Rueda na dinagosan nin manampulong ribo para sa walong aldaw kan kada saro sa mga kombension na idto.

Pakalihis kan mga kombension na idto, kabale na an pinakadakula sa gabos kan 1958, nagkaigwa nin darakulang aumento sa mga parahayag kan Kahadean. Ini direktang nakaapektar sa samong trabaho sa Bethel. Kan huring mga taon nin 1960 asin enot na mga taon nin 1970, kami biyong nagin desesperado para sa lugar asin mga kuarto na maiistaran nin mga trabahador. Tanganing matawan nin lugar an samong nagdadakulang pamilya, kaipuhan mi nin dugang na mga kuartong torogan, kusina, asin komedor.

Pinakiolayan ni Tugang na Knorr si Tugang na Max Larson, an paraataman sa pabrika, asin ako na humanap nin angay na daga para sa pagpahiwas. Kan 1957, kan maglaog ako sa Bethel, an samong pamilya nin mga 500 nag-iistar sa sarong dakulang dormitoryo. Alagad sa nag-aging mga taon, an Sosyedad buminakal asin hinirahay an tolong darakulang otel sa harani​—an Towers, Standish, asin Bossert—​saka an dakol na mas sadit na apartment. Kan 1986 binakal kan Sosyedad an daga na natotogdokan kaidto kan Otel Margaret asin ginibong erokan nin mga 250 katawo an magayon na bagong edipisyo na itinogdok duman. Dangan kan enot na mga taon nin 1990, itinogdok an 30 eskalon na dormitoryo tanganing istaran nin 1,000 pang trabahador. Kaya na ngonyan kan Bethel sa Brooklyn na paistaron asin pakakanon an labing 3,300 na miembro kan samong pamilya.

May binakal man na daga sa Wallkill, Nueva York, haros 160 kilometros hale sa Bethel sa Brooklyn. Sa nag-aging mga taon, poon kan huring mga taon nin 1960, itinogdok duman an mga dormitoryo asin mahiwas na imprentahan. Ngonyan, mga 1,200 na miembro kan samong pamilyang Bethel an nag-iistar asin nagtatrabaho duman. Kan 1980 nagpoon an paghanap nin mga 250 ektaryang daga na mas harani sa Siudad nin Nueva York asin harani sa mayor na tinampo. An ahente sa daga nagngisi asin nagsabi: “Saen kamo makakakua kan siring na daga? Bako nanggad iyan na posible.” Alagad pagkaaga nag-apod sia asin nagsabi: “Nakua ko na an daga nindo.” Ngonyan, iyan inaapod na Sentro nin Edukasyon kan Watchtower sa Patterson, Nueva York. Duman may mga paadalan asin may pamilya nin labing 1,300 na ministro.

Mga Leksion na Nanodan Ko

Nanodan ko na an marahay na paraataman saro na nakakukua nin mahalagang impormasyon sa iba. An kadaklan sa ideya na nagkapribilehio akong ipaotob bilang paraataman sa Bethel hale sa iba.

Kan ako lumaog sa Bethel, dakol an mas matua, arog ko ngonyan. An kadaklan mayo na. Siisay an minasalida sa mga naggurang asin nagadan? Bakong pirmeng an mga pinakamaabilidad. Imbes an mga yaon, na fiel na nagtatrabaho, na ginigibo an saindang sadiri na andam na gamiton.

An saro pang mahalagang bagay na dapat girumdomon iyo an halaga nin sarong marahay na agom na babae. An suporta kan mahal kong agom, si Fern, nagin dakulang tabang sa sako sa pag-otob kan sakong teokratikong mga asignasyon. An mga agom na lalaki may paninimbagan na siertohon na ikinaoogma kan saindang agom an asignasyon kan mga ini. Hinihingoa kong may ikaplano na gusto ming gibohon ni Fern. Dai man kaipuhan na iyan magastos kundi saro sanang bagay na napapaiba. Nasa agom na lalaki an paggibo nin mga bagay na makapaoogma sa saiyang agom. An oras nia kaiba kan saiyang agom mahalagang marhay asin madaling minalihis, kaya kaipuhan na aprobetsaran nia iyan.

Naoogma ako na ako nabubuhay sa huring mga aldaw na sinabi ni Jesus. Ini an pinakamakangangalas na panahon sa bilog na kasaysayan nin tawo. Namamasdan asin naheheling niato paagi kan satong mga mata nin pagtubod kun paano pinatatalubo kan Kagurangnan an saiyang organisasyon bilang pag-andam para sa pagdatong kan ipinanugang bagong kinaban. Sa paggirumdom ko sa bilog na buhay ko sa paglilingkod ki Jehova, naheheling ko na si Jehova iyo an nagpapadalagan sa organisasyon na ini​—bakong mga tawo. Kita mga lingkod nia sana. Bilang siring, dapat na kita pirmeng pagiya sa saiya. Oras na sabihon na nia nin malinaw kun ano an dapat niatong gibohon, maninigo na kita listong kumuyog asin magtarabangan.

Itao an saindong panahon asin kosog para sa organisasyon, asin garantisado na kamo magkakaigwa nin pano nin aktibidad, maogmang buhay. Ano man an saindong ginigibo​—baga man pagpapayunir, gibohon sa sirkito, paglilingkod bilang parahayag sa sarong kongregasyon, paglilingkod sa Bethel, o pagmimisyonero—​sunodon an itinaong instruksion, asin pahalagahan an saindong asignasyon. Gibohon an pinakamakakaya nindo na ikaogma an lambang asignasyon asin an kada aldaw nin trabaho sa paglilingkod ki Jehova. Mapapagal kamo, asin kun beses tibaad kamo masobrahan sa trabaho o mamondo. Iyan an panahon na kaipuhan nindong girumdomon an katuyohan kan pagdusay kan saindong buhay ki Jehova. Iyan iyo an pag-otob kan kabotan nia, bakong nindo.

Mayo nin aldaw na ako naglaog sa trabaho asin dai ko ikinaogma an ginibo ko. Taano? Huli ta kun bilog na kalag niatong itinatao an satong panahon asin kosog para ki Jehova, igwa kita kan pagkakontento sa pakaaram na ‘ginibo niato an dapat niatong gibohon.’

[Retrato sa pahina 19]

An Departamento sa Magasin

[Retrato sa pahina 19]

Siudad nin mga Harong na de Rueda, 1950

[Retrato sa pahina 19]

Pagpapayunir sa Baltimore, 1946

[Retrato sa pahina 19]

Sa Siudad nin mga Harong na de Rueda kaiba si Fern kan 1950

[Retrato sa pahina 22]

Kaiba ni Audrey asin Nathan Knorr

[Retrato sa pahina 23]

Sentro nin Edukasyon kan Watchtower sa Patterson, Nueva York

[Retrato sa pahina 24]

Kaiba si Fern ngonyan