Padagos na Maglakaw sa Dalan ni Jehova

“Maglaom ki Jehova asin otobon an saiyang dalan, asin ika ilalangkaw nia na makasadiri kan daga.”—SALMO 37:34.

1, 2. Ano an kalabot para ki Hadeng David kan paglakaw sa dalan ni Jehova, asin ano an hinahagad kaiyan sa sato ngonyan?

“PAARAMAN sa sako an dalan na maninigo kong lakawan, huli ta sa saimo iinitaas ko an sakuyang kalag.” (Salmo 143:8) An mga Kristiano ngonyan bilog na pusong inootro an mga tataramon na iyan ni Hadeng David. Sinsero nindang mawot na panigoan si Jehova asin maglakaw sa saiyang dalan. Ano an kalabot digdi? Para ki David, iyan nangahulogan nin pag-otob sa ley nin Dios. Kalabot dian an pagtiwala ki Jehova imbes na sa mga pakialyansa sa mga nasyon. Iyo, asin nangahulogan iyan nin maimbod na paglilingkod ki Jehova, bakong sa mga dios kan kataraed na banwaan. Para sa mga Kristiano, bako sana iyan an kalabot sa paglakaw sa dalan ni Jehova.

² Sarong bagay, an paglakaw sa dalan ni Jehova ngonyan nangangahulogan nin pagtubod sa atang na pantubos ni Jesu-Cristo, na rinerekonoser sia bilang “an dalan asin an katotoohan patin an buhay.” (Juan 3:16; 14:6; Hebreo 5:9) Iyan nangangahulogan man nin pag-otob sa “ley kan Cristo,” na kaiba an pagpaheling nin pagkamoot sa lambang saro, nangorogna sa linahidan na mga tugang ni Jesus. (Galacia 6:2; Mateo 25:34-40) An mga naglalakaw sa dalan ni Jehova namomoot sa saiyang mga prinsipyo asin pagboot. (Salmo 119:97; Talinhaga 4:5, 6) Saindang pinakamamahal an saindang mahalagang marhay na pribilehio na makikabtang sa ministeryong Kristiano. (Colosas 4:17; 2 Timoteo 4:5) An pamibi regular na kabtang kan saindang buhay. (Roma 12:12) Asin sinda ‘nagmamaan na marhay na an saindang paglakaw bakong siring sa mangmang kundi siring sa mga madonong.’ (Efeso 5:15) Tunay nanggad na dai ninda isinasakripisyo an espirituwal na mga kayamanan para sa temporaryong materyal na mga bentaha o bawal na mga kasingawan sa laman. (Mateo 6:19, 20; 1 Juan 2:15-17) Dugang pa, an kaimbodan ki Jehova asin tiwala sa saiya mahalagang marhay. (2 Corinto 1:9; 10:5; Efeso 4:24) Taano? Huli ta an situwasyon niato kaagid na marhay kan sa suanoy na Israel.

An Pangangaipo nin Tiwala Asin Kaimbodan

 3. Taano an kaimbodan, pagtubod, asin tiwala ta makatatabang na kita magdanay na naglalakaw sa dalan ni Jehova?

³ An Israel sadit na nasyon na napalilibotan nin antipatikong kataraed na naggigibo nin sobra kainmoral na mga seremonya sa pagsamba sa mga dios na idolo. (1 Cronica 16:26) Solamente an Israel an naglilingkod sa sarong tunay asin dai naheheling na Dios, si Jehova, asin hinagad nia na papagdanayon ninda an halangkaw na mga pamantayan sa moral. (Deuteronomio 6:4) Siring man ngonyan, pira sanang milyon katawo an nagsasamba ki Jehova, asin nabubuhay sinda sa sarong kinaban nin haros anom na bilyon katawo na an mga pamantayan asin relihiosong punto de vista laen na marhay kan sa sainda. Kun kita kabilang sa pira sanang milyon na iyan, dapat na kita magmaan na dai maimpluwensiahan sa salang paagi. Paano? An kaimbodan ki Jehova Dios, pagtubod sa saiya, asin marigon na tiwala na ootobon nia an saiyang mga panuga makatatabang. (Hebreo 11:6) Ililikay kita kaini sa pagtiwala sa mga bagay na linalaoman kan kinaban.—Talinhaga 20:22; 1 Timoteo 6:17.

 4. Taano an mga nasyon ta “nasa kadikloman sa isip”?

⁴ Ipinaheling ni apostol Pablo kun gurano dapat na mapalaen an mga Kristiano sa kinaban kan sia sumurat: “Ini, kun siring, sakuyang sinasabi asin pinatototoohan sa Kagurangnan, na dai na kamo padagos na naglalakaw siring sa paglakaw kan mga nasyon sa pagigin daing kamanungdanan kan saindang isip, mantang sinda nasa kadikloman sa isip, asin siblag sa buhay na gikan sa Dios, huli sa kamangmangan na nasa sainda, huli sa katagasan kan saindang puso.” (Efeso 4:17, 18) Si Jesus “an tunay na liwanag.” (Juan 1:9) An siisay man na habo sa saiya o naghihingako na nagtutubod sa saiya alagad dai nagkukuyog sa “ley kan Cristo” “nasa kadikloman sa isip.” Imbes na maglakaw sa dalan ni Jehova, sinda “siblag sa buhay na gikan sa Dios.” Gurano man sinda kadonong sa paghona ninda sa kinabanon na paagi, sinda may “kamangmangan na nasa sainda” kun manongod sa solamenteng kaaraman na nagbubunga nin buhay, an manongod ki Jehova Dios asin ki Jesu-Cristo.—Juan 17:3; 1 Corinto 3:19.

 5. Maski ngani an liwanag nin katotoohan nagsisirang sa kinaban, taano ta dakol na puso an bakong sensitibo?

⁵ Pero, an liwanag nin katotoohan nagsisirang sa kinaban! (Salmo 43:3; Filipos 2:15) “An tunay na kadonongan mismo padagos na nagkukurahaw sa lansangan.” (Talinhaga 1:20) Kan nakaaging taon an Mga Saksi ni Jehova ginamit an labing sarong bilyon na oras sa pakikipag-olay sa saindang kataraed manongod ki Jehova Dios asin ki Jesu-Cristo. Ginatos na ribo an naghimate. Pero maninigo daw niatong ipagngalas na dakol pang iba an dai naghimate? Dai. Si Pablo nagtaram manongod sa “katagasan kan saindang puso.” An nagkapira bakong sensitibo an puso huli sa kaimotan o pagkamoot sa kuarta. An iba impluwensiado nin falsong relihion o kan kinabanon na punto de vista na lakop na marhay ngonyan. Huli sa masakit tioson na mga inagihan sa buhay dakol an tuminalikod sa Dios. An iba habong aboton an haralangkaw na pamantayan ni Jehova sa moral. (Juan 3:20) An puso daw nin saro na naglalakaw sa dalan ni Jehova puedeng magin daing pakamate sa siring na mga bagay?

6, 7. Minsan ngani sinda mga nagsasamba ki Jehova Dios, sa anong mga okasyon napasuhay an mga Israelita, asin taano?

⁶ Ini talagang nangyari sa suanoy na Israel, arog kan ipinaheling ni Pablo. Sia nagsurat: “An mga bagay na ini nagin satong mga halimbawa, na kita dai magin mga tawo na nagmamawot nin mga bagay na nakararaot, kun paanong iyan pinagmawot ninda. Ni magin kamong mga parasamba sa idolo, arog kan ginibo kan nagkapira sa sainda; siring sa nasusurat: ‘An banwaan nagturukaw sa pagkakan asin pag-inom, asin nagburuhat sinda sa pag-oroogma.’ Ni makisaro man kita, arog kan nagkapira sa sainda na nakisaro, tangani sanang magadan, duwang polo may tolong ribo sa sainda sa sarong aldaw.”—1 Corinto 10:6-8.

⁷ Enot si Pablo nagtataram manongod sa okasyon na an Israel nagsamba nin bulawan na ogbon na baka sa ibaba kan Bukid nin Sinai. (Exodo 32:5, 6) Ini direktang pakisuway sa pagboot nin Dios na inoyonan nindang kuyogon pira sanang semana bago kaidto. (Exodo 20:4-6; 24:3) Dangan, si Pablo nagtataram manongod sa panahon na an Israel naghuruhod ki Baal kaiba kan mga aking babae nin Moab. (Bilang 25:1-9) An pagsamba sa ogbon na baka midbid sa grabeng pagpagusto sa sadiri, na ‘nag-ooroogma.’a An pagsamba ki Baal may kaibang hayag na seksuwal na inmoralidad. (Kapahayagan 2:14) Taano ta nakomiter kan mga Israelita an mga kasalan na ini? Huli ta tinogotan ninda an saindang puso na ‘magmawot nin mga bagay na nakararaot’—baga man an idolatriya o an sobra kainmoral na mga gibo na kaiba kaiyan.

 8. Anong leksion an manonodan niato sa mga inagihan kan Israel?

⁸ Sinabi ni Pablo na maninigo kitang magkaleksion sa mga pangyayaring ini. Anong leksion? Imposible na an sarong Kristiano mahuruhod sa sarong bulawan na ogbon na baka o sa suanoy na dios nin mga Moabita. Alagad kumusta man an inmoralidad o daing pakundangan na pagpagusto sa sadiri? An mga ini lakop ngonyan, asin kun totogotan niato na tumubo sa satong puso an pagmawot kaiyan, an mga iyan an magigin dahelan na kita maparayo ki Jehova. An resulta kapareho man sana kun kita nagkomiter nin idolatriya—pagkasiblag sa Dios. (Ikomparar an Colosas 3:5; Filipos 3:19.) Tunay nanggad, tinatapos ni Pablo an pagtratar nia sa mga pangyayaring idto paagi sa pakasadolsadol sa mga kapagtubod nia: “Dumulag kamo sa idolatriya.”—1 Corinto 10:14.

Tabang sa Paglakaw sa Dalan nin Dios

 9. (a) Anong tabang an inaako niato tangani na kita makapagdanay na naglalakaw sa dalan ni Jehova? (b) Ano an sarong paagi na nadadangog niato an ‘tataramon sa likod niato’?

⁹ Kun kita determinado na padagos na maglakaw sa dalan ni Jehova, kita dai pinabayaan na mayo nin tabang. Ihinula ni Isaias: “An saimong mga talinga makadadangog nin tataramon sa likod mo na nagsasabi: ‘Iyo ini an dalan. Maglakaw kamo dian, banwaan,’ enkaso kamo banwaan pumatoo o enkaso kamo pumawala.” (Isaias 30:21) Paano nadadangog kan ‘satong mga talinga’ an ‘tataramon na iyan sa likod niato’? Bueno, mayo ngonyan na nakadadangog nin literal na tingog o nag-aako nin personal na mensahe hale sa Dios. An “tataramon” na nadadangog minaabot sa sato gabos sa parehong paagi. Enot sa gabos, iyan minaabot paagi sa ipinasabong na Kasuratan, an Biblia, na igwa kan mga nasa isip nin Dios asin nin rekord kan saiyang mga ginibo sa tawo. Mantang aroaldaw kita puedeng maimpluwensiahan nin propaganda gikan sa mga bagay na “siblag sa buhay na gikan sa Dios,” para sa marahay na espirituwal na salud, kaipuhan na regular niatong basahon an Biblia asin horophoropon iyan. Ini matabang sa sato na likayan an “daing kamanungdanan na mga bagay” asin magin “lubos na may kakayahan, andam nanggad para sa lambang marahay na gibo.” (Gibo 14:14, 15; 2 Timoteo 3:16, 17) Iyan mapakosog sa sato, maparigon sa sato, asin matabang sa sato na ‘magin kitang mapanggana.’ (Josue 1:7, 8) Huli kaini, an Tataramon ni Jehova nagsasadol: “Ngonyan, mga aki, paghinanyog kamo sa sako; iyo, maogma an mga nag-ootob kan sakuya mismong mga dalan. Maghinanyog kamo sa disiplina asin magin madonong, asin dai kamo magpabaya.”—Talinhaga 8:32, 33.

10. Ano an ikaduwang paagi na nadadangog niato an ‘tataramon sa likod niato’?

¹⁰ An ‘tataramon sa likod niato’ minaabot man paagi sa “fiel asin madonong na oripon,” na nagtatao nin “kakanon sa igong panahon.” (Mateo 24:45-47) An sarong paagi na itinatao an kakanon na ini iyo an inimprentang mga publikasyon na basado sa Biblia, asin sa nakaagi pa sanang mga taon an suplay na ini nin kakanon nagin abunda. Halimbawa, paagi sa magasin na An Torrengbantayan, napakarhay an satong pakasabot sa mga hula. Sa magasin na ini, inenkaminar kita na magmaigot sa gibong paghuhulit asin paggibo nin mga disipulo sa ibong nin nag-oorog na pagkaindiperente, natabangan kita na malikayan an natatagong mga peligro, asin sinadol kita na pataluboon an marahay na mga kualidad na Kristiano. Pinakamamahal nanggad niato an siring na kakanon sa igong panahon!

11. Ipaliwanag an ikatolong paagi na puede niatong madangog an ‘tataramon sa likod niato.’

¹¹ An fiel asin madonong na oripon nagtatao man nin kakanon paagi sa satong regular na pagtiripon. Kaiba digdi an lokal na mga pagtiripon kan kongregasyon, duwang beses kada taon na mga pagtiripon kan sirkito, asin mas darakulang taonan na kombension. Siisay na fiel na Kristiano an dai nagpapahalaga sa siring na mga pagtiripon? An mga iyan mahalagang marhay na tabang na masuportar sa sato sa paglakaw sa dalan ni Jehova. Mantang dakol an kaipuhan na gumamit nin dakol na oras sa trabaho o sa eskuelahan kaiba nin mga bako nindang kapagtubod, an regular na Kristianong pakikiasosyar sa aktuwal panligtas-buhay. An mga pagtiripon nagtatao sa sato nin marahay na oportunidad na ‘dagkahon an lambang saro sa pagkamoot asin sa marahay na mga gibo.’ (Hebreo 10:24) Namomotan niato an satong mga tugang, asin gustong-gusto niato na makiasosyar sa sainda.—Salmo 133:1.

12. Ano an determinasyon kan Mga Saksi ni Jehova, asin paano ninda iyan ipinahayag kasuarin pa sana?

¹² Napakosog kan siring na espirituwal na kakanon, haros anom na milyon ngonyan an naglalakaw sa dalan ni Jehova, asin minilyon pang iba an nag-aadal kan Biblia tanganing makanood kun paano iyan gigibohon. Sinda daw nanluluya an boot o pinanluluya kan bagay na sinda pira sana kun ikokomparar sa binilyon na populasyon kan daga? Dai nanggad! Sinda determinado na padagos na himateon an ‘tataramon sa likod ninda,’ na maimbod na ginigibo an kabotan ni Jehova. Bilang hayag sa gabos na pagpaheling kan determinasyon na ini, durante kan 1998/99 “Sa Dios na Dalan nin Buhay” na Pandistrito Asin Internasyonal na mga Kombension, inaprobaran kan mga delegado an sarong resolusyon na nagpapahayag kan saindang odok sa pusong paninindogan. Kasunod kaini an teksto kan resolusyon na iyan.

Resolusyon

13, 14. Ano an realistikong punto de vista kan Mga Saksi ni Jehova sa situwasyon kan kinaban?

¹³ “Kita, bilang Mga Saksi ni Jehova na tiripon sa ‘Sa Dios na Dalan nin Buhay’ na Kombension, bilog na pusong minaoyon na an dalan nin Dios iyo an pinakamarahay na dalan sa buhay. Minsan siring, minimidbid niato na an mayoriya kan katawohan ngonyan laen man an paghona. An sosyedad nin tawo nag-eksperimento nin balakid na konsepto, pilosopiya, asin relihiosong mga ideya sa kun ano an pinakamarahay na dalan sa buhay. An onestong pagsiyasat sa kasaysayan nin tawo asin sa mga kamugtakan sa kinaban ngonyan nagpapatunay sa pagigin totoo kan kapahayagan nin Dios na nasusurat sa Jeremias 10:23: ‘Mayo sa tawong naglalakaw an kakayahan na giyahan man lamang an saiyang lakad.’

¹⁴ “Aroaldaw nakaheheling kita nin mas dakol na ebidensia na nagpapatunay sa pagigin totoo kan mga tataramon na iyan. Sa pankagabsan, an sosyedad nin tawo binabasangbasang an dalan nin Dios sa buhay. Pinagmamaigotan nin mga tawo na kamtan an garo baga tama sa saindang pagheling. Nagin makaturotriste an mga resulta—an pagkalaglag nin buhay pampamilya, na napababayaan na daing paggiya an mga aki; an lakop na materyalismo, na minasagkod sa pagmate na dai nang halaga an buhay asin sa pagkasudya kan mawot; an daing kahulogan na krimen asin kadahasan, na dai mabilang an nagigin biktima; an etnikong iriwal asin guerra, na grabe kamakatatakot kan napipierdeng buhay nin tawo; an lakop na inmoralidad, na ginagatongan an epidemya nin mga helang na ikinaoolakit paagi sa pagdodorog. Ini pira sana sa kadakoldakol na komplikadong problema na nakaeentremeter sa pagmamaigot na kamtan an kaogmahan, katoninongan, asin katiwasayan.

15, 16. Mapadapit sa dalan nin Dios sa buhay, anong determinasyon an ipinahayag sa resolusyon?

¹⁵ “Huli sa mamondong kamugtakan kan katawohan asin sa kaharanihan kan ‘ralaban kan dakulang aldaw nin Dios na Makakamhan sa gabos,’ na inaapod Armagedon (Kapahayagan 16:14, 16), kita bilang Mga Saksi ni Jehova nagdedesisyon na:

¹⁶ “Enot: Ibinibilang niato an satong sadiri na rogaring ni Jehova Dios, mantang daing limitasyon na indibiduwal niatong idinusay sa saiya an satong sadiri, asin papagdadanayon niato an dai nanluluyang pagtubod sa probisyon ni Jehova na pantubos paagi sa saiyang Aki, si Jesu-Cristo. Determinado kita na maglakaw sa dalan nin Dios sa buhay, na naglilingkod bilang saiyang mga Saksi asin nagpapasakop sa saiyang soberaniya na ipinahayag paagi sa pamamahala ni Jesu-Cristo.

17, 18. Anong paninindogan an padagos na papagdadanayon kan Mga Saksi ni Jehova kun dapit sa moral na mga pamantayan asin sa Kristianong kasararoan nin magturugang?

¹⁷ “Ikaduwa: Magpapadagos kita sa pagsusog sa halangkaw na mga pamantayan kan Biblia sa moral asin espirituwal. Determinado kita na lumikay sa paglakaw siring sa paglakaw kan mga nasyon sa pagigin daing kamanungdanan kan saindang isip. (Efeso 4:17-19) Desisyon niato na magdanay na malinig sa atubangan ni Jehova asin daing digta kan kinaban na ini.—Santiago 1:27.

¹⁸ “Ikatolo: Kita higot na mangangapot sa satong paninindogan sono sa Kasuratan bilang pambilog na kinaban na Kristianong kasararoan nin magturugang. Papagdadanayon niato an Kristianong neutralidad sa tahaw kan mga nasyon, na dai itinotogot na kita mapadamay sa rasyal, nasyonal, o etnikong pagkaongis o pagkabaranga.

19, 20. (a) Ano an gigibohon nin Kristianong mga magurang? (b) Paano padagos na ipamimidbid nin gabos na tunay na Kristiano na sinda mga disipulo ni Cristo?

¹⁹ “Ikaapat: Kita na mga magurang itatadom niato an dalan nin Dios sa satong mga aki. Matao kita nin halimbawa sa Kristianong pamumuhay, na kaiba dian an regular na pagbasa kan Biblia, pampamilyang pag-adal, asin bilog na kalag na pakikikabtang sa Kristianong kongregasyon asin sa ministeryo sa langtad.

²⁰ “Ikalima: Kita gabos magmamaigot na kultibaron an diosnon na mga kualidad na ipinaheheling kan satong Kaglalang paagi sa halimbawa, asin hihingoahon niato na arogon an saiyang personalidad asin an saiyang mga ugale, arog kan ginibo ni Jesus. (Efeso 5:1) Desidido kita na pabayaan na an gabos niatong gibo-gibo mangyari na may pagkamoot, na paagi kaiyan ipinamimidbid an satong sadiri bilang mga disipulo ni Cristo.—Juan 13:35.

21-23. Ano an padagos na gigibohon kan Mga Saksi ni Jehova, asin sa ano sinda kombensido?

²¹ “Ikaanom: Daing pagluya na kita magpapadagos sa paghuhulit kan maogmang bareta kan Kahadean nin Dios, paggibo nin mga disipulo, asin totokdoan niato sinda sa dalan nin Dios sa buhay asin eenkaminaron niato sinda na umako nin dugang pang pagpatood sa mga pagtiripon kan kongregasyon.—Mateo 24:14; 28:19, 20; Hebreo 10:24, 25.

²² “Ikapito: Bilang mga indibiduwal asin bilang sarong relihiosong organisasyon, padagos niatong eenoton sa satong buhay an kabotan nin Dios. Ginagamit an saiyang Tataramon, an Biblia, bilang satong giya, dai kita masuway patoo o pawala, sa siring na paagi pinatutunayan na an dalan nin Dios nakalalabi nanggad sa mga dalan kan kinaban. Determinado kita na sundon an dalan nin Dios sa buhay—marigon asin may kaimbodan, ngonyan asin sagkod lamang!

²³ “Ginigibo niato an resolusyon na ini ta lubos an satong pagsarig sa mamomoton na panuga ni Jehova na an naggigibo kan kabotan nin Dios magdadanay sagkod lamang. Ginigibo niato an resolusyon na ini ta kombensido kita na an pamumuhay oyon sa mga prinsipyo, hatol, asin konseho na sono sa Kasuratan nagbubunga kan pinakamarahay na dalan sa buhay ngonyan asin nagbubugtak nin marahay na pundasyon para sa ngapit, tangani na makapangapot kita nin marigon sa tunay na buhay. (1 Timoteo 6:19; 2 Timoteo 4:7b, 8) Orog sa gabos, ginigibo niato an resolusyon na ini ta kita namomoot ki Jehova Dios sa bilog niatong puso, kalag, isip, asin kosog!

24, 25. Ano an reaksion sa iprinoponer na resolusyon, asin ano an determinasyon kan mga naglalakaw sa dalan ni Jehova?

²⁴ “An gabos na yaon sa kombension na ini na pabor sa pag-aprobar sa resolusyon na ini, tabi magsabing IYO!”

²⁵ Ginatos na ampiteatro asin istadyum sa palibot kan kinaban an nag-aniningal kan an gabos na yaon sumimbag nin nag-uurog-udog na “IYO!” An Mga Saksi ni Jehova mayo nin pagduda na sinda magpapadagos na maglakaw sa dalan ni Jehova. Lubos an saindang tiwala ki Jehova asin pagtubod na ootobon nia an saiyang mga panuga. Sinda nagdadanay na maimbod sa saiya, ano man an mangyari. Asin determinado sinda na gibohon an saiyang kabotan.

“An Dios Nasa Kampi Niato”

26. Ano an maogmang situwasyon kan mga naglalakaw sa dalan ni Jehova?

²⁶ Ginigirumdom kan Mga Saksi ni Jehova an sadol kan salmista: “Maglaom ki Jehova asin otobon an saiyang dalan, asin ika ilalangkaw nia na makasadiri kan daga.” (Salmo 37:34) Dai ninda linilingawan an nakaparirigon sa boot na mga tataramon ni Pablo: “Kun an Dios nasa kampi niato, siisay an matumang sa sato? Sia na minsan an saiya mismong Aki dai ilinikay kundi itinao sia dahel sa sato gabos, tadaw ta dai man sia maboot na magtatao sa sato kan gabos na iba pang bagay kaiba nia?” (Roma 8:31, 32) Iyo, kun kita padagos na maglalakaw sa dalan ni Jehova, itatao nia sa sato an “gabos na bagay para sa satong kasiraman.” (1 Timoteo 6:17) Ano pang mas marahay na lugar kisa namumugtakan niato—na naglalakaw sa dalan ni Jehova, kaabay kan satong mahal na mga tugang na lalaki asin babae. Mantang nasa kampi niato si Jehova, magin kitang determinado na magdanay dian asin magtagal sagkod sa katapusan, na lubos na kompiado na sa itinalaan niang panahon, maheheling niato na inootob nia an kada saro sa saiyang mga panuga.—Tito 1:2.

[Nota sa Ibaba]

Nagigirumdoman daw Nindo?

◻ Ano an hinahagad tangani na an sarong Kristiano makalakaw sa dalan ni Jehova?

◻ Taano ta kaipuhan niatong kultibaron an tiwala ki Jehova asin kaimbodan sa saiya?

◻ Anong tabang an makukua mantang kita naglalakaw sa dalan ni Jehova?

◻ Tumao nin nagkapirang tampok na kabtang kan resolusyon na inaprobaran sa “Sa Dios na Dalan nin Buhay” na mga Kombension.

[Mga retrato sa pahina 18]

May importanteng resolusyon na inaprobaran sa “Sa Dios na Dalan nin Buhay” na Pandistrito Asin Internasyonal na mga Kombension