Sarong Bagay na Mas Marahay Kisa mga Kosmetik

PAKASAMBITA kan “panluwas na mga pantabang” na ginamit kan mga babae bilang pampagayon, si apostol Pedro nagsadol: “Imbes, an saindong gayon maninigo na an saindong tunay na personang nasa laog, an dai naggugurang na gayon nin maboot asin toninong na espiritu, na may pinakadakulang halaga sa pagheling nin Dios.”—1 Pedro 3:3, 4, Today’s English Version.

Interesante nanggad, kan an apostol magsurat dapit sa siring na panluwas na samno, ginamit nia an porma kan termino sa Griego na koʹsmos, na iyo man an pinakagamot na termino kan tataramon sa Ingles na “cosmetic” (sa Bicol, “kosmetik”), na nangangahulogan na “pampagayon nangorogna sa kutis.” Nagbabawal daw si Pedro sa mga Kristiana mapadapit sa paggamit nin makeup asin iba pang kaagid na pampagayon? Mayo sa Tataramon nin Dios na nagsusuherir kaiyan. Imbes, iyan nagtotogot para sa personal na desisyon dapit sa bagay na ini, kaya malalaoman na igwa nin pagkakalaenlaen sa kun ano an gusto.

Minsan siring, kun sobra an pagbugtak nin makeup, o an pagkabugtak nakadidisturbo sa dakol na iba pa, anong impresyon an itinatao kaiyan? Bako daw na pagigin nakaiiritar, daing kabinian, magarbo, mapagpasikat, o sadiri sana an iniintindi? Tunay nanggad, pinapababa kaiyan an halaga kan itsura nin sarong babae, na posibleng nagtatao nin salang impresyon kun dapit sa moral na karakter.—Ikomparar an Ezequiel 23:36-42.

Bilang pagrekonoser kaini, an babae na ‘naghihingakong may reberensia sa Dios’ magmamaigot, kun gusto niang magbugtak nin mga kosmetik, na an saiyang lalauogon maghayag kan mga karakteristiko nin marahay na kaisipan, pagkakalmado, kabootan, asin kabinian. An mga kualidad na iyan mapaoswag sa saiyang gayon nin hiro asin itsura. Sa katunayan, baga man gusto nia na mag-makeup o dai, ipaheheling nia an dignidad asin nasa laog na gayon. Ipapabanaag kaini an saiyang pakaaram na, siring sa ipinaririsa kan mga tataramon ni Pedro na kinotar sa enotan, may mas marahay kisa mga kosmetik.—1 Timoteo 2:9, 10.