Bareta kan mga Parabalangibog kan Kahadean

Rinani kan mga Saksi an Publiko sa Pransia

POON kan amay na mga oras kan Biernes, Enero 29, 1999, asin nagpapadagos sagkod kan katapusan kan semana, an Mga Saksi ni Jehova sa Pransia entusiastikong idinistribwir sa mga tinampo asin kan huri sa harong-harong, an 12 milyones na kopya kan pulyeto na may titulong People of France, You Are Being Deceived! (sa Bicol, Mga Namamanwaan sa Pransia, Dinadaya Kamo!) Taano ta ginibo an siring na kampanya?

Sa sarong pagpainterbio sa media sa Paris kan Biernes na agang idto, itinao an dahelan kan kampanya. An sarong representante kan mga Saksi sa pagtaram nagpaliwanag: “An gusto niamong gibohon ngonyan na aldaw iyo na ihayag kun ano talaga kami asin pasilensiohon an pinalalakop na mapagpakaraot na mga tataramon manongod sa samo. Andam niamong akoon an mga pagtatsar, alagad habo na niamong maghinanyog sa mga kaputikan asin komento na nakadadanyar sa samong reputasyon.”

Minsan ngani an Mga Saksi ni Jehova iyo an ikatolong pinakadakulang Kristianong relihion sa Pransia, an dakol na aki nin mga Saksi iniinsulto asin riniribok sa eskuelahan. An mga nasa edad na hinale sa trabaho ninda asin hinuhuma huli sa saindang relihion. Nakabibigla nanggad, dawa an relihiosong kontribusyon na inako ninda tinasaran nin 60 porsientong buhis. Paano inatubang kan kampanya an diskriminasyon na ini?

Ipinahayag kan pulyeto: “An 250,000 na Saksi ni Jehova asin an mga kaibaiba ninda na nag-eerok sa Pransia NAGPOPROTESTA tumang sa madayang paagi na basta na sana ibinali sa peligrosong mga sekta poon kan 1995 an saindang Kristianong relihion, na nag-eeksister na sa Pransia poon pa kan 1900. . . . NAGPOPROTESTA tumang sa daing pondong panriribok sa sainda.” Ihinayag an mapagbalobaging mga akusasyon sa mga Saksi sa Pransia asin an tusong mga paagi na ginamit kan mga parabalobagi tanganing muknaon an negatibong publisidad. An pulyeto nagkonklusyon sa pagsabi: “Ngonyan, labing duwang milyon na Saksi ni Jehova asin mga kaibaiba ninda an nag-eerok sa Europa. Iginagalang ninda an mga ley kan mga Estado na dian sinda siudadano paagi sa pagsorog sa pamantayan sa buhay na yaon sa Ebanghelyo. Mga namamanwaan sa Pransia, ini an katotoohan. Katongdan niamo na iatubang iyan oyon sa kun ano man nanggad an mga iyan!”

Marikas, Positibong mga Reaksion

Minilyon na pulyeto an ikinatao sa enot na aldaw. Sa Paris sana, pag-abot nin odto ikinapasakamot na sa mga tawo nin labing 7,000 na Saksi an labing 1.3 milyones na pulyeto. Kaenot-enote nanggad na maheling kan mga tawo an kadakol na Saksi na nananao nin mga pulyeto sa mga tinampo. An media, pati an nasyonal asin lokal na mga peryodiko asin telebisyon, paborable an nagin reaksion sa kampanya sa pagkomunikar. An peryodikong Le Progrès de Lyon nagkomento: “An ginibong aksion na ini . . . nagpapangyaring mahayag an salang pakasabot manongod sa sarong termino. Sa nakaaging sampulong taon, an terminong ‘sekta’ . . . nagkaigwa nin sala, peligroso, asin nakadadanyar na konotasyon. . . . An Mga Saksi ni Jehova bako man na peligroso na tibaad makapaluya sa sosyedad.”

An mga nakakamidbid sa Mga Saksi ni Jehova inaapresyar an saindang pagkamatoninong asin an saindang hararom na paggalang sa naestablisar na areglo sa sosyedad. Sa siring, an dakol na nasa mga tinampo nagpahayag kan saindang pag-apresyar asin suporta sa manampulong ribong Saksi na nakikabtang sa kampanya. Haros ensegidang naresibi an mga apod sa telepono, fax, asin surat hale sa mga tawo na nagpapasalamat para sa pulyeto. Orog sa gabos, an sinserong mga tawo natawan kan oportunidad na madangog an katotoohan manongod sa mga Saksi imbes na an mga sinasabi na eroestorya sana asin daing kahulogan, asin nahimong ipaheling kan mga pinakaraot an paniniwala an saindang saboot para sa mahal ninda.