Irinerekomendar daw Nindo an Sadiri sa Iba?

‘Dai akong labot sa iniisip nin iba!’ Sa oras nin kaanggotan o pagkadiskontento, tibaad nanompongan nindo an saindong sadiri na pusoan na nagtataram kaini. Alagad sa oras na maghupa na an pagsulwak nin pag-isog-isog, tibaad makamate kamo nin paghadit. Taano? Huling an kadaklan sa sato talagang may labot sa iniisip nin iba manongod sa sato.

TUNAY nanggad, maninigo na may labot kita manongod sa saboot nin iba. Nangorognang dapat na kita bilang mga Kristiano, ordenadong mga ministro ni Jehova Dios, magkaigwa nin tamang pagmakolog sa pagmansay nin iba sa sato. Total, kita “sarong panteatrong dadalanon sa kinaban.” (1 Corinto 4:9) Sa 2 Corinto 6:​3, 4, makukua ta an marigon na hatol ni apostol Pablo: “Dai kami sa ano man na paagi nagtatao nin ano man na dahelan nin pagkasingkog, tanganing an samong ministeryo dai makuanan nin sala; kundi sa lambang paagi irinerekomendar niamo an samong sadiri bilang mga ministro nin Dios.”

Pero, ano an boot sabihon kan pagrekomendar kan satong sadiri sa iba? Boot daw sabihon kaiyan na ilalangkaw ta an satong sadiri o maapod kita nin dai maninigong atension sa satong sadiri asin sa satong mga abilidad? Dai. Alagad hinahagad kaiyan na iaplikar an mga tataramon kan 1 Pedro 2:​12: “Papagdanayon na marahay an saindong gawe-gawe sa tahaw nin mga nasyon, tanganing . . . tibaad huli sa saindong marahay na mga gibo na saindang naheheling pamurawayon ninda an Dios.” Irinerekomendar kan mga Kristiano an saindang sadiri paagi sa pagpabaya ninda na an saindang gawe-gawe mismo an magpatunay! Sa katapustapusi, ini magtatao nin kaomawan, bako sa sato, kundi sa Dios. Minsan siring, an pagrekomendar niato kan satong sadiri sa iba tibaad igwa man nin personal na mga pakinabang. Siyasaton niato an tolong langtad na iyan tibaad magin totoo para sa saindo.

Bilang Potensial na Maaagom

Halimbawa an dapit sa pag-agom. Iyan sarong regalo hale ki Jehova Dios, an saro “na pinagkakautangan nin ngaran kan lambang pamilya sa langit asin sa daga.” (Efeso 3:15) Tibaad kamawotan nindo na mag-agom pag-abot nin panahon. Kun iyo, sagkod sa anong sokol nindo irinerekomendar an saindong sadiri bilang potensial na maaagom? Iyo, ano an nagibo nindong reputasyon bilang daing agom na Kristianong lalaki o babae?

Sa nagkapirang kadagaan iyan pinagmamalasakitan na marhay kan mga pamilya. Halimbawa, sa Ghana, kun an duwa nagmamawot na magpakasal, an tradisyon iyo na iimpormaran kan magigin mag-agom an saindang mga magurang. Iimpormaran man kan mga ini an ibang mga miembro kan pamilya. Dangan an pamilya kan lalaki poponan nang aramon sa pagtaraed an reputasyon kan babae. Kun an mga magurang makombensir kan pagigin angay kan babae, iimpormaran ninda an pamilya kan babae manongod sa intension kan saindang aking lalaki na agomon an aking babae. An pamilya kan babae ngonyan an maberepikar sa reputasyon kan lalaki bago oyonan an pagpakasal. Sa siring an sarong sarabihon sa Ghana nagsasabi, “Hapoton an mga nakaaaram bago ka mag-agom.”

Kumusta man sa mga nasyon sa Solnopan, kun saen an mga indibiduwal sa pankagabsan tinotogotan na pumili kan saindang aagomon? Maski duman, an sarong maygurang na Kristianong lalaki o babae magigin madonong na maghagad nin sadiosan na rekomendasyon sa mga nakamimidbid na marhay sa sarong potensial na maaagom, siring baga kan mga magurang o maygurang na mga katood. Oyon sa librong An Sekreto sa Kaogmahan nin Pamilya, an sarong hoben na babae puedeng maghapot: “‘Anong klase an reputasyon kan lalaking ini? Sairisay an saiyang mga katood? Nagpapaheling daw sia nin pagpopogol sa sadiri? Ano an pagtratar nia sa mga gurang? Anong klaseng pamilya an saiyang pinaghalean? Paano nia sinda pinakikiibanan? Ano an ugale nia pag-abot sa kuarta? Nagpapangana daw sia sa mga inomon na de alkohol? Sia daw aranggoton, madahas pa ngani? Ano an mga paninimbagan nia sa kongregasyon, asin paano nia iyan inaasikaso? Puede ko daw siang igalang nin hararom?’​​—Levitico 19:​32; Talinhaga 22:​29; 31:​23; Efeso 5:​3-5, 33; 1 Timoteo 5:​8; 6:​10; Tito 2:​6, 7.”a

Bobooton man nin sarong lalaki na maghapot manongod sa siisay man na Kristiana na iniisip niang agomon. Oyon sa Biblia, si Booz nagpaheling nin siring na interes ki Rut, an babaeng inagom nia sa huri. Kan si Rut naghapot: “Taano ta nakakua ako nin pabor sa saimong mga mata na ako rinirisa, mantang ako taga ibang daga?” Si Booz nagsabi: “Nakaabot nin lubos sa sako an bareta kan gabos mong ginibo.” (Rut 2:​10-​12) Iyo, bako sanang naobserbaran nin personal ni Booz na si Rut sarong maimbod, dedikado, asin mahigos na babae kundi nakaabot man sa saiya an paborableng mga komento hale sa iba.

Siring man, an saindong gawe-gawe magkakaigwa nin epekto sa kun baga mamansayon kamo kan iba bilang angay na aagomon. Paano nanggad nindo irinerekomendar an saindong sadiri sa iba sa bagay na ini?

Bilang Sarong Empleyado

An pinagtatrabawohan saro pang lugar kun saen an pagpapadanay nin marahay na gawe-gawe puedeng magbunga nin pakinabang sa saindo. An pagdinaogan sa trabaho tibaad grabe. An mga empleyadong midbid na suwayan, pirmeng huri, asin nandadaya sa parate sinisisante. An mga kompanya puede man na haleon sa trabaho an eksperyensiadong mga empleyado tanganing inaan an gastos. Kun an mga mayong trabaho maghanap nin bagong trabaho, tibaad maaraman ninda na an mga kompanya naghahapot sa dati nindang among tanganing aramon an saindang ugale sa trabaho, aktitud, asin eksperyensia. Dakol na Kristiano an mapangganang ikinarekomendar an sadiri ninda sa mga among paagi sa saindang magalang na gawe-gawe, mabining gubing, marahay na ugale, asin pambihirang Kristianong mga kualidad.

An pagkaonesto siring na kualidad​​—saro na tinatawan nin halangkaw na importansia kan dakol na among. Arog ni apostol Pablo, gusto niato na “gumawe nin sadiosan sa gabos na bagay.” (Hebreo 13:18) Sa sarong kompanya sa pagmina sa Ghana, isinumbong an pag-iikit. An superbisor sa treatment plant, na sarong Saksi, naretener sa saiyang trabaho mantang an iba sinisante. Taano? Naobserbaran kan mga administrador an saiyang pagkaonesto sa nag-aging mga taon. Aram man na marhay an saiyang kahigosan sa trabaho asin paggalang sa autoridad. Iyo, huli sa saiyang tanos na gawe-gawe dai sia nahale sa trabaho!

Ano pa an ibang mga bagay na puedeng gibohon nin sarong Kristiano tanganing ikarekomendar an saiyang sadiri sa paghanap nin trabaho? Makanood na magin eksperto sa ano man na trabaho na itinao sa saindo. (Talinhaga 22:29) Magtrabaho nin mahigos asin sa maatom na paagi. (Talinhaga 10:​4; 13:4) Trataron an saindong among asin superbisor sa trabaho na may paggalang. (Efeso 6:5) An pagigin nasa oras, pagkaonesto, pagigin episiente, asin kahigosan sa trabaho mga kualidad na pinahahalagahan nin mga among, asin an mga kualidad na iyan makatatabang sa saindo na makakua nin trabaho dawa kakadikit kan malalaogan na trabaho.

Mga Pribilehio sa Kongregasyon

Ngonyan orog kisa kasuarin man, kaipuhan an maygurang na mga lalaki tanganing mangenot sa Kristianong kongregasyon. An dahelan? Si Isaias naghula: “Pahiwasa an lugar kan saimong tolda. Asin paignitan sa sainda an mga tahob kan saimong tabernakulong grande.” (Isaias 54:2) Bilang kaotoban kan hulang ini, an pankinaban na kongregasyon ni Jehova padagos na naeeksperyensiahan an pag-oswag.

Kaya kun kamo sarong Kristianong lalaki, paano nindo ikarerekomendar an saindong sadiri bilang saro na kualipikadong maglingkod sa sarong nombradong katongdan? Estudyare an halimbawa kan hoben na si Timoteo. Si Lucas nagbareta na si Timoteo “marahay an patotoo . . . kan mga tugang sa Listra asin Iconio.” Iyo, paagi sa saiyang marahay na gawe-gawe, an hoben na lalaking ini ikinarekomendar an sadiri nia sa iba sa duwang magkalaen na siudad. Kun siring inimbitaran ni Pablo si Timoteo na ibanan sia sa ministeryong nagbibiahe.​​—Gibo 16:​1-4.

Paano an sarong lalaki ngonyan ‘makapaghihingoang maabot an katongdan nin paraataman’ sa tama, diosnon na paagi? Tunay nanggad na bakong paagi sa pagkampanya na nombrahan kundi paagi sa pagkultibar kan espirituwal na mga kualidad na kaipuhan sa siring na mga responsibilidad. (1 Timoteo 3:​1-​10, 12, 13; Tito 1:​5-9) Puede man niang ipaheling na sia “nagmamawot nin marahay na gibo” paagi sa pakikikabtang nin lubos sa gibohon na paghuhulit asin paggibo nin disipulo. (Mateo 24:​14; 28:​19, 20) An mga irinerekomendar an sadiri bilang responsableng Kristianong mga lalaki igwa nin sinserong pagmakolog sa ikararahay kan saindang espirituwal na mga tugang. Sinusunod ninda an sadol ni apostol Pablo: “Hirasan nindo an mga banal sono sa saindang mga pangangaipo. Sundan nindo an dalan nin pagkamapag-istimar.” (Roma 12:13) Paagi sa paggibo kan siring na mga bagay, an sarong Kristianong lalaki totoong ‘ikarerekomendar an saiyang sadiri bilang ministro nin Dios.’

Sa Gabos na Panahon

An pagrekomendar kan satong sadiri sa iba dai nangangahulogan nin pagsaginsagin o pagigin “mga nagpapanigo sa mga tawo.” (Efeso 6:6) Sa katapustapusi, iyan nangangahulogan nin pagrekomendar kan satong sadiri sa satong Kaglalang, si Jehova Dios, paagi sa maatom na pagsunod kan saiyang mga ley asin prinsipyo. Kun patataluboon nindo an saindong espirituwalidad asin pakokosogon an saindong relasyon ki Jehova Dios, maririparo kan iba an pag-oswag sa pagtratar nindo sa mga miembro kan saindong pamilya, mga katrabaho, asin kapwa mga Kristiano. Maoobserbaran man ninda an saindong karigonan asin pagkatimbang, an saindong marahay na paghusgar, an saindong abilidad na magsaabaga nin paninimbagan, asin an saindong kapakumbabaan. Huli kaiyan makakamtan nindo an saindang pagkamoot saka paggalang asin, an mas mahalaga, kakamtan nindo an pag-aprobar ni Jehova Dios huli ta irinerekomendar nindo an saindong sadiri sa iba!

[Nota sa Ibaba]

[Ritrato sa pahina 19]

Dakol na magurang an madonong na naghahapot manongod sa reputasyon kan saro na gustong agomon kan saindang aking lalaki o babae

[Ritrato sa pahina 20]

An sarong tugang na lalaki irinerekomendar an saiyang sadiri para sa mga pribilehio nin paglilingkod paagi sa pagigin makonsiderasyon sa iba