May Marahay daw na Nagigibo an Pamimibi?

KAIDTO, haros gabos nakamamate kan pangangaipo na mamibi. Sa katunayan, an mga miembro nin haros lambang relihiosong paniniwala namimibi nin odok. Halimbawa, rinibong beses kada aldaw, an sarong Budista tibaad inoorootro an pamibi na “minatubod ako ki Amida Buda.”

Huli sa nagpapadagos na mga problema sa bilog na daga, tama sanang maghapot: Ano an inaasahan kan mga tawo na magigibo paagi sa pamimibi? An gabos daw na pamibing ini may marahay na nagigibo?

Taano ta Namimibi an mga Tawo?

An dakol na taga Sirangan namimibi sa saindang mga apoon asin sa mga dios nin Sintoismo o Tao. Ginigibo ninda iyan sa paglaom na makapasar sa mga eksaminasyon sa eskuelahan, tumama sa ani, o maebitaran an mga helang. Paagi sa saindang mga paghihingoa, an mga Budista naglalaom na magkamit nin kaliwanagan. An mga Hindu namimibi nin odok sa saindang paboritong mga dios asin diosa para sa kaaraman, kayamanan, asin proteksion.

An nagkapirang Katoliko naglalaom na makatabang sa katawohan paagi sa pagdusay kan saindang buhay bilang mga monghe o madre sa sirradong mga monasteryo o kombento, na dayaday na namimibi. Minilyon na Katoliko an naghahagad nin pabor ki Maria paagi sa tinuom na mga pamibi, na tibaad sa tabang nin rosaryohan. Sa mga nasyon sa Sirangan, dakol an naggagamit nin mga prayer wheel. An mga Protestante inoorootro an mga tataramon sa Pamibi kan Kagurangnan, minsan ngani puede man nindang ipahayag an saindang mga saboot sa Dios nin gikan sa boot. Dakol na Judio an nagbibiahe nin harayo tanganing mamibi sa Solnopan na Lanob sa Jerusalem, na naglalaom para sa pagbabalik sa dati kan templo asin sa sarong panahon nin prosperidad asin katoninongan.

Minsan ngani minilyon an nagmamaigot sa pamimibi, an sosyedad nin tawo paorog nang paorog na dinadamat nin mga problema sa kadukhaan, adiksion, laglag na mga pamilya, krimen, asin guerra. Posible daw na an gabos na tawong ini dai namimibi sa tamang paagi? Huli sa bagay na iyan, may nagdadangog daw talaga sa mga pamibi?

May Nagdadangog daw sa mga Pamibi?

An mga pamibi mayo nin totoong marahay na magigibo kun dai iyan dinadangog. Kun an saro namimibi, minalataw na sia naniniwalang may saro na nagdadangog sa dai naheheling na rona nin mga espiritu. Minsan siring, an mga pamibi dai ikinapaaabot paagi sana sa boses. Dakol an naniniwala na may saro na kaya nganing basahon an mga kaisipan kan namimibi. Siisay daw kaya iyan?

Kun paano man nanggad minaluwas an mga kaisipan sa binilyon na neuron na minakompuesto kan cerebral cortex kan satong hotok sa pangenot sarong misteryo para sa mga parasiyasat. Pero rasonable na an Saro na nagdisenyo kan hotok kayang basahon an mga kaisipan na iyan. An saro na iyan daing iba kundi an satong Kaglalang, si Jehova Dios. (Salmo 83:18; Kapahayagan 4:11) An mga pamibi dapat na sa saiya ipaabot. Alagad tinatawan daw nin atension ni Jehova an gabos na siring na pamibi?

Dinadangog daw an Gabos na Pamibi?

Si Hadeng David kan suanoy na Israel sarong tawo na namimibi. Bilang pinasabngan nin Dios na salmista, sia nag-awit: “O Paradangog nin pamibi, sa saimo an mga tawo nin gabos na laman madorolok.” (Salmo 65:2) Nasasabotan ni Jehova an mga pamibi na sinasambit sa arin man kan rinibong lenguahe kan katawohan. An bagay na daing isip nin tawo na kayang atenderan an kadakol na impormasyon dai nangangahulogan na dai kaya nin Dios na tawan nin atension an gabos na namimibi sa saiya sa inaakong paagi.

Pero ihinayag ni Jesu-Cristo—saro man na tawo na namimibi—na bakong gabos na pamibi nasosonoan nin Dios. Mangnoha an sinabi ni Jesus manongod sa popular na ugale kan panahon na idto na pag-orootro nin tinuom na mga pamibi. Segun sa Katolikong Jerusalem Bible, sia nagsabi: “Sa saimong mga pamibi dai ka magtiwatiwa arog kan mga pagano, huli ta hinohona ninda na sa paggamit nin dakol na tataramon dadangogon sinda.” (Mateo 6:7) Dai kita makaaasa na hihinanyogon ni Jehova an mga pamibi na dai nagpapahayag kan satong totoong mga saboot.

Sinasabi kun taano ta may mga pamibi na dai nasosonoan nin Dios, an sarong talinhaga sa Biblia nagsasabi: “An irinarayo an saiyang talinga tanganing dai makadangog kan ley—minsan an saiyang pamibi bagay na makauuyam nin makuri.” (Talinhaga 28:9) An saro pang talinhaga nagsasabi: “Si Jehova harayo sa mga maraot, alagad an pamibi kan mga matanos saiyang dinadangog.” (Talinhaga 15:29) Kan panahon na an mga namomoon sa suanoy na Juda makagibo nin magabat na pagkakasala, si Jehova nagpahayag: “Kun binibiklad nindo an saindong mga palad, tinatago ko an sakong mga mata sa saindo. Minsan pa mamibi kamo nin dakol, dai ako maghihinanyog; pano nin dugo an saindong mga kamot.”—Isaias 1:1, 15.

May ibang sinambit si apostol Pedro na puedeng magin dahelan na dai akoon nin Dios an mga pamibi. Si Pedro nagsurat: “Kamong mga agom na lalaki, padagos na makiiba sa siring na paagi sa [saindong agom na babae] oyon sa kaaraman, na tinatawan sinda nin onra siring sa lalagan na mapapasaon, an babae, huli ta kamo man mga paramana sa kaibanan ninda kan dai na kutana maninigong biyaya nin buhay, tanganing an saindong mga pamibi dai maolang.” (1 Pedro 3:7) An mga pamibi nin sarong lalaki na nag-iignoro sa hatol na iyan puedeng sagkod sa kisame sana makaabot!

Malinaw nanggad kun siring na may mga kahagadan na dapat na aboton tanganing dangogon an mga pamibi. Minsan siring, dakol na namimibi an mayo nin pakilabot manongod sa paggibo kan kahagadan nin Dios sa sato. Iyan an dahelan na an labi-labing pagigin odok sa pamimibi dai nagbunga nin mas marahay na kinaban.

Kun siring, ano an kahagadan nin Dios tanganing dangogon an satong mga pamibi? An simbag may labot sa sato mismong dahelan sa pamimibi. Sa katunayan, kun boot niatong maaraman kun baga may marahay na nagigibo an mga pamibi, dapat niatong masabotan an katuyohan kaiyan. Taano ta pinagin posible ni Jehova na makaolay niato sia?

[Picture Credit Line sa pahina 3]

G.P.O., Jerusalem