“Papagdanayon na Marahay an Saindong Gawe-Gawe sa Tahaw nin mga Nasyon”
“Tawan nin onra an gabos na klase nin tawo, mamoot kamo sa bilog na kasararoan nin mga tugang.”—1 PEDRO 2:17.
1, 2. (a) Ano an ikinomento nin sarong kabareta sa peryodiko manongod sa Mga Saksi ni Jehova? (b) Taano ta hinihingoa kan Mga Saksi ni Jehova na papagdanayon an halangkaw na mga pamantayan nin paggawe?
NAGKAPIRANG taon na an nakaagi, an sarong kabareta sa peryodiko sa Amarillo, Texas, E.U.A., nagdalaw sa laen-laen na simbahan sa lugar na iyan asin ibinareta an saiyang nadiskobre. Sarong grupo an natadom sa isip nia. Sia nagsabi: “Sa laog nin tolong taon, inatenderan ko an taonan na mga kombension kan Mga Saksi ni Jehova sa Amarillo Civic Center. Mantang ako nakikiibaiba sa sainda, nungka akong nakaheling nin siisay man na nagsosolo nin sigarilyo, nagbubukas nin serbesa, o nagraraway. Sinda an pinakamalinig, pinakatoltol, mabini an gubing, marahay an ugaleng grupo nin mga tawo na nabisto ko kasuarin man.” May kaagid na mga komento manongod sa Mga Saksi ni Jehova na parateng napupublikar. Taano an Mga Saksi ni Jehova ta parateng inoomaw kan mga tawo na bako man nindang kapareho an pagtubod?
2 Sa parate, an banwaan nin Dios inoomaw huli sa saindang marahay na gawe-gawe. Minsan ngani nagrururo an mga pamantayan sa pankagabsan, minamansay kan Mga Saksi ni Jehova an halangkaw na mga pamantayan nin paggawe bilang sarong obligasyon, kabtang kan saindang pagsamba. Aram ninda na an saindang mga paghiro may epekto ki Jehova asin sa saindang mga tugang na Kristiano asin na an saindang marahay na gawe-gawe nagrerekomendar kan katotoohan na saindang ihinuhulit. (Juan 15:8; Tito 2:7, 8) Kun siring, helingon niato kun paano niato mapagdadanay an satong marahay na gawe-gawe asin sa siring na paagi padagos na masuportaran an marahay na dangog ni Jehova asin kan saiyang mga Saksi saka kun paano kita makikinabang sa paggibo kaiyan.
An Kristianong Pamilya
3. Sa ano kaipuhan na protehiran an Kristianong mga pamilya?
3 Konsideraron niato an satong gawe-gawe sa laog kan pamilya. An librong Die Neuen Inquisitoren: Religionsfreiheit und Glaubensneid (An Bagong mga Inkisidor: Katalingkasan sa Relihion Asin Relihiosong Pagkauri), ni Gerhard Besier asin Erwin K. Scheuch, nagsasabi: “Para sa [Mga Saksi ni Jehova] an pamilya sarong bagay na espesyalmenteng dapat protehiran.” Totoo an sinabing iyan, asin ngonyan kadakol kan bagay na kaipuhan kan pamilya an proteksion. May mga aki na “masumbikal sa mga magurang” asin mga nasa edad na na “dai nin natural na kapadangatan” o “mayong pagpopogol sa sadiri.” (2 Timoteo 3:2, 3) Sa mga pamilya nangyayari an kadahasan sa agom, inaabuso o pinababayaan nin mga magurang an saindang mga aki, asin an mga aki nagrerebelde, nagdodroga asin naggigibo nin inmoralidad, o naglalayas sa harong. An gabos na ini resulta kan mapanlaglag na impluwensia kan ‘espiritu kan kinaban.’ (Efeso 2:1, 2) Kaipuhan niatong protehiran an satong mga pamilya tumang sa espiritung iyan. Paano? Paagi sa paghimate sa hatol asin instruksion ni Jehova sa mga miembro nin pamilya.
4. Ano an mga paninimbagan kan mga miembro nin Kristianong pamilya sa balang saro?
4 Aram kan mga mag-agom na Kristiano na igwa sinda nin emosyonal, espirituwal, asin pisikal na obligasyon sa balang saro. (1 Corinto 7:3-5; Efeso 5:21-23; 1 Pedro 3:7) An Kristianong mga magurang igwa nin magabat na mga paninimbagan sa saindang mga aki. (Talinhaga 22:6; 2 Corinto 12:14; Efeso 6:4) Asin mantang nagdadakula an mga aki sa Kristianong harong, nanonodan ninda na sinda igwa man nin mga obligasyon. (Talinhaga 1:8, 9; 23:22; Efeso 6:1; 1 Timoteo 5:3, 4, 8) An pag-otob sa pampamilyang mga obligasyon nagkakaipo nin paghihingoa, kapanugaan, asin espiritu nin pagkamoot asin pagsasakripisyo sa sadiri. Minsan siring, kun inootob kan gabos na miembro nin pamilya an tao nin Dios na mga obligasyon ninda, sinda nagigin bendisyon sa balang saro asin sa kongregasyon. Orog na mahalaga, tinatawan ninda nin onra an Kagtugdas kan pamilya, si Jehova Dios.—Genesis 1:27, 28; Efeso 3:15.
An Kristianong Kasararoan nin Magturugang
5. Anong mga bendisyon an nakakamtan niato sa pakikiasosyar sa mga kapwa Kristiano?
5 Bilang mga Kristiano, igwa man kita nin mga paninimbagan sa mga kapagtubod sa kongregasyon asin, sa kahurihurihi, sa mga minakompuesto kan “bilog na kasararoan nin . . . mga tugang sa kinaban.” (1 Pedro 5:9) An relasyon niato sa kongregasyon mahalagang marhay para sa satong espirituwal na salud. Kun kita nakikiasosyar sa mga kapwa Kristiano, nakakamtan niato an saindang nakapakokosog na pakikiiba saka an masustansiang espirituwal na kakanon hale sa “fiel asin may diskresion na oripon.” (Mateo 24:45-47) Kun igwa kita nin mga problema, puede kitang dumolok sa satong mga tugang para sa tamang hatol basado sa mga prinsipyo sa Kasuratan. (Talinhaga 17:17; Eclesiastes 4:9; Santiago 5:13-18) Kun kita nangangaipo, dai kita binabayaan kan satong mga tugang. Kanigoan na bendisyon an magin kabtang kan organisasyon nin Dios!
6. Paano ipinaheling ni Pablo na igwa kita nin mga paninimbagan sa ibang mga Kristiano?
6 Minsan siring, dai kita nasa kongregasyon tangani sanang mag-ako; yaon man kita dian tangani na magtao. Iyo nanggad, nagsabi si Jesus: “Igwang orog na kaogmahan sa pagtao kisa pag-ako.” (Gibo 20:35) Idinoon ni apostol Pablo an espiritu nin pagtatao kan sia sumurat: “Mangapot kita nin higot sa pagpapahayag sa publiko kan satong paglaom na daing pag-urong-sulong, huli ta sia na nanuga fiel. Asin konsideraron niato an lambang saro tanganing mandagka sa pagkamoot asin sa marahay na mga gibo, na dai pagpabayaan an satong pagtorotiripon, siring kan kaugalean nin nagkapira, kundi na magparinigonan nin boot, asin lalo na ta naheheling nindo na an aldaw harani na.”—Hebreo 10:23-25.
7, 8. Paano niato ipinaheheling an pagigin matinao sa laog kan satong kongregasyon sagkod sa mga Kristiano sa ibang nasyon?
7 Sa laog kan kongregasyon, kita ‘nagpapahayag kan satong paglaom’ kun kita nagkokomento durante kan pagtiripon o nakikikabtang sa iba pang mga paagi sa programa. An mga kontribusyon na iyan nakaparirigon nanggad sa boot kan satong mga tugang. Pinaririgon ta man an boot ninda paagi sa satong pakikipag-olay bago asin pakatapos kan pagtiripon. Iyan panahon na puede niatong pakosogon an mga maluya, rangahon an mga nagmomondo nin makuri, asin rangahon an mga may helang. (1 Tesalonica 5:14) An sinserong mga Kristiano buka an palad sa klaseng iyan nin pagtatao, na iyo an dahelan kun taano ta kadakol kan enot pa sanang nakaatender sa satong mga pagtiripon an naghahanga sa pagkamoot na naririsa ninda sa tahaw niato.—Salmo 37:21; Juan 15:12; 1 Corinto 14:25.
8 Pero, an satong pagkamoot bako sanang sa satong sadiring kongregasyon. Kaiba dian an bilog na kasararoan kan satong mga tugang sa bilog na kinaban. Halimbawa, iyan an dahelan kun taano ta sa lambang Kingdom Hall igwa nin kahon nin kontribusyon para sa Pondo sa Kingdom Hall. An satong sadiring Kingdom Hall tibaad marahay an kamugtakan, alagad aram niato na rinibong kapwa Kristiano sa ibang nasyon an mayo nin angay na lugar na pinagtitiriponan. Kun kita nagkokontribwir para sa Pondo sa Kingdom Hall, ipinaheheling niato an satong pagkamoot sa siring na mga indibiduwal minsan ngani tibaad dai niato sinda midbid sa personal.
9. Ano an pundamental na dahelan kaya nagkakaminorootmootan an Mga Saksi ni Jehova?
9 Taano ta nagkakaminorootmootan an Mga Saksi ni Jehova? Bueno, pinagbotan sinda ni Jesus na gibohon iyan. (Juan 15:17) Asin an pagkaminorootmootan ninda nagpapatunay na an espiritu nin Dios naghihiro sa sainda bilang mga indibiduwal asin bilang grupo. An pagkamoot kabtang kan “bunga kan espiritu.” (Galacia 5:22, 23) Mantang an Mga Saksi ni Jehova nag-aadal sa Biblia, nag-aatender sa Kristianong mga pagtiripon, asin dayaday na namimibi sa Dios, an pagkamoot nagigin natural na sana sa sainda baga man sinda nabubuhay sa sarong kinaban kun saen ‘an pagkamoot nin dakol malipot na.’—Mateo 24:12.
Relasyon sa Sekular na Kinaban
10. Ano an paninimbagan niato sa sekular na kinaban?
10 An pagkasambit ni Pablo kan “pagpapahayag sa publiko kan satong paglaom” nagpapagirumdom sa sato kan saro pang paninimbagan. Kabale sa pagpapahayag na ini sa publiko an paghuhulit kan maogmang bareta sa mga bako pa niatong Kristianong tugang. (Mateo 24:14; 28:19, 20; Roma 10:9, 10, 13-15) An siring na paghuhulit saro pang akto nin pagtatao. An pakikikabtang dian nagkakaipo nin panahon, kosog, pag-andam, pagsasanay, asin paggamit nin personal na mga rekurso. Pero, nagsurat man si Pablo: “Ako may utang sa mga Griego sagkod sa mga Barbaro, sa mga madonong sagkod sa mga daing isip: kaya ako galagang ipahayag man an maogmang bareta sa saindo na yaon sa Roma.” (Roma 1:14, 15) Arog ki Pablo, logod na dai kita magin kuripot sa pagbayad niato kan “utang” na ini.
11. Anong duwang prinsipyo sa Kasuratan an naggigiya kun dapit sa satong relasyon sa kinaban, alagad ta ano an rinerekonoser niato?
11 Igwa daw kita nin iba pang mga paninimbagan sa mga bakong kapagtubod? Igwa nanggad. Siempre, rinerekonoser niato na “an bilog na kinaban namumugtak sa kapangyarihan kan maraot.” (1 Juan 5:19) Aram niato na si Jesus nagsabi dapit sa saiyang mga disipulo: “Sinda bakong kabtang kan kinaban, kun paanong ako bakong kabtang kan kinaban.” Pero, nag-eerok kita sa kinaban, naghahanap-buhay dian, asin nag-aako nin mga serbisyo hale dian. (Juan 17:11, 15, 16) Kaya igwa kita nin mga obligasyon sa sekular na kinaban. Ano an mga iyan? Sinimbag ni apostol Pedro an hapot na iyan. Dai mahaloy bago laglagon an Jerusalem, nagsurat sia sa mga Kristiano sa Asia Minor, asin an sarong halipot na kotasyon sa surat na iyan nagtatabang sa sato na magkaigwa nin balanseng relasyon sa kinaban.
12. Sa anong paagi “mga dayo asin nakiiistar nin temporaryo” an mga Kristiano, asin bilang siring, sa ano sinda maninigong lumikay?
12 Primero, si Pedro nagsabi: “Mga namomotan, pinakasasadol ko kamo bilang mga dayo asin nakiiistar nin temporaryo na padagos na lumikay sa mga mawot nin laman, na iyo mismo an nakikipaglaban sa kalag.” (1 Pedro 2:11) Sa espirituwal na sentido, an tunay na mga Kristiano “mga dayo asin nakiiistar nin temporaryo” sa dahelan na an saindang buhay totoong nakasentro sa paglaom na buhay na daing katapusan—an mga linahidan nin espiritu sa langit asin an “ibang karnero” sa sarong daganon na paraiso sa ngapit. (Juan 10:16; Filipos 3:20, 21; Hebreo 11:13; Kapahayagan 7:9, 14-17) Pero ano an mga mawot nin laman? Kabale digdi an mga bagay na arog kan pagmawot na yumaman, pagmawot na magin prominente, inmoral na mga pagmawot sa sekso, asin an mga pagmawot na inaapod na “pagkauri” asin “kaaraan.”—Colosas 3:5; 1 Timoteo 6:4, 9; 1 Juan 2:15, 16.
13. Paano “nakikipaglaban sa [satong] kalag” an mga mawot nin laman?
13 An siring na mga pagmawot talagang “nakikipaglaban sa [satong] kalag.” Rinaraot kaiyan an satong relasyon sa Dios asin sa siring isinasapeligro an satong Kristianong paglaom (an satong “kalag,” o buhay). Halimbawa, kun kinukultibar niato an interes sa inmoral na mga bagay, paano niato ikadodolot an satong sadiri “na siring sa buhay na atang, banal, inaako nin Dios”? Kun maholog kita sa siod nin materyalismo, paano niato ‘hinahanap nguna an kahadean’? (Roma 12:1, 2; Mateo 6:33; 1 Timoteo 6:17-19) An mas marahay na gibohon iyo na sunodon an halimbawa ni Moises, talikdan an mga pan-akit kan kinaban, asin enoton sa satong buhay an paglilingkod ki Jehova. (Mateo 6:19, 20; Hebreo 11:24-26) Iyan importanteng paagi tanganing magkaigwa nin balanseng relasyon sa kinaban.
‘Papagdanayon an Marahay na Gawe-gawe’
14. Taano ta pinagmamaigotan niato bilang mga Kristiano na papagdanayon an marahay na gawe-gawe?
14 An saro pang mahalagang marhay na giya manonompongan sa sunod na mga tataramon ni Pedro: “Papagdanayon na marahay an saindong gawe-gawe sa tahaw nin mga nasyon, tanganing, sa mga bagay na ipinagtataram ninda kontra sa saindo na garo baga kamo naggibo nin maraot, tibaad huli sa saindong marahay na mga gibo na saindang naheheling pamurawayon ninda an Dios sa aldaw kan saiyang pagsiyasat.” (1 Pedro 2:12) Bilang mga Kristiano, pinagmamaigotan niato na magin arogan. Nag-aadal kitang marhay sa eskuelahan. Sa satong pinagtatrabawohan, kita mahigos asin onesto—dawa kun an satong among garo baga nagigin sobra na man. Sa sarong nababangang pamilya, an may pagtubod na agom na lalaki o babae lalo nang naghihingoa na sunodon an Kristianong mga prinsipyo. Bako iyan na pirmeng pasil, alagad aram niato na an satong arogan na paggawe nakapaoogma ki Jehova asin sa parate may marahay na epekto sa mga bakong Saksi.—1 Pedro 2:18-20; 3:1.
15. Paano niato naaaraman na dakol an nagrerekonoser sa halangkaw na pamantayan nin paggawe kan Mga Saksi ni Jehova?
15 An pagigin mapanggana kan kadaklan sa Mga Saksi ni Jehova sa pagpapadanay nin arogan na mga pamantayan naheheling sa mga komento manongod sa sainda na napublikar na sa nakaaging mga taon. Halimbawa, an Il Tempo sa Italia nagbareta: “An mga tawo na may katrabahong mga Saksi ni Jehova nagsasabi na sinda onestong mga trabahador, na kombensidong marhay sa saindang pagtubod kaya sinda tibaad garo bangkag dian; minsan siring, sinda maninigo sa paggalang huli sa saindang moral na integridad.” An Herald sa Buenos Aires, Argentina, nagsabi: “An Mga Saksi ni Jehova napatunayan sa laog nin dakol na taon bilang mahihigos, seryoso, maekonomiya, asin matatakton sa Dios na mga siudadano.” An intelektuwal na Ruso na si Sergei Ivanenko nagsabi: “An Mga Saksi ni Jehova midbid sa bilog na kinaban bilang mga tawong dai matatatsaran sa pagkuyog sa ley asin orog na sa saindang pagigin eskrupuloso sa pagbayad nin buhis.” An manedyer sa sarong pasilidad sa Zimbabwe na ginamit kan Mga Saksi ni Jehova sa saindang kombension nagsabi: “Naheling ko an nagkapirang Saksi na pinupurot an mga papel asin naglilinig sa mga kasilyasan. An pasilidad binayaan na mas malinig kisa dati. An mga tinedyer nindo may prinsipyo. Kutana an bilog na kinaban pano nin mga Saksi ni Jehova.”
Kristianong Pagpasakop
16. Ano an relasyon niato sa sekular na mga autoridad, asin taano?
16 Naunabihan man ni Pedro an manongod sa satong relasyon sa sekular na mga autoridad. Sia nagsabi: “Dahel sa Kagurangnan magpasakop kamo sa gabos na tawong linalang: baga man sa hade bilang superyor o sa mga gobernador bilang isinugo nia na magkastigo sa mga paragibo nin maraot alagad mag-omaw sa mga paragibo nin marahay. Huli ta siring an kabotan nin Dios, na sa paggibo nin marahay mapaontok nindo an mangmang na orolay kan bakong makatanosan na mga tawo.” (1 Pedro 2:13-15) Inaapresyar niato an mga pakinabang na inaako hale sa toltol na gobyerno, asin sa paggiya kan mga tataramon ni Pedro, kinukuyog niato an mga ley kaiyan asin nagbabayad kita nin buhis. Minsan ngani rinerekonoser niato an tao nin Dios na deretso nin mga gobyerno na padusahan an mga paralapas nin ley, sa pangenot kaya kita nagpapasakop sa sekular na autoridad “dahel sa Kagurangnan.” Kabotan iyan nin Dios. Dugang pa, habo niatong tawan nin katuyawan an ngaran ni Jehova kun kita mapapadusahan huli sa paggibo nin sala.—Roma 13:1, 4-7; Tito 3:1; 1 Pedro 3:17.
17. Kun kinokontra kita nin “bakong rasonableng mga tawo,” sa ano kita makakokompiar?
17 Makamomondo, an nagkapirang “bakong rasonableng mga tawo” na nasa autoridad linalamag kita o kinokontra kita sa ibang paagi—arog kan pagpalakop nin mga kampanya tanganing pakaraoton kita. Pero, sa itinalaan na panahon ni Jehova, an saindang mga kaputikan pirmeng nabubuyagyag, asin an saindang “mangmang na orolay” napaoontok nanggad. An satong rekord nin Kristianong gawe-gawe an nagpapatunay. Iyan an dahelan na an onestong mga opisyal sa gobyerno parateng tinatawan kita nin komendasyon bilang mga paragibo nin marahay.—Roma 13:3; Tito 2:7, 8.
Mga Oripon nin Dios
18. Bilang mga Kristiano, sa anong mga paagi niato malilikayan na abusohon an satong katalingkasan?
18 Nagpatanid ngonyan si Pedro: “Magin kamong siring sa mga tawong talingkas, alagad pinangangaptan an saindong katalingkasan, bakong bilang pantahob sa karatan, kundi bilang mga oripon nin Dios.” (1 Pedro 2:16; Galacia 5:13) Ngonyan, an satong kaaraman sa katotoohan sa Biblia nagpapatalingkas sa sato sa falsong relihiosong katokdoan. (Juan 8:32) Dugang pa, igwa kita nin libreng kabotan, asin puede kitang gumibo nin mga pagpili. Pero, dai niato inaabuso an satong katalingkasan. Kun naggigibo nin mga pagpili manongod sa mga pag-iriba, paggubing, pag-alinyar, aling-alingan—pati pagkakan asin inomon—ginigirumdom niato na an tunay na mga Kristiano oripon nin Dios, dai pinaoogma an sainda man sana. Pinipili niato na maglingkod ki Jehova imbes na magin oripon kan satong sadiring mga mawot nin laman o mga moda asin uso sa kinaban.—Galacia 5:24; 2 Timoteo 2:22; Tito 2:11, 12.
19-21. (a) Paano niato minamansay an mga nasa katongdan nin sekular na autoridad? (b) Paano an nagkapira nagpaheling nin ‘pagkamoot sa bilog na kasararoan nin mga tugang’? (c) Ano an pinakamahalagang paninimbagan niato?
19 Si Pedro padagos na nagsasabi: “Tawan nin onra an gabos na klase nin tawo, mamoot kamo sa bilog na kasararoan nin mga tugang, matakot kamo sa Dios, tawan nin onra an hade.” (1 Pedro 2:17) Huling tinotogotan ni Jehova an mga tawo na magkapot nin manlaenlaen na mga katongdan na may autoridad, tinatawan niato nin angay na onra an siring na mga tawo. Namimibi pa ngani kita may labot sa sainda, sa katuyohan na kita togotan man logod na ipadagos an satong ministeryo na may katoninongan asin diosnon na debosyon. (1 Timoteo 2:1-4) Minsan siring, kadungan kaiyan ‘namomoot kita sa bilog na kasararoan nin mga tugang.’ Pirme kitang naghihingoang gibohon an para sa ikararahay, bakong ikararaot, kan satong Kristianong mga tugang.
20 Halimbawa, kan an sarong nasyon sa Aprika nababanga huli sa etnikong kadahasan, narisang marhay an Kristianong paggawe kan mga Saksi ni Jehova. An peryodikong Reformierte Presse sa Switzerland nagbareta: “Kan 1995, napatunayan kan African Rights . . . na may partisipasyon an gabos na iglesia [sa ralaban] apuera sa Mga Saksi ni Jehova.” Kan mabaretaan sa ibang parte kan kinaban an makaturotristeng mga pangyayari, an mga Saksi ni Jehova sa Europa tolos-tolos na nagpadara nin mga pagkakan asin asistensia medikal sa saindang mga tugang asin sa iba pa sa nasyon na iyan na nagsasakit nin makuri. (Galacia 6:10) Hinimate ninda an mga tataramon sa Talinhaga 3:27: “Dai ipanguri an marahay sa mga nanonongdan kaiyan, kun nasa kapangyarihan kan saimong kamot na gibohon iyan.”
21 Pero igwa nin paninimbagan na orog pang mahalaga kisa onra na utang niato sa arin man na sekular na autoridad asin maski sa pagkamoot na utang niato sa satong mga tugang. Ano iyan? Si Pedro nagsabi: “Matakot kamo sa Dios.” An utang niato ki Jehova nakalalabi nanggad kisa utang niato sa siisay man na tawo. Taano man? Asin paano niato mababalanse an satong obligasyon sa Dios asin an obligasyon na utang niato sa sekular na mga autoridad? An mga hapot na ini sisimbagon sa minasunod na artikulo.
Nagigirumdoman daw Nindo?
• Ano an mga paninimbagan kan mga Kristiano sa laog kan pamilya?
• Paano niato ikapaheheling an pagigin matinao sa kongregasyon?
• Ano an mga paninimbagan niato sa sekular na kinaban?
• Ano an nagkapirang pakinabang na bunga kan pagpapadanay niato nin halangkaw na pamantayan nin paggawe?
[Ritrato sa pahina 9]
Paano puedeng paggikanan nin dakulang kagayagayahan an Kristianong pamilya?
[Mga ritrato sa pahina 10]
Taano ta nagkakaminorootmootan an Mga Saksi ni Jehova?
[Mga ritrato sa pahina 10]
Puede daw kitang magpaheling nin pagkamoot sa satong mga tugang dawa dai niato sinda midbid sa personal?