Hula ni Isaias—Liwanag Para sa Bilog na Katawohan II
Kapitulo Nuebe: Tinotokdoan Kita ni Jehova Para sa Satong Ikararahay
1. Paano naghihimate an mga madonong sa mga tataramon ni Jehova?
KUN si Jehova nagtataram, an mga madonong naghihinanyog na may dakulang paggalang asin hinihimate an saiyang mga tataramon. An gabos na sinasabi ni Jehova para sa satong kapakinabangan, asin sia interesadong marhay sa satong ikararahay. Halimbawa, kanigoan kanakaoogmang isipon kun paano kinaolay ni Jehova an saiyang suanoy na katipan na banwaan: “O kun ika sana kutana totoong matao nin atension sa sakong mga togon!” (Isaias 48:18) An probadong halaga kan katokdoan nin Dios maninigong magpahiro sa sato na maghinanyog sa saiya asin sunodon an saiyang paggiya. An rekord nin naotob na hula hinahale an ano man na pagduda sa determinasyon ni Jehova na otobon an saiyang mga panuga.
2. Para kiisay isinurat an mga tataramon sa Isaias 48, asin siisay pa an puedeng makinabang dian?
2 An mga tataramon sa ika-48 kapitulo kan libro nin Isaias minalataw na isinurat para sa kapakanan kan mga Judio na magigin mga desterrado kaidto sa Babilonya. Dugang pa, an mga tataramon na ini may mensahe na dai puedeng palimanlimanan nin mga Kristiano ngonyan. Sa Isaias kapitulo 47, ihinula kan Biblia an pagbagsak nin Babilonya. Ngonyan ilinaladawan ni Jehova an nasa isip nia para sa mga desterradong Judio sa siudad na iyan. Namomondo si Jehova sa pagsaginsagin kan saiyang piniling banwaan asin kan saindang may katagasan na pagsayumang tumubod sa saiyang mga panuga. Pero, gusto pa man giraray niang tokdoan sinda para sa ikararahay ninda. Naheling nia antes pa an sarong peryodo nin pagdalisay na magbubunga nin pagkabalik nin fiel na natatada sa saindang dagang tinuboan.
3. Ano an sala sa pagsamba kan Juda?
3 Abaa kagrabe kan pagsuhay kan banwaan ni Jehova sa dalisay na pagsamba! An enot na mga tataramon ni Isaias nakapapepensar: “Dangoga ini, O harong ni Jacob, kamong nag-aapod sa saindong sadiri kan ngaran na Israel asin luminuwas hale sa mismong katubigan nin Juda, kamong nagsusumpa sa ngaran ni Jehova asin nagsasambit pa ngani sa Dios kan Israel, bakong sa katotoohan asin bakong sa katanosan. Huli ta inapod ninda an saindang sadiri bilang naggikan sa banal na siudad, asin sa Dios kan Israel suminandig sinda, Jehova nin mga hukbo an saiyang ngaran.” (Isaias 48:1, 2) Kanigoan kamapagsaginsagin! An ‘panunumpa sa ngaran ni Jehova’ malinaw na paggamit man sana kan ngaran nin Dios sa pormalistikong paagi. (Sofonias 1:5) Bago sinda nadistiero sa Babilonya, an mga Judio nagsamba ki Jehova sa “banal na siudad,” an Jerusalem. Alagad an saindang pagsamba bakong sinsero. An saindang puso harayong marhay sa Dios, asin an saindang mga akto nin pagsamba “bakong sa katotoohan asin bakong sa katanosan.” Mayo sinda kan pagtubod kan mga patriarka.—Malaquias 3:7.
4. Anong klaseng pagsamba an nakapaoogma ki Jehova?
4 An mga tataramon ni Jehova nagpapagirumdom sa sato na an pagsamba dai maninigong magin mekanikal. Iyan dapat na odok sa puso. An paramas sanang paglilingkod—na tibaad ginigibo tangani sanang paogmahon o pahangaon an iba—dai ikabibilang na mga “gibo nin diosnon na debosyon.” (2 Pedro 3:11) An pagsabi sana nin saro na sia sarong Kristiano bakong iyo mismo an nagpapangyari na akoon nin Dios an saiyang pagsamba. (2 Timoteo 3:5) Mahalagang marhay an pagrekonoser na si Jehova nag-eeksister, alagad kapinonan sana iyan. An gusto ni Jehova pagsamba na bilog na kalag asin motibado nin hararom na pagkamoot saka pag-apresyar.—Colosas 3:23.
Paghula nin Bagong mga Bagay
5. Ano an nagkapira sa “enot na mga bagay” na ihinula ni Jehova?
5 Tibaad kaipuhan na pagirumdomon an mga Judiong idto na nasa Babilonya. Huli kaini, ipinagirumdom na naman sa sainda ni Jehova na sia an Dios nin totoong hula: “An enot na mga bagay sinabi ko poon pa kan panahon na idto, asin hale sa sadiri kong ngoso luminuwas an mga iyan, asin padagos ko iyan na ipinadadangog. Bigla akong huminiro, asin an mga bagay nangyari.” (Isaias 48:3) “An enot na mga bagay” iyo an mga bagay na ginibo na nin Dios, siring baga kan pagpatalingkas sa mga Israelita hale sa Egipto asin pagtao sa sainda kan Dagang Panuga bilang pamana. (Genesis 13:14, 15; 15:13, 14) An siring na mga prediksion minaluwas sa ngoso nin Dios; iyan naggigikan sa Dios. Pinangyayari nin Dios na madangog nin mga tawo an saiyang mga dekreto, asin an saindang nadadangog maninigong magpahiro sa sainda na magin makinuyog. (Deuteronomio 28:15) Bigla siang minahiro tanganing gibohon an saiyang ipinanuga. An bagay na si Jehova an Makakamhan sa Gabos garantiya na maootob an saiyang katuyohan.—Josue 21:45; 23:14.
6. Sagkod saen nagin “sutil asin rebelde” an mga Judio?
6 An banwaan ni Jehova nagin “sutil asin rebelde.” (Salmo 78:8) Prangka niang sinabi sa sainda: “Ika matagas asin . . . an saimong liog kapit na batbat asin an saimong angog tanso.” (Isaias 48:4) Siring sa mga metal, an mga Judio dai basta-basta natitiko—masakit sumunod. Iyan an sarong dahelan kun taano ta ihinayag ni Jehova an mga bagay bago iyan mangyari. Ta kun dai, an saiyang banwaan masabi manongod sa mga bagay na ginibo ni Jehova: “An sakong idolo an naggibo kaiyan, asin an sakong inukit na imahen asin an sakong minoldeng imahen an nagboot kaiyan.” (Isaias 48:5) An sinasabi daw ngonyan ni Jehova magkakaigwa nin ano man na epekto sa bakong fiel na mga Judio? An Dios nagsasabi sa sainda: “Nadangog mo. Masdan mo iyan gabos. Kun para sa saindo, dai daw nindo iyan sasabihon? Ipinadangog ko sa saimo an bagong mga bagay hale sa presenteng panahon, mga bagay ngani na itinagama, na dai mo pa naaraman. Sa presenteng panahon iyan lalalangon, asin bakong hale sa panahon na iyan, mga bagay ngani na bago kan aldaw na ini dai mo pa nadangog, tanganing dai mo sabihon, ‘Uya! Aram ko na iyan.’”—Isaias 48:6, 7.
7. Ano an dapat na admitiron kan desterradong mga Judio, asin ano an malalaoman ninda?
7 Haloy pa isinurat na ni Isaias an prediksion manongod sa pagbagsak kan Babilonya. Ngonyan, bilang mga desterrado sa Babilonya, an mga Judio makahulang pinagbotan na horophoropon an kaotoban kan prediksion. Madedeharan daw ninda na si Jehova an Dios nin naotob na hula? Asin huling naheling asin nadangog kan mga nag-eerok sa Juda na si Jehova sarong Dios nin katotoohan, bako daw na dapat man nindang ipahayag sa iba an katotoohan na ini? Ihinula kan ihinayag na tataramon ni Jehova an bagong mga bagay na dai pa nangyayari, siring baga kan pagkongkistar ni Ciro sa Babilonya asin an pagkabutas kan mga Judio. (Isaias 48:14-16) An siring na nakabibiglang mga pangyayari garo baga bigla na sanang nangyari. Mayo nin siisay man an puedeng nakaheling kaini antes pa paagi sana sa pag-estudyar sa dalagan nin mga pangyayari sa kinaban. Iyan nangyari na garo mayong maliwanag na dahelan. Siisay an nagpangyari sa mga ini? Mantang ihinula na iyan ni Jehova mga 200 na taon antes pa, risang-risa an simbag.
8. Anong bagong mga bagay an linalaoman kan mga Kristiano ngonyan, asin taano ta igwa sinda nin lubos na kompiansa sa makahulang tataramon ni Jehova?
8 Dugang pa, inootob ni Jehova an saiyang tataramon oyon sa saiya mismong iskedyul. Pinatutunayan kan naotob na mga hula an saiyang pagka-Dios bako sanang sa mga Judio kan suanoy na mga panahon kundi siring man sa mga Kristiano ngonyan. An rekord nin balakid na hula na naotob kan nakaagi—“an enot na mga bagay”—garantiya na an bagong mga bagay na ipinanuga ni Jehova—an maabot na “dakulang kahorasaan,” an pagkaligtas kan “sarong dakulang kadaklan” sa kahorasaan na iyan, an “bagong daga,” asin dakol pa—maootob. (Kapahayagan 7:9, 14, 15; 21:4, 5; 2 Pedro 3:13) An garantiyang iyan nagmomotibar sa mga tama an kamugtakan nin puso ngonyan na maigot na magtaram manongod sa saiya. An saboot ninda kapareho kan sa salmista, na nagsabi: “Isinabi ko an maogmang bareta nin katanosan sa dakulang kongregasyon. Uya! Dai ko pinopogolan an sakong mga ngabil.”—Salmo 40:9.
Si Jehova Nagpopogol sa Sadiri
9. Paanong an nasyon nin Israel nagin “paralapas poon pa sa tulak”?
9 An dai paniniwala kan mga Judio sa mga hula ni Jehova nakaolang sa saindang paghimate sa saiyang mga patanid. Iyan an dahelan na nagpadagos siang magsabi sa sainda: “Apuera dian, dai mo pa nadangog, ni naaraman mo man, ni poon kan panahon na idto nabukasan an saimong pandangog. Huli ta aram kong marhay na talagang padagos kang naggigibo na may katraydoran, asin inaapod kang ‘paralapas poon pa sa tulak.’” (Isaias 48:8) Serado an pandangog kan Juda sa nakaoogmang notisya ni Jehova. (Isaias 29:10) An iginawe kan katipan na banwaan nin Dios nagpapaheling na an nasyon “paralapas poon pa sa tulak.” Poon kan iyan mamundag asin sa bilog na kasaysayan kaiyan, an nasyon nin Israel nakahaman nin rekord nin pagrebelde. An paglapas asin katraydoran mga sala na kinatodan na kan banwaan, bakong basta paminsanminsan na mga kasalan.—Salmo 95:10; Malaquias 2:11.
10. Taano ta popogolan ni Jehova an saiyang sadiri?
10 Mayo na daw nin ano man na paglaom? Dai. Dawa ngani an Juda nagin rebelde asin traydor, si Jehova pirmeng totoo asin fiel. Para sa onra kan sadiri niang dakulang ngaran, lilimitaran nia an pagbubo kan saiyang grabeng kaanggotan. Sia nagsasabi: “Nin huli kan sakuyang ngaran iinaan ko an sakuyang kaanggotan, asin huli sa sakuyang kaomawan popogolan ko an sakuyang sadiri manongod sa saimo tanganing dai ka mapoho.” (Isaias 48:9) Kanigoan na pagkakalaen! An banwaan ni Jehova, an Israel sagkod an Juda, nagin bakong fiel sa saiya. Alagad sasantipikaron ni Jehova an saiyang ngaran, na mahiro sa paagi na matao nin kaomawan asin onra dian. Sa dahelan na ini, dai nia popohoon an saiyang piniling banwaan.—Joel 2:13, 14.
11. Taano ta dai totogotan nin Dios na malaglag nin biyo an saiyang banwaan?
11 An mga indibiduwal na tama an kamugtakan nin puso sa tahaw kan desterradong mga Judio napukaw kan pagsagwe nin Dios asin nagin determinadong himateon an saiyang katokdoan. Para sa mga siring an minasunod na kapahayagan nakapakokosog na marhay liwat sa boot: “Uya! Dinalisay taka, alagad bakong siring kan pirak. Pinili taka sa hornong panunaw nin makuring sakit. Para sa sadiri kong kapakanan, para sa sadiri kong kapakanan ako mahiro, huli ta taano ta pababayaan nin saro na sia langhadan? Asin dai ko itatao sa iba an sakong kamurawayan.” (Isaias 48:10, 11) An mapagbalong mga sakit—na garo ‘horno nin makuring sakit’—na itinogot ni Jehova na agihan kan saiyang banwaan binalo asin dinalisay sinda, na ihinahayag an nasa puso ninda. Kaagid kaini an nangyari dakol na siglo bago kaiyan kan sabihon ni Moises sa saindang mga apoon: ‘Pinalakaw ka ni Jehova na saimong Dios sa laog kan kuarentang taon na ini sa kaawagan, tangani na pakumbabaon ka, na baloon ka tanganing maaraman an nasa puso mo.’ (Deuteronomio 8:2) Sa ibong kan saindang rebeldeng aktitud, dai linaglag ni Jehova an nasyon kan panahon na idto, asin dai nia ngonyan lalaglagon nin biyo an nasyon. Sa siring maiingatan an saiyang ngaran asin onra. Kun malaglag an saiyang banwaan sa kamot kan mga Babilonyo, sia magigin bakong fiel sa saiyang tipan asin malalanghadan an saiyang ngaran. Malataw na dai kayang iligtas kan Dios nin Israel an saiyang banwaan.—Ezequiel 20:9.
12. Paano dinalisay an tunay na mga Kristiano kan enot na guerra mundial?
12 Sa presenteng mga panahon man, kinaipuhan na dalisayon an banwaan ni Jehova? Kaidtong enot na mga aldaw kan ika-20 siglo, dakol sa saradit na grupo nin Mga Estudyante sa Biblia an naglingkod sa Dios huli sa sinserong pagmawot na paogmahon sia, alagad may nagkapira na igwa nin salang mga motibo, siring baga nin pagmawot na magin prominente. Bago mapangenotan kan sadit na grupong iyan an pambilog na kinaban na paghuhulit kan maogmang bareta na ihinula para sa panahon kan katapusan, kaipuhan na sinda linigon. (Mateo 24:14) Ihinula ni propeta Malaquias na may siring nanggad na pagdalisay na gigibohon may labot sa pagdatong ni Jehova sa saiyang templo. (Malaquias 3:1-4) An saiyang mga tataramon naotob kan 1918. An tunay na mga Kristiano nag-agi nin sarong peryodo nin grabeng pagbalo sa kainitan kan enot na guerra mundial asin an pagbalong iyan suminagkod sa pagkabilanggo ni Joseph F. Rutherford, an presidente kaidto kan Watch Tower Society, asin kan nagkapira sa pangenot na mga opisyal kaiyan. An sinserong mga Kristianong idto nakinabang sa proseso nin pagdadalisay. Pagkatapos kan Guerra Mundial I sinda nagin mas determinado kisa kasuarin man na maglingkod sa saindang dakulang Dios sa ano man na paagi na ipinaririsa nia.
13. Ano an nagin reaksion kan banwaan ni Jehova sa paglamag kan mga taon poon kan enot na guerra mundial?
13 Poon kan mga aldaw na idto, paorootrong napaatubang an Mga Saksi ni Jehova sa pinakamariringis na klase nin paglamag. Dai ini nagin dahelan na pagdudahan ninda an tataramon kan saindang Kaglalang. Imbes, tinawan ninda nin atension an mga tataramon ni apostol Pedro para sa linalamag na mga Kristiano kan kaaldawan nia: “Kamo nagmondo sa manlaenlaen na pagbalo, tanganing an nabalong kualidad kan saindong pagtubod . . . magin dahelan nin pag-omaw asin kamurawayan patin onra sa pagkahayag ni Jesu-Cristo.” (1 Pedro 1:6, 7) An grabeng pagbalo dai nakaraot sa integridad kan tunay na mga Kristiano. Imbes, ihinahayag kaiyan an kadalisayan kan saindang mga motibo. Tinatawan kaiyan nin nabalong kualidad an saindang pagtubod asin ipinaheheling an rarom kan saindang debosyon asin pagkamoot.—Talinhaga 17:3.
‘Ako an Enot, Ako an Huri’
14. (a) Sa anong paagi na si Jehova “an enot” asin “an huri”? (b) Anong makakamhan na mga gibo an hinaman ni Jehova paagi sa saiyang “kamot”?
14 Ngonyan mamomoton na nakikiolay si Jehova sa saiyang katipan na banwaan: “Paghinanyog sa sako, O Jacob, asin ika Israel na sakong inapod. Ako an Saro na iyo man sana. Ako an enot. Apuera dian, ako an huri. Apuera dian, an sadiri kong kamot an nagbugtak kan pundasyon kan daga, asin an sadiri kong toong kamot an nagbiklad kan kalangitan. Inaapod ko sinda, tanganing magdanay sindang magkairiba.” (Isaias 48:12, 13) Bakong arog nin tawo, an Dios daing sagkod asin dai nagliliwat. (Malaquias 3:6) Sa Kapahayagan, ipinahahayag ni Jehova: “Ako an Alfa asin an Omega, an enot asin an huri, an kapinonan asin an katapusan.” (Kapahayagan 22:13) Bago ki Jehova mayo nin Dios na makakamhan sa gabos asin pakatapos nia mayo nang iba. Sia an Supremo asin an Daing Sagkod, an Kaglalang. An saiyang “kamot”—an saiyang ginagamit na kapangyarihan—an nag-establisar kan daga asin nagbiklad kan mabitoon na kalangitan. (Job 38:4; Salmo 102:25) Pag-inaapod nia an saiyang mga linalang, an mga ini andam na maglingkod sa saiya.—Salmo 147:4.
15. Sa anong paagi asin sa anong katuyohan ‘namotan’ ni Jehova si Ciro?
15 Sarong mahalagang pangagda an ipinaabot sa mga Judio sagkod sa mga bakong Judio: “Pagsararo kamo gabos, kamo gabos, asin pagdangog kamo. Siisay dian sa sainda an nakapagsabi na kan mga bagay na ini? Si Jehova mismo namoot sa saiya. Gigibohon nia sa Babilonya an ikinaoogma niang marhay, asin an saiyang takyag mamumugtak sa mga Caldeo. Ako—ako mismo an nagtaram. Apuera dian, inapod ko sia. Dinara ko sia, asin mapapakarahay an saiyang dalan.” (Isaias 48:14, 15) Si Jehova sana an makapangyarihan sa gabos asin eksaktong makahuhula kan mga pangyayari. Mayo nin siisay man sa “sainda,” an daing kamanungdanan na mga idolo, an makapagsasabi kan mga bagay na ini. Si Jehova, bakong an mga idolo, an “namoot sa saiya,” ki Ciro—an boot sabihon, pinili sia ni Jehova para sa sarong espesipikong katuyohan. (Isaias 41:2; 44:28; 45:1, 13; 46:11) Naheling nia antes pa an paglataw ni Ciro sa kinaban asin pinili sia bilang an kongkistador nin Babilonya sa ngapit.
16, 17. (a) Taano ta masasabi na dai itinao nin Dios sa hilom an saiyang mga prediksion? (b) Paano ihinahayag ni Jehova an saiyang mga katuyohan ngonyan?
16 Sa nakaaatraer na paagi, si Jehova nagpapadagos: “Rumani kamo sa sako. Dangogon nindo ini. Poon sa kapinonan dai nanggad ako nagtaram sa sarong tagoan. Poon kan panahon na mangyari iyan yaon na ako duman.” (Isaias 48:16a) An mga prediksion hale ki Jehova dai itinao sa hilom o ipinaaram sa nagkapira sanang espesyal na indibiduwal. An mga propeta ni Jehova prangkang mga representante nin Dios sa pagtaram. (Isaias 61:1) Hayagan nindang ipinahahayag an kabotan nin Dios. Halimbawa, an mga pangyayari may labot ki Ciro bako nang bago sa Dios o bakong dai nia linalaoman. Mga 200 na taon antes pa, hayagan na ihinula iyan nin Dios paagi ki Isaias.
17 Sa kaparehong paagi ngonyan, si Jehova bakong mahinilom manongod sa saiyang mga katuyohan. Minilyon na tawo sa ginatos na kadagaan asin isla sa dagat an nagbabalangibog sa harong-harong, sa mga tinampo, asin saen man na mahihimo ninda kan patanid manongod sa maabot na katapusan kan sistemang ini nin mga bagay asin kan maogmang bareta manongod sa mga bendisyon na maabot sa irarom kan Kahadean nin Dios. Tunay nanggad, si Jehova Dios na ikinokomunikar an saiyang mga katuyohan.
‘Magtao nin Atension sa Sakong mga Togon!’
18. Ano an kamawotan ni Jehova para sa saiyang banwaan?
18 Tinawan nin puersa kan espiritu ni Jehova, ipinahayag kan propeta: “Isinugo ako kan Soberanong Kagurangnan na Jehova mismo, kan saiya nganing espiritu. Iyo ini an isinabi ni Jehova, an saimong Paratubos, an Banal kan Israel: ‘Ako, si Jehova, an saimong Dios, an Saro na nagtotokdo sa saimo na pakinabangon an saimong sadiri, an Saro na nagpapangyari sa saimo na maglakaw sa dalan na maninigo mong lakawan.’” (Isaias 48:16b, 17) An mamomoton na kapahayagan na ini kan pagmakolog ni Jehova maninigong magparigon liwat sa boot kan nasyon nin Israel na ililigtas sinda nin Dios hale sa Babilonya. Sia an saindang Paratubos. (Isaias 54:5) An odok sa pusong kamawotan ni Jehova iyo na ibalik kan mga Israelita an saindang relasyon sa saiya asin magtao nin atension sa saiyang mga togon. An tunay na pagsamba nakabasar sa pagkuyog sa mga instruksion nin Dios. An mga Israelita dai makalalakaw sa tamang dalan kun dai itokdo sa sainda ‘an dalan na maninigong lakawan.’
19. Ano an odok sa pusong ipinakikiolay ni Jehova?
19 An kamawotan ni Jehova na malikayan kan saiyang banwaan an kapahamakan asin magkamit nin buhay magayonon na ipinahayag: “O kun ika sana kutana totoong matao nin atension sa sakong mga togon! Dangan an saimong katoninongan magigin siring sa salog, asin an saimong katanosan siring sa mga alon kan dagat.” (Isaias 48:18) Abaa kaodok sa pusong pakiolay hale sa makakamhan sa gabos na Kaglalang! (Deuteronomio 5:29; Salmo 81:13) Imbes na mabihag, an mga Israelita puedeng magkamit nin katoninongan na siring kanagsosopay kan tubig na nagbobolos sa sarong salog. (Salmo 119:165) An saindang mga gibo nin katanosan puedeng magin siring kadai mabilang kan mga alon sa dagat. (Amos 5:24) Bilang an saro na talagang interesado sa sainda, si Jehova nakikiolay sa mga Israelita, na mamomoton na ipinaheheling sa sainda an dalan na maninigo nindang lakawan. O, kun mahinanyog sana kutana sinda!
20. (a) Ano an kamawotan nin Dios para sa Israel sa ibong kan saindang pagrebelde? (b) Ano an manonodan niato manongod ki Jehova sa pagtratar nia sa saiyang banwaan?
20 Anong mga bendisyon an madatong kun an Israel magsosolsol? Si Jehova nagsasabi: “An saimong mga aki magigin siring sa baybay, asin an mga gikan na hale sa saimong nasa laog na mga kabtang siring kan mga grano kaini. An ngaran nin saro dai puputolon o popohoon hale sa sakong atubangan.” (Isaias 48:19) Ipinagigirumdom ni Jehova sa banwaan an saiyang panuga na madakol an banhi ni Abraham, “siring kan mga bitoon sa kalangitan asin siring kan mga baybay sa baybayon.” (Genesis 22:17; 32:12) Minsan siring, an mga gikan na ini ni Abraham nagin rebelde, asin mayo sinda nin deretso na akoon an kaotoban kan panuga. An totoo, nagin maraot na marhay an saindang rekord kaya segun sa sadiring Ley ni Jehova, maninigo sanang paraon an saindang ngaran bilang sarong nasyon. (Deuteronomio 28:45) Pero, bakong kamawotan ni Jehova na mapara an saiyang banwaan, asin habo nia sindang biyong pabayaan.
21. Anong mga bendisyon an maeeksperyensiahan niato ngonyan kun hihingoahon niatong patokdo ki Jehova?
21 An mga prinsipyo na yaon sa mapuersang tekstong ini minaaplikar sa mga nagsasamba ki Jehova ngonyan. Si Jehova an Gikanan nin buhay, asin sia an orog na nakaaaram kisa siisay man kun paano ta maninigong gamiton an satong buhay. (Salmo 36:9) Nagtao sia sato nin mga giya, bakong tanganing halean kita nin kaogmahan, kundi tanganing pakinabangon kita. An tunay na mga Kristiano naghihimate paagi sa paghihingoang matokdoan ni Jehova. (Miqueas 4:2) An saiyang mga direktiba nagpoprotehir sa satong espirituwalidad asin sa satong relasyon sa saiya, asin iniingatan kita kaiyan sa nakararaot na impluwensia ni Satanas. Kun nasasabotan niato an mga prinsipyo sa likod kan mga ley nin Dios, naheheling niato na tinotokdoan kita ni Jehova para sa satong ikararahay. Narerealisar niato na “an saiyang mga togon dai nakapagagabat.” Asin dai kita mapapara.—1 Juan 2:17; 5:3.
‘Lumuwas Kamo sa Babilonya!’
22. Ano an isinadol na gibohon kan fiel na mga Judio, asin anong mga pagpasarig sa boot an itinao sa sainda?
22 Kun bumagsak na an Babilonya, may mga Judio daw na magpapaheling nin tamang kamugtakan nin puso? Aaprobetsaran daw ninda an pagliligtas nin Dios, mabalik sa saindang dagang tinuboan, asin ibabalik an dalisay na pagsamba? Iyo. An sunod na mga tataramon ni Jehova nagpapaheling kan saiyang kompiansa na ini mangyayari. “Lumuwas kamo, banwaan, sa Babilonya! Dumulag kamo sa mga Caldeo. Ibareta nindo paagi sa magayagayang kurahaw, ibalangibog nindo ini. Darahon nindo iyan sagkod sa pagdolonan kan daga. Pagsabi kamong: ‘Tinubos ni Jehova si Jacob na saiyang lingkod. Asin dai sinda napaha kan pinalalakaw nia sinda dawa sa laglag na mga lugar. Tubig hale sa dakulang gapo an pinabolos nia para sa sainda, asin binaak nia an sarong dakulang gapo tanganing bumolos an tubig.’” (Isaias 48:20, 21) Makahulang sinadol an banwaan ni Jehova na bayaan an Babilonya na daing pag-atraso. (Jeremias 50:8) An pagkabalukat sa sainda dapat na maaraman sagkod sa mga kaporoporohi kan daga. (Jeremias 31:10) Pakatapos kan lagdoan na pagharale sa Egipto, si Jehova nagtao kan mga pangangaipo kan saiyang banwaan mantang sinda naglalakaw sa mga desierto. Kaagid kaiyan, itatao man nia an mga pangangaipo kan saiyang banwaan mantang sinda papuli hale sa Babilonya.—Deuteronomio 8:15, 16.
23. Siisay an dai magkakamit kan katoninongan na tao nin Dios?
23 May saro pang mahalagang marhay na prinsipyo na dapat tandaan kan mga Judio mapadapit sa mga pagliligtas ni Jehova. An mga may matanos na tendensia tibaad magdusa huli sa saindang mga kasalan, alagad dai sinda lalaglagon. Pero iba man para sa mga bakong matanos. “‘Dai nin katoninongan,’ an sabi ni Jehova, ‘para sa mga maraot.’” (Isaias 48:22) An habong magsolsol na mga parakasala dai mag-aako kan katoninongan na itinagama nin Dios para sa mga namomoot sa saiya. An mga pagliligtas bakong para sa sutil na mga maraot o mga daing pagtubod. Iyan para sana sa mga may pagtubod. (Tito 1:15, 16; Kapahayagan 22:14, 15) An katoninongan na hale sa Dios mayo sa mga maraot.
24. Ano an nagtao nin kagayagayahan sa banwaan nin Dios sa presenteng mga panahon?
24 Kan 537 B.C.E., an oportunidad na makahale sa Babilonya nagtao nin dakulang kagayagayahan sa fiel na mga Israelita. Kan 1919 an pakabutas kan banwaan nin Dios hale sa pagkabihag sa Babilonya nagpagayagaya sa sainda. (Kapahayagan 11:11, 12) Napano sinda nin paglaom, asin inaprobetsaran ninda an oportunidad na pahiwason an saindang aktibidad. Totoo, kinaipuhan kan sadit na grupong idto nin mga Kristiano an kosog nin boot tanganing aprobetsaran an bagong mga posibilidad nin paghuhulit sa sarong antipatikong kinaban. Alagad sa tabang ni Jehova, ihinulit ninda an maogmang bareta. Pinatutunayan kan kasaysayan na binendisyonan sinda ni Jehova.
25. Taano ta importanteng mag-atentong marhay sa matanos na mga dekreto nin Dios?
25 Idinodoon kan kabtang na ini kan hula ni Isaias na tinotokdoan kita ni Jehova para sa satong ikararahay. Importante nanggad na mag-atentong marhay sa matanos na mga dekreto nin Dios. (Kapahayagan 15:2-4) Kun gigirumdomon niato an kadonongan asin pagkamoot nin Dios, tatabangan kita kaiyan na kumuyog sa sinasabi ni Jehova na tama. An gabos niang pagboot para sa satong kapakinabangan.—Isaias 48:17, 18.