Mga Hapot Hale sa mga Parabasa

May magigibo daw kun magin imposible para sa sarong herelangon na linahidan na Kristiano na makaatender sa pagselebrar kan kongregasyon kan Pamanggihan nin Kagurangnan?

Igwa. May magigibo asin maninigong gibohon bilang konsiderasyon sa sarong linahidan na Kristiano na herelangon asin tibaad dai nakakabangon asin kun siring dai makaatender sa pagselebrar kan kongregasyon kan Memorial kan kagadanan ni Cristo. Sa siring na kamugtakan, puedeng iareglo kan grupo nin kamagurangan na may sarong magurang sa kongregasyon o ibang maygurang na Kristianong lalaki na maghatod nin kabtang kan emblemang tinapay asin arak sa kapwa kapagtubod na iyan sa banggi man sanang iyan bago sumirang an aldaw.

Depende sa mga sirkunstansia, an nagsosongkong magurang sa kongregasyon o ibang tugang na lalaki puedeng magtao nin halipot na komento asin magbasa nin angay na mga teksto. Puede niang sundan an arogan na inestablisar ni Jesus kan ponan Nia an Pamanggihan nin Kagurangnan. Halimbawa, puedeng basahon an Mateo 26:26 asin ialok an tinapay na daing lebadura pakatapos nin pamibi. Sunod, puedeng basahon kan nagsosongkong tugang na lalaki an Mateo kapitulo 26, bersikulo 27 asin 28, dangan ialok an arak pakatapos nin saro pang pamibi. Puedeng magtao nin halipot na mga komento manongod sa kahulogan kan lambang emblema, asin angay an sarong pantapos na pamibi.

Siempre, maninigong gibohon an gabos na rasonableng paghihingoa na magin presente sa pagselebrar kan kongregasyon kan Pamanggihan nin Kagurangnan. Alagad ano an puedeng gibohon sa masakit nanggad na situwasyon may koneksion sa sarong linahidan na Kristiano na grabe an helang, naospital, o nin huli sa iba pang kadahelanan na siring kaiyan dai nakaselebrar kan Memorial pagkasolnop kan saldang sa Nisan 14? Puedeng aprobetsaran kan siring na linahidan an sarong susundan sa Ley ni Moises asin selebraron iyan nin pribado pakalihis nin 30 aldaw.—Bilang 9:9-14.