Mga Hoben—Dai Lilingawan ni Jehova an Saindong Ginibo!

“An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran, na kamo naglingkod sa mga banal asin padagos pang naglilingkod.”—HEBREO 6:10.

 1. Paano ipinaheheling kan mga libro sa Biblia na Hebreo asin Malaquias na inaapresyar ni Jehova an saimong paglilingkod?

NAKAGIBO ka na daw nin kabootan sa sarong katood dangan dai ka pinasalamatan? Puedeng ikakolog na marhay nin boot kun an sarong kabootan binaliwala o, mas maraot pa, biyong liningawan. Pero laen nanggad kun kita nagtatao nin bilog na pusong paglilingkod ki Jehova! An Biblia nagsasabi: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran, na kamo naglingkod sa mga banal asin padagos pang naglilingkod.” (Hebreo 6:10) Isip-isipa an boot sabihon kaiyan. Talagang ibibilang ni Jehova na sarong akto nin kabikoan sa saiya​—sarong kasalan—kun lilingawan nia an ginibo mo asin an padagos na ginigibo mo sa paglilingkod sa saiya. Abaa kamapag-apresyar na Dios!—Malaquias 3:10.

 2. Taano ta totoong espesyal an paglilingkod ki Jehova?

² Igwa ka nin espesyal na pribilehio na sambahon asin paglingkodan an mapagpasalamat na Dios na ini. Huling mga anom na milyon sana an kapagtubod mo kun ikokomparar sa mga anom na bilyon katawo sa bilog na kinaban, bihira nanggad an saimong pribilehio. Apuera kaini, an bagay na ika naghihinanyog asin nagsusunod sa mensahe kan maogmang bareta nagpapatunay na si Jehova personal na interesado sa saimo. Total, si Jesus nagsabi: “Dai nin makadodolok sa sako kun dai sia dagkahon kan Ama na nagsugo sa sako.” (Juan 6:44) Iyo, indibiduwal na tinatabangan ni Jehova an mga tawo na aprobetsaran an mga pakinabang sa atang ni Cristo.

Pag-apresyar sa Saimong Dakulang Pribilehio

 3. Paano ipinahayag kan mga aking lalaki ni Core an pag-apresyar sa pribilehio nin paglilingkod ki Jehova?

³ Siring sa tinokar sa naenot na artikulo, ika nasa daing kaagid na kamugtakan na pagayagayahon an puso ni Jehova. (Talinhaga 27:11) Saro ining bagay na maninigong dai mo noarin man pagbaliwalaon. Sa saro kan saindang ipinasabong na mga salmo, ipinahayag kan mga aking lalaki ni Core an saindang pag-apresyar sa pribilehio nin paglilingkod ki Jehova. Mababasa niato: “An sarong aldaw sa saimong mga patyo orog na marahay kisa sarong ribo sa ibang lugar. Pinili kong tumindog sa tata kan harong kan sakuyang Dios kisa maglibotlibot sa mga tolda nin karatan.”​—Salmo 84:10.

 4. (a) Ano an tibaad dahelan kun taano ta sa heling nin nagkapira nakalilimitar an pagsamba ki Jehova? (b) Sa anong paagi ipinaheheling ni Jehova na gustong-gusto niang marisa asin balosan an mga lingkod nia?

⁴ Iyan daw an saboot mo manongod sa saimong pribilehio na maglingkod sa saimong langitnon na Ama? Totoo, kun minsan tibaad garo baga linilimitaran kan pagsamba ki Jehova an saimong katalingkasan. Totoo na an pamumuhay sono sa mga prinsipyo kan Biblia nagkakaipo man nin pagsasakripisyo. Pero sa katapustapusi, an ano man na hinahagad sa saimo ni Jehova para sa saimong kapakinabangan. (Salmo 1:1-3) Dugang pa, naheheling ni Jehova an saimong mga paghihingoa asin ipinaheheling nia an saiyang pag-apresyar sa saimong pagigin fiel. Tunay nanggad, isinurat ni Pablo na si Jehova “nagigin an parabalos sa mga maigot na naghahanap sa saiya.” (Hebreo 11:6) Naghahanap si Jehova nin mga oportunidad na gibohon ini. An sarong matanos na propeta sa suanoy na Israel nagsabi: “Kun manongod ki Jehova, an saiyang mga mata naglilibot sa bilog na daga tanganing ipaheling an saiyang kosog para duman sa mga an puso bilog para sa saiya.”—2 Cronica 16:9.

 5. (a) Ano an saro sa pinakamarahay na mga paagi na ikapaheheling mo na bilog an saimong puso para ki Jehova? (b) Taano ta tibaad garo baga depisil na ipakipag-olay sa iba an saimong pagtubod?

⁵ An saro sa pinakamarahay na mga paagi na ikapaheheling mo na bilog an saimong puso para ki Jehova iyo an pakipag-olay sa iba manongod sa saiya. Nagkaoportunidad ka na daw na makipag-olay sa nagkapirang kaeskuela mo manongod sa saimong tinutubod? Sa primero, an paggibo kaini tibaad garo baga nakapanluluya sa boot, asin an mismong ideyang iyan tibaad magpamate nin kadikit na takot. ‘Paano kun pagngisihan ninda ako?’ an tibaad ihapot mo. ‘Paano kun isipon ninda na palaen an sakong relihion?’ Rinekonoser ni Jesus na bakong gabos maghihinanyog sa mensahe kan Kahadean. (Juan 15:20) Minsan siring, dai boot sabihon kaini na ika pag-oolog-ologon asin hahaboan sa bilog na buhay. Sa kabaliktaran, dakol na hoben na Saksi an nakanompong nin naghihinanyog asin orog pa nganing iginalang kan saindang kairiba paagi sa paninindogan sa saindang mga kombiksion.

“Tatabangan Ka ni Jehova”

6, 7. (a) Paano nahimo nin sarong 17 anyos na babae na magpatotoo sa mga kaklase nia? (b) Ano an nanodan mo sa eksperyensia ni Jennifer?

⁶ Alagad paano ka magkakaigwa kan kosog nin boot na magtaram manongod sa saimong pagtubod? Taano ta dai magdesidir na magin onesto asin prangka kun may mga naghahapot saimo manongod sa saimong relihion? Isip-isipa an eksperyensia kan 17 anyos na si Jennifer. “Nangongodto ako kaidto sa eskuelahan. Nataon na an mga babaeng kaiba ko sa lamesa nag-oorolay dapit sa relihion, asin an saro sa mga babae hinapot ako kun ano an relihion ko,” an sabi nia. Ninerbios daw si Jennifer na sumimbag? “Iyo,” an pag-admitir nia, “huli ta dai ko segurado kun ano an magigin reaksion ninda sa sako.” Kaya ano an ginibo ni Jennifer? “Sinabi ko sa mga babae na saro ako sa Mga Saksi ni Jehova,” an sabi pa nia. “Sa primero garo nabigla sinda. Minalataw na an paghona ninda an Mga Saksi ni Jehova palaen na mga tawo. Nagin dahelan ini tanganing maghapot sinda sa sako, asin nalinaw ko an nagkapirang salang paghona ninda. Dawa pakalihis kan aldaw na idto, an nagkapira sa mga babae naghahapot sakuya paminsanminsan.”

⁷ Nagbasol daw si Jennifer sa pag-aprobetsar kan oportunidad na magtaram manongod sa saiyang mga tinutubod? Dai nanggad! “Magayonon an pagmate ko pagkatapos kan pangodtohan,” an sabi nia. “An mga babaeng idto ngonyan igwa na nin mas malinaw na ideya kun siisay man nanggad an Mga Saksi ni Jehova.” Simple an suhestion ngonyan ni Jennifer: “Kun nadedepisilan kang magpatotoo sa mga kaklase o maestra, mamibi ka nin halipot sana. Tatabangan ka ni Jehova. Maoogma ka na inaprobetsaran mo an saimong oportunidad na magpatotoo.”—1 Pedro 3:15.

 8. (a) Paano nakatabang ki Nehemias an pamibi kan sia mapaatubang sa sarong dai linalaoman na situwasyon? (b) Ano an nagkapirang situwasyon sa eskuelahan na tibaad kaipuhan mong mamibi ki Jehova nin halipot asin silensio?

⁸ Mangnoha na irinekomendar ni Jennifer an ‘pamimibi nin halipot sana’ ki Jehova kun magkaigwa nin oportunidad na magpatotoo manongod sa saimong pagtubod. Ini mismo an ginibo ni Nehemias, an kopero ni Hadeng Artajerjes nin Persia, kan sia mapaatubang sa sarong dai linalaoman na situwasyon. Heling-heling an pagkapurisaw ni Nehemias huli ta ibinareta sa saiya an kamugtakan kan mga Judio asin naaraman nia na garaba an lanob asin mga tata kan Jerusalem. Nariparo kan hade na garo nahahadit si Nehemias, kaya hinapot nia si Nehemias kun ano an problema. Bago nagsimbag, namibi si Nehemias para sa paggiya. Dangan pusoan siang naghagad nin permiso na bumalik sa Jerusalem asin tumabang na itogdok liwat an nagabang siudad. Itinao ni Artajerjes an hinahagad ni Nehemias. (Nehemias 2:1-8) An leksion? Kun ika ninenerbios pagnagkaigwa nin oportunidad na magpatotoo may labot sa saimong pagtubod, dai paglingawan an saimong oportunidad na mamibi nin silensio. ‘Ibugtak mo an gabos mong kahaditan [ki Jehova],’ an isinurat ni Pedro, ‘huli ta sia may pagmakolog sa saimo.’—1 Pedro 5:7; Salmo 55:22.

“Andam na Gumibo nin Pagdepensa”

 9. Paano nakapasakamot nin 23 na kopya kan librong Young People Ask an 13 anyos na si Leah?

⁹ Estudyare an saro pang eksperyensia. Binabasa ni Leah, 13 anyos, an librong Questions Young People Ask—Answers That Worka durante nin saiyang pahingalo sa odto sa eskuelahan. “Minamasdan ako kan iba,” sabi nia, “asin dai nahaloy kadakol na kan yaon sa likod ko na nag-uusyoso. Nagpoon sindang maghapot kun manongod sa ano an libro.” Pagkahapon, apat na babae an naghagad ki Leah nin kopya kan librong Young People Ask. Dai nahaloy ipinasubli kan mga babaeng ini sa iba an libro, dangan an mga ini gusto man na magkaigwa nin kopya. Sa suminunod na pirang semana, si Leah nakapasakamot nin 23 na kopya kan librong Young People Ask sa saiyang mga kaklase asin sa saindang mga katood. Pasil daw para ki Leah na magtaram kan enot na maghapot an iba manongod sa librong binabasa nia? Bako nanggad! “Sa primero, ninenerbios ako,” an inadmitir nia. “Minsan siring, namibi ako, asin aram ko na nasa sakuya si Jehova.”

10, 11. Paano natabangan nin sarong daragitang Israelita an sarong hepe sa hukbo nin Siria na makanood manongod ki Jehova, asin anong mga pagbabago an ginibo kan hepe pakatapos kaiyan?

¹⁰ An eksperyensia ni Leah tibaad magpagirumdom saimo nin sarong kaagid na situwasyon na napaatubang sa sarong daragitang Israelita na dinarang bihag sa Siria. Si Naaman, sarong hepe kan hukbo nin Siria, may lepra. Tibaad an agom nia an nagpoon nin pakikipag-olay kaya nagtaram an daragitang ini manongod sa saiyang pagtubod. “Kun an kagurangnan ko sana kutana makaatubang sa propeta na yaon sa Samaria!” an sabi nia. “Sa siring paoomayan nia sia sa saiyang lepra.”—2 Hade 5:1-3.

¹¹ Bilang resulta kan pagkapusoan kan daragitang ini, naaraman ni Naaman na “mayo nin Dios saen man na kabtang kan daga kundi sa Israel.” Nagdesisyon pa ngani sia na sia “dai na matao nin dolot na tinotong o atang sa siisay pa man na ibang dios kundi ki Jehova.” (2 Hade 5:15, 17) Binendisyonan nanggad ni Jehova an kosog nin boot kan daragitang iyan. Kaya nia asin talagang gigibohon nia man iyan para sa mga hoben ngonyan. Napatunayan iyan ni Leah. Pag-abot nin panahon, an nagkapira sa mga kaeskuela nia nagrani sa saiya asin nagsabi na an librong Young People Ask nakakatabang sa saindang gawe-gawe. “Naoogma ako,” sabi ni Leah, “huli ta aram ko na natatabangan ko an iba na makanood nin orog pa manongod ki Jehova asin natatabangan ko sinda na bagohon an saindang buhay.”

12. Paano ka mapakokosog na gumibo nin pagdepensa sa saimong pagtubod?

¹² Puede ka man na makaeksperyensia nin kaagid kan ki Jennifer asin Leah. Sunodon an konseho ni Pedro, na nagsurat na bilang Kristiano maninigo kang pirmeng ‘andam na gumibo nin pagdepensa sa atubangan nin lambang tawo na naghahagad sa saimo nin rason para sa saimong paglaom, alagad ginigibo iyan sa mahoyong boot asin hararom na paggalang.’ (1 Pedro 3:15) Paano mo iyan magigibo? Arogon an ginibo kan mga Kristiano kan enot na siglo na namibi ki Jehova na tabangan nia sindang maghulit “sa bilog na pagkapusoan.” (Gibo 4:29) Dangan magin makosog an boot sa pakikipag-olay sa iba manongod sa saimong mga tinutubod. Tibaad mapangalas ka sa mga resulta. Dugang pa, mapagagayagaya mo an puso ni Jehova.

Mga Video Asin Espesyal na mga Pradyek

13. Anong mga oportunidad an inaprobetsaran nin nagkapirang hoben tanganing magpatotoo? (Helingon an mga kahon sa pahina 20 asin 21.)

¹³ Dakol na hoben an ikinapaliwanag an saindang tinutubod sa mga kaeskuela o mga maestra paagi sa paggamit kan mga video. Kun beses, nabubukasan an oportunidad na makatao nin kaomawan ki Jehova paagi sa mga pradyek sa eskuelahan. Halimbawa, duwang 15 anyos na solterito, na pareho Saksi ni Jehova, an tinawan nin asignasyon bilang kabtang kan saindang klase sa kasaysayan kan kinaban na magsurat nin sarong report dapit sa saro kan mga relihion sa kinaban. An duwang ini nagtabangan na isurat an saindang report dapit sa Mga Saksi ni Jehova, na ginagamit bilang reperensia an librong Jehovah’s Witnesses​—Proclaimers of God’s Kingdom.b Kaipuhan man sindang magpresentar nin limang minutong berbal na report. Pagkatapos, an maestro asin mga estudyante nagkaigwa nin kadakol na hapot kaya an mga solteritong iyan nagdanay sa atubangan kan klase sa laog nin 20 minutos pa. Nagkapirang semana pakatapos kaiyan, an saindang mga kaklase nagpadagos na maghapot manongod sa Mga Saksi ni Jehova!

14, 15. (a) Taano ta sarong siod an pagkatakot sa tawo? (b) Taano ta maninigo kang magin kompiado manongod sa pagsabi sa iba kan saimong mga tinutubod?

¹⁴ Siring sa ipinaheheling kan mga eksperyensiang nasambitan sa enotan, dakulang mga bendisyon an makakamtan paagi sa pagsabi sa iba manongod sa saimong mga tinutubod asin kombiksion bilang saro sa Mga Saksi ni Jehova. Dai pagtogotan an pagkatakot sa tawo na haleon sa saimo an pribilehio asin kagayagayahan nin pagtabang sa iba na mamidbid si Jehova. An Biblia nagsasabi: “An pagtakig sa mga tawo sarong siod, alagad an nagtitiwala ki Jehova iingatan.”​—Talinhaga 29:25.

¹⁵ Girumdomon, bilang sarong hoben na Kristiano, igwa ka nin sarong bagay na kaipuhan na marhay kan saimong mga kaedad​—an pinakamarahay na paagi nin pamumuhay ngonyan asin an panugang buhay na daing katapusan para sa ngapit. (1 Timoteo 4:8) Interesante nanggad, sa Estados Unidos—kun saen tibaad iniisip mo na an kadaklan na tawo indiperente o sa sekular na mga bagay an kaisipan—ihinayag nin sarong surbey na kisuerra kabanga kan mga hoben an sineseryosong marhay an relihion, asin un-tersio an nagsasabi na an relihiosong pagtubod iyo “an pinakamahalagang impluwensia” sa saindang buhay. Posibleng marhay na arog man kaiyan an kamugtakan sa dakol na iba pang parte kan kinaban. Kun siring, posibleng marhay na an mga kaedad mo sa eskuelahan maoogmang maghinanyog sa sasabihon mo manongod sa Biblia.

Bilang Sarong Hoben, Rumani Ka ki Jehova

16. Ano an kalabot sa pagpaogma ki Jehova apuera sa pagtaram sa iba manongod sa saiya?

¹⁶ Siempre, an kalabot sa pagpagayagaya sa puso ni Jehova bako sanang basta pagtaram manongod sa saiya. Kaipuhan mo man na ioyon an saimong gawe-gawe sa mga pamantayan nia. Si apostol Juan nagsurat: “Ini iyo an boot sabihon kan pagkamoot sa Dios, na kuyogon niato an saiyang mga togon; pero an saiyang mga togon dai nakapagagabat.” (1 Juan 5:3) Mapatutunayan mo ini kun ika marani ki Jehova. Paano mo iyan magigibo?

17. Paano ka makararani ki Jehova?

¹⁷ Magtao ka nin panahon na basahon an Biblia asin mga publikasyon na basado sa Biblia. Mientras na nagdadakol an saimong nanonodan manongod ki Jehova, magigin man mas madali na kuyogon sia asin magtaram sa iba manongod sa saiya. “An marahay na tawo minapaluwas nin marahay gikan sa marahay na kayamanan kan saiyang puso,” sabi ni Jesus, “huli ta gikan sa kapanoan kan puso an saiyang ngoso nagtataram.” (Lucas 6:45) Kaya panoa an saimong puso nin mararahay na bagay. Taano ta dai magbugtak nin mga pasohan dapit sa bagay na ini? Tibaad puede kang umoswag kun dapit sa pag-andam para sa mga pagtiripon kan kongregasyon ngonyan na masunod na semana. An sunod mong pasohan iyo na makikabtang paagi sa pagtao nin halipot alagad odok sa pusong komento. Siempre, mahalagang marhay na iaplikar mo man an saimong mga nanonodan.​—Filipos 4:9.

18. Dawa kun mag-agi ka nin pagtumang, sa ano ka makakokompiar?

¹⁸ An mga bendisyon gikan sa paglilingkod ki Jehova naghahaloy​—tunay nanggad na daing katapusan. Totoo, paminsanminsan tibaad may maatubang ka man na pagtumang o pag-olog-olog huli sa pagigin saro sa Mga Saksi ni Jehova. Alagad isipon mo si Moises. Sinasabi kan Biblia na “sia nakaturuhok na gayo sa pagtao kan balos.” (Hebreo 11:24-26) Makakokompiar ka man na babalosan ka ni Jehova dahel sa mga paghihingoa mo na makanood manongod sa saiya asin magtaram manongod sa saiya. Tunay nanggad, nungka niang ‘lilingawan an saimong ginibo asin an pagkamoot na saimong ipinaheling para sa saiyang ngaran.’—Hebreo 6:10.

[Mga Nota sa Ibaba]

Nagigirumdoman Mo daw?

• Taano ta makasesegurado ka na pinahahalagahan ni Jehova an saimong paglilingkod?

• Anong mga paagi nin pagpatotoo sa eskuelahan an nanompongan nin nagkapira na mapanggana?

• Paano ka mapakokosog na magpatotoo sa mga kaklase?

• Paano ka makararani ki Jehova?

[Kahon/Mga Ritrato sa pahina 20]

Maski an mga Hobenon Pa Nag-oomaw ki Jehova!

Maski an mga bako pang tinedyer nakapagpapatotoo na sa eskuelahan. Estudyare an mga eksperyensiang ini.

An klase kan 10 anyos na si Amber sa ikalimang grado nagbabasa nin sarong libro dapit sa pananalakay kan Nazi sa mga Judio durante kan Guerra Mundial II. Nagdesisyon si Amber na darahon sa saiyang maestra an video na Purple Triangles. Nabigla an maestra kan maaraman na an mga Saksi ni Jehova linamag man durante kan rehimen kan Nazi. Ipinadalan kan maestra an video sa bilog na klase.

Sa edad na otso anyos, si Alexa nagsurat sa saiyang klase na nagpapaliwanag kun taano ta dai sia puedeng makikabtang sa pagselebrar ninda kan Pasko. Naghangang marhay an maestra nia kaya an surat ipinabasa nia nin makosog ki Alexa sa saiya mismong klase asin siring man sa duwa pang klase! “Tinokdoan akong magin magalang sa iba na bako kong kapareho an mga tinutubod,” an sabi nia sa pagtatapos, “asin nagpapasalamat ako saindo sa paggalang nindo kan desisyon ko na dai magselebrar nin Pasko.”

Dai nahaloy pagkapoon kan enot na grado, dinara ni Eric sa eskuelahan an My Book of Bible Stories asin naghagad nin permiso na ipaheling iyan sa mga kaklase nia. “May mas marahay akong naiisip,” an sabi kan maestra nia. “Taano ta dai ka magbasa nin sarong estorya sa klase?” Iyan an ginibo ni Eric. Pagkatapos, pinaitaas nia nin kamot an gabos na gustong magkaigwa nin kopya kan libro. Desiotso katawo—kabale an maestra—an nag-itaas! Nagtutubod ngonyan si Eric na igwa sia nin sadiring espesyal na teritoryo nin paghuhulit.

An nuebe anyos na si Whitney nagpapasalamat sa brosyur na Jehovah’s Witnesses and Education.c “Parateng tinatawan ni nanay kan brosyur na ini an mga maestra ko kada taon,” an sabi nia, “alagad ngonyan na taon ako na mismo an nagtao. Sa tabang kan brosyur na iyan, pignominar ako kan sakong maestra bilang ‘estudyante kan semana.’”

[Nota sa Ibaba]

[Kahon/Mga Ritrato sa pahina 21]

Mga Situwasyon na Ginamit nin Nagkapira Tanganing Magtaram Manongod sa Saindang Tinutubod

Kan maasignaran na tumao nin sarong report o pradyek sa eskuelahan, an nagkapira nagpili nin tema na nagtogot sa sainda na makapagpatotoo

Dakol na hoben an nagtao sa saindang maestra nin sarong video o publikasyon na may koneksion sa sarong tema na tinotokar sa klase

An nagkapirang hoben mantang nagbabasa kan Biblia o sarong publikasyon na basado sa Biblia durante nin reses dinolok nin ibang hoben na naghapot

[Ritrato sa pahina 18]

An mga may kabatidan puedeng tumabang na sanayon an mga hoben na maglingkod ki Jehova