Tabangan an Iba na Akoon an Mensahe kan Kahadean

“Si Agripa nagsabi ki Pablo: ‘Sa halipot na panahon makokombensir mo akong magin Kristiano.’”​—GIBO 26:28.

1, 2. Paano nangyaring si apostol Pablo uminatubang ki Gobernador Festo asin Hadeng Herodes Agripa II?

SA Cesarea kan 58 C.E., si Gobernador Porcio Festo nin Roma dinalaw ni Hadeng Herodes Agripa II asin kan saiyang tugang na si Berenice. Huli sa imbitasyon ni Gobernador Festo, nag-abot sinda na “may labi-labing magarbong pasale asin naglaog sa kuarto para sa pakipag-olay kaiba an mga komandante militar saka an mga tawong bantog sa siudad.” Sa pagboot ni Festo, an Kristianong apostol na si Pablo iinatubang sa sainda. Paano nangyaring an parasunod na ini ni Jesu-Cristo nagtitindog sa atubangan kan trono nin paghokom ni Gobernador Festo?​—Gibo 25:13-23.

² An sinabi ni Festo sa saiyang mga bisita nagtatao nin simbag sa hapot na iyan. Sinabi nia: “Hadeng Agripa asin kamo gabos na kaibahan mi digdi, naheheling nindo an tawong ini na mapadapit sa saiya hinagad sa sako kan bilog na kaburunyogan kan mga Judio sa Jerusalem sagkod digdi, na ikinukurahaw na dai sia dapat mabuhay pa. Alagad nasabotan ko na mayo siang ginibo na maninigo sa kagadanan. Kaya kan an tawong ini mag-apelar sa Saro na Agosto, nagdesisyon akong ipadara sia. Alagad mapadapit sa saiya mayo ako nin ano man na seguradong ikasusurat sa sakong Kagurangnan. Kun siring dinara ko sia sa atubangan nindo, asin nangorogna sa atubangan mo, Hadeng Agripa, tangani na, pagkatapos na magibo an hudisyal na pagsiyasat, igwa akong ikasusurat. Huli ta garo baga bakong makatanosan para sa sako na ipadara an sarong bilanggo asin dai man ipaaram an mga sahot tumang sa saiya.”​—Gibo 25:24-27.

 3. Taano ta nagpaluwas nin mga sahot an relihiosong mga namomoon tumang ki Pablo?

³ Ipinaheheling kan mga tataramon ni Festo na si Pablo napaatubang sa bakong totoong mga sahot nin sedisyon​—sarong krimen na may padusang kagadanan. (Gibo 25:11) Minsan siring, si Pablo daing kasalan. An mga sahot bunga nin pag-imon kan relihiosong mga namomoon sa Jerusalem. Kinokontra ninda an gibohon ni Pablo bilang parabalangibog kan Kahadean asin ikinaaanggot na marhay an pagtabang nia sa iba na magin mga parasunod ni Jesu-Cristo. Biyong guardiado, si Pablo dinara hale sa Jerusalem pasiring sa duongan na siudad nin Cesarea, na duman sia nag-apelar ki Cesar. Hale duman sia dadarahon sa Roma.

 4. Ano an nakabibiglang sinabi ni Hadeng Agripa?

⁴ Imahinara si Pablo sa palasyo kan gobernador na nasa atubangan nin sarong grupo na kaiba an namamahala sa sarong mahalagang kabtang kan Imperyo nin Roma. Hineling ni Hadeng Agripa si Pablo asin nagsabi: “Tinotogotan kang magtaram.” Mantang si Pablo nagtataram, may pambihirang nangyari. An sinabi ni Pablo nagpoon na makaapektar sa hade. Sa katunayan, si Hadeng Agripa nagsasabi: “Sa halipot na panahon makokombensir mo akong magin Kristiano.”​—Gibo 26:1-28.

 5. Taano ta epektibong marhay an mga tataramon ni Pablo ki Agripa?

⁵ Isip-isipa iyan! Bilang resulta kan ekspertong depensa ni Pablo, naapektaran an sarong namamahala kan nakatataros na puersa kan Tataramon nin Dios. (Hebreo 4:12) Ano an epektibong marhay manongod sa depensa ni Pablo? Asin ano an manonodan niato ki Pablo na makatatabang sa sato sa satong paggibo nin disipulo? Kun aanalisaron niato an saiyang depensa, duwang prinsipal na punto an malinaw na minalataw: (1) Si Pablo matibay mangombensir sa saiyang pag-atubang. (2) Ginamit nia sa ekspertong paagi an saiyang kaaraman sa Tataramon nin Dios, kun paanong ginagamit nin trabahador sa epektibong paagi an sarong kasangkapan.

Gamiton an Teknika nin Pangongombensir

6, 7. (a) Siring kan paggamit sa Biblia, ano an kahulogan kan “pangongombensir”? (b) Ano an kabtang kan pangongombensir sa pagtabang sa iba na akoon an katokdoan kan Biblia?

⁶ Sa libro nin Gibo, an mga termino sa Griego para sa pangongombensir paorootrong ginamit may koneksion ki Pablo. Ano daw an kahulogan kaini kun manongod sa satong paggibo nin disipulo?

⁷ Sa orihinal na lenguahe kan Kristianong Griegong Kasuratan, an “kombensiron” nangangahulogan na “madara” o papangyarihon na “magbago an isip paagi sa impluwensia nin pangangatanosan o mga konsiderasyon sa moral,” an sabi kan Vine’s Expository Dictionary of New Testament Words. An pagsiyasat sa pudamental na kahulogan nagtatao nin dugang pang kaliwanagan. Iyan nagtatao kan ideya nin pagtitiwala. Kun siring kun kinokombensir nindo an saro na akoon an sarong katokdoan kan Biblia, nakua nindo an saiyang pagtitiwala, kaya nagtutubod sia sa pagigin totoo kan katokdoan na iyan. Siempre pa, bakong igo na sabihon sa sarong tawo an sinasabi kan Biblia tanganing maniwala sia dian asin humiro kaoyon kaiyan. Dapat na makombensir an kaolay nindo na totoo an sinasabi nindo, baga man an indibiduwal na iyan aki, kataed, katrabaho, kaeskuela, o paryente.​—2 Timoteo 3:​14, 15.

 8. Ano an kalabot tanganing makombensir an sarong tawo sa katotoohan sa Kasuratan?

⁸ Paano nindo makokombensir an sarong tawo na an ibinabalangibog nindo hale sa Tataramon nin Dios iyo an katotoohan? Paagi sa lohikong pangangatanosan, marahay na argumento, asin odok na pakikipag-olay, naghingoa si Pablo na pangyarihon na magbago an isip kan mga indibiduwal na kinaolay nia.a Kun siring, imbes na sabihon sanang totoo an sarong bagay, kaipuhan na tumao kamo nin nakakokontentong ebidensia tanganing suportaran an saindong sinabi. Paano daw ini magigibo? Seguradohon na an saindong sinasabi marigon na nakabasar sa Tataramon nin Dios asin bakong sa personal na opinyon. Siring man, gumamit nin dagdag na ebidensia tanganing suportaran an saindong odok sa pusong mga sinasabi sono sa Kasuratan. (Talinhaga 16:23) Halimbawa, kun itinotokdo nindo na an makinuyog na katawohan magkakamit nin buhay sa paraisong daga, suportaran nin teksto sa Kasuratan an sinasabing iyan, arog baga kan Lucas 23:43 o Isaias 65:21-25. Paano nindo patutunayan an saindong ipinaliliwanag sa Kasuratan? Puede nindong gamiton an mga halimbawa na gikan sa eksperyensia kan kaolay nindo. Puede nindong ipagirumdom sa saiya an simple asin daing bayad na mga kaogmahan na nakakamtan huli sa gayon kan pagsolnop nin saldang, sa mahamot na alimyo nin burak, sa masiram na namit nin prutas, o sa kagayagayahan kun pinagmamasdan an inang gamgam na pinakakakan an saiyang siyo. Tabangan siang masabotan na an siring na mga kaogmahan ebidensia na gusto kan Kaglalang na kita maggayagaya sa buhay digdi sa daga.​—Eclesiastes 3:​11, 12.

 9. Paano kita makapaheheling nin pagigin makatanosan sa satong paghuhulit?

⁹ Kun hinihingoa nindong kombensiron an sarong tawo na akoon an sarong katokdoan sa Biblia, magmaan na an saindong entusiasmo dai magin dahelan na kamo magin garo bakong makatanosan, sa siring sineserahan an isip asin puso kan kaolay nindo. An librong Teokratikong Paadalan nagtatao kan patanid na ini: “An deretsong pagsabi nin katotoohan na nagbubuyagyag kan pagigin sala nin pinakamamahal na paniniwala nin ibang tawo, dawa suportado nin halawig na listahan nin mga teksto sa Kasuratan, sa pankagabsan dai inaako nin marahay. Halimbawa, kun an popular na mga selebrasyon basta sana kinokondenar na pagano an ginikanan, tibaad dai kaini mabago an saboot nin mga tawo manongod dian. Parateng mas mapanggana an pamamaaging nakikipagrasonan.” Taano ta maninigong maghingoa nin odok na magin makatanosan? An librong pinag-aadalan nagsasabi: “An paaging nakikipagrasonan nakaeenkaminar nin orolay, tinatawan an mga tawo nin iisip-isipon sa huri, asin pinapagdadanay na bukas an oportunidad para sa mga pag-orolay sa ngapit. Iyan puedeng makakombensir na marhay.”​—Colosas 4:6.

Pangongombensir na Nakapupukaw sa Puso

10. Sa anong paagi iinintrodusir ni Pablo an saiyang depensa sa atubangan ni Agripa?

¹⁰ Siyasaton niato nin orog an mga tataramon nin pagdepensa ni Pablo sa Gibo kapitulo 26. Mangnoha kun paano nia pinonan an saiyang diskurso. Sa pag-introdusir kan saiyang tema, nakanompong si Pablo nin lehitimong basehan tanganing tawan nin komendasyon si Agripa, minsan ngani iskandaloso an relasyon kan hade sa saiyang tugang na si Berenice. Sinabi ni Pablo: “May labot sa gabos na bagay na iinaakusar sa sako kan mga Judio, Hadeng Agripa, ibinibilang kong maogma an sakong sadiri na sa atubangan mo na ako magdedepensa sa aldaw na ini, orog na ta ika eksperto sa gabos na kostumbre saka mga kontrobersia sa tahaw nin mga Judio. Kun siring nakikimaherak ako sa saimo na dangogon ako na may pagpapasensia.”​—Gibo 26:​2, 3.

11. Paano nagpapaheling nin paggalang an mga tataramon ni Pablo ki Agripa, asin anong pakinabang an nagin resulta?

¹¹ Nariparo daw nindo na rinekonoser ni Pablo an halangkaw na posisyon ni Agripa paagi sa pakikipag-olay sa saiya na ginagamit an saiyang titulo, an Hade? Nagpapaheling ini nin paggalang, asin paagi sa saiyang madonong na pagpili nin mga tataramon, tinawan ni Pablo nin onra si Agripa. (1 Pedro 2:17) Rinekonoser kan apostol si Agripa bilang sarong eksperto sa komplikadong mga kostumbre asin ley kan saiyang mga sakop na Judio asin sinabi nia na naoogma siang ikaaatubang an saiyang depensa sa siring na edukado nanggad na namamahala. Si Pablo, na sarong Kristiano, dai guminawe na garo baga sia mas halangkaw ki Agripa, na bakong Kristiano. (Filipos 2:3) Imbes, si Pablo nakimaherak sa hade na dangogon sia na may pagpapasensia. Sa siring, naggibo si Pablo nin sarong kamugtakan na paagi kaiyan mas posibleng marhay na akoon ni Agripa, saka kan ibang nagdadangog, an sasabihon nia. Nagbubugtak sia nin pundasyon, nin puntong pinagkakaoyonan na gagamiton niang basehan para sa saiyang mga argumento.

12. Sa pagbalangibog kan Kahadean, paano niato mapupukaw an puso kan mga kaolay niato?

¹² Kapareho ni Pablo kan nasa atubangan ni Agripa, poon sa introduksion sagkod sa konklusyon kan satong pag-atubang kan mensahe kan Kahadean, pukawon niato an puso. Magigibo niato ini paagi sa pagpaheling nin sinserong paggalang sa tawong hinuhulitan niato asin paagi sa pagpaheling nin tunay na interes sa saiyang partikular na kamugtakan asin kaisipan.​—1 Corinto 9:20-23.

Gamiton an Tataramon nin Dios sa Ekspertong Paagi

13. Kapareho ni Pablo, paano nindo mamomotibar an mga kaolay nindo?

¹³ Minawot ni Pablo na motibaron an mga nagdadangog sa saiya na humiro kaoyon kan maogmang bareta. (1 Tesalonica 1:5-7) Sa katuyohan na iyan, pinukaw nia an saindang piguratibong puso, an sentro nin motibasyon. Balikan niato an pagdepensa ni Pablo sa atubangan ni Agripa asin mangnoha kun paano ‘ginamit ni Pablo sa tamang paagi an tataramon nin Dios’ paagi sa pagsambit kan mga bagay na sinabi ni Moises asin kan mga propeta.​—2 Timoteo 2:15.

14. Ipaliwanag kun paano si Pablo naggamit nin pangongombensir kan nasa atubangan ni Agripa.

¹⁴ Aram ni Pablo na si Agripa Judio sana sa ngaran. Pinupukaw na gamiton ni Agripa an saiyang kaaraman dapit sa Judaismo, ipinangatanosan ni Pablo na talagang kalabot sa saiyang paghuhulit an “dai pagtaram nin ano man apuera sa mga bagay na isinabi kan mga Propeta patin ni Moises na mangyayari” mapadapit sa kagadanan asin pagkabuhay liwat kan Mesiyas. (Gibo 26:​22, 23) Direktang kinakaolay si Agripa, si Pablo naghapot: “Hadeng Agripa, minatubod ka sa Mga Propeta?” Namugtak sa alanganon si Agripa. Kun sabihon nia na sia dai nagtutubod sa mga propeta, mararaot an saiyang reputasyon bilang may pagtubod na Judio. Alagad kun umoyon sia sa pangangatanosan ni Pablo, maluwas na sia asin an apostol igwa nin hayag na pagkakaoyon asin mamemeligro siang apodon na sarong Kristiano. Sinimbag ni Pablo an saiyang sadiring hapot sa madonong na paagi, na nagsasabi: “Aram ko na minatubod ka.” Paano an puso ni Agripa nagpahiro sa saiya na sumimbag? Sia nagsimbag: “Sa halipot na panahon makokombensir mo akong magin Kristiano.” (Gibo 26:​27, 28) Minsan ngani dai nagin Kristiano si Agripa, minalataw na minsan paano napahiro ni Pablo an puso kaini paagi sa saiyang mensahe.​—Hebreo 4:12.

15. Paano nakapagpoon si Pablo nin sarong kongregasyon sa Tesalonica?

¹⁵ Nariparo daw nindo na an pag-atubang ni Pablo kan maogmang bareta kompuesto nin pagbalangibog sagkod pangongombensir? Huli ta ginamit ni Pablo an paaging iyan mantang ‘ginagamit nia an Tataramon nin Dios sa tamang paagi,’ an nagkapira na nakadangog sa saiya na dati mga naghihinanyog sana nagin mga nagtutubod. Nangyari ini sa Tesalonica, na duman hinanap ni Pablo an mga Judio asin matatakton sa Dios na mga Hentil sa sinagoga. An pagkasaysay sa Gibo 17:2-4 nagsasabi: “Sono sa kaugalean ni Pablo sia naglaog duman sa kaibanan ninda, asin sa laog nin tolong sabbath sia nakipagrasonan sa sainda hale sa Kasuratan, na ipinaliliwanag asin pinatutunayan paagi sa mga reperensia na kaipuhan na an Cristo magdusa asin buhayon liwat hale sa mga gadan . . . Bilang resulta an nagkapira sa sainda nagin mga nagtutubod.” Si Pablo matibay mangombensir. Sia nakipagrasonan, nagpaliwanag, asin pinatunayan paagi sa Kasuratan na si Jesus iyo an haloy nang ipinanuga na Mesiyas. An resulta? Naestablisar an sarong kongregasyon nin mga nagtutubod.

16. Paano kamo makaeeksperyensia nin orog na kaogmahan sa pagbalangibog kan Kahadean?

¹⁶ Puede daw kamong magin mas eksperto pa sa teknika nin pangongombensir kun ipinaliliwanag an Tataramon nin Dios? Kun iyo, maeeksperyensiahan nindo an orog pang personal na satispaksion asin kaogmahan sa saindong paghuhulit asin pagtotokdo sa mga tawo manongod sa Kahadean nin Dios. Ini an naeksperyensiahan kan mga parahayag kan maogmang bareta na nag-aplikar kan mga suhestion na gamiton nin orog pa an Biblia sa paghuhulit.

17. Tanganing ipaheling kun paano kapakipakinabang an paggamit kan Biblia sa satong ministeryo, magsaysay nin personal na eksperyensia o itao an pinakaubod kan eksperyensia sa parapong ini.

¹⁷ Halimbawa, nagsurat an sarong nagbibiaheng paraataman kan Mga Saksi ni Jehova: “Dakol-dakol nang tugang na lalaki asin babae an nagkakapot ngonyan nin Biblia pagnaghuhulit sinda sa harong-harong. Nakatabang ini sa mga parahayag na magbasa nin teksto sa dakol na tawo na nanunuparan ninda. Nakatabang iyan sa kagharong sagkod sa parahayag na ikonektar sa satong ministeryo an Biblia, bako sanang an mga magasin asin libro.” Siempre, kun baga iluluwas niato na naheheling an Biblia mantang kita naghuhulit nakadepende sa manlaenlaen na dahelan, kaiba na an lokal na kostumbre. Minsan siring, maninigong mawoton niato na magkaigwa nin reputasyon sa ekspertong paggamit kan Tataramon nin Dios tanganing kombensiron an iba na akoon an mensahe kan Kahadean.

Magkaigwa kan Pagmansay nin Dios sa Ministeryo

18, 19. (a) Paano minamansay nin Dios an satong ministeryo, asin taano ta maninigo niatong kultibaron an saiyang punto de vista? (b) Ano an makatatabang sa sato na magin mapanggana sa mga pagdalaw liwat? (Helingon an kahon na may titulong “Kun Paano Magigin Mapanggana sa mga Pagdalaw Liwat,” sa pahina 16.)

¹⁸ An saro pang paagi nin pagtaros sa puso kan mga kaolay niato igwa nin koneksion sa pagmansay niato sa ministeryo base sa punto de vista nin Dios asin sa pagigin mapasensia. An kabotan nin Dios iyo na an gabos na klase nin tawo “makaabot sa tamang kaaraman sa katotoohan.” (1 Timoteo 2:​3, 4) Bako daw na iyan an satong kamawotan? Si Jehova mapasensia man, asin an saiyang pasensia nagtatao nin mga oportunidad sa dakol na makapagsolsol. (2 Pedro 3:9) Sa siring, kun may manompongan kita na gustong maghinanyog sa mensahe kan Kahadean, tibaad kaipuhan na paorootrong bumalik tanganing kultibaron an interes na iyan. Kaipuhan an panahon asin pasensia tanganing maheling an pagtalubo kan mga banhi nin katotoohan. (1 Corinto 3:6) An kaibanan na kahon na may titulong “Kun Paano Magigin Mapanggana sa mga Pagdalaw Liwat” nagtatao nin mga suhestion tanganing mapatalubo an siring na interes. Girumdomon, an buhay nin mga tawo​—an saindang mga problema asin situwasyon​—danay na nagbabago. Tibaad dakol na pagprobar an kaipuhan tanganing maabotan sinda sa harong, alagad bawi an paghihingoa. Gusto niato sindang tawan nin oportunidad na madangog an mensahe nin Dios na kaligtasan. Kun siring, mamibi ki Jehova Dios para sa kadonongan na mapaoswag an saindong mga abilidad sa pangongombensir sa saindong gibohon na pagtabang sa iba na akoon an mensahe kan Kahadean.

¹⁹ Oras na manompongan an sarong tawo na nagmamawot na makadangog nin orog pa manongod sa mensahe nin Kahadean, ano pa an magigibo niato bilang Kristianong mga trabahador? An sunod na artikulo nagtatao nin tabang.

[Nota sa Ibaba]

Nagigirumdoman daw Nindo?

• Ano an nagpangyaring magin epektibo an depensa ni Pablo sa atubangan ni Hadeng Agripa?

• Paano makapahihiro sa puso an satong mensahe?

• Ano an makatatabang sa sato na magamit an Tataramon nin Dios sa epektibong paagi sa pagtaros sa puso?

• Paano niato mahihimong mansayon an ministeryo base sa punto de vista nin Dios?

[Kahon/Mga Ritrato sa pahina 16]

Kun Paano Magigin Mapanggana sa mga Pagdalaw Liwat

• Magpaheling nin sinserong personal na interes sa mga tawo.

• Pumili nin nakaaakit na tema sa Biblia na pag-oolayan.

• Ibugtak an basehan para sa kada masunod na pagdalaw.

• Pirmeng isipon an tawong iyan pagkahale nindo.

• Bumalik tolos, tibaad pakalihis nin saro o duwang aldaw, tanganing subaybayan an interes.

• Pirmeng isaisip na an obheto nindo makapoon nin pag-adal sa Biblia.

• Ipamibi na logod pataluboon ni Jehova an interes.

[Ritrato sa pahina 15]

Si Pablo naggamit nin pangongombensir kan sia nasa atubangan ni Gobernador Festo asin Hadeng Agripa