Nakapukaw nin Pagtumang an Paghuhulit ni Saulo

DAI iyan masabotan kan mga Judio sa Damasco. Paanong an malaad na parasurog kan ortodoksia nagin sarong apostata? Uya si Saulo, an tawong nanriribok sa mga nag-aapod sa ngaran ni Jesus sa Jerusalem. Sia nag-abot sa Damasco tanganing paglamagon an mga disipulo duman. Alagad ngonyan ihinuhulit nia mismo na an iyo man sanang hinahamak na kriminal na ipinako sa harigi huli sa paglanghad iyo an Mesiyas! Nabua na daw si Saulo?​—Gibo 9:​1, 2, 20-22.

Igwa gayod nin paliwanag iyan. Posibleng marhay na an ibang nagbiahe hale sa Jerusalem na kasabay ni Saulo sa karaban nag-estorya kan nangyari sa dalan. Mantang nagdadangadang sinda sa Damasco, bigla na sanang suminilyab an liwanag sa palibot ninda, asin gabos sinda nahulog sa daga. Nadangog man an sarong tingog. Mayo nin nakolgan apuera ki Saulo. Sia nakahigda sa tinampo. Kan sa katapustapusi sia buminuhat, kinaipuhan na kabiton sia nin ibang parabiahe pasiring sa Damasco, huli ta sia dai nakakaheling.​—Gibo 9:3-8; 26:​13, 14.

An Kalaban Nagin Parasuportar

Ano an nangyari ki Saulo sa dalan pasiring sa Damasco? Huli daw sa halawig na pagbiahe o init kan saldang sa udto kaya gayod sia nagkaigwa nin diperensia? Determinadong makakua nin natural na mga eksplikasyon, an mga mapagduda sa presenteng panahon nagtatao nin mga senaryo na kaiba an pagdedeliryo, imahinasyon, grabeng sikolohikong krisis na dahelan sa nariribok na konsensia ni Saulo, nervous breakdown, asin hinohonang pagkaigwa nin subi-subi.

An aktuwal na nangyari iyo na si Jesu-Cristo nagpaheling ki Saulo sa nakakabutang liwanag na idto, na nakakombensir sa saiya na Sia an Mesiyas. May mga artistikong pagkaladawan sa pangyayaring ini na ipinapaheling na si Saulo nahulog sa sarong kabayo. Minsan ngani posible iyan, an Biblia nagsasabi sana na sia ‘nahulog sa daga.’ (Gibo 22:6-​11) An ano man na pisikal na pagkahulog na naeksperyensiahan ni Saulo bakong siring kagrabe kan makasusupog na pagbagsak hale sa dati niang posisyon. Kaipuhan nia ngonyan na rekonoseron na totoo an ihinuhulit kan mga parasunod ni Jesus. An puede na sanang gibohon ni Saulo iyo an makiayon sa sainda. Hale sa pagigin agresibong kalaban kan mensahe ni Jesus, si Saulo nagin saro sa pinakamakosog na parasuportar kaiyan. Pagkatapos na makaheling giraray asin mabautismohan, “si Saulo orog pang nagkakaigwa nin kosog asin tinataranta an mga Judio na nag-iistar sa Damasco mantang pinapatunayan nia sa lohikong paagi na ini iyo an Cristo.”​—Gibo 9:22.

Naprakaso an Pakana na Pag-asesinar

Saen nagduman si Saulo, na sa huri inapod na Pablo, pagkatapos na sia makombertir? Kan magsurat sa mga taga Galacia, sia nagsabi: “Nagpasiring ako sa Arabia, asin nagbalik giraray ako sa Damasco.” (Galacia 1:17) An terminong “Arabia” puedeng mag-aplikar sa pagbaklay sa arin man na parte kan Peninsula nin Arabia. May mga iskolar na nagsusuherir na si Pablo tibaad nagduman sa Desierto nin Siria o sa ibang lugar sa kahadean ni Aretas IV sa Nabatea. Posibleng marhay na nagpasiring si Saulo sa sarong toninong na lugar tanganing maghorophorop pagkatapos kan saiyang bautismo, kun paanong si Jesus nagpasiring man sa kapatagan pagkatapos kan saiyang bautismo.​—Lucas 4:1.

Kan magbuelta si Saulo sa Damasco, “an mga Judio nagpaharatolhatol na gadanon sia.” (Gibo 9:23) An siudad binabantayan kan gobernador na nagseserbing representante ni Hadeng Aretas sa Damasco tanganing dakopon si Saulo. (2 Corinto 11:32) Alagad mantang an mga kaiwal nagpapakana na gadanon si Saulo, an mga disipulo ni Jesus nagpaplano nin paagi na sia makadulag.

Kabilang sa mga nagtabang ki Saulo na makadulag iyo si Ananias asin an mga disipulo na nakaibaiba kan apostol pakatapos tolos kan saiyang pagkakombertir.a (Gibo 9:17-19) Tibaad nagtabang man an nagkapirang nagturubod huli sa paghuhulit ni Saulo sa Damasco, huli ta an Gibo 9:25 nagsasabi: “Kinua sia kan saiyang mga disipulo asin itinunton sia kan banggi sa sarong labot sa lanob, na itinunton sia sa sarong basket.” An pananaram na “saiyang mga disipulo” tibaad nangangahulogan na idtong mga tinokdoan ni Saulo. Sa paano man, an kapangganahan kan saiyang ministeryo posibleng marhay na iyong nagpagrabe sa pagkaanggot na namamatean na tumang sa saiya.

Sarong Leksion na Maninigong Manodan

Kun sisiyasaton niato an nagkapirang pangyayari may koneksion sa pagkakombertir asin bautismo ni Saulo, malinaw nanggad na naheheling niato na sia dai nahadit nin sobra kun paano sia hinuhusgaran nin iba; ni nagpondo sia huli sa grabeng pagtumang. An pinakamahalaga ki Saulo iyo an inako niang sugo na maghulit.​—Gibo 22:​14, 15.

Kamo daw kasuarin pa sana nakombensir dapit sa importansia kan paghuhulit kan maogmang bareta? Kun iyo, aram nindo na an gabos na tunay na Kristiano kaipuhan na magin mga parahulit kan Kahadean. Maninigo na dai kamo magngalas na kun beses an saindong ministeryo nakakapukaw nin mga pagtumang. (Mateo 24:9; Lucas 21:12; 1 Pedro 2:20) Arogan an reaksion ni Saulo sa pagtumang. Magkakamit kan pabor nin Dios an mga Kristianong nagtatagal sa irarom nin mga pagbalo na dai nagpopondo. Sinabihan ni Jesus an saiyang mga disipulo: “Ikakaongis kamo nin gabos na tawo huli sa ngaran ko.” Pero, inasegurar nia sinda: “Huli sa saindong pakatagal makakamtan nindo an saindong kalag.”​—Lucas 21:17-19.

[Nota sa Ibaba]

[Ritrato sa pahina 28]

Si Saulo ‘nahulog sa daga’ kan magpaheling si Jesus sa saiya

[Ritrato sa pahina 29]

Nadulagan ni Saulo an pakana na asesinaron sia sa Damasco