Estorya nin Buhay

Binalosan nin Igo ni Jehova an Sakong Kamawotan na Magin Misyonera

Isinaysay ni Sheila Winfield da Conceição

Sarong beses inestoryahan kami nin sarong misyonera na nagdalaw gikan sa Aprika na sa nadestinohan sa saiya an gabos pinapadagos sia asin atentong naghihinanyog sa maogmang bareta kan Kahadean nin Dios. ‘Gusto ko nanggad na maglingkod sa teritoryong arog kaiyan!’ an inisip ko. An pag-oolay na iyan nagtadom sa sako, na 13 anyos kaidto, kan pagmawot na magin misyonera.

MINSAN siring, an pamilya mi nagpoon na makanood manongod ki Jehova nin mas amay nanggad. Sarong aga kan 1939, duwang areglado an bulos na hoben na lalaki an nagtuktok sa samong pinto sa Hemel Hempstead, na nasa luwas sana kan Mas Mahiwas na Londres, Inglaterra. Sinda mga Saksi ni Jehova. Ako namundag kan mismong taon bago kaiyan, kaya dai ko magirumdoman an pagdalaw ninda. Tanganing maghale sinda, sinabihan sinda ni Nanay na tibaad magin interesado si Tatay alagad maabot sia sa harong nin alas 9:00 nin banggi. Nasorpresa nanggad sia kan sinda magbalik kan mismong bangging idto! Pakatapos na masierto an saindang paninindogan sa politikal asin nasyonalistikong mga isyu, pinadagos sinda kan sakong ama, si Henry Winfield, asin nag-ako sia nin pag-adal sa Biblia. Marikas siang nag-oswag pasiring sa bautismo. Pakaagi nin nagkapirang taon, an sakong ina, si Kathleen, nagpoon man na mag-adal. Sia nabautismohan kan 1946.

Kan 1948, nagpoon akong makikabtang nin regular sa paghuhulit kan maogmang bareta kan Kahadean nin Dios. Inisip ko na kakaipuhanon ko an sarong relo para sa tamang pagreport kan oras na ginamit ko sa ministeryo. Kun nagigin maboot kami, natatawan kaming magturugang nin sais sentimos kada Sabado bilang paragastos. Dinamot ko an sais sentimos ko sa laog haros nin duwang taon tanganing makabakal ako kan pinakabaratong relo kan panahon na idto. Minsan siring, si Ray, an nguhod sa sakong duwang tugang na lalaki, pirmeng naghahagad ki Tatay nin duwang sinsilyo na tres sentimos kada saro, nungkang sarong sinsilyo na sais sentimos. Sarong aldaw grabe an pag-insistir nia na magkaigwa nin duwang sinsilyo kaya naanggot si Tatay. Nagpoon nang maghibi si Ray asin sinabi nia na kaipuhan nia an duwang sinsilyo na tres sentimos kada saro huli sa sarong sekreto ninda ni Jehova. Sa katapustapusi, si Ray nagpaliwanag: “An sarong sinsilyo na tres sentimos ilalaag sa kahon sa kontribusyon, asin an saro pang sinsilyo para sako.” Napahibi si Nanay sa kagayagayahan, tolos na nagpasinsilyo si Tatay, asin nanodan ko an kahalagahan nin pinansial na pagsuportar sa gibohon na pang-Kahadean.

Kan panahon man na idto, inareglo ni Tatay na bumalyo kun saen mas dakula an pangangaipo para sa mga parabalangibog kan Kahadean. Kan 1949 ipinabakal nia an saiyang oma asin an kalot na kinukuanan nin pinapabakal na baybay saka graba asin nagpoon sia na magpayunir, na naglilingkod bilang bilog na panahon na ministro kan Mga Saksi ni Jehova. Nabautismohan ako kan Setyembre 24, 1950, bilang simbolo kan sakong pagdusay ki Jehova. Poon kaidto, durante nin bakasyon niamo sa eskuelahan, nagpapalista ako bilang bakasyon [ngonyan auxiliary] payunir, na naggagamit nin 100 na oras kada bulan sa ministeryo. Alagad kapinonan pa sana iyan. Dai nahaloy nagin makosog na kamawotan kan sakong puso na gumibo nin orog pa sa pagpalakop kan dalisay na pagsamba.

An Sakong Kamawotan na Magin Misyonera

Kan 1951, nadestino si Tatay sa Bideford, North Devon. Dai nahaloy pakaabot niamo duman, dinalaw an kongregasyon niamo kan misyonera na naglingkod sa Aprika, siring kan nasambitan sa kapinonan. Pakatapos kaiyan, an sakong kamawotan na magin misyonera nakaimpluwensia sa gabos kong desisyon. Aram kan mga paratokdo sa eskuelahan an sakong pasohan asin ginibo ninda an gabos nindang magigibo tanganing desganaron ako, na naglalaom na sekular na karera an pag-aaboton ko. Minsan siring, sa huring aldaw ko sa eskuelahan, kan ako magduman sa opisina kan mga paratokdo tanganing pasalamatan sinda asin magpaaram, saro sa sainda an nagsabi: “Enhora-buena! Ika sana an estudyante na talagang nakakaaram kun ano an gusto mo sa buhay. Naglalaom kami na maaabot mo an saimong pasohan.”

Huling dai nagsayang nin panahon, nakakua ako nin trabaho na por ora sana, asin kan Disyembre 1, 1955, nagin regular payunir ako. Sa huri, si Nanay asin an sakong mga tugang na lalaki nagin mga payunir man. Kaya sa laog nin nagkapirang taon, gabos sa pamilya nasa bilog na panahon na paglilingkod.

Pasiring sa Irlandia

Pakalihis nin sarong taon, nakaresibi ako nin imbitasyon na maglingkod sa Irlandia. Ini sarong lakdang pasiring sa pag-aabot kan pasohan ko na magin misyonera. Kan Pebrero 1957, kaiba an duwa pang hoben na payunir, si June Napier asin Beryl Barker, nag-abot ako sa Cork, sa timog nin Irlandia.

Depisil an paglilingkod sa langtad sa Irlandia. Kadakol kan pagtumang gikan sa Iglesia Katolika Romana. Nakanood kami na seguradohon na igwa nin maluluwasan sa sarong bloke nin mga apartment o lugar nin paharong, enkaso kaipuhan niamo na humale nin biglaan. Pirme niamong itinatago an mga bisikleta mi nin nagkapirang distansia an rayo, alagad parateng may nakakanompong kaiyan asin linalaslas o pinapakupos an mga rueda.

Sarong beses, mantang nagdadalaw kami ni Beryl sa mga residente nin sarong dakulang lugar nin paharong, sarong grupo nin mga aki an nagpoon na kurahawan kami nin mga insulto asin ginarapo kami. Kaya naglaog kami sa sarong tindahan, na parte nin harong nin sarong tawo, na may itinitindang gatas. Nagpoon na magtiripon sa luwas an sururog. Mantang gustohon ni Beryl an gatas, luway-luway na ininom nia an duwa o tolong baso kaini, na naglalaom na maharale an sururog. Dai sinda nagharale. Dangan, sarong hoben na padi an naglaog sa tindahan. Huling inisip nia na kami mga bisita, sinabi nia na gusto nia kaming ipasyar. Minsan siring, iiniba nia nguna kami sa saro pang kuarto sa laog kan harong, asin mantang kami silensiong nakatukaw, ginibo nia an biatiko sa sarong madali nang magadan na may edad nang lalaki. Dangan naghale kami sa harong kaiba an padi. Huling naheling kami na nakikiestoryahan sa saiya, nagharale an sururog.

Pasiring sa Gilead

Kan 1958, an Kabotan nin Dios na Internasyonal na Asamblea gigibohon kaidto sa Nueva York. Maduman si Tatay, asin gusto ko man na magduman, alagad mayo akong kuarta. Dangan, biglang nagadan an sakong lola asin winalatan ako nin 280 dolyares (Estados Unidos). An balikan na pamasahe pasiring sa asamblea 180 dolyares, kaya tolos akong nagpareserba nin tiket sa eroplano.

Dai nahaloy pakatapos kaiyan, sarong representante gikan sa sangang opisina nin Mga Saksi ni Jehova sa Britania an nagdalaw sa samo asin inimbitaran nia an gabos na espesyal payunir na maatender sa asamblea na mag-aplay para sa pagsasanay sa pagmimisyonero sa Paadalan sa Biblia kan Watchtower sa Gilead. Dai ako makapaniwala! Tinawan nia nin aplikasyon an gabos puera sa sako. Hoben pa daa akong marhay. Nakiolay ako na tawan man ako, na ipinapaliwanag na naghale na ako sa samong nasyon asin haros nasa pagmimisyonero na ako. Huling naheling an sakong determinasyon, tinawan nia ako nin aplikasyon. Namibi nanggad ako na akoon! An simbag nag-abot tolos, asin inimbitaran ako na mag-atender sa Gilead.

Sa dakulang kagayagayahan ko, ilinista ako sa ika-33 na klase sa Gilead, kaiba an 81 iba pang payunir gikan sa 14 nasyon. Marikas na natapos an limang bulan na pag-adal. Sa pagtatapos, nagtao sa samo si Tugang na Nathan H. Knorr nin sarong nakakamotibar na pahayag na apat na oras an lawig. Inenkaminar nia an mga makakapagdanay na daing agom na gibohon an siring. (1 Corinto 7:37, 38) Alagad para sa samo na nagmamawot na mag-agom sa ngapit, isinuherir nia na gumibo kami nin listahan nin personal na mga rekisitos mi para sa sarong angay na agom. Dangan, kun umabot an potensial na magigin agom, puede niamong siyasaton an indibiduwal sa tabang kan mga rekisitos na iyan.

Kabilang an minasunod sa sakong personal na listahan nin mga rekisitos para sa potensial na magigin agom: Kaipuhan na sia kapwa misyonero asin namomoot ki Jehova, mas dakol an aram nia na katotoohan sa Biblia kisa sako, andam na lingawan nguna an pagkaigwa nin mga aki bago an Armagedon tanganing makapadagos sa bilog na panahon na paglilingkod, sueltong magtaram nin Ingles, asin matua sako. An listahan na ini sarong dakulang tabang sa sako, na sarong 20 anyos na madali nang madestino sa sarong harayong nasyon.

Pasiring sa Brazil

Kan Domingo, Agosto 2, 1959, naggradwar kami asin ipinaaram sa samo an mga destino mi. Si Vehanouch Yazedjian, Sarah Greco, Ray saka Inger Hatfield, Sonia Springate, Doreen Hines, asin ako idinestino sa Brazil. Napalukso an puso niamo. Naimahinar ko an mga kadlagan, mga halas, mga kahoy na goma, asin tubong mga Indian. Minsan siring, nasorpresa nanggad ako kan ako umabot! Imbes na sa kadlagan nin Amazon, nasa Rio de Janeiro ako, sarong masaldang asin modernong siudad, an kabisera kan nasyon kan panahon na idto.

An nagin ensegidang kadepisilan niamo iyo an makanood nin Portugues. Durante kan enot na bulan, 11 oras kaming nag-aadal kada aldaw. Pakatapos na maghulit sa Rio asin mag-istar nin kadikit na panahon sa sangang opisina kan Mga Saksi ni Jehova duman, ipinadara ako sa erokan nin mga misyonero sa Piracicaba, sa Estado nin Sao Paulo, asin sa huri sa erokan nin mga misyonero sa Porto Alegre, sa Estado nin Rio Grande do Sul.

Dangan, kan amay nin 1963, nakaresibi ako nin sarong imbitasyon na magtrabaho sa Departamento nin Pagtradusir sa sangang opisina. Si Floriano Ignez da Conceição, na nagtokdo sa samo nin Portugues kan enot na pag-abot niamo, iyo an nangangataman sa departamento. Nanodan nia an katotoohan kan 1944, kan mga 300 pa sana an Saksi sa Brazil, asin nag-atender sia sa ika-22 na klase sa Gilead. Sarong aldaw, pakalihis nin nagkapirang bulan, pinakiolayan ako ni Tugang na Conceição na magpawalat sa udto, huling gusto nia akong makaolay. Kan primero, nahadit ako. May nagibo daw akong sala? Kan sa katapustapusi magbagting na para sa pagkakan, hinapot ko sia kun ano an gusto niang sabihon sa sako. Bilang simbag, sia naghapot, “Boot mo daw na magpakasal sa sako?” Nabigla akong marhay. Hinagad ko sa saiya na tawan ako nin panahon na pag-isipan an mga bagay-bagay asin dali-dali akong nagduman sa lugar nin pangudtohan.

Bako si Floriano an enot na tugang na lalaki na nagpahayag nin interes sa sako. Minsan siring, sagkod kan panahon na idto, mayo pa nin nakaabot sa sakong personal na mga rekisitos para sa sarong angay na agom. Naniniwala ako na nakatabang sa sako an listahan ko na makalikay na gumibo nin salang desisyon. Ngonyan, laen na. Naabot ni Floriano an gabos kong rekisitos! Kaya ikinasal kami kan Mayo 15, 1965.

Pag-atubang sa Kadepisilan nin Helang

Nagin sarong maogmang eksperyensia para samo ni Floriano an pag-agoman niamo, sa ibong kan mga kadepisilan na napaatubang sa samo. An saro digdi iyo an mga problema sa salud ni Floriano, na nagpoon dai nahaloy bago kan pag-agoman mi. Kan nakaaging mga taon, puminalya an saiyang walang pulmon, asin an mga epekto pakatapos nagpoon nang magin dahelan nin grabeng pagsakit nia. Bilang resulta, naghale kami sa Bethel asin idinestino kami bilang espesyal payunir sa siudad nin Teresopolis, sa mabukid na rehion kan Estado nin Rio de Janeiro. Naglaom kami na an klima duman makakatabang sa pagrahay nia.

Dugang pa, kan Disyembre 1965, nakaresibi ako nin bareta na an sakong ina grabe an helang na kanser. Regular kaming nagsusuratan, alagad dai ko naheling si Nanay sa laog nin pitong taon. Kaya sia an namasahe sa samo pasiring sa Inglaterra tanganing maheling sia. Inoperaran si Nanay, alagad dai nakayang haleon kan mga doktor an kanser. Dawa dai na sia nakakabangon asin nagkahelang nin grabe, pinagdanay nia an saiyang pagmawot na makikabtang sa paghuhulit. Igwa sia nin makinilya sa saiyang kuartong torogan tangani na ikadikta nia an mga letra na imamakinilya. Sia nagpapatotoo man sa halipot sa mga bisita. Nagadan sia kan Nobyembre 27, 1966. Kan bulan man sanang idto, nagreport sia nin dies oras nin paglilingkod sa langtad! Padagos na nagin maimbod si Tatay sa paglilingkod bilang payunir sagkod sa saiyang kagadanan kan 1979.

Pagkagadan ni Nanay, nagbalik kami ni Floriano sa Brazil, kun saen kami naglingkod sa Estado nin Rio de Janeiro poon sa kaenot-enote. Kan primero inasignaran kami sa gibohon sa sirkito sa kabisera kan estado, alagad an kagayagayahan na ini temporaryo sana, huling nagkahelang giraray nin grabe si Floriano. Dangan nagbalik kami sa Teresopolis bilang espesyal payunir.

Kan 1974, pagkatapos nin mga taon nin makolog na mga pagbolong, sa katapustapusi hinale kan mga doktor an walang pulmon ni Floriano. Kan panahon na idto, dai nia kayang maglingkod bilang nangengenot na paraataman o bilang espesyal payunir, alagad kaya niang magkondukta nin mga pag-adal sa Biblia sa mga oras nin pagbisita sa ospital—an saro sa sainda na kinokonduktahan sa lenguaheng Ingles iyo si Bob, sarong retiradong Amerikano. Inako ni Bob an katotoohan asin sa huri nabautismohan. Luway-luway na nagrahay si Floriano asin naglingkod bilang regular payunir poon kaidto.

Binendisyonan ni Jehova an Sakong Ministeryo

Sa nag-aging mga taon, padagos akong naglingkod bilang espesyal payunir, asin binendisyonan ni Jehova an sakong ministeryo. Sa Teresopolis, nagkaigwa ako kan marahayon na pribilehio na tabangan an labing 60 katawo na magdusay kan saindang buhay ki Jehova. Kabilang sa mga ini an sarong babae na an ngaran Jupira, na tinokdoan ko man na magbasa. Pag-abot nin panahon, nakipag-adal sa sako an walo sa saiyang nasa edad nang mga aki. Bilang resulta, si Jupira asin an labing 20 kapamilya asin paryente aktibong naglilingkod ki Jehova ngonyan. An saro magurang sa kongregasyon, an tolo ministeryal na lingkod, asin an duwa payunir.

Nakanood ako na papagdanayon an positibong aktitud manongod sa posibilidad na an mga tawo makanood kan katotoohan. Sa sarong pangyayari, nagkokondukta ako nin pag-adal sa Biblia sa sarong hoben na babae na an ngaran Alzemira kan an saiyang agom, si Antonio, naghuma na ipapalapag ako sa duwang dakulaon na ayam kun dai ako tolos-tolos na mahale sa saindang harong. Pakatapos kaiyan, bihira sana an komunikasyon niamo ni Alzemira sagkod na mga pitong taon an nakalihis, kan nagibo kong makua an permiso ni Antonio na makipag-adal giraray sako si Alzemira. Pero, pinagbawalan nia ako na ipakipag-olay sa saiya an manongod sa Biblia. Minsan siring, sarong aldaw na maoran, inimbitaran ko si Antonio na umiba sa pag-adal. Dangan naaraman ko na an saiyang problema iyo na sia dai tataong magbasa o sumurat. Poon kaidto, si Floriano asin an iba pa inadalan sia sa Biblia asin tinokdoan sia na magbasa. Ngonyan si Alzemira asin Antonio pareho nang bautisado. Sia dakulang tabang sa kongregasyon, na iniibanan an dakol na hoben sa ministeryo.

An mga ini pira sana sa mga eksperyensia niamo durante kan labing 20 taon na paglilingkod mi sa Teresopolis. Sa kapinonan nin 1988, naresibi niamo an bagong destino—an siudad nin Niteroi, kun saen kami naglingkod sa suminunod na limang taon bago nagbalyo sa Santo Aleixo. Dangan ibinalyo kami sa Kongregasyon nin Japuiba sa sentro kan estado asin nagkaigwa kami kan pribilehio na ponan an Kongregasyon nin Ribeira.

Sarong Simple Alagad Nakakakontentong Buhay

Sa nag-aging mga taon, nagkaigwa kami ni Floriano kan pribilehio na tabangan an labing 300 katawo na magdusay kan saindang buhay ki Jehova. Sa ngonyan, an nagkapira sa sainda naglilingkod sa sangang opisina, asin an nagkapira payunir, magurang sa kongregasyon, asin ministeryal na lingkod. Nagpapasalamat nanggad ako na ginamit kami nin Dios paagi sa saiyang banal na espiritu na tabangan an kadakol na tawo!—Marcos 10:29, 30.

Totoo na kaipuhan ni Floriano na tioson an grabeng mga problema sa salud. Sa ibong kan saiyang kamugtakan, nagdadanay sia na marigon, magayagaya, asin kompiado ki Jehova. Pirme niang sinasabi: “An kaogmahan ngonyan dai naggigikan sa pagkakaigwa nin buhay na mayong problema. Iyan naggigikan sa pagkamit kan tabang ni Jehova na atubangon an satong mga problema.”—Salmo 34:19.

Kan 2003, may nadiskobreng kanser sa wala kong mata. Inoperaran ako, asin an sakong mata sinalidahan nin artipisyal, na kaipuhan na linigan nin dakol na beses kada aldaw. Sa ibong kaini, binendisyonan ako ni Jehova nin kosog na makapagpadagos sa paglilingkod sa saiya bilang espesyal payunir.

Kun manongod sa materyal na mga bagay, simple an buhay ko. Pero, binendisyonan ako ni Jehova sa sakong asignasyon asin pinayaman ako sa espirituwal. An komento kan misyonerang idto manongod sa paghuhulit sa Aprika nagin sarong angay na deskripsion kan samong asignasyon sa Brazil. Tunay nanggad, binalosan nin igo ni Jehova an sakong kamawotan na magin misyonera!

[Ritrato sa pahina 9]

Kaiba ko an sakong pamilya, 1953

[Ritrato sa pahina 9]

Paghuhulit sa Irlandia, 1957

[Ritrato sa pahina 10]

Kan 1959 sa Brazil, kaiba ko an mga kapwa misyonera. Poon sa wala patoo: Ako, Inger Hatfield, Doreen Hines, asin Sonia Springate

[Ritrato sa pahina 10]

Kaiba ko an sakong agom