Kun Ano an Gigibohon kan Pagdatong ni Cristo

“MAKATATAKOT NA KADAHASAN SA SÃO PAULO.” Siring kaiyan an pagkaladawan kan magasin na Veja sa apat na aldaw kan Mayo 2006 kan “pinaluhod” nin organisadong krimen an pinakadakula asin pinakamayaman na siudad sa Brazil. Mga 150 pulis, kriminal, asin ordinaryong siudadano an nagadan durante kan “labing 100 na oras na makatatakot na kadahasan.”

An kadahasan nagigin pangenot na mga bareta sa haros gabos na lugar sa daga. Garo baga dai iyan kayang papondohon kan mga tawong namomoon. Paorog nang paorog na nagigin peligrosong istaran an satong kinaban. Tibaad nanluluya an saindong boot huli ta dawa saen kamo magheling, kadakol kan maraot na bareta. Minsan siring, harani na an panahon para sa pagbabago.

Tinokdoan ni Jesus an saiyang mga parasunod na ipamibi na dumatong logod an Kahadean nin Dios asin gibohon logod an kabotan nin Dios, “kun paano sa langit, siring man sa daga.” (Mateo 6:9, 10) An Kahadean na ini sarong gobyerno na si Cristo Jesus an Hadeng ninombrahan nin Dios. Reresolberan kaiyan an gabos na problema nin katawohan. Minsan siring, tanganing mapangyari kan Kahadean nin Dios an mga pagbabago sa daga, an pamamahala nin tawo kaipuhan na salidahan kan pamamahala ni Cristo. Ini an eksaktong gigibohon kan pagdatong ni Cristo.

Sarong Matoninong na Transisyon?

Mapasakop daw nin matoninong an mga nasyon sa pamamahala ni Cristo? Tinawan si apostol Juan nin sarong bisyon na nagtatao kan simbag. Si Juan nagsaysay: “Naheling ko an mabangis na hayop [an politikal na sistema kan kinaban] asin an mga hade kan daga patin an saindang mga hukbo na nagkatiripon tanganing makiguerra sa nakakabayo [si Jesus] asin sa saiyang hukbo.” (Kapahayagan 19:19) Ano an mangyayari sa mga hade kan daga sa guerrang ini? ‘Babarion sinda [kan Hadeng linahidan ni Jehova] paagi sa setrong batbat, papasaon sinda siring sa lalagan kan paragibo nin koron,’ an sabi kan Biblia. (Salmo 2:9) An politikal na sistema biyong roronoton. An Kahadean nin Dios an “maronot asin matapos kan gabos na . . . kahadean [nin tawo], asin iyan mismo magdadanay sagkod sa mga panahon na daing talaan.”—Daniel 2:44.

Paano man an mga tawo na nagtutumang sa Kahadean nin Dios? “Sa pagkahayag kan Kagurangnan na Jesus hale sa langit kaiba an saiyang makapangyarihan na mga anghel sa naglalaad na kalayo,” si Jesus ilinaladawan bilang an ‘mamamalos sa mga dai nakakamidbid sa Dios asin sa mga dai nagkukuyog kan maogmang bareta.’ (2 Tesalonica 1:7, 8) “Kun dapit sa mga marigsok,” an sabi kan Talinhaga 2:22, “sinda popohoon sa mismong daga; asin kun manongod sa mga madaya, sinda hahaleon dian.”

Mapadapit sa pagdatong ni Cristo, an Biblia nagsasabi: “Uya! Sia madatong kaiba kan mga panganoron, asin an gabos na mata makakaheling sa saiya.” (Kapahayagan 1:7) Dai sia maheheling kan mga tawo paagi kan saindang literal na mga mata. Poon kan pagsakat nia sa langit, si Jesus sarong espiritung persona “na nag-eerok sa dai maranihan na liwanag, na mayo ni saro sa mga tawo an nakaheling o makakaheling.”—1 Timoteo 6:16.

Dai ni Jesus kaipuhan na magmateryalisar tanganing ‘maheling’ kan mga nag-iistar sa daga kun paanong dai man iyan kinaipuhan na gibohon ni Jehova kan ipaabot nia an Sampulong Damat sa mga Egipcio kan panahon ni Moises. An mga tawo kan panahon na idto dai nagduda na si Jehova an nagpapangyari kan mga damat, asin napiritan sindang rekonoseron an saiyang kapangyarihan. (Exodo 12:31) Sa kaagid na paagi, kun humiro na si Cristo bilang an Parakastigo nin Dios, mapipiritan an mga marigsok na ‘maheling,’ o marealisar, na ginagamit nin Dios si Jesus sa paghokom sa sainda. Maaaraman ninda ini huli ta an katawohan pinatanidan na nin patienot. Iyo, “an gabos na mata makakaheling [ki Jesus], asin tutumbokon kan gabos na tribo sa daga an saindang sadiri sa pagmondo huli sa saiya.”—Kapahayagan 1:7.

An kalaglagan kan mga marigsok asin paghale kan marigsok na pamamahala mahalagang marhay bago ikabalik sa daga an tunay na katoninongan asin prosperidad. Gigibohon iyan ni Cristo. Dangan sia na an makapot kan bilog na kontrol sa gabos na bagay-bagay sa daga, asin masunod an importanteng mga pagbabago.

Sarong Pagbabalik sa Dati na Matao nin mga Pakinabang

Si apostol Pedro nagtaram manongod sa “pagbabalik sa dati kan gabos na bagay na isinabi nin Dios paagi sa ngoso kan saiyang banal na mga propeta kan suanoy na panahon.” (Gibo 3:21) Kaiba sa pagbabalik na ini sa dati an pagliliwat na mangyayari sa daga durante kan pamamahala ni Cristo. Kabilang sa mga propeta na ginamit nin Dios sa pagtaram manongod sa “pagbabalik sa dati kan gabos na bagay” sa daga iyo si propeta Isaias kan ikawalong siglo B.C.E. Ihinula nia na gigibohon ni Jesu-Cristo, an “Prinsipe nin Katoninongan,” na ibalik an katoninongan sa daga. Mapadapit sa pamamahala ni Cristo, an propesiya ni Isaias nagsasabi: “An kadakolan kan sa prinsipeng pamamahala asin an katoninongan magigin daing kasagkodan.” (Isaias 9:6, 7) Totokdoan ni Jesus an mga tawo sa daga sa mga dalan nin katoninongan. An mga nag-eerok sa daga ‘tunay na makakanompong kan saindang labi-labi nanggad na kaogmahan sa nagsosopay na katoninongan.’—Salmo 37:11.

Ano an mangyayari sa kadukhaan asin pagkagutom sa irarom kan pamamahala ni Cristo? Si Isaias nagsabi: “Si Jehova nin mga hukbo magibo nanggad para sa gabos na banwaan, sa bukid na ini, nin bangkete nin matatabang putahe, bangkete nin arak na laon, nin matatabang putahe na pano nin hotok, nin arak na laon, sinara.” (Isaias 25:6) Nag-awit an salmista: “Magkakaigwa nin abundang tipasi sa ibabaw kan daga; maglilipwas sa alitoktok kan kabukidan.” (Salmo 72:16) Dugang pa, mapadapit sa mga nag-eerok sa daga, mababasa niato: “Sinda siertong matogdok nin mga harong asin maistar sinda dian; asin siertong matanom sinda nin mga ubasan asin kakakanon ninda an bunga kaiyan. Dai sinda matogdok asin iba an maistar; dai sinda matanom asin iba an makakan. Huli ta magigin siring sa mga aldaw nin kahoy an mga aldaw kan sakuyang banwaan; asin an ginibo kan saindang mga kamot lubos na gagamiton kan sakuyang mga pinili.”—Isaias 65:21, 22.

Ihinula man ni Isaias an katapusan kan helang asin kagadanan. An Dios nagtaram paagi ki Isaias, na nagsasabi: “Sa panahon na iyan an mga mata kan mga buta magkakaburuklat, asin an mismong mga talinga kan mga bungog magkakaburukasan. Sa panahon na iyan an pilay matukad na garo lalaking usa, asin an dila kan pula makurahaw sa kaogmahan.” (Isaias 35:5, 6) Dangan “mayo nin nag-eerok na masabi: ‘Naghehelang ako.’” (Isaias 33:24) “Totoong hahalonon [nin Dios] an kagadanan sagkod lamang, asin papahidon nanggad kan Soberanong Kagurangnan na Jehova an mga luha sa gabos na lalauogon.”—Isaias 25:8.

Paano man an gabos na gadan na “nasa mga lolobngan na girumdoman”? (Juan 5:28, 29) Nagpropesiya si Isaias: “An saimong mga gadan magkakaburuhay. . . . Sinda maburuhat.” (Isaias 26:19) Iyo, bubuhayon liwat idtong mga nagtotorog sa kagadanan!

“An Dios an Saimong Trono Sagkod Lamang”

An pagdatong ni Cristo magbubunga nin lubos na pagbabalik sa dati kan planetang Daga. An daga liliwaton na magin sarong mamuraway na paraiso, asin an katawohan magkakasararo sa pagsamba sa tunay na Dios. Makakasierto daw kita na magigin mapanggana si Jesu-Cristo sa paghale kan karigsokan sa daga asin sa pagpangyari nin matanos na mga kamugtakan?

Estudyare an ginigikanan kan kapangyarihan asin autoridad na itinao ki Jesus. Mapadapit sa Aki, an Biblia nagsasabi: “An Dios an saimong trono sagkod pa man, asin an setro kan saimong kahadean setro nin katanosan. Namoot ka sa katanosan, asin naongis ka sa katampalasanan.” (Hebreo 1:8, 9) An trono ni Jesus, an boot sabihon, an saiyang katongdan o autoridad, gikan ki Jehova. An Dios an Kagtugdas asin Kagtao kan tronong ini. Mayong mga problema an magigin depisilon resolberan para ki Jesus.

Pagkatapos kan saiyang pagkabuhay liwat, sinabihan ni Jesus an saiyang mga disipulo: “An gabos na autoridad sa langit asin sa daga itinao na sa sako.” (Mateo 28:18) “An mga anghel asin mga autoridad patin mga kapangyarihan ipinasakop na sa saiya,” an sabi kan 1 Pedro 3:22. Mayo nin kapangyarihan o autoridad an magigin mapanggana sa pagtumang ki Jesus. Mayong makakaolang sa saiya sa pagtao nin nagdadanay na pakinabang sa katawohan.

Kun Paano Nakakaapektar sa mga Tawo an Pagdatong ni Cristo

Sa saiyang surat sa mga taga Tesalonica, si apostol Pablo nagsabi: “Daing ontok na isinasaisip niamo an saindong maimbod na gibo asin an saindong mamomoton na pagpapagal patin an saindong pagtagal huli sa saindong paglaom sa satong Kagurangnan na Jesu-Cristo sa atubangan kan satong Dios asin Ama.” (1 Tesalonica 1:3) An mabungang pagpapagal asin pakatagal iinatribwir ni Pablo sa paglaom ki Jesu-Cristo. Kaiba sa paglaom na iyan an pagtubod sa pagdatong ni Cristo asin sa pagbabalik sa dati na papangyayarihon kaiyan. Masususteniran kan siring na paglaom an tunay na mga Kristiano, o mapagdadanay sindang nagtatagal, sa ibong nin depisilon na mga situwasyon.

Arog halimbawa ni Carlos, na taga São Paulo, Brazil. Kan Agosto 2003, naaraman ni Carlos na igwa sia nin kanser. Poon kaidto, walong beses na siang inoperaran na nagresulta sa makolog asin nagpapaluyang mga epekto. Pero, padagos siang nagin gikanan nin pagparigon sa boot para sa iba. Halimbawa, mantang naghuhulit sa tinampong nasa atubangan nin sarong dakulang ospital, nanuparan nia an saro man sa mga Saksi ni Jehova, na an agom na lalaki binobolong paagi sa chemotherapy. Huling naeksperyensiahan na an nakakapanluya nin biyo na mga epekto nin kanser, nahimo ni Carlos na maparigon an boot asin maranga an agom na lalaki sagkod an agom na babae. Pagkatapos kaini, sinda nagkomento na an pag-orolay na idto nagin gikanan nin pagparigon sa boot para sa sainda. Sa siring, naeksperyensiahan ni Carlos an pagigin totoo kan mga tataramon na ini ni Pablo: “[An Dios] minaranga sa sato sa gabos niatong kapurisawan, tanganing maranga niato an mga nasa ano man na kapurisawan paagi sa karangahan na inako niato mismo hale sa Dios.”—2 Corinto 1:4, New International Version.

Ano an nakakatabang ki Carlos na makakua kan kosog na magpadagos sa pagparigon sa boot nin iba sa ibong kan saiyang helang? An paglaom sa pagdatong ni Cristo asin sa gabos na gigibohon kaiyan nagmomotibar ki Carlos na magdanay sa “paggibo nin karahayan.”—Galacia 6:9.

Estudyare man an nangyari ki Samuel, na an nguhod na tugang na lalaki ginadan 50 metros sana an distansia sa harong kan saindang ama. Sampulong bala an tuminama sa hawak kan saiyang tugang. An bangkay walong oras na yaon sa gilid nin dalan mientras na iniimbestigaran kan mga pulis an krimen. Dai malingawan ni Samuel an nangyari kan aldaw na idto. Minsan siring, sinususteniran sia kan paglaom na hahaleon ni Cristo sa daga an gabos na karigsokan asin na an masunod na matanos na pamamahala matao nin mga bendisyon sa katawohan. Parateng iniimahinar ni Samuel an saiyang sadiri na kinukugos an saiyang binuhay liwat na tugang sa Paraiso sa daga.—Gibo 24:15.

Ano an Dapat Nindong Gibohon?

Makakanompong kamo nin dakulang karangahan sa paglaom sa pagdatong ni Cristo asin sa gigibohon kaiyan. Seguradong reresolberan ni Jesu-Cristo an gabos na dahelan nin mga problema nin tawo asin nin mga karompotan na nakapalibot sa sato.

Ano an dapat nindong gibohon tanganing makamtan an mga bendisyon na abundang ipapaabot sa katawohan kan pamamahala ni Cristo? Maingat na pag-adalan an Tataramon nin Dios, an Biblia. Sa sarong pamibi sa saiyang Ama, sinabi ni Jesus: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) Gibohon nindong pasohan na siyasaton kun ano an itinotokdo kan Biblia. An mga Saksi ni Jehova sa saindong lugar maoogmang tabangan kamo mapadapit digdi. Mainit niamo kamong iniimbitaran na kontakon sinda o suratan an mga kagpublikar kan magasin na ini.

[Mga Ritrato sa pahina 7]

An pagdatong ni Cristo magbubunga nin lubos na pagbabalik sa dati kan daga

[Credit Line]

Sadit na retrato, likod sana: Rhino and Lion Park, Gauteng, South Africa