Pagsiyasat sa “Harararom na Bagay nin Dios”

“Sinisiyasat kan espiritu an gabos na bagay, pati an harararom na bagay nin Dios.”—1 CORINTO 2:10.

 1. Ano an nagkapirang katotoohan sa Biblia na nagin dahelan nin kagayagayahan kan bagong mga inaadalan sa Biblia?

AN KADAKLAN sa sato sa Kristianong kongregasyon magigirumdoman an kagayagayahan na namatean niato kan enot niatong manodan an katotoohan. Naaraman niato kun taano ta mahalaga an ngaran ni Jehova, kun taano ta tinotogotan nia an pagdusa, kun taano ta maduman sa langit an ibang tawo, asin kun ano an nakatagama sa ngapit para sa maimbod na katawohan sa pangkagabsan. Tibaad siniyasat na niato kaidto an Biblia, alagad dai niato nasabotan an mga bagay na ini, siring kan dai pakasabot dian kan kadaklan sa katawohan. Garo kita sarong tawo na inaaninaw sa tubig an sarong bahora nin korales (coral reef). Huling mayo nin antiparang pangrurip (diving goggles), dikit sana an naheheling nia sa magagayon na bagay sa irarom kan tubig. Alagad sa tabang kan antiparang pangrurip o sarong baroto na salming an salog, ogmahon siang maheling sa kaenot-enote an magayon asin makolor na korales, mga sira, mga klase nin hayop sa dagat na garo nagbuburak na tinanom (sea anemone), asin iba pang kaakit-akit na mga linalang. Kaagid kaiyan, kun may saro na nagpoon na tumabang sa sato na masabotan an Kasuratan, naaraman niato sa kaenot-enote an “harararom na bagay nin Dios.”—1 Corinto 2:8-10.

 2. Taano ta magigin daing katapusan an kagayagayahan sa pakanood sa Tataramon nin Dios?

² Maninigo daw kitang manigoan sa hababaw sanang kaaraman manongod sa katotoohan sa Biblia? Kaiba sa pananaram na “harararom na bagay nin Dios” an pakasabot sa kadonongan nin Dios na ihinahayag sa mga Kristiano kan banal na espiritu alagad dai nasasabotan kan iba. (1 Corinto 2:7) Daing limitasyon nanggad an kadonongan nin Dios asin makakanompong kita nin dakulang kagayagayahan paagi sa pagsiyasat sa saiyang mga dalan! Nungka niatong maaaraman an gabos manongod sa kadonongan kan mga dalan nin Dios. An kagayagayahan na naeksperyensiahan niato kan enot niatong manodan an pundamental na katokdoan sa Biblia magdadanay na nasa sato sagkod pa man kun kita magpapadagos na daing ontok sa pagsiyasat sa “harararom na bagay nin Dios.”

 3. Taano ta kaipuhan niato an lubos na pakasabot sa mga dahelan kan satong mga tinutubod?

³ Taano ta kaipuhan niatong masabotan an “harararom na bagay” na iyan? An pakasabot bako sanang kun ano an satong tinutubod kundi kun taano ta tinutubod niato iyan—an pundamental na mga dahelan kan satong mga tinutubod—nagpapakosog sa satong pagtubod asin pagsarig. Sinasabi sa sato kan Kasuratan na gamiton an satong “kakayahan na mangatanosan” tanganing ‘patunayan niato sa satong sadiri kun ano an marahay asin inaako patin sangkap na kabotan nin Dios.’ (Roma 12:1, 2) An pakasabot kun taano ta kahagadan sa sato ni Jehova na mamuhay sa partikular na paagi nagpapakosog sa satong desisyon na kuyogon sia. Kun siring, an kaaraman manongod sa “harararom na bagay” makakapagtao sa sato nin kosog tanganing labanan an sugot na makikabtang sa tampalasan na mga gibo asin puedeng magpahiro sa sato na magin “maigot sa marahay na mga gibo.”—Tito 2:14.

 4. Ano an kalabot sa pag-adal sa Biblia?

⁴ An pagsabot sa harararom na bagay nangangaipo nin pag-adal. Minsan siring, an pag-adal bakong kapareho nin pagbasa na paramas sana. Kalabot dian an maingat na pagsiyasat sa impormasyon tanganing maheling kun paano iyan konektado sa dati na niatong aram. (2 Timoteo 1:13) Nangangahulogan iyan nin pagsabot sa mga dahelan kun taano ta sinabi iyan. Maninigong kaiba sa pag-adal sa Biblia an paghorophorop kun paano niato magagamit an satong nanonodan sa paggibo nin madonong na mga desisyon asin sa pagtabang sa iba. Siring man, mantang “an gabos na Kasuratan ipinasabong nin Dios asin kapakipakinabang,” maninigong iiba niato sa pag-adal an “lambang tataramon na minaluwas sa ngoso ni Jehova.” (2 Timoteo 3:16, 17; Mateo 4:4) An pag-adal sa Biblia puedeng mangaipo nin maigot na paghihingoa! Alagad puede man iyan na magin nakakaogmang marhay, asin an pakasabot sa “harararom na bagay nin Dios” bako man depisil na gayo.

Tinatabangan ni Jehova na Makasabot an mga Mahoyo

 5. Siisay an makakasabot sa “harararom na bagay nin Dios”?

⁵ Dawa kun dai kamo nagin matibay sa eskuelahan asin dai tuod na mag-adal, dai nindo maninigong isipon na dai nindo masasabotan an “harararom na bagay” nin Dios. Durante kan ministeryo ni Jesus sa daga, ihinayag ni Jehova an pakasabot manongod sa Saiyang katuyohan, bakong sa mga madonong asin may inadalan, kundi sa mga daing inadalan saka ordinaryong mga tawo na igo an kapakumbabaan tanganing tokdoan kan lingkod nin Dios. Garo sinda mga omboy kun ikokomparar sa mga inedukar sa mga eskuelahan. (Mateo 11:25; Gibo 4:13) Mapadapit sa “mga bagay na inandam nin Dios para sa mga namomoot sa saiya,” si apostol Pablo nagsurat sa saiyang mga kapagtubod: “Sa sato na an mga iyan ihinayag nin Dios paagi sa saiyang espiritu, huli ta sinisiyasat kan espiritu an gabos na bagay, pati an harararom na bagay nin Dios.”—1 Corinto 2:9, 10.

 6. Ano an kahulogan kan 1 Corinto 2:10?

⁶ Paano sinisiyasat kan espiritu nin Dios “an gabos na bagay, pati an harararom na bagay nin Dios”? Imbes na personal na ihayag an katotoohan sa lambang Kristiano, ginagamit ni Jehova an saiyang espiritu tanganing giyahan an saiyang organisasyon, na nagtatao sa nagkakasararong banwaan nin Dios nin pakasabot sa Biblia. (Gibo 20:28; Efeso 4:3-6) Sa bilog na kinaban, inaako kan gabos na kongregasyon an pararehong programa nin pag-adal sa Biblia. Sa laog nin dakol nang taon, pinag-adalan ninda an gabos na katokdoan na nasa Biblia. An banal na espiritu naghihiro paagi sa kongregasyon tanganing tabangan an mga tawo na ipaheling an kinakaipuhan na saboot tanganing masabotan an “harararom na bagay nin Dios.”—Gibo 5:32.

Kun Ano an Kaiba sa “Harararom na Bagay nin Dios”

 7. Taano ta dai nasasabotan kan dakol na tawo an “harararom na bagay nin Dios”?

⁷ Dai niato maninigong isipon na an “harararom na bagay” pirmeng depisil na masabotan. An kaaraman manongod sa “harararom na bagay nin Dios” dai nasasabotan kan kadaklan na tawo, bakong huli ta depisil na makua an kadonongan nin Dios, kundi huli ta dinadaya ni Satanas an mga tawo paagi sa pagsikwal sa itinataong tabang ni Jehova paagi sa Saiyang organisasyon.—2 Corinto 4:3, 4.

 8. Anong harararom na bagay an sinambit ni Pablo sa ikatolong kapitulo kan saiyang surat sa mga taga Efeso?

⁸ Ipinapaheling sa ikatolong kapitulo kan surat ni Pablo sa mga taga Efeso na kaiba sa “harararom na bagay nin Dios” an dakol na katotoohan na nasasabotan na marhay kan kadaklan sa banwaan ni Jehova, siring kan kun siisay an ipinanugang Banhi, pagpili sa katawohan nin mga indibiduwal na may paglaom sa langit, asin Mesiyanikong Kahadean. Si Pablo nagsurat: “Sa ibang mga kapag-arakian an hilom na ini dai ipinahayag sa mga aki nin mga tawo arog kan pagkapahayag kaiyan ngonyan sa saiyang banal na mga apostol asin propeta paagi sa espiritu, arin na baga, na an mga tawo kan mga nasyon maninigong magin kaibang paramana asin kapwa miembro kan hawak patin nakikikabtang kaiba niato sa panuga kasaro ni Cristo Jesus.” Sinabi ni Pablo na inasignaran sia na “ipasabot sa mga tawo kun paano ipinapaotob an sagradong hilom na kaidtong daing talaan na nakaagi nakatago sa Dios.”—Efeso 3:5-9.

 9. Taano ta sarong pribilehio na masabotan an “harararom na bagay nin Dios”?

⁹ Padagos na ipinaliwanag ni Pablo an kabotan nin Dios na ‘ikapaaram man sa langitnon na mga lugar paagi sa kongregasyon an manlaenlaen na gayong kadonongan nin Dios.’ (Efeso 3:10) Nakikinabang an mga anghel paagi sa pag-obserbar asin pagkaigwa nin pakasabot sa kadonongan kan mga pagtratar ni Jehova sa Kristianong kongregasyon. Marahayon nanggad na pribilehio na masabotan niato an mga bagay na interesante pati sa mga anghel! (1 Pedro 1:10-12) Sunod, sinabi ni Pablo na maninigo kitang magmaigot na “masabotan kan [satong] isip kaibanan kan gabos na banal kun ano an lakbang asin laba asin langkaw patin rarom” kan Kristianong pagtubod. (Efeso 3:11, 18) Pag-olayan niato ngonyan an nagkapirang halimbawa nin harararom na bagay na puedeng magpahiwas kan satong pakasabot.

Mga Halimbawa nin Harararom na Bagay

10, 11. Oyon sa Kasuratan, kasuarin si Jesus nagin pangenot na kabtang kan “banhi” kan langitnon na simbolikong “babae” nin Dios?

¹⁰ Aram niato na si Jesus an pangenot na kabtang kan “banhi” kan langitnon na simbolikong “babae” nin Dios na sinambit sa Genesis 3:15. Tanganing mapahiwas an satong pakasabot, puede kitang maghapot: ‘Kasuarin si Jesus nagin an ipinanugang Banhi? Iyan daw durante kan saiyang buhay bago sia nagin tawo, sa saiyang pagkamundag bilang tawo, sa saiyang bautismo, o kan sia buhayon liwat?’

¹¹ Nanuga an Dios na an langitnon na kabtang kan saiyang organisasyon, na sinambit sa hula bilang saiyang simbolikong “babae,” magmumundag nin sarong banhi na malugad sa payo kan halas. Alagad luminihis an rinibong taon, asin an simbolikong babae nin Dios mayong iminundag na banhi na may kakayahan na laglagon si Satanas asin an saiyang mga gibo. Bilang resulta, an hula ni Isaias inapod an simbolikong babae na “baog” asin “kinolgan sa espiritu.” (Isaias 54:1, 5, 6) Sa kahurihurihi, si Jesus namundag sa Betlehem. Alagad pakatapos sana kan saiyang bautismo, kan sia pinaniaki sa espiritu tanganing magin espirituwal na aki nin Dios, na ipinaisi ni Jehova: “Ini an sakong Aki.” (Mateo 3:17; Juan 3:3) An pangenot na kabtang kan “banhi” kan simbolikong babae sa katapustapusi nagpamidbid kan saiyang sadiri. Sa huri, linahidan asin pinaniaki man kan banal na espiritu an mga parasunod ni Jesus. Sa katapustapusi, ‘makakakurahaw na may kagayagayahan’ an simbolikong “babae” ni Jehova na sa halawig nanggad na panahon nakamate na garo sarong “babae na dai nag-aki.”—Isaias 54:1; Galacia 3:29.

12, 13. Anong mga teksto an nagpapaheling na an gabos na linahidan na Kristiano sa daga minakompuesto sa “maimbod asin mapagmansay na oripon”?

¹² An ikaduwang halimbawa kan harararom na bagay na ihinayag sa sato, may koneksion sa katuyohan nin Dios na pumili nin 144,000 hale sa katawohan. (Kapahayagan 14:1, 4) Inaako niato an katokdoan na an gabos na linahidan na nabubuhay sa daga sa ano man na peryodo nin panahon minakompuesto sa “maimbod asin mapagmansay na oripon” na sinabi ni Jesus na magtatao nin napapanahon na “kakanon” sa saiyang mga domestiko. (Mateo 24:45) Anong mga teksto sa Biblia an nagpapatunay na tama an pakasabot na ini? Posible daw na sa pangkagabsan an pinapanongdan ni Jesus iyo an siisay man na Kristiano na nagpapakosog sa saiyang mga tugang paagi sa espirituwal na kakanon?

¹³ Sinabi nin Dios sa nasyon nin Israel: “Kamo an sakong mga saksi . . . an sakong lingkod na sakong pinili.” (Isaias 43:10) Alagad kan Nisan 11 kan taon 33 C.E., sinabi ni Jesus sa mga namomoon sa Israel na isinikwal nin Dios an saindang nasyon sa pagigin lingkod Nia. Sia nagsabi: “An kahadean nin Dios hahaleon sa saindo asin itatao sa nasyon na nagluluwas nin mga bunga kaiyan.” Si Jesus nagsabi sa mga kadaklan: “Uya! An saindong harong pinabayaan na sa saindo.” (Mateo 21:43; 23:38) Bilang oripon ni Jehova, an harong ni Israel bakong maimbod ni mapagmansay. (Isaias 29:13, 14) Paghaloyhaloy kan aldaw man sanang iyan, kan si Jesus maghapot: “Siisay man nanggad an maimbod asin mapagmansay na oripon?” garo man sana sia naghahapot, ‘Anong mapagmansay na nasyon an masalida sa Israel tanganing magin maimbod na oripon nin Dios?’ Itinao ni apostol Pedro an simbag kan sabihan nia an kongregasyon nin linahidan na mga Kristiano: “Kamo . . . ‘banal na nasyon, banwaan para sa espesyal na pagkasadiri.’” (1 Pedro 1:4; 2:9) An espirituwal na nasyon na iyan, an “Israel nin Dios,” nagin bagong oripon ni Jehova. (Galacia 6:16) Kun paanong an gabos na miembro kan suanoy na Israel minakompuesto sa sarong “oripon,” an gabos man na linahidan na Kristiano sa daga sa ano man na peryodo nin panahon minakompuesto sa sarong “maimbod asin mapagmansay na oripon.” Pambihirang pribilehio para sa sato na umako nin “kakanon” paagi sa oripon nin Dios!

An Personal na Pag-adal Puedeng Magin Nakakagayagaya

14. Taano ta an pag-adal sa Biblia, na labi pa kisa sa pagbasa sana, nagbubunga nin kagayagayahan?

¹⁴ Kun ihinahayag sa sato an bagong pakasabot sa Kasuratan, dai daw kita naoogma huli sa pagpakosog kaiyan sa satong pagtubod? Iyan an dahelan kun taano ta an pag-adal sa Biblia, na labi pa kisa sa pagbasa sana, puedeng magin nakakagayagaya nanggad. Kun siring, kun ika nagbabasa nin Kristianong mga publikasyon, hapoton an saimong sadiri: ‘Ano an pagkakalaen kan paliwanag na ini sa dati ko nang aram manongod sa temang ini? Anong dugang pang teksto o argumento sa Kasuratan an maiisip ko na magtatao nin dugang pang patotoo para sa kongklusyon na inatubang sa artikulong ini?’ Kun kaipuhan an dugang pang pagsiyasat, isurat an hapot na gusto nindong masimbag, asin gibohon iyan na tema kan sunod na proyekto para sa pag-adal nindo.

15. Anong mga proyekto para sa pag-adal an puedeng magin nakakagayagaya, asin paano iyan puedeng magkaigwa nin nagdadanay na pakinabang?

¹⁵ Anong mga proyekto para sa pag-adal an matao sa saindo nin kagayagayahan sa pagkaigwa nin bagong pakarorop? An mga proyekto na arog kan detalyadong pagsiyasat manongod sa laen-laen na pakipagtipan nin Dios para sa kapakinabangan kan katawohan nagtatao nin kaliwanagan. Mapapakosog nindo an saindong pagtubod paagi sa pag-adal sa mga hula manongod ki Jesu-Cristo o sa bersikulo-por-bersikulo na pag-estudyar sa saro sa mga libro nin hula sa Biblia. Nakakapakosog man sa pagtubod an pagrepaso sa kasaysayan kan Mga Saksi ni Jehova sa presenteng panahon, na ginagamit an librong Jehovah’s Witnesses—Proclaimers of God’s Kingdom.a Asin an pagrepaso sa nakaaging “Mga Hapot Hale sa mga Parabasa” na ipinublikar sa An Torrengbantayan siertong matao sa saindo nin mas malinaw na pakasabot sa nagkapirang teksto. Tawan nindo nin espesyal na atension an ginamit na pangangatanosan sa Kasuratan tanganing makaabot sa kongklusyon na iprinesentar. Makakatabang ini sa saindo na masanay an saindong “kakayahan sa pagrisa” asin mapatalubo an pakabatid. (Hebreo 5:14) Sa saindong pag-adal, magsurat nin mga nota sa saindong personal na kopya kan Biblia o sa papel tanganing an saindong pag-adal magkaigwa nin nagdadanay na pakinabang sa saindo asin sa mga matatabangan nindo.

Tabangan an mga Hoben na Ikaogma an Pag-adal sa Biblia

16. Paano nindo matatabangan an mga hoben na ikaogma an pag-adal sa Biblia?

¹⁶ Dakula an magigibo nin mga magurang tanganing pukawon an pagigin may gana sa espirituwal kan saindang mga aki. Dai pagmenoson an abilidad kan mga hoben na masabotan an harararom na bagay. Kun tinawan nindo nin asignasyon an mga hoben na magsiyasat sa sarong tema bilang pag-andam para sa pampamilyang pag-adal sa Biblia, puede nindo sindang hapoton kun ano an nanodan ninda. Puede man na iiba sa pampamilyang pag-adal an mga sesyon sa pag-ensayo tanganing tabangan an mga hoben na makanood na idepensa an saindang pagtubod asin patunayan na totoo an mga itinokdo sa sainda. Dugang pa, puede nindong gamiton an brosyur na “See the Good Land”b tanganing itokdo an geograpiya sa Biblia asin linawon an mga nababasa nindo sa saindong semanal na pagbasa sa Biblia.

17. Taano ta kaipuhan niato na magin timbang sa satong mga proyekto para sa personal na pag-adal sa Biblia?

¹⁷ An mga proyekto para sa personal na pag-adal sa Biblia puedeng magin kawiliwili asin nakakapakosog sa pagtubod, alagad mag-ingat na dai kaiyan maagawan nin panahon an pag-andam nindo para sa mga pagtiripon kan kongregasyon. An mga pagtiripon saro pang paagi na tinotokdoan kita ni Jehova paagi sa “maimbod asin mapagmansay na oripon.” Minsan siring, an dugang pang pagsiyasat puedeng makatabang sa saindo na magtao nin makahulogan na mga komento sa mga pagtiripon—halimbawa, sa Pag-adal sa Libro kan Kongregasyon o durante kan tampok na mga kabtang sa semanal na pagbasa sa Biblia para sa Teokratikong Paadalan sa Pagmiministro.

18. Taano ta kapakipakinabang an paghihingoa na kaipuhan sa pag-adal sa “harararom na bagay nin Dios”?

¹⁸ An hararom na personal na pag-adal sa Tataramon nin Dios makakatabang sa saindo na dumayupot ki Jehova. Sa pagpaheling kan kahalagahan kan siring na pag-adal, an Biblia nagsasabi: “An kadonongan para sa proteksion kun paanong an kuarta para sa proteksion; alagad an bentaha nin kaaraman iyo na iniingatan na buhay kan kadonongan an mga igwa kaiyan.” (Eclesiastes 7:12) Kun siring, kapakipakinabang an paghihingoa na kaipuhan tanganing pararomon an saindong pakasabot sa espirituwal na mga bagay. An Biblia nanunuga sa mga padagos na nagsisiyasat: “Makukua mo an mismong kaaraman nin Dios.”—Talinhaga 2:4, 5.

[Mga Nota sa Ibaba]

Ikakapaliwanag daw Nindo?

• Ano an “harararom na bagay nin Dios”?

• Taano ta dai noarin man maninigong matapos an satong pag-adal sa harararom na bagay?

• Taano ta bukas sa gabos na Kristiano an kagayagayahan na masabotan an “harararom na bagay nin Dios”?

• Paano kamo makikinabang nin mas lubos sa “harararom na bagay nin Dios”?

[Ritrato sa pahina 28]

Kasuarin si Jesus nagin an ipinanugang Banhi?

[Ritrato sa pahina 31]

An mga magurang puedeng magtao sa saindang mga aki nin mga tema na sisiyasaton bilang pag-andam para sa pampamilyang pag-adal