Malalaglag daw an Satong Daga?

NAPAG-ISIP-ISIP na daw nindo, ‘Ano an mangyayari sa satong daga sa ngapit?’ Huli sa naheheling nindang nangyayari sa satong magayon na planeta, dakol an nagtutubod na tibaad dai magdanay an satong daga.

Tunay nanggad, an daga nararaot ngonyan huli sa pag-abuso sa mahalagang marhay na mga kayamanan sa naturalesa, siring kan tubig, mga kadlagan, asin kan balanse nanggad na atmospera. Siring man, may mga sientista na nagpapatanid na an daga asin an gabos na nabubuhay dian tibaad mameligro huli sa mga bagay na arog baga nin dakulang bulalakaw, nagpuputok na bitoon, o pagkaubos kan gas na hidroheno (hydrogen) na nasa saldang.

Naniniwala an mga sientista na an daga luway-luway na mawawaran​—tibaad paglihis nin dakol na bilyon na taon—​kan kakayahan na susteniran an buhay nin tawo. Ilinaladawan ini kan Encyclopædia Britannica na “an dai mareremedyohan na tendensia na magin desareglado.”

Nakakaogma na sinisierto sa sato kan Biblia na dai itotogot ni Jehova Dios na an satong daga malaglag o dai na puedeng maerokan. Bilang Kaglalang, daing limite an saiyang “dinamikong enerhiya,” kaya puede niang susteniran nin daing sagkod an uniberso. (Isaias 40:26) Huli kaini, makakatubod kamo sa mga tataramon na ini: “Pinatindog [nin Dios] an daga sa mga pasisikadan kaiyan; dai iyan matatanyog sagkod sa panahon na daing talaan, o sagkod lamang.” “Omawa sia nindo, aldaw asin bulan. Omawa sia nindo, kamo gabos na bitoon nin liwanag. . . . Huli ta sia mismo nagboot, asin sinda nalalang. Asin pinapagdadanay nia sinda sagkod lamang.”​—Salmo 104:5; 148:3-6.

An Katuyohan nin Dios Para sa Daga

Dai noarin man nagin katuyohan nin Dios na an daga abusohon asin magkaigwa nin polusyon siring kan kamugtakan kaiyan ngonyan. Imbes, linalang nin Dios an enot na lalaki saka babae, si Adan asin Eva, patin ibinugtak nia sinda sa sarong magayon na hardin. Siempre, an saindang Paraisong erokan dai magdadanay na magayon kun papabayaan sana iyan. Inasignaran sinda nin Dios “tanganing kultibaron iyan asin atamanon iyan.” (Genesis 2:8, 9, 15) Nakakaogmang marhay asin nakakakontento nanggad na trabaho an itinao nin Dios sa satong dating sangkap na mga magurang!

Alagad an kalabot sa katuyohan nin Dios para sa daga orog pa nanggad kisa sa pag-ataman sana sa orihinal na hardin na iyan. Gusto nia na an bilog na daga gibohon na sarong paraiso. Iyan an dahelan kun taano ta itinao nin Dios an pagboot na ini ki Adan asin Eva: “Pangagbunga asin pangagdakol kamo asin panoa nindo an daga patin sakopa nindo iyan, asin sakopon nindo an mga sira sa dagat asin an naglalayog na mga linalang sa kalangitan patin an lambang nabubuhay na linalang na naghihiro sa ibabaw kan daga.”​—Genesis 1:28.

Makamomondo, an katuyohan nin Dios tinumang nin sarong mapalangkaw na anghel na namidbid na Satanas. Hinimuyawot nia na sambahon sia ni Adan asin Eva. Paagi sa paggamit ni Satanas nin sarong halas bilang representante sa pagtaram, nadara nia sinda na magrebelde sa pamamahala nin Dios. (Genesis 3:1-6; Kapahayagan 12:9) Siertong nakolgan nanggad an satong Kaglalang huli sa saindang maimot na kawaran nin pag-apresyar! Alagad an sarong bagay na dai nagibo kan saindang pagrebelde iyo an bagohon an katuyohan ni Jehova Dios para sa daga. Sia nagsabi: ‘An sakong tataramon na magluwas sa sakong ngoso dai mabalik sa sako na mayong nahaman, kundi gigibohon nanggad kaiyan an ikinakaogma kong marhay, asin iyan siertong magigin mapanggana sa sakuyang sinobolan kaiyan.’​—Isaias 55:11.

May marahay na dahelan na itinotogot ni Jehova na magpadagos an pagrebelde ni Satanas sagkod sa panahon niato ngonyan. Durante kan panahon na ini, an katawohan nakapag-eksperimento na nin dakol na klase nin pamamahala sa sadiri, asin napatunayan kan mga resulta na an pagigin independiente sa Dios, siring kan pinalakop ni Satanas, biyong bakong mapanggana.a​—Jeremias 10:23.

Sa ibong kan gabos na iyan, durante kan mga milenyo na nakalihis na, binendisyonan nin Dios an nagkapirang tanos na tawo. Ipinasurat man nia sa Biblia an rekord kan mga epekto nin magsalang pagkuyog sa Dios o pagsikwal sa saiyang pamamahala. Dugang pa, si Jehova may ginibong marahayon na mga bagay para sa satong kapakinabangan sa ngapit. Mamomoton siang nagtao nin Paraligtas sa katawohan paagi sa pagsugo sa saiyang namomotan na marhay na Aki, si Jesu-Cristo, tanganing itokdo sa sato an pinakamarahay na paagi nin pamumuhay asin tanganing itao an saiyang buhay para sa sato. (Juan 3:16) Huling si Jesus dai maninigo sa kagadanan, ginamit nin Dios an saiyang kagadanan bilang legal na basehan tanganing tuboson an nawara ni Adan asin Eva, na iyo an paglaom na buhay na daing katapusan sa sarong paraiso sa bilog na daga.b Sa katuyohan na iyan, inestablisar ni Jehova Dios an sarong langitnon na gobyerno na mamamahala sa bilog na katawohan, asin ninombrahan nia an saiyang Aki, an binuhay liwat na si Jesu-Cristo, na magin Hade kan Kahadean na iyan. Sisiertohon kan marahayon na areglong ini na maotob an katuyohan nin Dios para sa daga.​—Mateo 6:9, 10.

Sa siring, biyo kamong makakasarig sa marahayon na mga panugang ini na nakasurat sa Biblia: “An mga paragibo nin maraot mismo popohoon, alagad idtong mga naglalaom ki Jehova iyo an mga makakasadiri kan daga. An mga matanos mismo makakasadiri kan daga, asin sinda mag-eerok dian sagkod lamang.” “‘Uya! An tolda nin Dios nasa mga tawo, asin sia mag-eerok kaiba ninda, asin sinda magigin saiyang mga banwaan. Asin an Dios mismo magigin kaibanan ninda. Asin papahidon nia an gabos na luha sa saindang mga mata, asin dai na magkakaigwa nin kagadanan, ni magkakaigwa pa man nin pagmondo o pagtangis o kolog. An enot na mga bagay nakalihis na.’ Asin an Saro na nakatukaw sa trono nagsabi: ‘Uya! Ginigibo kong bago an gabos na bagay.’”​—Salmo 37:9, 29; Kapahayagan 21:3-5.

Mayo nin Pagkakakorontrahan sa Biblia

Pero, tibaad isipon nin nagkapira, ‘Paano niato ikakaoyon an kinotar sa enotan na mga teksto sa Biblia, sa ibang bersikulo na garo baga nagtataram manongod sa pagtatapos kan daga?’ Estudyaran niato an nagkapirang halimbawa. Ipapaheling kan siring na pagsiyasat na mayo nin pagkakakorontrahan sa Biblia.

Haloy pa bago minidbid nin mga sientista na an gabos na pisikal na bagay may “tendensia na magin desareglado,” an sarong salmista sa Biblia nagsurat: “Ibinugtak mo [an boot sabihon, nin Dios] an mga pundasyon kan daga mismo, asin an kalangitan gibo kan saimong mga kamot. Sinda mismo mapapara, alagad ika mismo magdadanay na nag-eeksister; asin arog sa sarong gubing sinda gabos maluluma. Arog sa gubing sasanglian mo sinda, asin matatapos na man sinda. Alagad ika iyo pa man giraray, asin an saimo mismong mga taon dai matatapos.”​—Salmo 102:25-27.

Sa pagsurat kan mga tataramon na ini, dai kinokontra kan salmista an daing katapusan na katuyohan nin Dios para sa daga. Imbes, ipinapaheling nia an kalaenan kan daing sagkod na pag-eksister nin Dios asin kan pagkadai nagdadanay kan gabos na bagay na linalang nin Dios. Kun mayo an daing sagkod na kapangyarihan nin Dios na ibalik sa dati an mga bagay-bagay, magigin biyong desareglado asin malalaglag sa katapustapusi an uniberso​—kaiba an sistema solar na dian kita nagdedepende sa estabilidad, liwanag, asin enerhiya. Sa siring, kun papabayaan sana an satong daga, iyan garo “maluluma,” o permanente nang matatapos.

May iba pang bersikulo sa Kasuratan na tibaad garo baga sa primero kakontra man kan sinabing katuyohan nin Dios para sa daga. Halimbawa, an Biblia nagtataram manongod sa langit asin daga na ‘malihis.’ (Kapahayagan 21:1) Siertong dai kinokontra kan mga tataramon na ini an panuga ni Jesus: “Maogma an mga mahoyo, mantang mamanahon ninda an daga.” (Mateo 5:5) Kun siring, ano an boot sabihon kan Biblia kun iyan nagtataram manongod sa langit asin daga na ‘malihis’?

Sa parate ginagamit kan Biblia sa piguratibong paagi an tataramon na “daga,” na nangangahulogan na sosyedad nin tawo. Halimbawa, isip-isipon an bersikulong ini: “An bilog na daga nagpadagos na saro sana an lenguahe asin saro sana an tataramon.” (Genesis 11:1) Siempre pa, an “daga” digdi nanonongod sa mga tawong nabubuhay sa daga. An saro pang halimbawa iyo an Salmo 96:1, na oyon sa King James Version nagsasabi: “Mag-awit kamo sa KAGURANGNAN, bilog na daga.” Malinaw nanggad, digdi asin sa dakol na iba pang teksto, an tataramon na “daga” ginagamit sa piguratibong paagi tanganing panongdan an mga tawo.​—Salmo 96:13.

Kun beses an namamahalang mga kapangyarihan sa daga inaagid kan Biblia sa kalangitan o sa mga bagay sa kalangitan. Halimbawa, an mapang-aping Babilonyong mga namamahala ilinadawan na siring sa bitoon huli ta ilinangkaw ninda an saindang sadiri sa mga nasa palibot ninda. (Isaias 14:12-14) Siring kan ihinula, natapos kan 539 B.C.E. an piguratibong “kalangitan,” o grupong namamahala na Babilonya, asin an “daga,” an mga parasuportar kan pamamahalang iyan. (Isaias 51:6) Tinogotan kaini an nagsolsol na mga Judio na magbalik sa Jerusalem, na duman sarong “bagong kalangitan,” na bagong grupong namamahala, an namahala sa “sarong bagong daga,” an matanos na sosyedad nin mga tawo.​—Isaias 65:17.

Minalataw na an mga tataramon kan Biblia manongod sa langit asin daga na ‘malihis’ nanonongod sa katapusan kan maraot na mga gobyerno nin tawo ngonyan asin kan saindang bakong diosnon na mga parasuportar. (2 Pedro 3:7) Iyan an mabukas kan dalan para sa bagong langitnon na gobyerno nin Dios tangani na mabendisyonan an matanos na bagong sosyedad nin tawo, huli ta ‘igwa nin bagong kalangitan asin sarong bagong daga na satong hinahalat segun sa panuga nin Dios, asin sa mga ini magdadanay an katanosan.’​—2 Pedro 3:13.

Sa siring, makakatubod kamo sa panuga nin Dios na an satong erokan na daga magdadanay sagkod lamang. Dugang pa, ipinapaheling kan Biblia kun ano an dapat nindong gibohon tanganing makapakikabtang sa makangangalas na panahon na iyan na an daga gigibohon na sarong paraisong lakop sa globo. Si Jesus nagsabi: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) Taano ta dai nindo gibohon na pasohan na siyasaton an itinotokdo kan Biblia manongod sa ngapit kan daga asin katawohan? Maoogmang marhay an mga Saksi ni Jehova sa saindong lugar na tabangan kamo sa bagay na ini.

[Mga Nota sa Ibaba]

[Blurb sa pahina 12]

Nanunuga an Biblia na an satong erokan na daga magdadanay sagkod lamang

[Picture Credit Lines sa pahina 10]

Globo na nasa likod kan mga retrato: NASA/​The Visible Earth (http://​visibleearth.nasa.gov/); polar bear: © Bryan and Cherry Alexander Photography