Gusto Nindo na Magin Anong Klaseng Tawo Kamo?

AN HEPE kan pulisya sa sarong banwaan sa Pilipinas naghapot sa sarong payunir, “Ano an ginibo mo ta binago kan lalaking iyan an saiyang paggawe?” Mantang itinotokdo an tambak na papel sa saiyang lamesa, sinabi pa nia: “Aram mo daw na an gabos na ini rekord kan nakaaging mga kaso nia sa husgado? Hinale mo an saro sa mga kolog-payo mi sa banwaan na ini.” An lalaki na pinag-oolayan ninda dating madahas na buratsero na pirmeng nagigin dahelan nin kariribokan. Ano an nagpahiro sa saiya na gumibo nin dakulaon na mga pagbabago sa saiyang buhay? Iyan an ipinasabong na mensahe kan Tataramon nin Dios, an Biblia.

Isinapuso nin dakol na indibiduwal an sadol ni apostol Pablo na ‘haleon an daan na personalidad na komporme sa dati nindang paggawe asin magsulog kan bagong personalidad na linalang segun sa kabotan nin Dios.’ (Efe. 4:22-24) Baga man dakula o sadit an mga pagbabago na kaipuhan niatong gibohon, an pagsulog kan bagong personalidad kabtang kan pagigin Kristiano.

Pero, an satong paggibo nin mga pagbabago asin an pag-oswag niato sagkod na makualipikar sa bautismo kapinonan pa sana. Kun ipinepresentar niato an satong sadiri tanganing magpabautismo sa tubig, kita arog nanggad sa kapidasong kahoy na inukit tanganing magkaigwa nin pundamental na porma. Risang-risa na nindo kun ano an kaluluwasan kan bagay na iyan, alagad dakol pang trabaho an dapat na gibohon. Kaipuhan pa kan paraukit na gibohon an mas detalyadong pag-ukit tanganing pagayonon iyan. Sa panahon nin bautismo, igwa na kita nin pundamental na mga kualidad na kaipuhan tanganing magin lingkod nin Dios. Minsan siring, an satong bagong personalidad nasa enot pa sanang tangga kaiyan. Dapat na padagos niatong paoswagon iyan paagi sa paggibo nin mga pagliliwat.

Dawa si Pablo nakakaaram na kaipuhan niang gumibo nin pag-oswag. Inadmitir nia: “Kun boot kong gibohon an tama, an maraot iyo an yaon sa sako.” (Roma 7:21) Tunay nanggad na aram ni Pablo kun anong klaseng tawo sia asin kun ano an gusto niang magin pagkatawo nia. Kumusta man kita? Maninigo man niatong hapoton an satong sadiri: ‘Ano an yaon sa sako? Anong klaseng tawo ako? Asin ano an gusto kong magin pagkatawo ko?’

Ano an “Yaon sa Sako”?

Kun naghihirahay kita nin sarong lumang harong, bakong igo na pinturahan an luwas kaiyan kun iyan may gabok nang mga kahoy sa laog. Kun binabaliwala an mga depekto sa estruktura, mas dakula an magigin problema sa huri. Sa kaagid na paagi, bakong igo an panluwas na pagpaheling nin pagigin tanos. Dapat niatong siyasaton an satong kairairaroming personalidad asin aramon an mga problemang kaipuhan na resolberan. Ta kun dai, an dating mga ugale seguradong malataw liwat. Kun siring, kaipuhan an pagsiyasat sa sadiri. (2 Cor. 13:5) Kaipuhan na maaraman niato an satong bakong marahay na mga ugale asin itanos niato iyan. Tanganing magibo iyan, nagtao si Jehova sa sato nin tabang.

Isinurat ni Pablo: “An tataramon nin Dios buhay asin mapuersa asin mas matarom kisa sa arin man na espada na may duwang tarom asin minalagbas sagkod sa pagbulag kan kalag asin espiritu, saka kan mga pagsokmolan asin hotok kaiyan, asin nakakabatid kan mga kaisipan asin intension kan puso.” (Heb. 4:12) An mensahe kan nasusurat na Tataramon nin Dios, an Biblia, puedeng magkaigwa nin mapuersang impluwensia sa satong buhay. Minalagbas iyan sagkod sa kairairaromi niato​—sa piguratibong pagtaram, sagkod sa hotok kan tolang, na iyo an kalaoglaoging parte kaiyan. Ihinahayag kaiyan an satong mga kaisipan asin motibo, na ibinubuyagyag kun ano talaga kita sa panlaog kun ikokomparar sa kun ano kita sa panluwas o kun ano kita sa paghona ta. Tinatabangan nanggad kita kan Tataramon nin Dios na maaraman an satong mga problema!

Kun naghihirahay kita nin sarong lumang harong, tibaad bakong igo na salidahan an naraot na materyales. Kun aram niato an dahelan kan pagkaraot kaiyan, makakatabang iyan sa sato na gumibo nin mga lakdang na makakaolang sa paglataw giraray kan mga problema. Siring man, bako sanang pag-aram sa negatibong mga ugale ta an makakatabang sa sato na makontrol an mga kaluyahan niato kundi makakatabang man an pagtao nin atension sa nagin dahelan kaiyan o nakakontribwir dian. Dakol na bagay an nakakakontribwir sa pagmolde sa satong personalidad. Kaiba dian an satong posisyon sa sosyedad, pinansial na kamugtakan, palibot, kultura, mga magurang, kaibaiba, asin pinaghalean na relihion. May epekto sa satong personalidad dawa an mga programa sa telebisyon asin pelikula na hineheling niato, saka an iba pang porma nin aling-alingan. An pag-aram sa mga bagay na may negatibong impluwensia sa satong personalidad nakakatabang sa sato na inaan an epekto kaiyan.

Pagkatapos na siyasaton an satong sadiri, tibaad sabihon niato: ‘Arog na talaga ako kaiyan.’ Ini salang pangangatanosan. Sa pagtaram manongod sa mga miembro kan kongregasyon sa Corinto na dating mga parapakisaro, homoseksuwal, buratsero, asin mga kaagid kaiyan, si Pablo nagsabi: “Arog kaiyan kaidto an nagkapira sa saindo. Alagad kamo nahugasan na . . . sa espiritu kan satong Dios.” (1 Cor. 6:9-11) Sa tabang kan banal na espiritu ni Jehova, magigin mapanggana man kita sa paggibo nin kinakaipuhan na mga pagbabago.

Isip-isipa an nangyari sa sarong lalaki na an ngaran Marcos,a na nakaistar sa Pilipinas. Sa pagkomento manongod sa saiyang nakaagi, si Marcos nagsabi: “An sakong mga magurang pirmeng nag-iiwal. Iyan an dahelan kun taano ta nagrebelde ako sa edad na 19.” Si Marcos nagin midbid sa pagsugal, paghabon, asin pagholdap. Plinano pa ngani nia asin nin iba pa na i-hijack an sarong eroplano, minsan ngani dai man iyan nangyari. Nagpadagos si Marcos sa maraot niang mga gibo dawa kan may agom na sia. Sa kahurihurihi nawara nia an gabos na bagay na yaon sa saiya huli sa pagsugal. Dai nahaloy pagkatapos kaiyan, nakiayon si Marcos sa saiyang agom sa pakikipag-adal kaini sa Biblia sa mga Saksi ni Jehova. Kan primero, an pagmate nia dai sia angay na magin Saksi. Minsan siring, an pag-aplikar ni Marcos kan saiyang mga nanonodan asin an pag-atender nia sa mga pagtiripon nakatabang sa saiya na bayaan an dati niang pamumuhay. Sia ngonyan saro nang bautisadong Kristiano na regular na nakikikabtang sa pagtotokdo sa iba kun paano sinda puede man na magbago.

Gusto Nindong Magin Ano Kamo?

Anong mga pagbabago an tibaad kaipuhan niatong gibohon tanganing mapaoswag an satong Kristianong mga kualidad? Naghatol si Pablo sa mga Kristiano: ‘Haleon nindo an gabos na iyan sa saindo, an grabeng pagkaanggot, kaanggotan, karatan, mapanlibak na pagtaram, asin malaswang orolay hale sa saindong ngoso. Dai kamo magpapurutikputik. Hubaa nindo an daan na personalidad kaiba an mga gibo kaiyan.’ An apostol nagsabi pa: “Isulog nindo an bagong personalidad, na binabago paagi sa tamang kaaraman segun sa ladawan kan Saro na naglalang kaiyan.”​—Col. 3:8-10.

Kun siring, an satong pangenot na pasohan iyo na haleon an daan na personalidad asin isulog an bago. Anong mga kualidad an kaipuhan niatong pataluboon tanganing magibo iyan? Si Pablo nagsabi: “Isulog nindo an mamomoton na mga pagmate nin pagmalasakit, kabootan, kababaan nin isip, kahoyoan, asin pakatios. Padagos kamong magpatiriostios asin lubos na magpatarawadtawadan kun an siisay man igwa nin dahelan na magreklamo tumang sa saro. Kun paanong kamo lubos na pinatawad ni Jehova, siring man an gibohon nindo. Alagad, laen pa sa gabos na bagay na ini, isulog nindo an pagkamoot, huli ta iyan sangkap na bogkos nin pagkasararo.” (Col. 3:12-14) An maingat na paghihingoa na mapatalubo an mga kualidad na ini matabang sa sato na magin “orog na kawiliwili sa pagheling ni Jehova sagkod nin mga tawo.” (1 Sam. 2:26) Kan si Jesus yaon digdi sa daga, ipinaheling nia sa pambihirang paagi an diosnon na mga kualidad. Paagi sa pag-adal asin pag-arog sa saiyang halimbawa, kita magigin mas arog-Cristo na mga “paraarog sa Dios.”​—Efe. 5:1, 2.

An saro pang paagi tanganing mabatid kun anong mga pagbabago an tibaad kaipuhan niatong gibohon iyo an pag-adal sa mga ugale kan mga karakter sa Biblia, na ineestudyaran kun ano an kawiliwili asin bakong kawiliwili manongod sa sainda. Halimbawa, isip-isipa si Jose, an aki kan patriarkang si Jacob. Minsan ngani nag-aagi nin inhustisya, pinagdanay ni Jose an positibong saboot asin an panlaog na kagayonan. (Gen. 45:1-15) Sa ibong na lado, an aki ni Hadeng David na si Absalon nagsagin na sia may dakulang pagmalasakit sa banwaan asin inomaw sia huli sa saiyang magayon na tindog. Minsan siring, an totoo sia traydor asin paragadan. (2 Sam. 13:28, 29; 14:25; 15:1-12) An sagin na karahayan asin an pisikal na kagayonan dai ginigibong tunay na kaakit-akit an saro.

Puede Kitang Magin Mapanggana

Tanganing mapaoswag an satong personalidad asin magin magayon sa pagheling nin Dios, kaipuhan niatong tawan nin atension an satong panlaog na pagkatawo. (1 Ped. 3:3, 4) Tanganing makagibo nin mga pagbabago sa satong personalidad, kaipuhan na maaraman niato an satong negatibong mga ugale asin an mga bagay na nagigin dahelan o nakakakontribwir sa mga ini, saka kaipuhan na pataluboon niato an diosnon na mga kualidad. Makakasarig daw kita na an satong mga paghihingoang gumibo nin siring na mga pag-oswag magigin mapanggana?

Iyo, sa tabang ni Jehova makakagibo kita nin kinakaipuhan na mga pagbabago. Arog kan salmista, puede kitang mamibi: “Lalangon mo sa sakuya an dalisay na puso, O Dios, asin bugtakan mo ako nin bagong espiritu, saro na marigon.” (Sal. 51:10) Puede niatong hagadon na logod an espiritu nin Dios magkaigwa nin epekto sa sato, na pinapakosog an satong pagmawot na ioyon nin mas lubos an satong buhay sa saiyang kabotan. Tunay nanggad na puede kitang magin mapanggana sa paghihingoang magin mas kawiliwili sa pagheling ni Jehova!

[Nota sa Ibaba]

[Ritrato sa pahina 4]

Igo na daw na pinturahan an luwas kan harong na ini na naraot na gayo huli sa bagyo?

[Ritrato sa pahina 5]

An saindo daw na personalidad nagigin arog-Cristo?