Determinado na Lubos na Magpatotoo

“Pinagbotan nia kami na maghulit sa mga tawo asin magtao nin lubos na patotoo.”​—GIBO 10:42.

 1. Kan nakikipag-olay si Pedro ki Cornelio, anong sugo an itinampok nia?

TINIPON kan opisyal sa hukbo nin Italia an saiyang mga paryente asin katood para sa sarong pangyayari na iyo an nagin dakulang pagbabago sa pagtratar nin Dios sa mga tawo. An matatakton sa Dios na tawong iyan iyo si Cornelio. Sinabi ni apostol Pedro sa grupong iyan na an mga apostol pinagbotan na “maghulit sa mga tawo asin magtao nin lubos na patotoo” manongod ki Jesus. An pagpatotoo ni Pedro nagkaigwa nin dakol na bunga. An bakong turi na mga Hentil nag-ako kan espiritu nin Dios, nabautismohan, asin nagkaoportunidad na magin mga hade sa langit kaiba ni Jesus. Marahayon nanggad na mga resulta kan lubos na pagpapatotoo ni Pedro!​—Gibo 10:22, 34-48.

 2. Paano niato naaaraman na an pagboot na magpatotoo bako sanang para sa 12 apostol?

² Nangyari iyan kan 36 C.E. Mga duwang taon bago kaiyan, an sarong maigot na nagtutumang sa Kristianismo nagkaigwa nin eksperyensia na nagpabago sa saiyang buhay. Si Saulo nin Tarso pasiring sa Damasco kan si Jesus magpaheling sa saiya asin magsabi: “Lumaog ka sa siudad, asin sasabihon sa saimo an dapat mong gibohon.” Sinierto ni Jesus ki disipulo Ananias na si Saulo magpapatotoo “sa mga nasyon saka sa mga hade asin mga aki ni Israel.” (Basahon an Gibo 9:3-6, 13-20.) Kan kaiba si Saulo, si Ananias nagsabi: “Pinili ka kan Dios kan satong mga apoon . . . huli ta ika magigin saksi para sa saiya sa gabos na tawo.” (Gibo 22:12-16) Paano sineryoso ni Saulo, na kan huri namidbid na Pablo, an asignasyon na magpatotoo?

Sia Talagang Lubos na Nagpatotoo!

 3. (a) Sa anong partikular na pagkasaysay kita makonsentrar? (b) Ano an nagin reaksion kan kamagurangan sa Efeso dapit sa mensahe ni Pablo, na nagtatao nin anong marahay na halimbawa?

³ Magigin interesanteng marhay na pag-adalan nin detalyado an gabos na ginibo ni Pablo pakatapos kaiyan, alagad ngonyan, magkonsentrar nguna kita sa pahayag na itinao ni Pablo kan mga 56 C.E., na nakasurat sa Gibo kapitulo 20. Itinao ni Pablo an diskursong ini kan madali nang matapos an saiyang ikatolong pagbiahe bilang misyonero. Sia naglusad sa Mileto, sarong duongan sa Dagat na Aegean, asin ipinaapod nia an kamagurangan kan kongregasyon sa Efeso. An Efeso mga 50 kilometros an rayo, pero mas halawig an biahe sa pasikosikong mga tinampo. Maiimahinar nindo kun gurano kaogma an kamagurangan sa Efeso kan maresibi ninda an mensahe ni Pablo. (Ikomparar an Talinhaga 10:28.) Pero, kaipuhan sindang gumibo nin mga areglo na magbiahe pasiring sa Mileto. An nagkapira daw sa sainda kaipuhan na magbakasyon sa trabaho o sirahan an saindang mga tindahan? Ginigibo iyan nin dakol na Kristiano ngonyan tanganing masierto na dai ninda malilipasan an dawa sarong sesyon kan saindang taonan na pandistritong kombension.

 4. Ano an nagin pamumuhay ni Pablo kan sia nasa Efeso sa laog nin nagkapirang taon?

⁴ Ano sa paghona nindo an ginibo ni Pablo sa Mileto durante kan tolo o apat na aldaw sagkod na umabot an kamagurangan? Ano kutana an ginibo nindo? (Ikomparar an Gibo 17:16, 17.) An mga tataramon ni Pablo sa kamagurangan sa Efeso makakatabang sa sato na maaraman ini. Ilinadawan nia an saiyang pamumuhay sa nakaaging mga taon, pati an mga eksperyensia nia kaidtong yaon sia sa Efeso. (Basahon an Gibo 20:18-21.) Huling aram nia na mayo nin makakakontra sa saiya, sia nagsabi: “Aram nindong marhay kun paanong poon kan enot na aldaw na ako magtungtong sa distrito nin Asia . . . lubos akong nagpatotoo.” Iyo, determinado siang gibohon an sugo sa saiya ni Jesus. Paano nia iyan ginibo sa Efeso? An sarong paagi iyo an pagpapatotoo nia sa mga Judio, na nagduduman sia kun saen dakol sa sainda an manonompongan. Ibinareta ni Lucas na kan si Pablo nasa Efeso kan mga 52-55 C.E., ini ‘nagpahayag asin naggamit nin pangongombensir’ sa sinagoga. Alagad kan an mga Judio “nagpadagos na magmatagas asin dai nagtutubod,” itinao ni Pablo sa iba an saiyang atension, na nagbalyo sa ibang parte kan siudad alagad naghuhulit pa man giraray. Sa siring, sia nagpatotoo sa mga Judio asin Griego sa dakulang siudad na iyan.​—Gibo 19:1, 8, 9.

5, 6. Taano ta makakasierto kita na kan si Pablo naghuhulit sa harong-harong an kinaolay nia iyo an mga daing pagtubod?

⁵ Pag-abot nin panahon, an nagkapira sa mga napatotoohan ni Pablo sa Mileto na nagin mga Kristiano nagin kualipikado bilang kamagurangan. Ipinagirumdom sa sainda ni Pablo an pamamaagi na ginamit nia: “Dai ako nagpugol sa pagsabi sa saindo kan ano man na mga bagay na kapakipakinabang ni sa pagtokdo sa saindo sa publiko asin sa harong-harong.” Sa panahon niato, hinihingako nin nagkapirang tawo na an pinanonongdan sana digdi ni Pablo iyo an pagsongko sa pagpastor sa mga nagtutubod. Alagad, dai. An paglaladawan na ‘pagtokdo sa publiko asin sa harong-harong’ sa pangenot aplikado sa pag-ebanghelyo sa mga daing pagtubod. Iyan malinaw sa sunod niang mga tataramon. Sinabi ni Pablo na sia nagpapatotoo na “sa mga Judio sagkod sa mga Griego manongod sa pagsolsol sa Dios asin sa pagtubod sa satong Kagurangnan na Jesus.” Malinaw nanggad, si Pablo nagpapatotoo na sa mga daing pagtubod, na nangangaipong magsolsol asin magtubod ki Jesus.​—Gibo 20:20, 21.

⁶ Sa sarong detalyadong pag-analisar sa Kristianong Griegong Kasuratan, an sarong nag-espesyalisar nagsabi dapit sa Gibo 20:20: “Si Pablo nagdanay nin tolong taon sa Efeso. Dinalaw nia an lambang harong, o minsan paano sia naghulit sa gabos na tawo (bersikulo 26). Ini sono sa Kasuratan na basehan kan pag-ebanghelyo sa harong-harong saka sa mga pagtiripon sa publiko.” Baga man sia aktuwal na nagdalaw o dai sa lambang harong, siring kan sinabi kan nag-espesyalisar na ini, habo ni Pablo na malingawan kan kamagurangan sa Efeso kun paano sia nagpatotoo asin kun ano an nagin resulta kaiyan. Si Lucas nagbareta: “An gabos na nag-eerok sa distrito nin Asia nakadangog kan tataramon kan Kagurangnan, mga Judio sagkod mga Griego.” (Gibo 19:10) Alagad paano puedeng nakadangog an “gabos” sa Asia, asin ano an tibaad ipinaparisa kaini manongod sa satong pagpapatotoo?

 7. Paanong an paghuhulit ni Pablo posibleng marhay na nagkaigwa nin epekto bako sanang sa mga direkta niang napatotoohan?

⁷ Paagi sa paghuhulit ni Pablo sa pampublikong mga lugar asin sa harong-harong, dakol an nakadangog sa saiyang mensahe. Sa paghona daw nindo posibleng marhay na an gabos na talagang nagdangog nagdanay sa Efeso, na mayo nin nagbalyo sa ibang lugar tanganing magnegosyo, magin harani sa mga paryente, o makadulag sa sibot-sibot na buhay sa dakulang siudad? Dai nanggad. Dakol ngonyan an nagbabalyo sa ibang lugar huli sa siring na mga dahelan; posibleng ginibo man nindo iyan. Siring man, kaidto, an mga tawo hale sa ibang lugar nagdadalaw sa Efeso huli sa sosyal o komersial na mga dahelan. Mientras na yaon duman, tibaad namidbid ninda si Pablo o nadangog ninda siang nagpapatotoo. Ano an mangyayari pagpuli ninda? An mga nag-ako kan katotoohan magpapatotoo dapit dian. An iba tibaad dai man nagturubod, pero posibleng marhay na ipinakipag-olay ninda an saindang nadangog mantang nasa Efeso. Huli kaini, an katotoohan nadangog nin mga paryente, kataed, o kliyente, asin tibaad inako iyan kan nagkapira sa sainda. (Ikomparar an Marcos 5:14.) Ano an ipinaparisa kaini manongod sa tibaad nagigin epekto kan saindong lubos na pagpapatotoo?

 8. Paano tibaad nakadangog kan katotoohan an mga tawo sa bilog na distrito nin Asia?

⁸ Mapadapit sa ministeryo nia kaidto sa Efeso, si Pablo nagsurat na ‘sarong dakulang pinto na pasiring sa gibohon an binukasan para sa saiya.’ (1 Cor. 16:8, 9) Anong pinto iyan, asin paano iyan binukasan para sa saiya? An padagos na ministeryo ni Pablo sa Efeso nagresulta sa paglakop kan maogmang bareta. Isip-isipa an Colosas, Laodicea, asin Hierapolis, tolong siudad na parayo hale sa baybayon kan Efeso. Nungkang dinalaw ni Pablo an mga lugar na iyan, alagad an maogmang bareta nakaabot duman. Si Epafras taga dian sa lugar na iyan. (Col. 2:1; 4:12, 13) Nadangog daw ni Epafras si Pablo na nagpatotoo sa Efeso asin sia nagin Kristiano? Dai ini espesipikong sinasabi kan Biblia. Alagad, sa pagpalakop ni Epafras kan katotoohan sa lugar na iniistaran nia, tibaad ginibo nia iyan bilang representante ni Pablo. (Col. 1:7) An Kristianong mensahe tibaad nakaabot man sa mga siudad na siring baga nin Filadelfia, Sardis, asin Tiatira durante kan mga taon na si Pablo nagpapatotoo sa Efeso.

 9. (a) Ano an nagin odok sa pusong pagmawot ni Pablo? (b) Ano an teksto kan taon para sa 2009?

⁹ Bilang resulta, may bastanteng dahelan an kamagurangan sa Efeso na akoon an komento ni Pablo: “Dai ko ibinibilang an sakong kalag na may ano man na halaga asin mahal para sa sako, tangani sanang matapos ko an sakong gibohon asin an ministeryo na inako ko sa Kagurangnan na Jesus, na lubos na magpatotoo sa maogmang bareta manongod sa dai na kutana maninigong kabootan nin Dios.” Yaon sa bersikulong iyan an positibo asin nakakamotibar na teksto kan taon para sa 2009: “Lubos na magpatotoo sa maogmang bareta.”​—Gibo 20:24.

Lubos na Pagpapatotoo Ngonyan

10. Paano niato naaaraman na dapat man kitang lubos na magpatotoo?

¹⁰ Apuera sa mga apostol, an iba pa pinagbotan man na “maghulit sa mga tawo asin magtao nin lubos na patotoo.” Kan an binuhay liwat na si Jesus makipag-olay sa mga disipulo na nagtitiripon sa Galilea, na posibleng marhay na 500 sa sainda, sia nagboot: “Kun siring, paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo.” An pagboot na iyan aplikado sa gabos na tunay na Kristiano ngonyan, siring kan ipinaparisa kan mga tataramon ni Jesus: “Uya! Ako kaiba nindo sa gabos na aldaw sagkod sa pagtatapos kan sistema nin mga bagay.”​—Mat. 28:19, 20.

11. An Mga Saksi ni Jehova midbid sa paggibo nin anong mahalagang gibohon?

¹¹ Padagos na kinukuyog nin maigot na mga Kristiano an pagboot na iyan, na naghihingoa na “lubos na magpatotoo sa maogmang bareta.” An sarong pangenot na paagi sa paggibo kaiyan iyo an sinambit ni Pablo sa kamagurangan sa Efeso​—an paghuhulit sa harong-harong. Sa sarong libro kan 2007 dapit sa epektibong pagmimisyonero, si David G. Stewart, Jr., nagsabi: “An praktikal asin iinaaplikar na paagi kan Mga Saksi ni Jehova, sa pagmotibar sa mga miembro ninda na magpartisipar sa paghuhulit, an napatunayan na mas epektibong marhay kisa sa bakong malinaw saka teoretiko [na mga pagdagka na sinasabi sa mga pulpito]. Para sa dakol na Saksi ni Jehova, an pakikipag-olay sa iba manongod sa mga tinutubod ninda sarong paboritong aktibidad.” An resulta? “Kan 1999, 2 sagkod 4 porsiento sana kan mga tawo na sinurbey ko sa duwang kabisera sa Sirangan na Europa an nagsabi na sinda dinolok kan mga misyonerong Latter-day Saints o ‘Mormon.’ An labing 70 porsiento nagsabi na sinda personal na dinolok kan mga Saksi ni Jehova, na sa parate dakol na beses.”

12. (a) Taano ta “dakol na beses” kitang nagdadalaw sa mga harong sa satong teritoryo? (b) May ikakasaysay daw kamong eksperyensia dapit sa saro na nagbago an saboot mapadapit sa satong mensahe?

¹² Tibaad arog man kaiyan an sinasabi kan mga tawo sa lugar nindo. Posibleng marhay na may kabtang kamo dian. Mantang ‘personal nindong dinodolok’ an mga tawo sa saindong ministeryo sa harong-harong, nakakaolay nindo an mga lalaki, babae, asin hoben. An iba tibaad dai naghihinanyog dawa ngani “dakol na beses” na sindang dinolok. An iba tibaad naghihinanyog nin halipot sana kun kamo nagbabasa nin sarong teksto sa Biblia o may sinasabi na sarong punto na sono sa Kasuratan. Pero, sa iba, kamo nakakatao nin marahayon na patotoo, asin sinda nag-aako kaiyan. Iyan gabos posibleng mangyari mantang kita ‘lubos na nagpapatotoo sa maogmang bareta.’ Siring kan posibleng marhay na aram nindo, dakol na tawo an daing gayo nagpaheling nin interes minsan “dakol na beses” na sindang dinolok, alagad pag-abot nin panahon nagkaigwa nin pagbabago. Tibaad may nangyari sa sainda, o sa sarong namomotan, na nagin dahelan na an saindang isip asin puso mag-ako kan katotoohan. Ngonyan sinda mga tugang na niato sa pagtubod. Huli kaini, dai kamo magpondo, minsan ngani kan nakaagi pa sana dai kamo nakanompong nin dakol na andam na maghimate. Dai niato inaasahan na an gabos makakalaog sa katotoohan. Alagad an inaasahan sa sato nin Dios iyo na kita mahigos asin maigot na magpadagos sa lubos na pagpatotoo.

Mga Resulta na Tibaad Dai Niato Naaaraman

13. Paano puedeng an satong pagpapatotoo nagkakaigwa nin mga resulta na tibaad dai niato naaaraman?

¹³ An ministeryo ni Pablo nagkaigwa nin epekto bako sanang sa mga direkta niang tinabangan na magin Kristiano; totoo man iyan sa sato. Sinisierto niato na regular na makikabtang sa ministeryo sa harong-harong, na nagpapatotoo sa pinakadakol na tawo na posible. Ipinapakipag-olay niato sa satong mga kataed, katrabaho, kaeskuela, asin paryente an dapit sa maogmang bareta. Aram daw niato an gabos na resulta kaiyan? Sa nagkapira, tibaad igwa tolos nin marahay na mga resulta. Sa ibang kamugtakan, an mga banhi nin katotoohan tibaad magdanay na dai nagtutubo sa sarong peryodo nin panahon, alagad pag-abot nin panahon iyan nagkakagamot sa puso nin saro asin minatalubo. Dawa kun dai iyan mangyari, an mga tawong nakakaolay niato tibaad iestorya sa iba an manongod sa sinabi niato, tinutubod niato, asin iginawe niato. Iyo, tibaad dai ninda tinutuyo na ikapaabot an mga banhing iyan sa ibang daga na andam na umako kaiyan.

14, 15. Ano an nagin resulta kan pagpapatotoo nin sarong tugang na lalaki?

¹⁴ Bilang saro sanang halimbawa, isip-isipa si Ryan asin an saiyang agom na si Mandi, na nakaistar sa Florida, E.U.A. Sa pinagtatrabahohan ni Ryan, sia impormal na nagpatotoo sa sarong katrabaho. An lalaking iyan, na naggikan sa pamilyang Hindu, naghanga sa paggubing ni Ryan asin sa paagi nin pagtaram kaini. Sa saindang mga pag-oolay, ipinakipag-olay ni Ryan an mga tema na siring kan pagkabuhay liwat asin kamugtakan kan mga gadan. Sarong banggi kan Enero, hinapot kan lalaking iyan an agom niang si Jodi kun ano an aram kaini dapit sa Mga Saksi ni Jehova. Si Jodi sarong Katoliko, asin sinabi nia na an aram sana nia dapit sa mga Saksi iyo an saindang “paghuhulit sa harong-harong.” Kaya nagsiyasat si Jodi sa Internet dapit sa temang “Jehovah’s Witnesses,” asin itinokdo sia sa satong Web site na www.watchtower.org. Sa laog nin mga bulan, nagbasa si Jodi nin mga impormasyon sa site na iyan, kaiba an Biblia asin interesanteng mga artikulo.

¹⁵ Pag-abot nin panahon, namidbid ni Jodi si Mandi, huling sindang duwa parehong nars. Naogma si Mandi na simbagon an mga hapot ni Jodi. Pakalihis nin sarong panahon, nagkaigwa sinda nin pag-oolay na inaapod ni Jodi na “poon ki Adan sagkod sa Armagedon.” Inako ni Jodi an alok na pag-adal sa Biblia. Dai nahaloy, sia nagpoon nang mag-atender sa mga pagtiripon sa Kingdom Hall. Kan Oktubre, si Jodi nagin sarong dai pa bautisadong parahayag, asin sia nabautismohan kan Pebrero. Sia nagsurat: “Ngonyan na aram ko na an katotoohan, maogma nang marhay asin may pagkakontento an sakong buhay.”

16. Ano an ipinaparisa kan eksperyensia kan tugang na lalaki sa Florida manongod sa satong mga paghihingoa na lubos na magpatotoo?

¹⁶ Dai hinohona ni Ryan na an pagpapatotoo nia sa sarong lalaki maresulta sa paglaog nin ibang tawo sa katotoohan. Totoo, sa kamugtakan nia, talagang naaraman nia an epekto kan saiyang pagigin determinado na “lubos na magpatotoo.” Pero, tibaad kamo nagpapatotoo sa harong, sa pinagtatrabahohan, sa eskuelahan, o sa impormal na paagi, asin dai nindo naaaraman, iyan an nagigin paagi na an katotoohan ikalakop sa iba. Kun paanong dawa si Pablo dai nakaaram kan gabos na bunga kan saiyang pagpapatotoo sa “distrito nin Asia,” tibaad dai nindo maaraman an gabos na marahay na resulta kan saindong lubos na pagpapatotoo. (Basahon an Gibo 23:11; 28:23.) Alagad mahalagang marhay nanggad na padagos nindong gibohon iyan!

17. Ano an determinado nindong gibohon durante kan 2009?

¹⁷ Durante kan 2009, isapuso logod niato gabos an sugo sa sato na magpatotoo sa harong-harong asin sa iba pang paagi. Sa siring, ikakapahayag man niato an mga saboot na kapareho kan ki Pablo: “Dai ko ibinibilang an sakong kalag na may ano man na halaga asin mahal para sa sako, tangani sanang matapos ko an sakong gibohon asin an ministeryo na inako ko sa Kagurangnan na Jesus, na lubos na magpatotoo sa maogmang bareta manongod sa dai na kutana maninigong kabootan nin Dios.”

Ano an Isisimbag Nindo?

• Paano si apostol Pedro asin Pablo saka an iba pa lubos na nagpatotoo kan enot na siglo?

• Taano ta an epekto kan satong pagpapatotoo tibaad magin mas mahiwas nanggad kisa sa naaaraman niato?

• Ano an teksto kan taon para sa 2009, asin taano ta naniniwala ka na angay iyan?

[Blurb sa pahina 19]

An teksto kan taon para sa 2009 iyo an: “Lubos na magpatotoo sa maogmang bareta.”​—Gibo 20:24.

[Ritrato sa pahina 17]

Aram kan kamagurangan sa Efeso an kaugalean ni Pablo na pagpapatotoo sa harong-harong

[Ritrato sa pahina 18]

Gurano kahiwas an maaabot kan mga epekto kan saindong lubos na pagpapatotoo?