Pagpaheling nin Marahay na Ugale Bilang mga Ministro nin Dios

“Magin kamong mga paraarog sa Dios.”—EFE. 5:1.

1, 2. (a) Taano ta mahalaga an marahay na ugale? (b) Ano an pag-oolayan sa artikulong ini?

MAPADAPIT sa magalang na paggawe, an autor na si Sue Fox nagsurat: “Mayo nin bakasyon kun dapit sa pagpaheling nin marahay na ugale. An marahay na ugale ipinapaheling sa gabos na lugar asin sa gabos na panahon.” Kun nakatodan na nin mga tawo na magin marahay an ugale, an mga problema sa iba naiinaan asin sa parate nawawara. Alagad totoo man an kabaliktaran kaiyan. An daing modong pagtratar sa iba minaresulta sa iriwal, paghinanakit, asin kamondoan.

² An tunay na Kristianong kongregasyon kompuesto nin mga tawo na sa pangkagabsan may marahayon na ugale. Pero, dapat kitang magmaan na dai maarog an maraot na ugale na lakop sa kinaban ngonyan. Helingon niato kun paano an pag-aplikar kan mga prinsipyo sa Biblia dapit sa pagigin marahay an ugale makakaprotehir sa sato sa bagay na ini asin makakadagka sa mga tawo pasiring sa tunay na pagsamba. Tanganing masabotan kun ano an kalabot sa pagpaheling nin marahay na ugale, estudyare an halimbawa ni Jehova Dios asin kan saiyang Aki.

Si Jehova Asin an Saiyang Aki—Mga Halimbawa nin Marahay na Ugale

 3. Anong halimbawa nin marahay na ugale an itinao ni Jehova Dios?

³ Itinao ni Jehova Dios an sangkap na halimbawa nin marahay na ugale. Sa ibong kan saiyang halangkaw na posisyon bilang Soberano kan uniberso, an mga tawo tinatratar nia na may dakulang kabootan asin paggalang. Kan makipag-olay si Jehova ki Abraham asin Moises, naggamit sia nin termino sa Hebreo na parateng tinatradusir na “tabi.” (Gen. 13:14; Ex. 4:6) Kun napapasala an saiyang mga lingkod, si Jehova “maheherakon asin maugayon, maluway sa pagkaanggot asin abunda sa mamomoton na kabootan asin kaimbodan sa katotoohan.” (Sal. 86:15) Laen nanggad sia sa nagkapirang tawo na naaanggot nin labi-labi kun an inaasahan ninda dai nagigibo nin iba.

 4. Paano niato maaarog si Jehova kun nakikipag-olay sa sato an iba?

⁴ An marahay na ugale nin Dios maririsa man sa paagi nin paghinanyog nia sa mga tawo. Kan si Abraham magpalataw nin mga hapot mapadapit sa mga tawo sa Sodoma, mapasensiang sinimbag ni Jehova an kada saro kaiyan. (Gen. 18:23-32) Dai nia minansay na an ikinakahadit ni Abraham makakasayang sana kan Saiyang panahon. Naghihinanyog si Jehova sa mga pamibi kan saiyang mga lingkod asin sa mga pakimaherak nin nagsosolsol na mga nagkasala. (Basahon an Salmo 51:11, 17.) Bako daw na maninigo niatong arogon si Jehova paagi sa paghinanyog kun nakikipag-olay sa sato an iba?

 5. Paano an pag-arog sa marahay na ugale ni Jesus makakapaoswag kan satong relasyon sa iba?

⁵ An marahay na ugale kabilang sa dakol na bagay na nanodan ni Jesu-Cristo sa saiyang Ama. Minsan ngani kun beses dakol na panahon asin kosog an kaipuhan ni Jesus sa saiyang ministeryo, sia pirmeng mapasensia asin maboot. Namatean kan mga may lepra, mga buta na nagin parapakilimos, asin iba pang nangangaipo na si Jesus andam na tumabang sa sainda. Dai nia sinda binaliwala, minsan ngani sinda nag-abot na dai nia linalaoman. Parate niang ipinopondo an saiyang ginigibo tanganing tabangan an saro na napupurisaw. Pambihira an pagkamakonsiderasyon ni Jesus sa mga nagturubod sa saiya. (Mar. 5:30-34; Luc. 18:35-41) Bilang mga Kristiano, sinusunod niato an halimbawa ni Jesus paagi sa pagigin maboot asin matinabang. An siring na paggawe naririsa kan satong mga paryente, kataed, asin iba pa. Dugang pa, an siring na paggawe nagpapamuraway ki Jehova asin nagpapaogma sa sato.

 6. Anong halimbawa nin pagigin makikatood an itinao ni Jesus?

⁶ Nagpaheling man si Jesus nin paggalang sa mga tawo paagi sa paggamit kan saindang ngaran. Ginibo man daw iyan kan Judiong mga namomoon sa relihion bilang pagtao nin dignidad sa iba? Dai. Minansay ninda an mga dai nakakaaram kan Ley bilang “mga tawong isinumpa” asin trinatar ninda an mga ini na siring kaiyan. (Juan 7:49) Bakong arog kaiyan an Aki nin Dios. Nadangog ni Marta, Maria, Zaqueo, asin kan dakol pang iba na inapod nia sinda sa ngaran ninda. (Luc. 10:41, 42; 19:5) Minsan ngani an pakikipag-olay niato sa mga tawo ngonyan tibaad naiimpluwensiahan nin mga kostumbre asin kamugtakan, an mga lingkod ni Jehova naghihingoang magin makikatood sa iba.a Dai ninda tinotogotan an pagpalaenlaen na makaina sa paggalang na maninigong ipaheling sa saindang mga kapagtubod asin sa iba pa.—Basahon an Santiago 2:1-4.

 7. Paano an mga prinsipyo sa Biblia nakakatabang sa sato sa pagpaheling nin marahay na ugale sa mga kapwa tawo sa gabos na lugar?

⁷ An maugayon na pagtratar nin Dios asin kan saiyang Aki sa mga tawo kan gabos na nasyon asin grupong etniko nagtatao nin dignidad sa siring na mga indibiduwal asin nakakaakit sa mga may tamang inklinasyon sa katotoohan. Siempre, depende sa lugar kun ano an ibinibilang na marahay na ugale. Huli kaini, mayo kitang sinusunod na estriktong mga susundon mapadapit sa marahay na ugale. Imbes, nagpapagiya kita sa mga prinsipyo sa Biblia kun paano niato tatawan nin dignidad an mga kapwa tawo sa gabos na lugar. Siyasaton niato kun paano an marahay na ugale sa pagtratar sa mga tawo makakatabang sa sato na magin mas mabunga sa Kristianong ministeryo.

Pagtino sa mga Tawo Asin Pakikipag-olay sa Sainda

8, 9. (a) Anong ugale an tibaad tawan nin kahulogan na kadaihan nin modo? (b) Taano ta maninigo niatong togotan an mga tataramon ni Jesus sa Mateo 5:47 na magkaigwa nin epekto sa pagtratar niato sa mga tawo?

⁸ Sa sibot-sibot na pamumuhay na ordinaryo na sana sa dakol na lugar ngonyan, an duwang tawo sa parate nagkakasabatan na dai man lamang nagsasabi nin “marahay na aldaw” o “kumusta?” Siempre, dai inaasahan an siisay man na makipag-olay sa lambang nag-aagi sa matawong gilid nin dalan. Minsan siring, sa dakol na iba pang kamugtakan, angay asin marahay na tinohon an iba. Ugale daw nindo na tinohon an mga tawo? O sa parate kamo daw naglalakaw na dai naghuhuyom o mayong sinasabing nakakaogma? Minsan ngani mayo nin maraot na intension, an saro puedeng magkaigwa nin ugale na sa katunayan kadaihan nin modo.

⁹ Nagpagirumdom sa sato si Jesus kan sia magsabi: “Kun an saindong mga tugang sana an tinitino nindo, anong pambihirang bagay an saindong ginigibo? Bako daw na ginigibo man iyan kan mga tawo kan mga nasyon?” (Mat. 5:47) Mapadapit digdi, an sarong propesyonal na kinokonsulta na si Donald Weiss nagsurat: “Naghihinanakit an mga tawo kun lampas an heling sa sainda o dai sinda iniintindi nin iba. Mayo talagang marahay na rason na dai tinohon an saro. Simple sana an remedyo: Tinohon an mga tawo. Makipag-olay sa sainda.” Kun dai niato totogotan an satong pagkabakong matinino o pagigin bakong makikatood na makaapektar sa satong relasyon sa iba, magkakamit kita nin marahay na mga resulta.

10. Paano an marahay na ugale nakakatabang sa sato na magin mabunga sa ministeryo? (Helingon an kahon na “Magpoon Paagi sa Makikatood na Huyom.”)

¹⁰ Estudyare an ginibo nin Kristianong mag-agom na si Tom asin Carol, na nakaistar sa sarong dakulang siudad sa Amerika del Norte. Ginibo nindang kabtang kan saindang ministeryo an nakakaogmang pakikipag-olay sa mga tawo sa saindang lugar. Paano ninda ginibo iyan? Sa pagsambit sa Santiago 3:18, si Tom nagsabi: “Pinagmamaigotan ming trataron an mga tawo sa makikatood asin matoninong na paagi. Dinodolok mi an mga naheheling mi sa luwas kan saindang harong asin an mga nagtatrabaho sa lugar niamo. Naghuhuyom kami asin tinitino sinda. Ipinapakipag-olay mi an mga pinagkakainteresan ninda—an saindang mga aki, ayam, harong, asin trabaho. Pag-abot nin panahon, ibinibilang na ninda kami na saindang mga katood.” Sinabi pa ni Carol: “Sa sunod na pagdalaw, sinasabi mi sa sainda an samong ngaran asin hinahapot mi kun ano an ngaran ninda. Sinasabi mi sa sainda an samong ginigibo sa lugar na iyan alagad pinapagdadanay ming halipot sana an pakikipag-olay. Paghaloyhaloy, nakakapagpatotoo na kami sa sainda.” Nakua ni Tom asin Carol an tiwala nin dakol sa mga tawo sa lugar ninda. Dakol an nag-ako nin mga publikasyon na basado sa Biblia, asin an pira nagpaheling nin orog pang interes na makanood kan katotoohan.

Pagpaheling nin Marahay na Ugale sa Depisil na mga Kamugtakan

11, 12. Taano ta maninigong asahan niato an bakong marahay na pagtratar mantang naghuhulit kan maogmang bareta, asin ano maninigong magin reaksion niato dian?

¹¹ Kun beses, daing modo an pagtratar sa sato kun naghuhulit kita kan maogmang bareta. Inaasahan niato ini, huling patienot nang pinatanidan ni Cristo Jesus an saiyang mga disipulo: “Kun ako pinersegir ninda, kamo pepersegiron man ninda.” (Juan 15:20) Alagad kun an pang-iinsulto babalosan man nin pang-iinsulto, bakong marahay an magigin mga resulta. Ano an maninigong magin reaksion niato? Si apostol Pedro nagsurat: “Pakangbanalon nindo an Cristo bilang Kagurangnan sa saindong puso, na pirmeng andam na gumibo nin pagdepensa sa atubangan nin lambang tawo na naghahagad sa saindo nin rason para sa saindong paglaom, alagad ginigibo iyan na may mahoyong boot asin hararom na paggalang.” (1 Ped. 3:15) An pagpaheling niato nin marahay na ugale—na mahoyo asin magalang an pagsimbag—puedeng magresulta sa paborableng reaksion kan mga nang-iinsulto sa sato.—Tito 2:7, 8.

¹² Puede daw kitang mag-andam na atubangon an negatibong mga komento sa paagi na inooyonan nin Dios? Iyo. Irinekomendar ni Pablo: “An saindo logod na pagtaram danay na may kabootan, na tinimplahan nin asin, tanganing maaraman nindo kun paano kamo dapat na sumimbag sa lambang saro.” (Col. 4:6) Kun pirme kitang nagpapaheling nin marahay na ugale sa mga kapamilya, kapwa estudyante, katrabaho, kakongregasyon, asin kataraed, mas andam kitang atubangon an pag-olog-olog asin pang-iinsulto sa paagi na maninigo sa sarong Kristiano.—Basahon an Roma 12:17-21.

13. Magtao nin halimbawa kun paanong an pagpaheling nin marahay na ugale puedeng magresulta sa paborableng reaksion nin mga nagkokontra.

¹³ An pagpaheling nin marahay na ugale sa depisil na mga situwasyon nagbubunga nin marahay na mga resulta. Halimbawa, sa Hapon, sarong Saksi an inolog-olog kan kagharong sagkod kan bisita kaini. Magalang na huminale an tugang na lalaki. Sa pagpadagos kan saiyang paghuhulit sa teritoryo, narisa nia na pinagmamasdan sia kan bisita na nasa haroharani. Kan dolokon sia kan tugang, an lalaki nagsabi: “Pasensia ka na sa nangyari. Dawa bakong marahay an mga sinabi mi saimo, narisa ko na nakahuyom ka pa man giraray. Ano an dapat kong gibohon tanganing magin arog man ako kaiyan?” Huling an lalaking iyan nawaran nin trabaho asin nagadanan pa sana nin ina, mayo na sia nin ano man na paglaom na magin maogma. An Saksi nag-alok sa saiya nin pag-adal sa Biblia, na inako kan lalaki. Dai nahaloy, sia nag-aadal na sa Biblia nin duwang beses kada semana.

An Pinakamarahay na Paagi na Magkaigwa nin Marahay na Ugale

14, 15. Paano sinanay nin mga lingkod ni Jehova an saindang mga aki kan mga panahon kan Biblia?

¹⁴ Sinierto kan diosnon na mga magurang kan mga panahon kan Biblia na an saindang mga aki makanood nin pundamental na mga bagay manongod sa marahay na ugale sa harong. Estudyare an magalang na pakikipag-olay ni Abraham asin kan saiyang aki na si Isaac sa lambang saro na nasa Genesis 22:7. Risang-risa man sa kamugtakan ni Jose an marahay na pagsasanay sa saiya kan saiyang mga magurang. Kan sia nakabilanggo, nagpaheling sia nin marahay na ugale dawa sa saiyang mga kapwa bilanggo. (Gen. 40:8, 14) An mga tataramon nia ki Faraon nagpapaheling na nanodan nia an tamang paagi nin pakikipag-olay sa saro na may halangkaw na katongdan.—Gen. 41:16, 33, 34.

¹⁵ Kaiba sa Sampulong Togon na itinao sa mga aki ni Israel an pagboot na ini: “Tawan mo nin onra an saimong ama asin an saimong ina tanganing maglawig an saimong mga aldaw sa daga na itinatao sa saimo ni Jehova na saimong Dios.” (Ex. 20:12) An sarong paagi na matatawan nin onra kan mga aki an saindang mga magurang iyo an pagkaigwa nin marahay na ugale sa harong. An aking babae ni Jefte nagpaheling nin pambihirang paggalang sa saiyang ama paagi sa pagsunod sa promesa ni Jefte sa depisilon na situwasyon.—Hok. 11:35-40.

16-18. (a) Ano an puedeng gibohon tanganing tokdoan nin marahay na ugale an mga aki? (b) Ano an nagkapirang pakinabang nin pagtotokdo nin marahay na ugale sa mga aki?

¹⁶ Mahalagang marhay an pagsasanay sa satong mga aki na magin marahay an ugale. Tanganing magin mga adulto na marahay makiibaiba, kaipuhan na manodan nin mga aki an tamang paagi nin pagtaratara sa mga bisita, pagsimbag sa telepono, asin pagkakan na may kairiba. Maninigo sindang tabangan na masabotan kun taano ta dapat na kapotan na nakabukas an pinto para sa iba, magpaheling nin kabootan sa mga may edad na asin may helang, saka mag-alok nin tabang sa mga may darang magagabat na bagay. Kaipuhan na masabotan ninda an halaga kan sinserong pagsabi nin “tabi,” “salamat,” “daing ano man,” “ano an puede kong itabang saindo?,” asin “pasensia na tabi.”

¹⁷ Dai kaipuhan na magin depisil an pagsasanay sa mga aki na magkaigwa nin marahay na ugale. An pinakamarahay na paagi iyo an pagigin marahay na halimbawa. Ini an sabi kan 25 anyos na si Kurt manongod sa kun paano sia asin an tolo niang tugang na lalaki nakanood na magin marahay an ugale: “Naheheling asin nadadangog mi si Nanay asin Tatay na may kabootan na nakikipag-olay sa lambang saro asin tinatratar an ibang tawo sa mapasensia asin makonsiderasyon na paagi. Sa Kingdom Hall, iiniiba ako ni Tatay bago asin pagkatapos kan mga pagtiripon tanganing makipag-olay sa mas may edad nang mga tugang. Nadadangog ko an saiyang mga pagtaratara asin naheheling ko an paggalang nia sa sainda.” Si Kurt nagsabi pa: “Sa paglihis nin panahon, naarog ko an saiyang ugale. Nagigin natural na sana an magalang na pagtratar sa mga tawo. Bako sa kaipuhan mong gumawe nin siring kaiyan, kundi gusto mong gumawe nin siring kaiyan.”

¹⁸ Ano an posibleng marhay na mangyari kun tinotokdoan nin mga magurang an saindang mga aki nin marahay na ugale? Makakanood an mga aki na makipagkatood asin mapapagdanay ninda an matoninong na relasyon sa iba. Magigin andam sindang marhay na magtrabaho na may among asin mga katrabaho. Dugang pa, an mga aki na magalang, marahay an ugale, asin tanos matao nin kagayagayahan asin pagkakontento sa saindang mga magurang.—Basahon an Talinhaga 23:24, 25.

Napapalaen Kita Huli sa Marahay na Ugale

19, 20. Taano ta maninigo kitang magin determinado na arogon an satong maugayon na Dios asin an saiyang Aki?

¹⁹ “Magin kamong mga paraarog sa Dios, bilang mga aki na namomotan na marhay,” an isinurat ni Pablo. (Efe. 5:1) Kalabot sa pag-arog ki Jehova Dios asin sa saiyang Aki an pag-aplikar sa mga prinsipyo sa Biblia, siring kan pinag-olayan sa artikulong ini. Sa paggibo kaiyan, malilikayan niato na magsagin na marahay an ugale tangani sanang makua an pabor nin saro na nasa halangkaw na katongdan o makakua nin materyal na pakinabang.—Jud. 16.

²⁰ Sa huring mga aldaw kan maraot na pamamahala ni Satanas, determinado siang haleon an mga pamantayan nin magalang na paggawe na inestablisar ni Jehova. Alagad dai magigin mapanggana an Diablo na haleon an marahay na ugale nin tunay na mga Kristiano. Logod na an lambang saro sa sato magin determinado na sunodon an mga halimbawa kan satong maugayon na Dios asin kan saiyang Aki. Dangan an satong pagtaram asin paggawe pirmeng magigin kabaliktaran kan mga gibo nin mga tawong mas gustong magin daing modo. Matao kita nin kaomawan sa satong Dios na marahay an ugale, si Jehova, asin an sinserong mga tawo maaakit niato sa tunay na pagsamba sa saiya.

[Nota sa Ibaba]

Nagigirumdoman daw Nindo?

• Ano an manonodan niato ki Jehova asin sa saiyang Aki manongod sa pagpaheling nin marahay na ugale?

• Taano ta an makikatood na pagtino sa mga tawo nagtatao nin marahay na impresyon dapit sa sato bilang mga Kristiano?

• Paano nakakatabang an marahay na ugale na magin mabunga sa ministeryo?

• Ano an papel nin mga magurang sa pagtotokdo nin marahay na ugale sa saindang mga aki?

[Kahon sa pahina 27]

Magpoon Paagi sa Makikatood na Huyom

Dakol an nag-aalangan na magpoon na makipag-olay sa saro na dai ninda midbid. Minsan siring, huli sa pagkamoot sa Dios asin sa saindang kapwa, an mga Saksi ni Jehova odok na nagmamaigot na makanood kun paano makipag-olay tanganing ikasabi sa iba an mga katotoohan sa Biblia. Ano an makakatabang sa saindo na umoswag sa bagay na ini?

Sarong mahalagang prinsipyo an yaon sa Filipos 2:4, na nagsasabi: “[Magin mapagrisa], bakong sa personal na interes sa sadiri sana nindong mga bagay-bagay, kundi siring man sa personal na interes sa mga bagay-bagay kan iba.” Isip-isipa an mga tataramon na ini sa arog kaining paagi: Kun nungka pa nindong nakamidbid an sarong tawo, minamansay nia kamo bilang estranghero. Ano an puede nindong gibohon tanganing magin pamugtak an boot nia? Puedeng makatabang an makikatood na huyom asin pagtino. Pero, orog pa an dapat na girumdomon.

Paagi sa pagprobar na magpoon na makipag-olay sa saro, tibaad nadisturbo nindo an iniisip nia. Kun poprobaran nindong ipakipag-olay an iniisip nindo na dai iniintindi an nasa isip nia, tibaad bakong paborable an magin reaksion nia. Kun siring, kun posible na maaraman nindo an tibaad iniisip nia, taano ta dai gamiton iyan tanganing makapoon nin pakikipag-olay sa saiya? Iyan an ginibo ni Jesus kan manuparan nia an sarong babae sa bubon sa Samaria. (Juan 4:7-26) An nasa isip kan babae iyo an pagsakdo nin tubig. Iyan an ginamit ni Jesus kan magpoon siang makipag-olay sa babae, asin dai nahaloy iyan nagibo niang magin buhay na pag-oolay dapit sa espirituwal na mga bagay.

[Mga Ritrato sa pahina 26]

An pagigin makikatood sa mga tawo puedeng magbunga nin marahay na pagpatotoo

[Ritrato sa pahina 28]

Pirmeng angay an pagpaheling nin marahay na ugale