Pagdanayon an “Kadalisayan nin Puso” sa Delikadong mga Panahon na Ini

“DAI manenegaran nin siisay man na an kalinigan sa moral sarong problema sa Iglesia ngonyan.” Iyan an sabi kan Katolikong peryodista na si Vittorio Messori dapit sa mga iskandalo sa sekso na dian naimbuelto kasuarin pa sana an Iglesia sa Italia. “Asin dai iyan mareresolberan paagi sa paghale sa kahagadan sa klero na dai mag-agom huling sa 80 porsiento kan mga kaso, kalabot an mga bakla—mga kaso nin bakong normal na pagdodorog na dian imbuelto an mga pading nang-aabuso nin mga adultong lalaki asin solterito.”—La Stampa.

An lakop na karatan daing duda na sarong tanda kan “huring mga aldaw” na ini kan presenteng sistema nin mga bagay. (2 Tim. 3:1-5) Siring sa ipinapaheling nin mga bareta, an resulta kaiyan na pagruro sa moral igwa nin negatibong impluwensia bako sanang sa mga tawo sa pangkagabsan kundi pati na sa mga naghihingakong lingkod nin Dios. An maraot asin bakong dalisay na puso ninda nagtutulod sa sainda na gumibo nin kabikoan. (Efe. 2:2) May marahay na rason na si Jesus nagpatanid na “gikan sa puso minaluwas an maraot na mga pangangatanosan, mga paggadan, mga pagsambay, mga pakikisaro, mga paghabon, putik na mga patotoo, mga paglanghad.” (Mat. 15:19) Minsan siring, mawot ni Jehova Dios na an saiyang mga lingkod mamoot sa “kadalisayan nin puso.” (Tal. 22:11) Kaya paano an sarong Kristiano makakapagpadanay nin dalisay na puso sa delikadong mga panahon na ini?

Kun Ano an Boot Sabihon nin Pagigin “Dalisay an Puso”

Sa Biblia, an “puso” parateng ginagamit sa simbolikong paagi. Segun sa sarong reperensia, an termino sa Biblia para sa puso nanonongod sa “kairairaroming kabtang nin tawo” asin “iyo an parte nin tawo na mahalaga sa Dios, na dian nakagamot an relasyon nin saro sa Dios, asin na nagdedeterminar kan moral na paggawe.” An puso nagrerepresentar sa kun ano talaga kita sa laog. Siring sa itinatampok kan reperensiang kinotar sa enotan, iyo ini an sinisiyasat ni Jehova asin pinapahalagahan nia sa saiyang mga lingkod.—1 Ped. 3:4.

Sa Biblia, an “dalisay” asin “malinig” puedeng mangahulogan nin pisikal na kalinigan. Alagad an mga terminong iyan iinaaplikar man sa bagay na mayong digta—dai nasalakan, dai naatian, o dai naraot—sa moral asin espirituwal na paagi. Sa Sermon sa Bukid, si Jesus nagpahayag: “Maogma an mga dalisay an puso.” An pinanonongdan nia iyo an mga masasabing malinig sa laog. (Mat. 5:8) Dalisay an saindang mga saboot, pagmawot, asin motibo. Motibado nin pagkamoot asin pasasalamat, namomotan ninda si Jehova nin bilog na puso, na may sinserong saboot asin mayo nin pagsaginsagin. (Luc. 10:27) Gusto nindong magin dalisay sa paaging iyan, bako daw?

Depisil an Pagpadanay nin ‘Dalisay na Puso’

An sarong lingkod ni Jehova dapat na bako sanang “inosente an kamot” kundi ‘malinig man an puso.’ (Sal. 24:3, 4) Minsan siring, orog na nagigin depisil ngonyan para sa mga lingkod nin Dios na magdanay na “malinig an puso.” Si Satanas asin an kinaban na pinamamahalaan nia, pati na an sato mismong bakong sangkap na laman, ginigipit kita nin grabe tanganing rumayo ki Jehova. Tanganing malabanan an mga panggigipit na ini, mahalagang marhay nanggad na mamotan niato an “kadalisayan nin puso” asin danay na pangaptan iyan nin higot. Iingatan asin tatabangan kita kaini na magdanay na katood nin Dios. Paano niato mapagdadanay an dalisay na puso?

Sa Hebreo 3:12, mababasa niato an patanid: “Mag-ingat kamo, mga tugang, ta tibaad tumubo sa siisay man sa saindo an maraot na puso na daing pagtubod paagi sa pagbaya sa buhay na Dios.” Dai niato mapagdadanay na “dalisay an puso” niato kun minatubo sa sato an puso na “daing pagtubod.” Anong mga ideya an ipinapalakop ni Satanas na Diablo tanganing paluyahon an pagtubod sa Dios? Kaiba digdi an teoriya nin ebolusyon, kanya-kanyang pamantayan sa moral asin relihion, asin pagduda dapit sa pagpasabong nin Dios sa Banal na Kasuratan. Dai niato dapat togotan na maapektaran kita kan siring na nakakagadan na ideolohiya. (Col. 2:8) An aroaldaw na pagbasa kan Biblia asin hararom na paghorophorop pangenot na mga pandepensa sa mga pag-atakeng ini. An tamang kaaraman sa Tataramon nin Dios magpapalaad sa satong pagkamoot ki Jehova asin sa satong pakasabot sa pagtratar nia sa mga tawo. Mahalagang marhay an siring na pagkamoot asin pakasabot kun gusto niatong isikwal an falsong mga pangangatanosan asin mapagdanay na makosog an satong pagtubod ki Jehova tanganing danay na magkaigwa kita nin dalisay na puso.—1 Tim. 1:3-5.

Kun Napapaatubang sa mga Pagmawot kan Laman

An saro pang klase nin pag-atake na tibaad mapaatubang sa sato mantang hinihingoang mapagdanay an “kadalisayan nin puso” iyo an makalaman asin materyalistikong mga pagmawot. (1 Juan 2:15, 16) An pagkamoot sa kuarta o an pagmawot na magtipon nin kayamanan asin magkaigwa nin materyal na mga bagay puedeng makaraot sa puso, na itinutulod an sarong Kristiano na gumawe nin tumang sa kabotan nin Dios. An nagkapira nagin bakong sadiosan sa trabaho, nandaya sa iba, o naghabon pa ngani nin kuarta o iba pang bagay.—1 Tim. 6:9, 10.

Sa ibong na lado, paagi sa pagpatalubo nin tamang pagkatakot na mapaanggot si Jehova, pagkamoot sa hustisya, asin pagigin determinado na mapagdanay an marahay na konsensia, satong ipinapaheling na namomotan niato an “kadalisayan nin puso.” An pagkamoot na iyan nagpapahiro sa sato na padagos na “gumawe nin sadiosan sa gabos na bagay.” (Heb. 13:18) Kun kita minagawe nin tanos, an pagkasadiosan puedeng magresulta sa marahay na patotoo. Si Emilio, sarong Italianong Saksi na nagtatrabaho bilang drayber sa sarong kompanya nin pampublikong transportasyon, nakakua nin pitaka na may laog na 470 euro (mga ₱32,690). Nabigla an saiyang mga katrabaho kan itao nia an pitaka sa saiyang superbisor, na kan huri iyo an nagbalik kaiyan sa kagsadiri. An nagkapira sa mga katrabaho ni Emilio naghanga nanggad sa saiyang iginawe kaya nagin interesado sinda asin nagpoon na mag-adal sa Biblia. Bilang resulta, pito hale sa duwang pamilya an nag-ako kan katotoohan. Iyo, an paggawe nin sadiosan gikan sa dalisay na puso puede nanggad magpahiro sa iba na omawon an Dios.—Tito 2:10.

An saro pa na puedeng magkaigwa nin negatibong impluwensia sa kadalisayan nin puso nin sarong Kristiano iyo an biribid asin imoral na pagmansay sa sekso. Huling ibinibilang nin dakol na normal an pagdodorog kan mga bako pang kasal, kan mga bakong mag-agom, asin kan mga magkasekso, puede ining makaraot sa puso nin sarong Kristiano. An saro na nagpapadara sa seksuwal na imoralidad tibaad mapagsaginsagin na mamuhay nin doble-kara, na itinatago an kasalan. Siertong dai kaiyan ipinapabanaag an “kadalisayan nin puso.”

Si Gabriele nabautismohan kan sia 15 anyos asin tolos-tolos na nagpayunir. Minsan siring, paghaloyhaloy nagpoon siang maglaog sa mga nightclub kaiba kan bakong marahay na barkada. (Sal. 26:4) Ini an nagin kapinonan nin imoral asin mapagsaginsagin na pamumuhay, asin sia kinaipuhan na itiwalag sa Kristianong kongregasyon. An siring na disiplina hale ki Jehova nagpaisip sa saiya nin hararom. Nagigirumdoman ni Gabriele: “Pinonan kong gibohon an gabos na bagay na nungka kong sineryoso kaidto. Binasa ko an Biblia aroaldaw, na hinihingoang masabotan kun ano talaga an sinasabi ni Jehova, asin maingat kong pinag-adalan an teokratikong mga publikasyon. Naheling ko na puedeng magin kapakipakinabang asin nakakakontento nanggad an personal na pag-adal asin kun gurano kanakakapakosog an pagbasa kan Biblia saka an odok na pamibi.” Nakatabang ini ki Gabriele na bayaan an saiyang imoral na paggawe asin ikabalik an saiyang relasyon ki Jehova.

Ngonyan, si Gabriele naglilingkod na giraray bilang payunir kaiba an saiyang agom. An nangyari sa saiya nagpapatunay na an pag-adal kan Biblia asin kan mga publikasyon kan “maimbod asin mapagmansay na oripon” makakatabang sa saro na magkaigwa nin dalisay na puso asin na isikwal an imoralidad.—Mat. 24:45; Sal. 143:10.

“Kadalisayan nin Puso” Kun Binabalo

An panggigipit kan mga nagtutumang, kasakitan sa pagbuhay, asin grabeng helang nagpapagabat sa nagkapira sa mga lingkod nin Dios. May beses na pati an saindang puso naaapektaran sa negatibong paagi. Dawa si Hadeng David nag-agi sa siring na eksperyensia: “An sakong espiritu nangluluya sa laog ko; sa tahaw ko an sakong puso namamagol.” (Sal. 143:4) Paano nia napangganahan an siring na mga kamugtakan? Ginirumdom ni David an pagtratar nin Dios sa Saiyang mga lingkod asin kun paano nia mismo naeksperyensiahan an pagliligtas. Hinorophorop nia kun ano an ginibo ni Jehova para sa Saiyang dakulang ngaran. Dayaday na tinawan ni David nin atension an mga gibo nin Dios. (Sal. 143:5) Sa kaagid na paagi, an paghorophorop sa satong Kaglalang asin sa gabos niang ginibo patin padagos na ginigibo para sa sato makakatabang sa sato dawa kun kita binabalo.

Kun kita nagibohan nin maraot o kun iyan an namamatean niato, posibleng magraot an satong boot. An daing ontok na pagparaisip sa pangyayaring iyan posibleng magresulta sa pagkaigwa niato nin negatibong saboot sa satong mga tugang. Tibaad rumayo kita sa sainda, na nagsosolosolo asin haros mayo na nin interes sa iba. Minsan siring, an arog daw kaiyan na reaksion magigin kaoyon kan satong pagmawot na magkaigwa nin “kadalisayan nin puso”? Malinaw nanggad, kalabot sa pasohan niatong magkaigwa nin siring na kamugtakan nin puso an satong pagtratar asin reaksion sa Kristianong mga tugang niato.

Sa sarong kinaban na orog pang nagigin maraot asin paruro nang paruro sa moral, kita bilang mga Kristiano napapalaen huling namomotan niato an “kadalisayan nin puso.” May positibong impluwensia sa satong buhay mantang naeeksperyensiahan niato an panglaog na katoninongan na resulta kan paggibo kan kabotan nin Dios. Orog sa gabos, nagkakaigwa kita nin dayupot na pakikikatood sa satong Kaglalang, si Jehova Dios, na namomoot sa mga “malinig an puso.” (Sal. 73:1) Iyo, puede kitang mapabilang sa mga magigin maogma huling, siring kan ipinanuga ni Jesus, “maheheling ninda an Dios,” mantang Sia minahiro sa kapakanan kan mga namomoot sa “kadalisayan nin puso.”—Mat. 5:8.