Makanood sa Pagpapasensia ni Jehova Asin ni Jesus

 1. Ano an iniisip kan nagkapirang maimbod?

AN SARONG maimbod na sister na nagtagal nin dakol na kadepisilan sa nagkapirang dekada mapakumbabang naghapot, “Mahihiling ko pa daw an katapusan bago ako magadan?” Arog man kaiyan an iniisip kan nagkapira na haloy nang naglilingkod ki Jehova. Hinahalat niato an aldaw na babagohon nin Dios an gabos na bagay asin hahaleon an mga problema na napapaatubang sa sato ngonyan. (Kap. 21:5) Dawa dakol kitang dahilan na magtubod na haranihon na an katapusan kan sistema ni Satanas, depisil maghalat na may pagpapasensia sa pag-abot kan aldaw na iyan.

 2. Anong mga hapot dapit sa diosnon na pagpapasensia an pag-oolayan niato?

² Pero, ipinapahiling kan Biblia na dapat kitang magin mapasensia. Arog kan mga lingkod nin Dios kaidto, kakamtan niato an ipinanuga nin Dios kun kita igwa nin makosog na pagtubod asin mapasensiang maghahalat sa panahon na ootobon na nia an mga panugang iyan. (Basahon an Hebreo 6:11, 12.) Si Jehova mismo mapasensia. Puede nia na kutanang taposon an karatan ano man na oras, alagad hinahalat nia an tamang panahon. (Roma 9:20-24) Taano ta mapasensia siang marhay? Paanong si Jesus nagin marahay na halimbawa nin diosnon na pagpapasensia? Ano an mga pakinabang niato kun kita magigin mas mapasensia arog nin Dios? An simbag sa mga hapot na ini makakatabang sa sato na magin mapasensia asin magkaigwa nin makosog na pagtubod, dawa kun sa hiling niato garo nag-aatraso si Jehova.

 3, 4. (a) Taano ta nagpapasensia si Jehova sa pag-otob kan saiyang katuyohan para sa daga? (b) Ano an ginibo ni Jehova kan magkaigwa nin pagrebelde sa Eden?

³ May marahay na dahilan si Jehova na magpasensia. Totoo na sia an kaharohalangkaweng autoridad sa uniberso noarin man; pero, dahil sa pagrebelde sa Eden, naglataw an mga isyu na may epekto sa bilog na uniberso. Nagin mapasensia si Jehova, huling aram niang kaipuhan nin panahon tanganing lubos na resolberan an mga isyung iyan. Huling igwa sia nin lubos na kabatidan sa mga ginigibo asin iniisip nin mga indibiduwal sa langit asin sa daga, para nanggad sa pinakaikakarahay niato an ginigibo nia.—Heb. 4:13.

⁴ Katuyohan ni Jehova na an daga mapano nin mga aki ni Adan asin Eva. Kan tentaran ni Satanas si Eva dangan sumuway si Adan, dai liningawan nin Dios an saiyang katuyohan. Dai sia nataranta, nagdesisyon nin pabiglabigla, o nagin sobra an reaksion, na nawaran nin paglaom sa mga tawo. Imbes, nag-isip sia nin paagi na otobon an katuyohan nia para sa mga tawo asin sa daga. (Isa. 55:11) Tanganing otobon an katuyohan nia asin ibindikar an saiyang soberaniya, si Jehova nagpupugol na marhay asin nagpapasensia, na rinibong taon pa nganing naghahalat na maotob sa pinakamarahay na paagi an nagkapirang aspekto kan saiyang katuyohan.

 5. An pagpapasensia ni Jehova nagtatao nin oportunidad para sa anong bendisyon?

⁵ May saro pang dahilan kan mapasensiang paghalat ni Jehova—tanganing dakol pang tawo an magkaigwa nin buhay na daing katapusan. Ngonyan mismo, may ginigibo na sia bilang preparasyon sa pagligtas sa “sarong dakulang kadaklan.” (Kap. 7:9, 14; 14:6) Paagi sa paghuhulit niato, inaagda ni Jehova an mga tawo na makanood dapit sa saiyang Kahadean asin matanos na mga pamantayan. An mensahe kan Kahadean an pinakamaogmang bareta para sa mga tawo—iyo, “marahay na bareta” iyan. (Mat. 24:14, An Marahay na Bareta Biblia) An lambang tawo na inaagda ni Jehova nagigin kabtang nin pambilog na kinaban na kongregasyon nin tunay na magkakatood na namomoot sa kun ano an tama. (Juan 6:44-47) Tinatabangan sinda kan satong mamomoton na Dios na kamtan an saiyang pag-oyon. May pinipili na man siang mga tawo na magigin mga miembro kan saiyang langitnon na gobyerno. Pag nasa langit na an mga debotadong ini, tatabangan ninda an makinuyog na mga tawo na magin perpekto asin mabuhay nin daing katapusan. Malinaw nanggad, minsan ngani mapasensia siang naghahalat, may ginigibo si Jehova tanganing otobon an saiyang mga panuga—para sa satong ikakarahay.

 6. (a) Paano si Jehova nagpasensia kan panahon ni Noe? (b) Paano si Jehova nagpapasensia sa ngonyan?

⁶ Nagpapasensia si Jehova dawa grabe na an mga dahilan na puede nia kutanang ikaanggot, siring kan mahihiling niato sa ginibo nia sa karatan bago an Baha. An daga pano kaidto nin imoralidad asin kadahasan, asin ‘nakolgan na gayo an puso’ ni Jehova dahil sa kabikoan nin tawo. (Gen. 6:2-8, An Banal na Biblia) Dai nia totogotan na magpadagos an kamugtakan na iyan, kaya nagdesisyon sia na magpaabot nin baha sa masinuway na mga tawo. Mantang ‘an pakatios nin Dios naghahalat kan mga aldaw ni Noe,’ may ginibo si Jehova bilang preparasyon sa pagligtas ki Noe asin sa pamilya nia. (1 Ped. 3:20) Pag-abot kan tamang panahon, sinabi ni Jehova ki Noe an desisyon na ini asin pinagibo sia nin arka. (Gen. 6:14-22) Dugang pa, si Noe “parahulit nin katanosan,” na sinasabi sa pagtaraed nia an nagdadangadang na paglaglag. (2 Ped. 2:5) Sinabi ni Jesus na an panahon niato kapareho kan panahon ni Noe. Nagdesisyon na si Jehova kun noarin nia tataposon an maraot na sistemang ini. Mayong tawo na nakakaaram kan ‘aldaw asin oras’ kan pag-abot kaiyan. (Mat. 24:36) Sa ngonyan, tinawan kita nin Dios nin gibohon na patanidan an mga tawo asin sabihon sa sainda kun paano sinda maliligtas.

 7. Maluway daw si Jehova sa pag-otob kan mga panuga nia? Ipaliwanag.

⁷ Malinaw nanggad, an pagpapasensia ni Jehova dai nangangahulogan na naghahalat sana siang maglipas an panahon. Dai niato maninigong isipon na an pagpapasensia nia kapareho nin dai pag-intindi o pagigin daing pakiaram! Pero an totoo, puedeng depisil isaisip ini mantang kita naggugurang o nagsasakit sa maraot na sistemang ini. Tibaad madesganar kita o mag-isip na maluway an Dios sa pag-otob kan mga panuga nia. (Heb. 10:36) Nungkang lingawan na igwa sia nin marahay na mga dahilan na magpasensia asin ginagamit nia an natatadang panahon para sa kapakanan kan maimbod niang mga lingkod. (2 Ped. 2:3; 3:9) Estudyare man kun paano si Jesus nagpahiling nin diosnon na pagpapasensia.

 8. Sa anong mga kamugtakan nagpasensia si Jesus?

⁸ Ginigibo ni Jesus an kabotan nin Dios asin gustong-gusto niang gibohon iyan sa laog nin rinibong taon na. Kan magrebelde si Satanas, nagdesisyon si Jehova na magdigdi sa daga an saiyang bugtong na Aki bilang Mesiyas. Isipa an boot sabihon kaiyan para ki Jesus—rinibong taon na mapasensiang paghalat sagkod na uminabot an panahon na iyan. (Basahon an Galacia 4:4.) Dai sia nagparahalat na sana na daing ginigibo; imbes, sibot sia sa ipinapagibo kan saiyang Ama. Kan sa kahurihurihi magdigdi na sia sa daga, aram nia na kaipuhan siang magadan sa kamot ni Satanas, segun sa hula. (Gen. 3:15; Mat. 16:21) Mapasensia siang nagpasakop sa kabotan nin Dios, dawa nangahulogan iyan na maagi sia nin grabeng kolog. Pinakahalangkaw na klase nin kaimbodan an ipinahiling nia. Dai sia nagpokus sa saiyang sadiri asin sa katongdan nia, asin makikinabang kita dian.—Heb. 5:8, 9.

9, 10. (a) Ano an ginigibo ni Jesus mantang mapasensiang naghahalat na humiro si Jehova? (b) Paano niato dapat mansayon an itinalaan na panahon ni Jehova?

⁹ Pagkabuhay liwat ni Jesus, nag-ako sia nin autoridad sa langit asin sa daga. (Mat. 28:18) Ginagamit nia an autoridad na iyan sa pag-otob kan katuyohan ni Jehova segun sa itinalaan Niang panahon. Si Jesus mapasensiang naghalat sa too nin Dios sagkod kan 1914 kan ibugtak an saiyang mga kaiwal bilang tungtongan kan saiyang bitis. (Sal. 110:1, 2; Heb. 10:12, 13) Madali na niang taposon an sistema ni Satanas. Mientras tanto, mapasensiang tinatabangan ni Jesus an mga tawo asin ginigiyahan pasiring sa “tubig nin buhay.”—Kap. 7:17.

¹⁰ Nahihiling mo daw sa halimbawa ni Jesus kun paano mo dapat mansayon an itinalaan na panahon ni Jehova? Mayong duda na gustong-gusto ni Jesus na gibohon an ano man na ipagibo sa saiya kan saiyang Ama; pero, andam siang maghalat kun noarin iyan ipagibo nin Dios. Mantang hinahalat ta an katapusan kan maraot na sistema ni Satanas, kaipuhan niato gabos an diosnon na pagpapasensia. Dai ta pag-enotan an Dios asin dai kita mawaran nin paglaom huli sa pagkadesganar. Ano an puede tang gibohon tanganing magin mas mapasensia arog nin Dios?

11. (a) Taano ta magkakonektar an pagtubod asin pagpapasensia? (b) Taano ta igwa kita nin balidong mga dahilan na magkaigwa nin makosog na pagtubod?

¹¹ Bago si Jesus magdigdi sa daga, an mga propeta asin an iba pang maimbod na lingkod nagtao nin halimbawa kun paano makakatagal na may pagpapasensia dawa an bakong perpektong mga tawo. Magkakonektar na marhay an saindang pagtubod asin an saindang pagpapasensia. (Basahon an Santiago 5:10, 11.) Kun sinda dai talaga naniwala sa sinabi ni Jehova sa sainda—kun mayo sinda nin pagtubod—mapasensia daw kutana sindang mahalat sa kaotoban kan mga panuga nia? Dakol na beses, inatubang ninda an makatatakot o masakit na mga pagbalo sa pagtubod, na may kompiansa na sa kahurihurihi ootobon nin Dios an ipinanuga nia. (Heb. 11:13, 35-40) Igwa nanggad kita nin orog pang dahilan na magkaigwa nin makosog na pagtubod, huling si Jesus naglilingkod na ngonyan bilang ‘Parasangkap kan satong pagtubod.’ (Heb. 12:2) Dakol na hula an inotob nia asin ihinayag nia an mga katuyohan nin Dios sa paagi na nagtatao sa sato nin balidong mga dahilan na magtubod.

12. Ano an magigibo niato tanganing pakosogon an satong pagtubod?

¹² Ano an praktikal na magigibo ta tanganing pakosogon an satong pagtubod asin sa siring tumalubo man an satong pagpapasensia? Importanteng marhay na iaplikar niato an konseho nin Dios. Halimbawa, horophoropa an mga dahilan mo na enoton an Kahadean sa saimong buhay. Puede mo daw dagdagan an paghihingoa mo na iaplikar an pagboot sa Mateo 6:33? Tibaad mangahulogan iyan na dagdagan mo pa an saimong panahon sa ministeryo o liwaton an nagkapirang aspekto kan estilo nin pamumuhay mo. Dai paglingawan kun paano binendisyonan ni Jehova sagkod ngonyan an mga paghihingoa mo. Tibaad tinabangan ka nia na magkaigwa nin bagong tinotokdoan sa Biblia o na mapasaimo an ‘katoninongan nin Dios na minalampas sa gabos na pakasabot.’ (Basahon an Filipos 4:7.) Kaya mantang nagpopokus ka sa mga bendisyon na personal mong inako dahil sa pagsunod sa mga instruksion ni Jehova, lalo mong mapapahalagahan an pagpapasensia.—Sal. 34:8.

13. Paano niato ikakailustrar an proseso nin pagpatalubo sa pagtubod asin pagigin mas mapasensia?

¹³ An prosesong ini kapareho kan normal na siklo nin pagtanom, pagkultibar, asin pag-ani. Kada makaani nin dakol an sarong paraoma, lalo siang nagigin kompiado na magtanom otro. Siempre, kaipuhan niang mapasensiang maghalat sagkod sa aranihan, alagad dai iyan makakapugol sa saiya na magtanom, na tibaad ngani mas dakol pa siang itatanom kisa kan nakaagi. Nagtitiwala siang may aanihon sia. Kaagid kaiyan, mantang inootro niato an siklo nin pag-adal sa konseho ni Jehova, pagsunod dian, asin pag-ani kan mga pakinabang, nagtatalubo an satong tiwala ki Jehova. Nagtatalubo man an pagtubod niato, asin nagigin mas madali an paghalat sa mga bendisyon na aram niatong maabot.—Basahon an Santiago 5:7, 8.

14, 15. Ano an kaipuhan na magin pagmansay niato sa pagsakit nin mga tawo?

¹⁴ Tanganing magin mapasensia, makakatabang man na isipon ta kun paano niato dapat mansayon an kinaban asin an personal niatong kamugtakan. Hingoahon na arogon si Jehova sa pagmansay nia sa mga bagay-bagay. Halimbawa, isipon kun paano nia minamansay an pagsakit nin mga tawo. Haloy na siang nakokolgan huli sa pagsakit nin tawo; alagad, dai sia nadadaog nin pagmondo, na dai na makagibo nin marahay. Sinugo nia an saiyang bugtong na Aki ‘na laglagon an mga gibo kan Diablo’ asin haleon an gabos na danyos na ginibo ni Satanas sa mga tawo. (1 Juan 3:8) An totoo, an pagsakit temporaryo sana, alagad an solusyon nin Dios permanente. Siring man, imbes na madaog kan pagparaisip kan presenteng karatan kan pamamahala ni Satanas o malangkag kun noarin matatapos iyan, magtubod kita sa dai nahihiling na mga bagay na magdadanay sagkod lamang. Dinesisyonan na ni Jehova kun noarin nia mismo tataposon an karatan, asin mahiro sia nin tama nanggad sa panahon.—Isa. 46:13; Nah. 1:9.

¹⁵ Sa masakit na huring mga aldaw kan sistemang ini nin mga bagay, puede kitang mag-agi nin masakit na mga pagbalo sa satong pagtubod. Imbes na maanggot kun kita magin biktima nin kadahasan o kun magsakit an mga namomotan niato, kaipuhan kitang magin desidido na lubos na magtiwala ki Jehova. Bako kitang perpekto, kaya depisil iyan. Pero girumdoma an ginibo ni Jesus na nakasurat sa Mateo 26:39.—Basahon.

16. Durante kan natatadang mga panahon, ano an kaipuhan niatong likayan?

¹⁶ An sarong nakakaolang sa sato na magin mapasensia arog nin Dios iyo an kaisipan na hilingon na sana kun ano an mangyayari. Ano an boot sabihon kaiyan? Bueno, an sarong tawo na dai nagtitiwala na harani na an katapusan tibaad magpoon na maggibo nin sadiri man niang mga plano enkaso dai mangyari an sinabi ni Jehova. Tibaad isipon nia, ‘Hilingon ko na sana kun talagang ootobon ni Jehova an sinabi nia.’ Tibaad hingoahon niang magin sikat sa kinaban na ini, magkaigwa nin pinansial na seguridad imbes na enoton an Kahadean nin Dios, o magsarig sa halangkaw na edukasyon para sa maginhawang buhay ngonyan. Pero an totoo, bako daw na ebidensia iyan nin kawaran nin pagtubod? Girumdoma na sinadol kita ni Pablo na arogon an mga maimbod na nag-ako kan mga panuga ni Jehova “huli sa pagtubod asin pakatios.” (Heb. 6:12) Dai totogotan ni Jehova an maraot na sistemang ini na maghaloy pa nin dai man sana kaipuhan segun sa saiyang katuyohan. (Hab. 2:3) Mientras tanto, dapat niatong likayan an rutina sanang paglilingkod ki Jehova. Imbes, kaipuhan kitang magdanay na mapagbantay asin magin mahigos sa paghuhulit kan maogmang bareta, na ginigikanan nin daing kaagid na kaogmahan dawa ngonyan.—Luc. 21:36.

17, 18. (a) Kun mapadapit sa pagpapasensia, igwa kita ngonyan nin anong oportunidad? (b) Anong mga bendisyon an aakoon niato huli sa pagpapasensia ngonyan?

¹⁷ Baga man pirang bulan pa sana o nagkapirang dekada na kitang naglilingkod sa Dios, gusto niatong paglingkodan sia sagkod lamang. An pagpapasensia nakakatabang sa sato na makatagal sagkod na makamtan niato an kaligtasan, dawa gurano pa kahaloy bago matapos an sistemang ini. Tinatawan kita ngonyan ni Jehova nin oportunidad na patunayan an bilog na pagtitiwala niato sa mga desisyon nia asin—kun kinakaipuhan—na magin andam na tioson an ano man para sa saiyang ngaran. (1 Ped. 4:13, 14) Sinasanay man kita nin Dios tanganing matabangan kitang magin mapasensia, na kaipuhan para sa kaligtasan.—1 Ped. 5:10.

¹⁸ Yaon ki Jesus an gabos na autoridad sa langit asin sa daga. Apuera sa saimo, mayong makakaagaw kan pagprotektar nia sa saimo. (Juan 10:28, 29) Dai kaipuhan na matakot sa mangyayari sa maabot na panahon o sa kagadanan man. An mga mapasensiang nagtatagal sagkod sa katapusan an maliligtas. Kaya dapat na seguradohon niato na dai kita matentaran kan kinaban asin haleon kaiyan an satong pagsarig ki Jehova. Imbes, dapat kitang magin determinado na pakosogon an pagtubod niato asin gamiton sa madonong na paagi an panahon nin pagpapasensia nin Dios.—Mat. 24:13; basahon an 2 Pedro 3:17, 18.