Huling ‘Namidbid Na Nindo an Diyos’—Ano Na an Gigibuhon Nindo?

 1. Taano ta may sinusunod na checklist an sarong piloto bago an pagbiyahe?

BAGO magpalayog nin eroplano, an mga piloto igwa nin sinusunod na checklist, sarong listahan nin labing 30 bagay na kaipuhan inspeksiyunon. Kun dai ninda maingat na susunudon an checklist kada pagbiyahe, pinapadakula ninda an posibilidad na magkaigwa nin grabeng aksidente. Aram mo daw kun anong klaseng piloto an espesyalmenteng tinatawan nin direktiba na sunudon pirmi an gabos na nasa checklist? An eksperyensiyadong piloto mismo! An eksperyensiyadong piloto madali sanang magin kampante asin dai na gibuhon an lambang detalye kan pag-inspeksiyon.

 2. Anong checklist an irinerekomendar sa mga Kristiyano?

² Arog nin piloto na mapag-isip sa kaligtasan, puwede ka man gumamit nin sarong klase nin checklist tanganing masigurado na an saimong pagtubod dai magluya pag kaipuhan mo iyan na marhay. Baga man ika bago pa sanang nabawtismuhan o dakul na taon nang naglilingkod sa Diyos, mahalagang marhay an regular na pag-ebalwar kan rarom kan saimong pagtubod asin debosyon sa Diyos na Jehova. Kun bakong regular asin maingat an paggibo kaiyan, puwede iyan magresulta sa espirituwal na kapahamakan. An Bibliya nagpapatanid sa sato: ‘An naghuhuna na siya nakatindog mag-ingat na dai siya mapukan.’—1 Cor. 10:12.

 3. Ano an kinaipuhan na gibuhon kan mga Kristiyano sa Galacia?

³ Kinaipuhan kan mga Kristiyano sa Galacia na ebalwaron an rarom kan saindang pagtubod asin apresyaron an saindang espirituwal na katalingkasan. Paagi sa atang ni Jesus, binuksan niya an dalan para sa mga nagtutubod sa saiya na mamidbid an Diyos sa pambihirang marhay na paagi—sinda puwedeng magin mga aki nin Diyos! (Gal. 4:9) Tanganing magdanay sa pinakamahalagang relasyon na iyan, kaipuhan kan mga taga Galacia na isikwal an katukduan kan mga nangangapot sa Judaismo, na nag-iinsistir na dapat nindang utubon an Ley ni Moises. An bakong turing mga Hentil sa mga kongregasyon dai nuarin man nagin sakop kan Ley! An mga Judio asin mga Hentil parehong kaipuhan na umuswag sa espirituwal. Kaiba digdi an pag-ako na dai sinda magkakaigwa nin matanos na kamugtakan paagi sa Ley ni Moises.

4, 5. Anong konseho an itinao ni Pablo sa mga taga Galacia, asin paano iyan aplikado sa sato?

⁴ An konseho ni apostol Pablo sa mga taga Galacia ipinasurat na may katuyuhan: tanganing ikalikay an tunay na mga Kristiyano sa arin man na peryodo nin panahon sa pagtalikod sa mahalagang marhay na katotoohan sa Bibliya asin pagbalik sa mga bagay na nasa hudyan. Pinasabngan ni Jehova an apostol na dagkahon bako lang an nasa mga kongregasyon nin Galacia kundi an gabos na nagsasamba sa Saiya na magdanay na marigon.

⁵ Marahay na girumdumon niyato gabos kun paano kita napatalingkas sa espirituwal na pagkauripon asin nagin saro sa Mga Saksi ni Jehova. Tanganing magibo iyan, pag-isipan an duwang hapot na ini: Nagigirumduman mo daw an mga lakdang na ginibo mo tanganing makuwalipikar bilang kandidato sa bawtismo? Nagigirumduman mo daw kun paano mo namidbid an Diyos asin namidbid man niya kaya nakamati ka nin tunay na espirituwal na katalingkasan?

 6. Anong checklist an pag-uulayan ta?

⁶ Sa pundamental, gabos kita may ginibong siyam na lakdang. An mga lakdang na iyan, na arog sa espirituwal na checklist, mahihiling sa kahon na “Mga Lakdang na Minagiya Pasiring sa Bawtismo asin Padagos na Pagtalubo.” An regular na paggirumdom sa siyam na lakdang na iyan mapakusog sa sato tanganing dai na balikan an mga bagay kan kinaban. Arog kan eksperyensiyado alagad maingat na piloto na padagos na ligtas an pagpalayog nin eroplano paagi sa paghiling nguna kan saiyang checklist, ika man matatabangan na magdanay sa maimbod na paglilingkod paagi sa pagrepaso kan satong espirituwal na checklist.

 7. Anong arugan an kaipuhan tang sunudon, asin taano?

⁷ An checklist nin piloto nagpapagirumdom sa saiya na igwa siya nin rutina na dapat niyang maingat na sunudon bago an kada pagbiyahe. Puwede man niyatong regular na inspeksiyunon, o siyasaton, an satong sadiri asin an rutina na sinusunod ta magpuon pa kan kita mabawtismuhan. Si Pablo nagsurat ki Timoteo: ‘An arugan nin mga marahay na tataramon na nadangog mo sako ingatan mo sa pagtubod asin pagkamuot na yaon ki Cristo Jesus.’ (2 Tim. 1:13) An ‘mga marahay na tataramon’ na iyan yaon sa Tataramon nin Diyos. (1 Tim. 6:3) Kun paanong an krokis (sketch) nin sarong pintor nagtatao sa sato nin kabilugan na ladawan, ‘an arugan’ kan katotoohan nagtatao nin pangkagabsan na ideya tanganing masabutan ta asin magibo an mga kahagadan sa sato ni Jehova. Pag-ulayan na niyato an mga lakdang na guminiya sa sato pasiring sa bawtismo tanganing mahiling kun gurano ta kaingat na sinusunod an arugan kan katotoohan.

 8, 9. (a) Taano ta maninigo na padagos kitang tumalubo sa kaaraman asin pagtubod? (b) Iilustrar an halaga kan espirituwal na pagtalubo asin kun taano ta iyan sarong nagpapadagos na proseso.

⁸ An inot sa satong checklist iyo an pangangaipo na magkua nin kaaraman. Sa siring, magkakaigwa kita nin pagtubod. Pero maninigo na padagos kitang tumalubo sa duwang aspektong iyan. (2 Tes. 1:3) Kalabot sa pagtalubo an progresibong serye nin mga pagbabago. An tataramon na “tumalubo” nangangahulugan na magdagdag, magdakula. Huli kaini, pagkabawtismo, kaipuhan tang padagos na pauswagon an satong espirituwalidad tanganing kita dai magin purog, o minapundo na sa pagtalubo.

⁹ An satong espirituwal na pagtalubo puwede tang ikumparar sa pagtalubo nin kahoy. An sarong kahoy puwedeng dumakulang marhay, lalo na kun an mga gamot kaiyan hararom o nakalakop. Halimbawa, an nagkapira sa kahanga-hangang mga sedro sa Lebanon puwedeng magin kasinglangkaw nin edipisyo na may 12 eskalon, asin magkaigwa nin matibay saka hararom na mga gamot asin hawak na minaabot nin 12 metros pag sinukol palibot. (Awit ni Sal. 5:15) Pagkatapos kan inot na kabtang nin pagtalubo kan siring na kahoy, nagtatalubo pa man giraray iyan pero dai nang gayo risa. Kada taon, an hawak kaiyan minadakula asin an mga gamot minararom saka minalakop, kaya nagigin mas masarig na kahoy iyan. Arog man kaiyan an espirituwal na pagtalubo nin sarong Kristiyano. Sa kapinunan kan satong pag-adal sa Bibliya, puwedeng marikas kitang nagtalubo sa espirituwal dangan nabawtismuhan. Naugma an mga nasa kongregasyon na mahiling an satong pag-uswag. Puwedeng nakuwalipikar pa ngani kita na magin payunir o tinawan nin iba pang mga pribilehiyo. Kan suminunod na mga taon, an satong padagos na pagtalubo sa espirituwal tibaad dai nang gayo risa. Minsan siring, kaipuhan ta pa man giraray na tumalubo sa pagtubod asin kaaraman sagkod “sa lubos na pagkatawo, sa pagdakula na kasukol kan kalubusan kan Cristo.” (Efe. 4:13, NW) Sa siring, kita nagtatalubo, sabi ngani, hali sa sarong sadit na supang pasiring sa pagigin maygurang na Kristiyano, sarong masarig asin dakula nang marhay na kahoy.

10. Taano ta kaipuhan an pagtalubo dawa kan maygurang na mga Kristiyano?

¹⁰ Pero an satong pagtalubo dai maninigong pumundo diyan. Kaipuhan na an satong kaaraman humiwas asin an satong pagtubod rumarom. Sa siring, kita nagigin urog pang nakagamot sa daga kan Tataramon nin Diyos. (Tal. 12:3) Sa Kristiyanong kongregasyon, dakul na tugang an nakagibo kaiyan. Halimbawa, sarong tugang na labing tulong dekada nang naglilingkod bilang elder an nagsabi na siya nagtatalubo pa man giraray sa espirituwal. Sinabi niya: “An pag-apresyar ko sa Bibliya ruminarom na marhay. Padagos akong nakakahanap nin bagong mga oportunidad na iaplikar an mga prinsipyo asin ley sa Bibliya sa lain-lain na paagi. Padagos man na nag-uurog an sakong pag-apresyar sa ministeryo.”

11. Paano niyato urog na mamimidbid si Jehova sa pag-agi nin panahon?

¹¹ Kalabot man sa satong pagtalubo an pagigin mas harani ki Jehova bilang satong Katuod asin Ama. Gusto niyang mamatian ta na kita inaako. Gusto niyang maaraman ta na kita namumutan asin ligtas kun paanong an sadit na aki nakakamati na siya namumutan asin ligtas pag kinukugos kan saiyang mamumuton na magurang, o arog kan pagmati ta pag kaibanan ta an sarong tunay asin dayupot na amigo. Arog kan aram mo, an kadayuputan na ini ki Jehova dai nangyayari nin magdamlag sana. Kaipuhan an panahon tanganing mamidbid asin mamutan ta siya. Kaya tanganing urog na mamidbid si Jehova, magin determinado na magtao nin panahon na basahon an saiyang Tataramon aroaldaw. Asin basahon an kada isyu kan An Torrengbantayan asin Awake! saka an iba pang publikasyon na basado sa Bibliya.

12. Ano an kaipuhan tanganing mamidbid kita ni Jehova?

¹² An mga katuod nin Diyos nagtatalubo sa espirituwal paagi sa saindang sinserong mga pamibi asin marahay na kairiba. (Basahon an Malaquias 3:16.) ‘An mga talinga [ni Jehova] nasa saindang pagngayongayo.’ (1 Ped. 3:12) Arog sa mamumuton na magurang, dinadangog ni Jehova an satong mga pakimahirak para sa tabang. Huli kaini, kaipuhan tang ‘magmaigot sa pamimibi.’ (Roma 12:12) Dai kita makakapagdanay na maygurang na Kristiyano kun mayo an tabang nin Diyos. An impluwensiya kan sistemang ini masakiton labanan asin mapangganahan kun kita sana. Kun dai na kita mamimibi nin danay, pinuputol niyato an dagos-dagos na suplay nin kusog na andam asin kayang itao nin Diyos. Kontento ka na daw sa kuwalidad kan saimong pamibi, o nahihiling mo na kaipuhan mo pang pauswagon iyan?—Jer. 16:19.

13. Taano ta mahalagang marhay sa espirituwal na pagtalubo an pakikiasosyar sa mga kapwa Kristiyano?

¹³ Nauugma si Jehova sa gabos na ginigibo siyang “pailihan”; huli kaini, dawa namidbid ta na an Diyos, gusto niyato na padagos na regular na makiasosyar sa kongregasyon kun sain yaon an iba pang nagmimidbid sa saiya. (Nah. 1:7) Huling an kinaban pano nin mga bagay na nakakapangluya sa buot, madunong na makiiba-iba sa satong nakakaparigon na mga tugang. Ano an mga pakinabang? Makakanumpong ka sa kongregasyon nin mga indibiduwal na makakadagka sa saimo sa ‘pagkamuot asin mga marahay na gibo.’ (Heb. 10:24, 25) An pagkaminuruot-muutan na tinukar ni Pablo sa surat niya sa mga Hebreo nangangaipo nin kasararuan nin magturugang, sarong grupo nin mga parasamba na nagkakasararo an kaisipan, sarong kongregasyon. Kalabot sa pagpahiling nin siring na klase nin pagkamuot an pakikiasosyar sa iba pang Kristiyano. Regular na markahan sa saimong checklist an pag-atender asin pagpartisipar sa mga pagtiripon.

14. Taano ta an pagsulsol asin pagbakli sarong nagpapadagos na proseso?

¹⁴ Bago magin Kristiyano, kaipuhan an pagsulsol asin pagbakli, o pagtalikod sa satong mga kasalan. Minsan siring, an pagsulsol sarong nagpapadagos na proseso. Bilang bakong perpektong tawo, igwa pa man giraray kita nin kasalan na nakaabang siring sa nakapurupot na halas na handang mangagat. (Roma 3:9, 10; 6:12-14) Magdanay kitang mapagmaan, na dai pinapasipara an satong mga sala. Nakakaugma ta si Jehova mapasensiya sa sato mantang pinagmamaigutan niyatong labanan an satong mga kaluyahan asin gumibo nin kinakaipuhan na mga pagbabago. (Fil. 2:12; 2 Ped. 3:9) Makakatabang na marhay kun kokontrolon ta an paggamit kan satong panahon asin kusog, na tinatalikdan an makasadiring mga intereses. Sarong sister an nagsurat: “Pinadakula ako sa katotoohan, pero nagdakula ako na an sakong pagmansay ki Jehova lain sa kadaklan. Para sako, dapat siyang katakutan na marhay, asin pagmati ko dai ko nanggad siya nuarin man mapapaugma.” Uminabot an panahon na an sister na ini “biyong nangluya sa espirituwal” huli sa nagkapirang sala na nagibo niya. “Bako man sa dai ko namumutan si Jehova,” an sabi niya, “kundi dai ko talaga siya midbid. Pero, pagkatapos nin udok na pagparapamibi, nagpuon akong magbago.” Sinabi niya pa: “Namatian ko na garo ako aking sadit na kinakabit ni Jehova, na mabuuton niyang tinatabangan tanganing saro-saro kong malampasan an mga ulang, asin ipinapahiling niya sakuya kun ano an kaipuhan kong gibuhon.”

15. Ano an inoobserbaran ni Jesus asin kan saiyang Ama?

¹⁵ Padagos na ‘magsabi sa mga tawo’ kan maugmang bareta. Sinabi iyan kan anghel nin Diyos ki Pedro asin sa iba pang mga apostol pagkatapos nindang makaluwas sa presohan sa milagrosong paagi. (Gui. 5:19-21) Iyo, an pakikikabtang niyato sa ministeryo sa langtad surusemana saro pa sa mga bagay na nasa satong checklist. Aram ni Jesus asin kan saiyang Ama an satong pagtubod sagkod an ginigibo ta sa ministeryo. (Kap. 2:19) Arog kan sinabi kan elder na nasambitan sa inutan, “An buhay ta nakasentro sa ministeryo sa langtad.”

16. Taano ta marahay na hurop-hurupon an satong pagdusay ki Jehova?

¹⁶ Hurop-hurupon an saimong pagdusay. An pinakamahalagang bagay na igwa kita iyo an satong personal na relasyon ki Jehova. Midbid niya an mga sadiri niya. (Basahon an Isaias 44:5.) Mapagngayongayong siyasaton an kuwalidad asin rarom kan saimong relasyon sa saiya. May koneksiyon diyan, girumdumon an mahalagang petsa kan saimong bawtismo. Matatabangan ka man kaini na girumdumon na an saimong bawtismo simbolo kan pinakamahalagang desisyon na ginibo mo kasuarin man.

17. Taano ta kaipuhan an pakatagal tanganing kita makapagdanay na harani ki Jehova?

¹⁷ Sa surat ni Pablo sa mga taga Galacia, idinuon niya na kaipuhan an pakatagal. (Gal. 6:9) Mahalagang marhay man iyan sa sarong Kristiyano ngunyan. Mapapaatubang ka sa mga pagbalo, pero tatabangan ka ni Jehova. Danay na mamibi para sa banal na espiritu. Magiginhawahan ka mantang sinasalidahan niya nin kagayagayahan an kamunduan asin nin katuninungan an kapurisawan. (Mat. 7:7-11) Pag-isipan ini: Kun nagmamakulog si Jehova sa mga gamgam, bako daw na urog nanggad siyang nagmamakulog sa saimo na namumuot sa saiya asin nagdusay kan sadiri sa saiya? (Mat. 10:29-31) Ano man na problema an mapaatubang sa saimo, nungkang umatras, nungkang sumuko. Marahayon nanggad na kayamanan an yaon sa sato huli ta midbid kita ni Jehova!

18. Huling ‘namidbid na nindo an Diyos,’ ano na an gusto nindong gibuhon?

¹⁸ Kun siring, kun ika dai pa sana nahahaloy na nakamidbid sa Diyos asin nabawtismuhan, ano na an gigibuhon mo? Padagos na midbidon si Jehova nin urog pa, asin tumalubo sa espirituwal na pagkamaygurang. Asin kun ika dakul na taon nang bawtisado, ano na an gigibuhon mo? Dapat man na padagos mong pararumon asin pahiwason an saimong kaaraman dapit ki Jehova. Lugod na nungka kitang magin kampante sa satong relasyon sa saiya. Imbes, maninigo na repasuhon niyato gabos an satong espirituwal na checklist sa panapanahon tanganing masigurado na kita padagos na nagtatalubo sa relasyon niyato sa satong mamumuton na Ama, Katuod, asin Diyos—si Jehova.—Basahon an 2 Corinto 13:5, 6.