Apresyaron an Kaimbudan Asin Pagpapatawad ni Jehova

1, 2. (a) Taano ta inaapresyar ta an mga katuod na maimbod asin mapagpatawad? (b) Anong mga hapot an sisimbagon niyato?

PARA sa saimo, ano an tunay na katuod? “Saro na pirming yaon diyan para saimo saka pinapatawad ka kun nakakagibo ka nin sala,” an sabi kan sister na si Ashley. Inaapresyar ta gabos an mga katuod na maimbod asin mapagpatawad. Tinatabangan ninda kita na makamati nin katiwasayan asin na kita namumutan.—Tal. 17:17.

² Si Jehova an pinakamaimbod asin pinakamapagpatawad na Katuod na puwede tang mamidbid. Arog kaini an pagkaladawan sa saiya kan salmista: ‘KAGURANGNAN, ika marahay saka mapagpatawad, mayaman sa danay na pagkamuot [o, maimbod na pagkamuot] sa gabos na nag-aapod saimo.’ (Sal. 86:5, BPV)a Ano an buot sabihon kan pagigin maimbod asin mapagpatawad? Paano ipinapahiling ni Jehova an magayon na mga kuwalidad na iyan? Asin paano ta maaarog an saiyang halimbawa? Matatabangan kita kan mga simbag na mapararom an satong pagkamuot sa satong pinakadayupot na Katuod, si Jehova. Matatabangan man kita kaiyan na mapakusog an satong pakikikatuod sa lambang saro.—1 Juan 4:7, 8.

 3. Ano an buot sabihon kan pagigin maimbod?

³ An kaimbudan sarong kawili-wiling kuwalidad na kalabot an debosyon, integridad, asin solidong pagsuportar. An tawong maimbod bakong paburubago. Imbes, siya mamumuton na minaiba sa sarong tawo (o bagay) asin dai binabayaan an tawo (o bagay) na iyan dawa sa masakit na mga kamugtakan. Iyo, si Jehova an “Saro na maimbod” sa daing kaagid na paagi.—Kap. 16:5, NW.

4, 5. (a) Paano ipinapahiling ni Jehova an kaimbudan? (b) Paano kita mapapakusog kan paghurop-hurop sa mga gibo nin kaimbudan nin Diyos?

⁴ Paano ipinapahiling ni Jehova an kaimbudan? Nungka niyang binabayaan an maimbod na mga nagsasamba sa saiya. An saro sa sainda, si Hading David, nagpatunay na si Jehova maimbod. (Basahon an 2 Samuel 22:26.)b Kan si David nag-aagi nin mga pagbalo, siya may kaimbudan na giniyahan, prinotektaran, asin ilinigtas ni Jehova. (2 Sam. 22:1) Aram ni David na maimbod si Jehova bako lang sa tataramon. Taano ta si Jehova huminiro nin may kaimbudan ki David? Huling si David mismo saro na “maimbod.” Pinapahalagahan ni Jehova an kaimbudan kan mga nagsasamba sa saiya, asin binabalusan niya iyan paagi sa pagigin maimbod sa sainda.—Tal. 2:6-8.

⁵ Puwede kitang mapakusog kun huhurop-hurupon ta an mga gibo nin kaimbudan ni Jehova. “Nakakatabang talaga sako pag binabasa ko an manungod sa kun paano tinabangan ni Jehova si David sa mga panahon nin kasakitan,” an sabi nin sarong maimbod na brother na si Reed. “Dawa kan si David nagdudulag, na nag-iistar sa mga kuweba o sain pa man, siya sinususteniran pirmi ni Jehova. Nakakapakusog nanggad iyan sako! Pinapagirumdom ako kaiyan na dawa ano pa an kamugtakan, dawa garo baga mayo na talagang paglaom an sitwasyon, si Jehova yaon para sako basta danay akong maimbod saiya.” Daing duda na arog man kaiyan an namamatian mo.—Roma 8:38, 39.

 6. Sa ano pang mga paagi ipinapahiling ni Jehova an kaimbudan, asin paano nakikinabang diyan an mga nagsasamba sa saiya?

⁶ Sa ano pang mga paagi ipinapahiling ni Jehova an kaimbudan? Pirmi niyang sinusunod an saiyang mga pamantayan. ‘Dawa sagkod sa pagkagurang nin saro ako iyo man sana,’ an pag-asegurar niya sa sato. (Isa. 46:4, NW) An mga desisyon niya pirming nakabasar sa saiyang dai nagbabagong mga pamantayan sa kun ano an tama asin sala. (Mal. 3:6) Apuwera kaiyan, ipinapahiling ni Jehova an kaimbudan paagi sa pag-utob pirmi sa ipinanuga niya. (Isa. 55:11) Huli kaiyan, nakikinabang sa kaimbudan ni Jehova an gabos na maimbod na nagsasamba sa saiya. Paano man? Kun ginigibo ta an satong pinakamakakaya tanganing sunudon an mga pamantayan ni Jehova, makakapagtiwala kita na uutubon niya an saiyang panuga na bebendisyunan kita.—Isa. 48:17, 18.

 7. Ano an sarong paagi na puwede tang maarog an kaimbudan nin Diyos?

⁷ Paano ta maaarog an kaimbudan ni Jehova? An sarong paagi iyo an paggibo nin marahay sa mga nasa masakit na mga kamugtakan. (Tal. 3:27) Halimbawa, may aram ka daw na kapagtubod na pinangluluyahan nin buot, tibaad huli sa mga problema sa salud, pagkontra nin pamilya, o personal na mga kaluyahan? Taano ta dai magsadiring buot na magtao sa tawong iyan nin ‘mga marahay na tataramon, mga nakakarangang tataramon’? (Zac. 1:13)c Sa paggibo kaiyan, ipinapahiling mo na ika maimbod asin tunay na katuod, saro na ‘labi pa kadayupot sa tugang.’—Tal. 18:24.

 8. Mapadapit sa pag-aguman, paano ta maaarog an kaimbudan ni Jehova?

⁸ Maaarog ta man an kaimbudan ni Jehova paagi sa pagdanay na maimbod sa satong mga namumutan. Halimbawa, kun kita may agom, aram ta na kita dapat na magdanay na maimbod sa satong agom. (Tal. 5:15-18) Kaya, dai ta ginigibo dawa an inot na lakdang na puwedeng sumagkod sa pagsambay. (Mat. 5:28, BPV) Dugang pa, ipinapahiling ta na kita maimbod sa mga kapagtubod kun linilikayan ta an nakakadanyar na tsismis o pagpakaraot, na dai nagpapalakop kan siring na negatibong pag-urulay ni nagdadangog man diyan.—Tal. 12:18.

9, 10. (a) Kiisay kita nangurugnang gustong magdanay na maimbod? (b) Taano ta bako pirming pasil na sunudon an mga pagbuot ni Jehova?

⁹ Urog sa gabos, gusto tang magdanay na maimbod ki Jehova. Paano ta ginigibo iyan? Paagi sa pagmamaigot na mansayon an mga bagay arog kan pagmansay niya diyan—na namumutan an saiyang namumutan asin ikinakaungis an saiyang ikinakaungis—asin pamumuhay kauyon kaiyan. (Basahon an Salmo 97:10.) Mantang urog kitang nagmamaigot na an satong kaisipan asin namamatian magin arog kan ki Jehova, nagigin mas madali sa sato na sunudon an saiyang mga pagbuot.—Sal. 119:104.

¹⁰ Totoo, bako pirming pasil na sunudon an mga pagbuot ni Jehova. Tibaad kaipuhan tang maghinguwang marhay tanganing magdanay na maimbod. Halimbawa, may mga daing agom na Kristiyano na gustong mag-agom, pero dai pa sinda nakakahanap nin angay na maaagom na nagsasamba man ki Jehova. (1 Cor. 7:39) Tibaad an sarong daing agom na sister pirming pigrereto kan saiyang bakong kapagtubod na mga katrabaho sa siisay man na puwedeng magin agom niya. An sister tibaad mamunduon. Pero, determinado siya na mapagdanay an saiyang integridad ki Jehova. Bako daw na inaapresyar ta an arog kaiyan karahay na mga halimbawa nin kaimbudan? Siyertong babalusan ni Jehova an gabos na nagdadanay na maimbod sa saiya sa ibong nin masakit na mga sitwasyon.—Heb. 11:6.

11. Ano an buot sabihon kan pagigin mapagpatawad?

¹¹ An saro sa pinakanakakaakit na mga kuwalidad ni Jehova iyo an saiyang pagigin andam na magpatawad. Ano an buot sabihon kan pagigin mapagpatawad? Sa panginot, kalabot diyan an pagpapatawad sa nagkasala kun igwa nin balidong basehan na gibuhon iyan. Dai iyan nangangahulugan na kinokonsinte o pigninigaran kan mapagpatawad na tawo an nagibong kasalan. Imbes, pinipili niya na dai na maghinanakit. Itinutukdo kan Kasuratan na si Jehova “mapagpatawad” sa mga tunay na nagsusulsol.—Sal. 86:5, BPV.

12. (a) Paano ipinapahiling ni Jehova an pagpapatawad? (b) Ano an buot sabihon kan ‘pagpara’ sa mga kasalan nin saro?

¹² Paano ipinapahiling ni Jehova an pagpapatawad? Pag nagpapatawad si Jehova, ginigibo niya iyan nin ‘bulaos’; an saiyang pagpapatawad lubos asin permanente. (Isa. 55:7) Paano niyato naaraman na si Jehova nagpapatawad nin lubos? Isip-isipon an pag-asegurar sa Guibo 3:19. (Basahon.) Sinadol ni apostol Pedro an mga nagdadangog sa saiya na ‘magsurulsol asin magbarakli.’ Kun an sarong parakasala tunay na nagsusulsol, pinagbabasulan niyang marhay an ginibo niyang sala. Determinado man siya na dai na pag-utruhon an saiyang kasalan. (2 Cor. 7:10, 11) Dugang pa, an tunay na pagsulsol nagpapahiro sa nagkasala na ‘magbakli,’ na binabayaan an saiyang salang gibo asin nagmamaigot na mapaugma an Diyos. Kun an mga nagdadangog ki Pedro magpahiling nin siring na tunay na pagsulsol, ano an puwedeng magin resulta? Sinabi ni Pedro na an saindang kasalan puwedeng “mapara.” Kaya pag nagpapatawad si Jehova, linilinig niya an satuyang rekord, sabi ngani. Siya nagpapatawad nin lubos.—Heb. 10:22; 1 Juan 1:7.

13. Ano an inaasegurar sa sato kan mga tataramon na ‘dai na ako magrurumdom kan saindang kasalan’?

¹³ Paano niyato naaraman na an pagpapatawad ni Jehova permanente? Konsideraron an hula ni Jeremias manungod sa bagong tipan, na ipinakipagtipan sa linahidan na mga Kristiyano, na paagi kaiyan nagin posible na mag-ako nin tunay na kapatawadan an mga nagtutubod sa pantubos. (Basahon an Jeremias 31:34.) Sinabi ni Jehova: ‘Ipapatawad ko an saindang karatan, asin dai na ako magrurumdom kan saindang kasalan.’ Kaya inaasegurar kita ni Jehova na pag siya nagpatawad, dai na siya nuarin man mahiro laban sa satuya huli sa nagibo niyatong mga kasalan. Dai niya iyan inuungkat tanganing akusaran o padusahan kita nin pauruutro. Imbes, pinapatawad ni Jehova an mga kasalan na iyan asin linilingawan iyan—nin permanente.—Roma 4:7, 8.

14. Paano kita mararanga kun huhurop-hurupon ta an pagpapatawad ni Jehova? Magtao nin halimbawa.

¹⁴ Mararanga kita kun huhurop-hurupon niyato an pagpapatawad ni Jehova. Estudyari an sarong halimbawa. Dakul na taon na an nakaagi, sarong sister na aapudon niyatong Elaine an natiwalag. Pakalihis nin pirang taon, nakabalik siya. “Dawa ngani sinabi ko sa sadiri ko asin sa iba na nagtutubod ako na pinatawad ako ni Jehova,” an inadmitir ni Elaine, “pagmati ko pirmi, harayo pa man giraray siya o na an iba mas harani sa saiya saka mas totoo siya sa sainda.” Pero, naranga si Elaine sa pagbasa asin paghurop-hurop sa nagkapirang ilustrasyon na ginamit sa Bibliya tanganing iladawan an pagpapatawad ni Jehova. “Namatian ko an pagkamuot saka pagpadangat sakuya ni Jehova sa paaging dai ko lamang narealisar kaidto,” an sabi pa ni Elaine. Napahiro siyang marhay kan puntong ini: “Kun ipinapatawad ni Jehova an satong mga kasalan, dai niyato kaipuhan na isabuot na dara-dara niyato an mantsa kan mga kasalan na iyan sagkod na kita nabubuhay.”d Si Elaine nagsabi: “Narealisar ko na dai palan ako nagtutubod na lubos akong mapapatawad ni Jehova, saka inisip ko na papasanon ko ini sagkod na ako nabubuhay. Aram ko na nangangaipo iyan nin panahon, pero sakuya nang namamatian na puwede talaga akong magin mas harani ki Jehova, saka pagmati ko may magabat na pasan na nahali sakuya.” Mamumuton asin mapagpatawad nanggad an Diyos na satuyang pinaglilingkudan!—Sal. 103:9.

15. Paano niyato puwedeng arugon an pagpapatawad ni Jehova?

¹⁵ Puwede niyatong arugon an pagpapatawad ni Jehova kun pipilion niyato na magin mapagpatawad sa lambang saro basta may basehan na gibuhon iyan. (Basahon an Lucas 17:3, 4.) Tandaan na pag nagpapatawad si Jehova, piglilingawan niya na an satuyang mga kasalan sa sentido na dai niya na iyan gagamiton laban sa sato. Kun pinapatawad niyato an iba, puwede man niyatong lingawan na an pagkakasala ninda, na dai na iyan iniisip ni inuungkat pa.

16. (a) An pagigin mapagpatawad daw nangangahulugan na kinokonsinte ta an mga pagkakasala o na tinutugutan ta an iba na trataron kita nin bakong makatanusan? Ipaliwanag. (b) Tanganing mapatawad nin Diyos, ano an dapat tang gibuhon?

¹⁶ An pagigin mapagpatawad dai nangangahulugan na kinokonsinte niyato an mga pagkakasala o na tinutugutan niyato an iba na trataron kita nin bakong makatanusan. Bakong arog kaiyan. Imbes, sa panginot nangangahulugan iyan na pinipili niyato na dai na maghinanakit. Pero, mahalagang tandaan na tanganing mapatawad nin Diyos, dapat na arugon niyato an pagpapatawad ni Jehova sa satuyang pagtratar sa iba. (Mat. 6:14, 15) Tutal, napapahiro si Jehova nin empatiya na girumdumon na ‘kita kabo-kabo.’ (Sal. 103:14) Kun siring, bako daw na maninigo kitang mapahiro nanggad nin empatiya na magpahiling nin konsiderasyon sa mga pagkukulang nin iba, na lubos sindang pinapatawad hali sa puso?—Efe. 4:32; Col. 3:13.

17. Ano an makakatabang sa sato kun kita nakulgan nin sarong kapagtubod?

¹⁷ Siyempre, bako pirming pasil na magpatawad. Dawa an ibang linahidan na mga Kristiyano kan inot na siglo minalataw na nasakitan na resolberan an saindang dai pagkakauyon. (Fil. 4:2) Kun kita nakulgan nin sarong kapagtubod, ano an makakatabang sa sato? Isipon an nangyari ki Job. Nakulgan siyang marhay kan an subuot mga katuod niya—si Elifaz, Bildad, asin Zofar—sahutan siya nin daing basehan na mga akusasyon. (Job 10:1; 19:2) Sa kahuri-hurihi, sinagwi ni Jehova an mga nagsasahot na ini nin kaputikan. Sinabihan sinda nin Diyos na magduman ki Job asin magdulot nin atang para sa saindang mga kasalan. (Job 42:7-9) Pero, may ipinagibo man si Jehova ki Job. Ano iyan? Sinabihan ni Jehova si Job na mamibi para sa mga nagsahot sa saiya. Ginibo ni Job an sinabi ni Jehova, asin benendisyunan siya ni Jehova huli sa saiyang pagigin mapagpatawad. (Basahon an Job 42:10, 12, 16, 17.) Ano an manunudan niyato digdi? An sinserong pamibi para sa mga nakakulog sa sato makakatabang satuya na dai na maghinanakit.

18, 19. Paano ta padagos na mapapararom an satong pag-apresyar sa nakakaakit na personalidad ni Jehova?

¹⁸ Siguradong ikinaugma niyato na pag-adalan an manlain-lain na aspekto kan mamumuton na personalidad ni Jehova. Nanudan niyato na siya madaling dulukon, mayong ipinapaurog, bukas-palad, rasonable, maimbod, asin mapagpatawad. Siyempre pa, kadikiton pa lang iyan. Puwede kitang magin magaya-gaya mantang nakakanuod nin urog pa manungod ki Jehova sa panahon na daing katapusan. (Par. 3:11) Minauyon kita ki apostol Pablo, na nagsurat: ‘O an kahararuman kan mga kayamanan nin kadunungan asin nin pagkaaram nin Diyos’—pati na an saiyang pagkamuot asin an anom na kuwalidad na pinag-ulayan niyato.—Roma 11:33.

¹⁹ Lugod na padagos niyato gabos na pararumon an satuyang pag-apresyar sa nakakaakit na personalidad ni Jehova. Magigibo niyato ini kun satuyang pag-aadalan an saiyang mga kuwalidad, huhurop-hurupon iyan, asin aarugon sa sato mismong buhay. (Efe. 5:1) Mantang ginigibo niyato iyan, daing duda na urog kitang mauyon sa salmista na nag-awit: ‘Kun mapadapit sa sakuya, an pagharani ko sa Diyos iyo an karahayan.’—Sal. 73:28.