Paglaom Para sa mga Gadan—An Pagkabuhay Liwat

Nagtutubod ka daw sa pangako kan Bibliya na pagkabuhay liwat?a An pag-isip-isip pa sana na makakaibanan ta giraray an satong mga mahal sa buhay nakakaugma na. Pero realistiko daw iyan? Para masimbag iyan, marahay na pag-ulayan ta an halimbawa kan mga apostol ni Jesu-Cristo.

Makusog an pagtubod kan mga apostol sa pagkabuhay liwat. Taano? Igwa nin kisiyera duwang dahilan. Inot, an paglaom ninda panginot na nakabasar sa katotoohan na ini: Si Jesus mismo binuhay liwat hali sa mga gadan. An mga apostol—saka an “labing limang gatos na tugang na nagkakatiripon”—nahiling an binuhay liwat na si Jesus. (1 Corinto 15:6) Saro pa, an pagkabuhay liwat ni Jesus pinatotoohan asin inako nin dakul, arog kan ipinapahiling sa apat na Ebanghelyo.—Mateo 27:62–28:20; Marcos 16:1-8; Lucas 24:1-53; Juan 20:1–21:25.

Ikaduwa, kisiyera tulong beses na nahiling mismo kan mga apostol na nagbuhay si Jesus nin gadan—an inot sa Nain, dangan sa Capernaum, asin an ultimo sa Betania. (Lucas 7:11-17; 8:49-56; Juan 11:1-44) An ultimong pagbuhay liwat na iyan, na nasambit sa saro sa mga nainot na artikulo, nangyari sa sarong pamilya na dayupot na marhay ki Jesus. Hilingon ta pa kun ano an nangyari.

“An saimong tugang mabubuhay liwat.” Ini an sinabi ni Jesus ki Marta, na an tugang na si Lazaro apat na aldaw nang gadan. Kan primero, dai nasabutan ni Marta an buot sabihon ni Jesus. ‘Aram ko na siya mabubuhay liwat,’ an simbag ni Marta, pero iniisip niya na mangyayari ini sa maabot pang panahon. Isip-isipa na sana an pagkabigla niya kan, pagkatapos sabihon ni Jesus na “Ako iyo an pagkabuhay liwat, asin an buhay,” nahiling niya na binuhay liwat ni Jesus an saiyang tugang!—Juan 11:23-25.

Hain si Lazaro kan apat na aldaw siyang gadan? Mayo siyang sinabi na nagpaparisa na nabuhay siya sa ibang runa. Si Lazaro mayo talaga nin imortal na kalag na nagsakat sa langit. Kan binuhay liwat si Lazaro, dai siya ibinaba giraray ni Jesus digdi sa daga hali sa langit mantang maugmahon na kutana siya sa kaibahan nin Diyos. Kaya hain si Lazaro sa apat na aldaw na idto? An totoo, siya nagtuturog sa lulubngan.—Parahulit 9:5, 10.

Tandaan na pigkumparar ni Jesus an kagadanan sa pagturog kun sain an saro puwedeng pukawon paagi sa pagbuhay liwat. An Bibliya nagsasabi: ‘“An satong katuod na si Lazaro nagtuturog; tara ako maduman tanganing pukawon siya.” An mga disipulo ngani nagsarabi saiya: “Kagurangnan, kun siya nagtuturog, siya mauumayan.” Si Jesus nagtaram dapit sa saiyang pagkagadan, alagad sinda naghuruna-huna na siya nagtaram dapit sa pagpahingalo sa pagkaturog. Dangan si Jesus nagsabi sainda nin sayod, “Si Lazaro gadan.”’ (Juan 11:11-14) Kan si Lazaro binuhay liwat, ibinalik ni Jesus an saiyang buhay asin nakaibanan niya giraray an saiyang pamilya. Magayunon nanggad na regalo an itinao ni Jesus sa pamilyang iyan!

An mga pagbuhay liwat na ginibo ni Jesus digdi sa daga halimbawa sana kan mga gigibuhon niya sa maabot bilang Hadi kan Kahadian nin Diyos.b Pag namahala na siya sa bilog na daga, ibabalik ni Jesus an buhay kan mga nagtuturog sa pangkagabsan na lulubngan nin katawuhan. Iyan an dahilan kaya sinabi niya: “Ako iyo an pagkabuhay liwat.” Isip-isipa an kaugmahan na mamamatian mo pag nahiling mo na giraray an mga mahal mo sa buhay! Isip-isipon man an kaugmahan na mamamatian kan mga binuhay liwat!—Lucas 8:56.

Sinabi ni Jesus ki Marta: ‘An minatubod sa sako, minsan magadan, mabubuhay; asin an siisay man na nabubuhay asin minatubod sa sako, dai nanggad magagadan.’ (Juan 11:25, 26) An mga bubuhayon liwat ni Jesus sa laog kan sangribong taon na paghadi niya may paglaom na mabuhay nin daing katapusan—basta padagos sindang nagtutubod sa saiya.

Pagkasabi kan magagayon na bagay na iyan manungod sa pagkabuhay liwat, nagtao si Jesus ki Marta nin nakakapukaw sa isip na hapot: ‘“Minatubod ka kaini?” Si Marta nagsabi saiya: “Oho, Kagurangnan, ako minatubod na ika iyo an Cristo, an Aki nin Diyos.”’ (Juan 11:26, 27) Kun ika hahaputon, gusto mo daw na magkaigwa nin makusog na pagtubod sa paglaom na pagkabuhay liwat arog ki Marta? An inot na gigibuhon iyo na magkua nin kaaraman manungod sa katuyuhan nin Diyos para sa katawuhan. (Juan 17:3; 1 Timoteo 2:4) Makakatabang iyan sa saimo na magkaigwa nin pagtubod. Taano ta dai haputon an Mga Saksi ni Jehova kun ano an itinutukdo kan Bibliya sa bagay na ini? Mauugma sindang ipaliwanag sa saimo an magayunon na paglaom na pagkabuhay liwat.