Siisay an Nanginginot Ngunyan sa Banwaan nin Diyos?

1, 2. Pagkasakat ni Jesus sa langit, ano an tibaad naisip kan saiyang mga apostol?

NASA Bukid nin mga Olibo an mga apostol asin nakatingag sinda sa langit. Nahiling pa sana ninda si Jesus, an saindang kagurangnan saka amigo, na nag-itaas sa langit sagkod na malipudan nin panganuron. (Gibo 1:9, 10) Sa laog nin mga duwang taon, si Jesus an nagtukdo, nagpakusog, asin nanginot sa sainda. Ano na an gigibuhon ninda ngunyan na mayo na siya?

² Tinawan ni Jesus an saiyang mga parasunod nin sarong asignasyon: “Kamo magigin mga saksi ko sa Jerusalem, sa bilog na Judea saka Samaria, asin sa pinakaharayong parte kan daga.” (Gibo 1:8) Paano ninda magigibo an asignasyon na iyan? Nanuga si Jesus sa sainda na madali na sindang mag-ako nin banal na espiritu. (Gibo 1:5) Pero huling pambilog na kinaban an gigibuhon nindang paghuhulit, kaipuhan na may maggiya asin mag-organisar sa sainda. Kan suanoy na mga panahon, naggamit si Jehova nin nahihiling na mga representante para giyahan asin organisaron an saiyang banwaan. Kaya, tibaad naisip kan mga apostol, ‘Manombra daw si Jehova nin bagong lider?’

 3. (a) Pagkasakat ni Jesus sa langit, anong mahalagang desisyon an ginibo kan maimbod na mga apostol? (b) Ano an pag-uulayan niyato sa artikulong ini?

³ Mayo pang duwang semana pagkasakat ni Jesus sa langit, kinonsulta kan mga disipulo ni Jesus an Kasuratan, namibi na giyahan sinda nin Diyos, dangan pinili ninda si Matias na magin kasalida ni Judas Iscariote bilang an ika-12 apostol. (Gibo 1:15-26) Taano ta mahalagang marhay para sa sainda asin ki Jehova an pagpiling ini? Narealisar kan mga disipulo na 12 talaga an dapat na magin bilang kan mga apostol.a Pinili ni Jesus an saiyang mga apostol bako sanang para may makaiba siya sa saiyang ministeryo. Pinili niya sinda para sa sarong mahalagang marhay na papel sa banwaan nin Diyos. Ano an papel na iyan, asin paano ni Jehova ginamit si Jesus para andamon sinda sa magigin papel nindang iyan? Sa banwaan nin Diyos sa ngunyan, anong areglo an kaagid kaiyan? Asin paano niyato ‘iisipon idtong mga nanginginot’ sa sato, lalo na idtong kabilang sa “maimbod asin mapagmansay na uripon”?—Heb. 13:7; Mat. 24:45.

 4. Ano an nagin papel kan mga apostol asin kan iba pang kamagurangan sa Jerusalem kan inot na siglo?

⁴ Puon kan Pentecostes 33 C.E., an mga apostol na an nanginot sa Kristiyanong kongregasyon. Kan panahon na idto, “tuminindog si Pedro kaiba an Onse” asin itinukdo an nagliligtas-buhay na mga katotoohan sa dakul na Judio saka proselito na yaon duman. (Gibo 2:14, 15) Dakul sa sainda an nagin Kristiyano. Pagkatapos kaiyan, an bagong mga Kristiyanong ini “nagpadagos . . . sa paghimati sa itinutukdo kan mga apostol.” (Gibo 2:42) An mga apostol an nag-aasikaso sa pondo kan kongregasyon. (Gibo 4:34, 35) Inaasikaso man ninda an espirituwal na mga pangangaipo kan banwaan nin Diyos, na sinasabi: “Kami mapokus sa pagpamibi asin pagtutukdo kan tataramon nin Diyos.” (Gibo 6:4) Nagsugo man sinda nin eksperyensiyadong mga Kristiyano tanganing maghulit sa bagong mga teritoryo. (Gibo 8:14, 15) Pag-abot nin panahon, kaibanan na kan mga apostol an iba pang linahidan na kamagurangan sa pangangataman sa mga kongregasyon. Bilang namamahalang grupo, sinda an nagtatao nin mga instruksiyon sa gabos na kongregasyon.—Gibo 15:2.

5, 6. (a) Paano tinabangan kan banal na espiritu nin Diyos an namamahalang grupo? (Hilingon an ritrato sa kapinunan kan artikulo.) (b) Paano tinabangan kan mga anghel an namamahalang grupo? (c) Paano giniyahan kan Tataramon nin Diyos an namamahalang grupo?

⁵ Aram kan mga Kristiyano kan inot na siglo na ginigiyahan ni Jehova an namamahalang grupo paagi kan saindang Lider na si Jesus. Paano ninda nasisigurado iyan? Inot, an namamahalang grupo tinabangan kan banal na espiritu nin Diyos. (Juan 16:13) Nag-ako nin banal na espiritu an gabos na linahidan na Kristiyano, pero partikular nang tinabangan kaiyan an mga apostol asin an iba pang kamagurangan sa Jerusalem tanganing mautob ninda an saindang papel bilang mga paraataman. Halimbawa, kan 49 C.E., giniyahan kan banal na espiritu an namamahalang grupo sa paggibo nin desisyon manungod sa isyu nin pagturi. Nagsunod an mga kongregasyon sa saindang nagin desisyon. Bilang resulta, ‘padagos na napakusog an pagtubod kan mga kongregasyon asin padagos na nagdakul an bilang kan mga tugang aroaldaw.’ (Gibo 16:4, 5) Sa ipinaabot na surat dapit sa nagin desisyon ninda, malinaw man na mahihiling sa namamahalang grupo an mga aspekto kan bunga kan banal na espiritu nin Diyos, arog kan pagkamuot asin pagtubod.—Gibo 15:11, 25-29; Gal. 5:22, 23.

⁶ Ikaduwa, tinabangan kan mga anghel an namamahalang grupo. Bago mabawtismuhan si Cornelio bilang an inot na bakong turing Kristiyanong Hentil, ininstruksiyunan siya nin sarong anghel na magsugo nin mga tawuhan tanganing ipaapod si apostol Pedro. Pagkatapos na mahulitan ni Pedro si Cornelio asin an mga kairiba kaini sa harong, ibinubo sa mga ini an banal na espiritu, dawa an mga lalaki bakong turi. Kan maaraman iyan kan mga apostol saka kan iba pang Kristiyanong tugang, sinunod ninda an kabutan nin Diyos asin inako sa Kristiyanong kongregasyon an mga bakong turing Hentil. (Gibo 11:13-18) Dugang pa, aktibong sinuportaran asin pinarikas kan mga anghel an paghuhulit na pinanginginutan kan namamahalang grupo. (Gibo 5:19, 20) Ikatulo, giniyahan kan Tataramon nin Diyos an namamahalang grupo. May rineresolberan man na doktrinal na mga isyu o nagtatao nin instruksiyon sa mga kongregasyon, nagpagiya sa Kasuratan an mga lalaking idto na linahidan nin banal na espiritu.—Gibo 1:20-22; 15:15-20.

 7. Taano ta masasabi niyato na si Jesus an nanginginot sa inot na mga Kristiyano?

⁷ Dawa ngani an namamahalang grupo an nanginginot sa kongregasyon kan inot na siglo, minimidbid kan lambang miyembro na an saindang Lider iyo si Jesus. Taano ta nasabi niyato iyan? Sinabi ni apostol Pablo: “Itinao niya [ni Cristo] an nagkapira bilang mga apostol.” Sinabi pa niya: “Paagi sa . . . pagpahiling nin pagkamuot, magtalubo kita sa gabos na bagay bilang pag-arog sa Cristo na iyo an payo.” (Efe. 4:11, 15) Imbes na magpaapod sa pangaran nin sarong apostol, “paagi sa paggiya nin Diyos, . . . inapod na mga Kristiyano an mga disipulo.” (Gibo 11:26) Totoo na minidbid ni Pablo an kahalagahan kan ‘pangangapot sa mga tradisyon’ o mga kaugalian na basado sa Kasuratan, na itinukdo kan mga apostol asin kan iba pang mga lalaki na nanginot kaidto. Pero, sinabi pa niya: “Alagad buot kong maaraman nindo na an payo kan lambang lalaki [kaiba na an lambang miyembro kan namamahalang grupo] iyo an Cristo; . . . asin an payo kan Cristo iyo an Diyos.” (1 Cor. 11:2, 3) Iyo, an dai nahihiling asin an pinamuraway na si Cristo Jesus an nanginginot sa kongregasyon, sa irarom kan paggiya kan saiyang Payo, an Diyos na Jehova.

8, 9. Ano an nagin mahalagang papel ni Brother Russell puon kan 1870?

⁸ Puon kan 1870, hininguwa ni Charles Taze Russell asin kan nagkapira niyang amigo na iestablisar giraray an tunay na pagsamba. Para maipalakop an katotoohan sa Bibliya sa manlain-lain na lengguwahe, legal na ipinarehistro kan 1884 an Zion’s Watch Tower Tract Society, kun sain si Brother Russell an presidente.b Maingat niyang pinag-adalan an Bibliya, asin daing takot na ibinuyagyag an palsong mga doktrina, arog kan Trinidad saka imortalidad kan kalag. Nasabutan niya na dai mahihiling an pagbabalik ni Jesus asin na “an itinalaan na mga panahon para sa mga nasyon” matatapos sa taon 1914. (Luc. 21:24) Ginamit ni Brother Russell an gabos niyang panahon, kusog, asin kuwarta tanganing itukdo sa iba an mga katotoohan na ini. Malinaw na ginamit ni Jehova si Brother Russell tanganing panginutan an kongregasyon sa mahalagang marhay na panahon na idto.

⁹ Habo ni Brother Russell nin ano man na espesyal na atensiyon hali sa mga tawo. Kan 1896, siya nagsurat: “Habo mi nin ano man na pag-umaw, o onra, para sa samuyang sadiri o sa mga isinusurat mi; ni gusto mi man na apudon kaming Reberendo o Rabbi. Habo mi man na an ano man na grupo apudon sa pangaran mi.” Kan huri, sinabi niya: “An gibuhon na ini bakong gibuhon nin tawo.”

10. (a) Kasuarin ninombrahan ni Jesus “an maimbod asin mapagmansay na uripon”? (b) Ipaliwanag kun paano nagin malinaw na magkalain an Namamahalang Grupo asin an Watch Tower Society.

¹⁰ Kan 1919, tulong taon pagkagadan ni Brother Russell, ninombrahan ni Jesus “an maimbod asin mapagmansay na uripon.” Taano? Para magtao sa saiyang mga lingkod sa harong nin “kakanon sa tamang panahon.” (Mat. 24:45) Dawa kan panahon na idto, may sarong sadit na grupo na nin linahidan na mga brother sa headquarters sa Brooklyn, New York, na nagpepreparar asin nagdidistribwir nin espirituwal na mga kakanon sa mga parasunod ni Jesus. Kan dekada nin 1940, pinunan na gamiton sa satong mga publikasyon an ekspresyon na “namamahalang grupo.” An pakasabot kan mga tugang kan panahon na iyan, an namamahalang grupo sa pangkagabsan nanunungod sa mga direktor kan Watch Tower Bible and Tract Society. Pero kan 1971, nagin malinaw na magkalain an Namamahalang Grupo asin an Watch Tower Society—sarong legal na kasangkapan sana imbes na sarong maka-Kasuratan na areglo. Kaya puon kaidto, puwede nang magin miyembro kan Namamahalang Grupo an linahidan na mga brother dawa bako sindang direktor kan Sosyedad. Sa nakalihis pa sanang mga taon, may responsableng mga brother na kabilang sa “ibang mga karnero” na nagin mga direktor kan Sosyedad asin kan iba pang mga korporasyon na ginagamit kan banwaan nin Diyos. Huli kaiyan, nakapagpokus an Namamahalang Grupo sa pagtao nin espirituwal na pagtutukdo asin paggiya. (Juan 10:16; Gibo 6:4) Ipinaliwanag kan Hulyo 15, 2013 na isyu kan An Torrengbantayan na “an maimbod asin mapagmansay na uripon” iyo an sarong sadit na grupo nin linahidan na mga brother na minakompuwesto sa Namamahalang Grupo..

11. Paano nagpupunsiyonar an Namamahalang Grupo?

¹¹ An Namamahalang Grupo naggigibo nin mahahalagang desisyon bilang sarong grupo. Paano ninda ginigibo iyan? Nagmimiting surusemana an mga miyembro kaiyan. Nakakatabang an miting na iyan para magkaigwa sinda nin bukas na komunikasyon asin magdanay na nagkakasararo. (Tal. 20:18) Kada taon, turnuhan sinda sa pagtsirman sa mga miting na iyan huling mayo sindang ibinibilang na mas nakakalangkaw sa ibang miyembro. (1 Ped. 5:1) Arog man kaiyan an areglo sa kun siisay an manginginot sa kada saro sa anom na komite kan Namamahalang Grupo. Dai minamansay nin siisay man na miyembro kan Namamahalang Grupo an saiyang sadiri bilang lider kan saiyang mga kapagtubod. Kundi, ibinibilang niya an saiyang sadiri na saro sa “mga lingkod sa harong,” na pinakakakan asin nasa panginginot kan maimbod na uripon.

12. May koneksiyon sa pagigin dai pinasabngan asin bakong perpekto kan Namamahalang Grupo, anong mga hapot an sisimbagon niyato?

¹² An Namamahalang Grupo dai pinapasabngan asin bakong perpekto. Kaya puwede iyan mapasala sa pagpaliwanag sa mga katukduan sa Bibliya, o sa pagtao nin paggiya sa organisasyon. Sa katunayan, iiniba sa Watch Tower Publications Index an tema na “Beliefs Clarified,” na diyan nakalista an mga nagin pagbabago sa satong pakasabot sa Bibliya puon 1870.c Mayong sinabi si Jesus na perpektong espirituwal na pagkakan an ipepreparar kan saiyang maimbod na uripon. Kaya paano niyato masisimbag an hapot ni Jesus na: “Siisay man nanggad an maimbod asin mapagmansay na uripon?” (Mat. 24:45) Ano an nagpapatunay na an Namamahalang Grupo iyo an maimbod na uripon? Pag-ulayan niyato an tulong bagay na nagtabang kaidto sa namamahalang grupo kan inot na siglo.

13. Paano tinabangan kan banal na espiritu nin Diyos an Namamahalang Grupo?

¹³ Patunay na tinatabangan kan banal na espiritu nin Diyos. Tinabangan kan banal na espiritu nin Diyos an Namamahalang Grupo na masabutan an mga katotoohan sa Bibliya na kaidto dai pa nasasabutan. Halimbawa, pag-isipan an sinambit sa sinundan na parapo dapit sa mga paglilinaw sa satong pakasabot sa Bibliya. Kun sa sadiri sanang kakayahan, siguradong mayong tawo na makakadiskubre asin makakapaliwanag kan ‘harararom na bagay na ini nin Diyos’! (Basahon an 1 Corinto 2:10.) Namamatian kan Namamahalang Grupo an arog kan namatian ni apostol Pablo kan ini magsurat: “An mga bagay na ini pinag-uulayan man niyato, bako paagi sa mga tataramon na itinukdo nin kadunungan nin tawo, kundi paagi sa mga tataramon na itinukdo kan espiritu.” (1 Cor. 2:13) Pagkatapos nin dakul na siglo nin apostasya asin espirituwal na kadikluman, may maiisip pa daw kitang ibang dahilan apuwera sa tabang kan banal na espiritu kun kaya nagkaigwa nin marikas na pag-uswag sa satong pakasabot sa Bibliya puon 1919?

14. Uyon sa Kapahayagan 14:6, 7, paano tinatabangan kan mga anghel an mga lingkod nin Diyos ngunyan?

¹⁴ Patunay na tinatabangan kan mga anghel. Dakulaon nanggad an gibuhon kan Namamahalang Grupo ngunyan sa panginginot sa labing walong milyon na ebanghelisador sa gibuhon na paghuhulit sa bilog na kinaban. Taano ta nagin mapangganang marhay an gibuhon na ini? An sarong dahilan iyo na nagtatabang an mga anghel. (Basahon an Kapahayagan 14:6, 7.) Sa dakul na pagkakataon, nadudumanan nin mga parahayag an mga tawong katatapos pa sanang mamibi na tabangan sinda nin Diyos!d Padagos man na nag-uuswag an gibuhon na paghuhulit asin paggibo nin mga disipulo sa ibong nin grabeng pagtumang sa nagkapirang kadagaan. Nagin posible sana iyan huli sa tabang kan mga anghel.

15. Ano an pagkakalain kan Namamahalang Grupo asin kan mga lider kan Kakristiyanuhan? Magtao nin halimbawa.

¹⁵ Nagsasarig sa Tataramon nin Diyos. (Basahon an Juan 17:17.) Pag-isipan an nangyari kan 1973. Sa isyu kan The Watchtower na Hunyo 1, naglataw an hapot na: ‘Makukuwalipikar daw sa bawtismo an mga indibidwal na dai pa nagpupundo sa paninigarilyo?’ Ini an nagin simbag: “Bako sindang kuwalipikado, uyon sa maka-Kasuratan na mga patunay.” Pagkatapos na sambiton an nagkapirang teksto, ipinaliwanag kan The Watchtower kun taano ta dapat na itiwalag an siisay man na dai mapundo sa paninigarilyo. (1 Cor. 5:7; 2 Cor. 7:1) Sinabi kaiyan: “An desisyon na ini dai ginibo na mayong basehan, o tanganing diktahan an mga tawo kan dapat nindang gibuhon. An pagigin istrikto kaini talagang hali sa Diyos, na ipinapahayag an saiyang sadiri paagi kan saiyang nasusurat na Tataramon.” Igwa pa daw nin ibang relihiyon na andam na manarig nin lubos sa Tataramon nin Diyos, dawa kun an resulta kaiyan magpapadipisil para sa ibang miyembro kaiyan? Sa Estados Unidos, sarong bagong libro manungod sa relihiyon an nagsabi: “Parating liniliwat kan mga lider kan Kakristiyanuhan an saindang mga katukduan tanganing iuyon sa mga paniniwala saka opinyon kan mga miyembro ninda asin kan sosyedad para makua an suporta kan mga ini.” Huling nagpapagiya an Namamahalang Grupo sa Tataramon nin Diyos imbes na sa opinyon kan kadaklan kun naggigibo nin desisyon, bako daw na patunay iyan na si Jehova talaga an naggigiya sa banwaan nin Diyos ngunyan?

16. Ano an sarong paagi na maipapahiling niyato na iniisip ta an Namamahalang Grupo?

¹⁶ Basahon an Hebreo 13:7. An tataramon na itrinadusir na “isipon” puwede man na itradusir na “sambiton.” Kaya, an sarong paagi para ‘isipon idtong mga nanginginot’ sa sato iyo an pagsambit sa Namamahalang Grupo sa satong mga pamibi. (Efe. 6:18) Isipa na sana an saindang paninimbagan sa pagtao nin espirituwal na kakanon, sa panginginot sa gibuhon na paghuhulit sa bilog na kinaban, asin sa pag-asikaso sa mga donasyon. Kaipuhan nanggad na pirmi niyato sindang iiba sa satong mga pamibi!

17, 18. (a) Paano niyato maipapahiling na nagsusunod kita sa itinataong mga paggiya kan Namamahalang Grupo? (b) Paano an satong paghuhulit nakakasuportar sa maimbod na uripon asin ki Jesus?

¹⁷ Siyempre, bako sanang paagi sa tataramon maipapahiling niyato na iniisip ta an Namamahalang Grupo, kundi paagi man sa pagsunod sa mga itinataong paggiya kaiyan. An Namamahalang Grupo nagtatao nin mga instruksiyon paagi sa satong mga publikasyon saka mga pagtiripon, asembleya, asin mga kumbensiyon. Nagnonombra man iyan nin mga paraataman nin sirkito, na iyo man an nagnonombra nin mga elder sa kongregasyon. Maipapahiling kan mga paraataman nin sirkito asin kan mga elder na iniisip ninda an Namamahalang Grupo kun maingat nindang susunudon an mga paggiya na itinatao sa sainda. Maipapahiling man niyato gabos na iginagalang ta an satong Lider, si Jesus, kun magigin makinuyog kita asin mapagpasakop sa mga lalaking ginagamit niya tanganing giyahan kita.—Heb. 13:17.

¹⁸ An saro pang paagi na maipapahiling niyato na iniisip ta an Namamahalang Grupo iyo an pagigin maigot niyato sa gibuhon na paghuhulit. Sinadol ni Pablo an mga Kristiyano na arugon an pagtubod kan mga nanginginot sa sainda. Nagpahiling nin pambihirang pagtubod an maimbod na uripon paagi sa maigot na paghuhulit kan maugmang bareta asin pagpalakop kaiyan. Saro ka daw sa ibang mga karnero na nagsusuportar sa mga linahidan sa mahalagang marhay na gibuhon na ini? Siguradong mauugma kang marhay kun an saimong Lider na si Jesus magsabi sa saimo: “Kun paanong ginibo [mo] iyan sa saro sa mga pinakahababa an kamugtakan sa mga tugang kong ini, ginibo [mo] iyan sa sakuya.”—Mat. 25:34-40.

19. Taano ta determinado kang sunudon an satong Lider na si Jesus?

¹⁹ Dawa kan nagbalik na si Jesus sa langit, dai niya pinabayaan an saiyang mga parasunod. (Mat. 28:20) Naeksperyensiyahan niya mismo na tinabangan siyang marhay kan banal na espiritu nin Diyos, kan mga anghel, asin kan Tataramon nin Diyos na manginot kan siya nasa daga. Kaya itinatao niya man ngunyan an tabang na iyan sa maimbod na uripon. Bilang linahidan na mga Kristiyano, an mga miyembro kan uripon na iyan “padagos na nagsusunod sa Kordero sain man siya magduman.” (Kap. 14:4) Kaya, an pagsunod sa paggiya kan maimbod na uripon, pagsunod sa satong Lider na si Jesus. Dai na mahahaloy, gigiyahan niya kita pasiring sa buhay na daing katapusan. (Kap. 7:14-17) Mayo nanggad nin lider na tawo na makakapanuga nin arog kaiyan!