Magpahiling nin Interes Asin Pagmalasakit

 1. Anong nakakarangang katotoohan manungod ki Jehova an ihinahayag kan Bibliya?

GUSTO mo daw na husgaran ka nin mga tawo base sa kulor kan saimong kublit, sa itsura mo, o sa timbang mo? Posibleng marhay na dai. Kaya nakakaranga nanggad na maaraman na dai kita hinuhusgaran ni Jehova base sa nahihiling nin tawo! Halimbawa, kan nahiling ni Samuel an mga aking lalaki ni Jesse, dai niya nahiling an nahiling ni Jehova. Sinabi ni Jehova ki Samuel na saro sa mga aking lalaki ni Jesse an magigin hadi kan Israel. Pero siisay? Kan mahiling ni Samuel an panganay na lalaki ni Jesse na si Eliab, sinabi niya: “Siguradong an sarong ini an pinili ni Jehova.” Base sa itsura ni Eliab, bagay siyang magin hadi. “Pero sinabi ni Jehova ki Samuel: ‘Dai ka maghiling sa saiyang itsura asin kun gurano siya kalangkaw, ta bako siya an pinili ko.’” An leksiyon? Sinabi pa ni Jehova: “An tawo naghihiling sa kun ano an nahihiling kan mga mata, alagad si Jehova naghihiling sa kun ano an nasa puso.”—1 Sam. 16:1, 6, 7, NWT.

 2. Kauyon kan Juan 7:24, taano ta dai niyato dapat husgaran an sarong tawo base sa saiyang itsura? Iilustrar.

² Huling bako kitang perpekto, gabos kita may tendensiya na husgaran an iba base sa saindang pangluwas na itsura. (Basahon an Juan 7:24.) Pero dikit sana an maaaraman niyato manungod sa sarong tawo kun an nahihiling ta sana an pagbabasehan ta. Bilang pag-ilustrar, dawa pa matibay asin eksperyensiyado an sarong doktor, dikit sana an maaaraman niya manungod sa sarong pasyente kun pagmamasdan niya lang ini. Dapat na magdangog siyang marhay tanganing maaraman niya an medikal na rekord kan pasyente, an kamugtakan kan emosyon kaini, o an ano man na sintomas na igwa ini. Tibaad ngani ipa-X-ray pa niya an pasyente para mahiling an laog kan hawak kaini. Ta kun dai, tibaad sala an maitao niyang paagi nin pagbulong. Sa kaagid na paagi, dai ta lubos na masasabutan an satong mga tugang kun pangluwas na itsura sana an hihilingon niyato. Dapat na hinguwahon niyatong hilingon bako an pangluwas kundi an panglaog na pagkatawo. Siyempre dai kita nakakabasa nin puso, kaya dai ta talaga lubos na masasabutan an iba arog kan kayang gibuhon ni Jehova. Pero puwede tang gibuhon an pinakamakakaya niyato tanganing maarog siya. Paano?

 3. Paano an mga istorya sa Bibliya na pag-uulayan sa artikulong ini makakatabang sa sato na maarog si Jehova?

³ Paano tinatratar ni Jehova an saiyang mga parasamba? Dinadangog niya sinda. Kinokonsiderar niya an saindang mga inagihan asin sitwasyon. Asin nagpapahiling siya nin pagmalasakit sa sainda. Mantang pinag-uulayan ta kun paano niya ginibo iyan ki Jonas, Elias, Hagar, asin Lot, hilingon niyato kun paano ta maaarog si Jehova sa pagtratar niyato sa satong mga tugang.

 4. Taano ta tibaad magin negatibo an pagmansay niyato ki Jonas?

⁴ Huling dai ta aram an gabos na detalye, tibaad husgaran niyato si Jonas na bako siyang maaasahan, o bakong maimbod pa ngani. Ipinagbuot mismo saiya ni Jehova na ipahayag an sarong mensahe nin paghukom sa Nineve. Pero imbes na magsunod, nagsakay si Jonas sa sarong barko na pasiring sa ibong na direksiyon, “tanganing dumulag ki Jehova.” (Jon. 1:1-3, NWT) Kun ika, tatawan mo daw giraray nin tsansa si Jonas na gibuhon an asignasyon na iyan? Posibleng dai na. Pero para ki Jehova, maninigong tawan giraray nin tsansa si Jonas.—Jon. 3:1, 2.

 5. Ano an nanudan mo sa mga tataramon ni Jonas na nasa Jonas 2:1, 2, 9?

⁵ Mahihiling sa pamibi ni Jonas kun ano talaga an panglaog na pagkatawo niya. (Basahon an Jonas 2:1, 2, 9.) An pamibing iyan—na siguradong saro sana sa dakul na pamibi ni Jonas—nakakatabang sa sato na hilingon siya bako bilang tawong nagdulag sa asignasyon. Ipinapahiling kan saiyang mga tataramon na siya mapakumbaba, mapagpasalamat, asin determinadong magsunod ki Jehova. Kaya bakong makangangalas na dai nagpokus si Jehova sa mga salang nagibo ni Jonas. Imbes, sinimbag niya an pamibi kaini, asin padagos na ginamit bilang propeta!

 6. Taano ta sulit an satong paghihinguwa na magdangog na marhay?

⁶ Para magibo niyatong magdangog na marhay sa iba, kaipuhan tang magin mapakumbaba asin mapasensiya. Sulit an satong paghihinguwa huli sa kisiyera tulong dahilan. Inot, mas dikit an tsansa na mapasala kita sa satong pagmansay sa iba. Ikaduwa, maaaraman niyato an mga namamatian asin motibo kan satong tugang, na makakatabang sa sato na magin mas mapagmalasakit. Asin ikatulo, tibaad matabangan niyato siya na masabutan an sadiri niya mismo. Kun minsan, nasasabutan ta sana nin lubos an satong mga namamatian pag naisabi ta na iyan. (Tal. 20:5) Inadmitir nin sarong elder sa Asia: “May pagkakataon kaidto na nagtaram ako na dai nguna inaaram an gabos na detalye. Sinabihan ko an sarong sister na kaipuhan niyang pauswagon an saiyang mga komento sa pagtiripon. Pagkatapos, naaraman ko na dai siya gayong tataong magbasa saka grabe an pagmamaigot niya tanganing makakomento.” Mahalaga nanggad na an lambang elder ‘dangugon nguna an aktuwal na detalye’ bago magtao nin konseho!—Tal. 18:13, NWT.

 7. Ano an nanudan mo sa pagtratar ni Jehova ki Elias?

⁷ May mga tugang na nasasakitan na iistorya an saindang mga namamatian huli sa saindang mga inagihan, kultura, o personalidad. Ano an puwede tang gibuhon tanganing magin mas pasil para sa sainda na sabihon sa sato kun ano talaga an namamatian ninda? Girumdumon an pagtratar ni Jehova ki Elias kan nagdulag ini ki Jezebel. Dakul na aldaw nguna an naglihis bago lubos na nasabi ni Elias sa saiyang Ama sa langit an saiyang mga namamatian. Nagdangog na marhay si Jehova. Dangan pinakusog niya si Elias asin tinawan niya ini nin mahalagang asignasyon. (1 Ha. 19:1-18) Tibaad mangaipo nin haloy na panahon bago magin komportable an satong mga tugang na ipakipag-ulay sa sato an tunay nindang namamatian. Pero kun aarugon ta an pagigin mapasensiya ni Jehova, makukua ta an saindang tiwala. Dangan, pag andam na sindang sabihon an saindang namamatian, dapat kitang magdangog na marhay.

 8. Sigun sa Genesis 16:7-13, paano ni Jehova tinabangan si Hagar?

⁸ Si Hagar, an suruguon na babayi ni Sarai, guminawi nin may kamangmangan kan magin agom na siya ni Abram. Kan magbados si Hagar nagi na siyang daing galang ki Sarai, na mayo nin aki. Naggrabeng marhay an sitwasyon mala ngani ta luminayas si Hagar huli ki Sarai. (Gen. 16:4-6) Huling dai ta aram an gabos na detalye, tibaad isipon niyato na marauton an ugali ni Hagar kaya tama sana an nangyari saiya. Pero bako iyan an nahiling ni Jehova ki Hagar. Isinugo niya ki Hagar an saiyang anghel. Kan manumpungan kan anghel si Hagar, tinabangan niyang maitanos an sabuot kaini dangan binendisyunan niya ini. Narealisar ni Hagar na riniriparo siya ni Jehova asin aram kaini an saiyang sitwasyon. Napahiro siya kaiyan na apudon si Jehova na “Diyos nin paghiling, . . . an saro na nakakahiling sa sako.”—Basahon an Genesis 16:7-13.b

 9. Ano an kinonsiderar nin Diyos sa pagtratar niya ki Hagar?

⁹ Ano an nahiling ni Jehova ki Hagar? Midbid niyang marhay si Hagar asin aram niya an gabos na inagihan kaini. (Tal. 15:3) Si Hagar sarong Ehipsiyo na nakaistar sa sarong Hebreong pamilya. Posible kayang minsan namamatian niyang nagsosolo siya? Napupungaw daw siya sa mga kapamilya niya asin sa saiyang sadiring lugar? Bako lang siya an agom ni Abram. Kaidto, may maimbod na mga lalaki na bako sanang saro an agom. Pero bako iyan an orihinal na katuyuhan ni Jehova. (Mat. 19:4-6) Kaya bakong makangangalas na an siring na areglo nagresulta sa selos asin raot nin buot. Aram ni Jehova na sala an pagigin daing galang ni Hagar ki Sarai, pero kinonsiderar niya an mga inagihan asin sitwasyon kaini.

10. Paano ta urog na mamimidbid an satong mga tugang?

¹⁰ Maaarog ta si Jehova paagi sa paghihinguwang sabuton an lambang saro. Urog na midbidon an saimong mga tugang. Makipag-ulay sainda bago asin pagkatapos kan mga pagtiripon, partneran sinda sa ministeryo, asin kun posible, imbitaran sinda sa pagkakan. Kun gigibuhon mo iyan, tibaad maaraman mo na an sister na hinuhuna mong suplada masusupgon lang palan, an brother na hinuhuna mong materyalistiko mapag-istimar palan, o an pamilyang parating huri sa mga pagtiripon may tinatagalan palan na pagkontra. (Job 6:29) Siyempre, dai kita dapat magin “mga parapakilabot sa buhay nin ibang tawo.” (1 Tim. 5:13) Minsan siring, marahay na may aram kita manungod sa satong mga tugang asin sa mga inagihan ninda na nakaimpluwensiya sa saindang personalidad.

11. Taano ta mahalaga na midbid na marhay kan mga elder an mga karnero?

¹¹ An mga elder partikular nang kaipuhan na mamidbid na marhay an mga tugang na nasa saindang pangangataman. Pag-isipan an halimbawa kan brother na si Artur na naglilingkod kaidto bilang paraataman nin sirkito. Dinalaw niya asin nin saro pang elder an sarong sister na garo masusupgon asin bakong maginirong. Sinabi ni Artur: “Naaraman mi na amay na nagadan an agom kaini. Sa ibong kan mga kadipisilan, napadakula niyang may makusog na espirituwalidad an duwa niyang aking babayi. Pero nagluluya na an paghiling niya asin igwa siya nin depresyon. Dawa arog kaiyan, nagdadanay na makusog an pagkamuot asin pagtubod niya ki Jehova. Narealisar mi na dakul kaming manunudan sa marahay na halimbawa kan sister na ini.” (Fil. 2:3) Inarog kan paraataman nin sirkitong ini an halimbawa ni Jehova. Midbid ni Jehova an saiyang mga karnero asin aram niya an kulog na namamatian ninda. (Ex. 3:7) Kun midbid na marhay kan mga elder an mga karnero, mas matatabangan ninda an mga ini.

12. Paano nakinabang si Yip Yee kan mas mamidbid niya an sarong sister sa saindang kongregasyon?

¹² Pag naaraman mo an mga inagihan nin sarong kapwa Kristiyano na ikinakasuya mo, posibleng marhay na magkaigwa ka nin empatiya sa saiya. Pag-isipan an sarong halimbawa. An sister na si Yip Yee na taga Asia nagsabi: “May sarong sister sa kongregasyon mi na makusugon an boses pag nagtataram. Para sako bakong magayon ’yan. Pero kan makapartner ko siya sa ministeryo, naaraman ko na tinatabangan niya palan kaidto an mga magurang niya sa pagtinda nin sira sa saod. Kaipuhan na makusog an boses niya tanganing makaengganyo nin mga parabakal.” Sinabi pa ni Yip Yee: “Nanudan ko na tanganing masabutan ko an mga tugang, kaipuhan na mas mamidbid ko sinda.” Iyo, kaipuhan nin paghihinguwa tanganing mas mamidbid mo an mga tugang. Pero pag sinusunod mo an sadol kan Bibliya na buksan nin lubos an saimong puso, inaarog mo si Jehova na namumutan “an gabos na klase nin tawo.”—1 Tim. 2:3, 4; 2 Cor. 6:11-13.

13. Sigun sa Genesis 19:15, 16, ano an ginibo kan mga anghel kan nag-aatraso pa si Lot, asin taano ta ginibo ninda iyan?

¹³ Sa sarong kritikal na panahon sa buhay ni Lot, dai siya tulos nagsunod sa mga instruksiyon ni Jehova. Duwang anghel an nagduman ki Lot asin sinabi ninda sa saiya na maghali sindang pamilya sa Sodoma. Taano? Sinabi ninda: “Lalaglagon mi an lugar na ini.” (Gen. 19:12, 13, NWT) Kinaagahan, nasa harong pa giraray si Lot saka an saiyang pamilya. Kaya pinatanidan giraray kan mga anghel si Lot. Pero “nag-aatraso pa siya.” Tibaad isipon ta na mayong pakiaram si Lot sa ipinapagibo saiya ni Jehova, o na masinuway siya. Pero dai siya pinabayaan na sana ni Jehova. “Huli sa pagmalasakit ni Jehova sa saiya,” kinabit kan mga anghel si Lot asin an mga kapamilya kaini asin dinara sinda sa luwas kan siyudad.—Basahon an Genesis 19:15, 16.c

14. Ano an posibleng mga dahilan kaya nakamati nin pagmalasakit si Jehova ki Lot?

¹⁴ Nakamati nin pagmalasakit si Jehova ki Lot posibleng huli sa nagkapirang dahilan. Tibaad nag-aalangan si Lot na bayaan an saiyang harong huling natatakot siya sa mga tawo sa luwas kan siyudad. Igwa man nin iba pang peligro. Posibleng aram ni Lot an manungod sa pagkahulog kan duwang hadi sa mga kalot na igwang espalto, na nasa kababan na harani sainda. (Gen. 14:8-12) Bilang agom asin ama, siguradong nahahadit si Lot para sa saiyang pamilya. Saro pa, mayaman si Lot, kaya tibaad magayon an harong niya sa Sodoma. (Gen. 13:5, 6) Siyempre, dai puwedeng isarahutan ni Lot an arin man diyan para dai tulos siya magsunod ki Jehova. Alagad dai nagpokus si Jehova sa sala ni Lot asin ibinilang siyang ‘matanos na tawo.’—2 Ped. 2:7, 8.

15. Imbes na husgaran an paggawi nin sarong tawo, ano an dapat tang gibuhon?

¹⁵ Imbes na husgaran an paggawi nin sarong tawo, gibuhon an pinakamakakaya mo na sabuton an namamatian niya. Iyan an pinagmaigutan na gibuhon ni Veronica, sarong sister sa Europa. Sinabi niya: “May sarong sister na garo baga pirmi na sanang mainit an pamayo. Pirmi niyang isinusuway an saiyang sadiri. Kun minsan natatakot akong magdulok saiya. Pero naisip ko, ‘Kun ako an nasa sitwasyon niya, kaipuhan ko nin amiga.’ Kaya nagdesisyon akong kumustahon siya. Asin nagpuon siyang mag-open sako! Ngunyan mas naiintindihan ko na siya.”

16. Taano ta dapat niyatong hagadon sa pamibi na tabangan kitang makultibar an empatiya?

¹⁶ Si Jehova sana an lubos na nakakasabot sa sato. (Tal. 15:11) Kaya hagadon an saiyang tabang na mahiling mo an iba kapareho kan paghiling niya sa sainda asin na masabutan kun paano mo ipapahiling an pagmalasakit sa sainda. An pagpamibi nakatabang sa sarong sister na si Anzhela na magin mas may empatiya. May sarong sister sa kongregasyon ninda na nagin masakit pakiibanan. Inadmitir ni Anzhela: “Pasilon sana kutang magin mapagkritika sa sister tapos iwasan na lang siya. Pero naghagad ako nin tabang ki Jehova na masabutan an sister na iyan.” Sinimbag daw ni Jehova an pamibi ni Anzhela? Sinabi ni Anzhela: “Nagpartner kami sa ministeryo tapos haloy na nag-ulay pagkatapos. May pagmalasakit akong nagdangog sa saiya. Ngunyan mas namumutan ko na siya, saka determinado akong tabangan siya.”

17. Ano an dapat na determinado niyatong gibuhon?

¹⁷ Dai mo puwedeng pilion kun siisay na tugang an maninigo mong pahilingan nin mamumuton na pagmalasakit. Gabos sinda nag-aagi nin mga problema arog ki Jonas, Elias, Hagar, asin Lot. Sa nagkapirang pagkakataon, dahil iyan sa salang mga desisyon ninda. Asin kun iisipon, gabos kita nakagibo na man kaiyan. Kaya, rasonable nanggad na hagadon sa sato ni Jehova na magpahiling nin pakikidamay sa lambang saro. (1 Ped. 3:8) Pag sinusunod ta si Jehova, nakakakontribwir kita sa pagkasararo kan satong pambihirang pangglobong pamilya na kompuwesto nin gabos na klase nin tawo. Kaya sa pagtratar niyato sa lambang saro, magin determinado lugod kitang magdangog sainda, mamidbid sinda, asin magpahiling nin pagmalasakit.