Suportaran an mga Kristiyanong Babayi

 1. Paano sinusuportaran kan mga sister an organisasyon, asin anong mga kadipisilan an napapaatubang sa dakul sa sainda? (Hilingon an ritrato sa cover.)

NAGPAPASALAMAT nanggad kitang marhay huling igwa kita nin dakulon na sister na maigot na nagtatrabaho sa kongregasyon! Halimbawa, nagpapartisipar sinda sa mga pagtiripon asin sa ministeryo. May mga sister na nagtatabang sa pagmentenar kan Kingdom Hall, asin nagpapahiling sinda nin personal na interes sa mga kapwa parasamba. Siyempre, napapaatubang man sinda sa mga kadipisilan. May mga nag-aataman sa may edad na nindang mga magurang. An iba nagtatagal nin pagkontra kan saindang mga kapamilya. Asin may mga iba pa na nagsosolong mga magurang na mahigos na nagtatrabaho para sustentuhan an saindang mga aki.

 2. Taano ta dapat niyatong hinguwahon na tawan nin suporta an satong mga sister?

² Taano ta dapat niyatong tawan nin suporta an mga sister? Huling an kinaban dai pirming tinatawan an mga babayi kan dignidad na maninigo sa sainda. Dugang pa, dinadagka kita kan Bibliya na tawan ta sinda nin suporta. Halimbawa, sinabi ni apostol Pablo sa kongregasyon sa Roma na akuon si Febe asin ‘itao digdi an ano man na tabang na tibaad kaipuhanon kaini.’ (Roma 16:1, 2) Kan Fariseo pa si Pablo, posibleng marhay na impluwensiyado siya kan kultura na hababa an paghiling asin pagtrato sa mga babayi. Pero kan Kristiyano na siya, inarog niya si Jesus asin trinato an mga babayi nin may dignidad asin kabuutan.—1 Cor. 11:1.

 3. Paano trinato ni Jesus an mga babayi, asin ano an pagmansay niya sa mga babaying naggibo kan kabutan nin Diyos?

³ Trinato ni Jesus nin may dignidad an gabos na babayi. (Juan 4:27) An pagmansay niya sa mga babayi bakong arog kan sa Judiong mga lider nin relihiyon kan panahon niya. Sa katunayan, sarong reperensiya sa Bibliya an nagsabi: “Mayo nin ano man na sinabi si Jesus na mapang-insulto o mapangmenos sa mga babayi.” Urog pa nganing nagpahiling si Jesus nin respeto sa mga babayi na naggibo kan kabutan kan saiyang Ama. Inapod niya pa ngani sinda na saiyang mga tugang na babayi asin sinambit sinda kaiba kan mga lalaki na ibinibilang niyang parte kan saiyang espirituwal na pamilya.—Mat. 12:50.

 4. Ano an pag-uulayan ta sa artikulong ini?

⁴ Pirming andam si Jesus na tabangan an mga tugang niyang babayi sa espirituwal. Inapresyar niya sinda asin idinepensa. Pag-ulayan niyato kun paano ta maaarog si Jesus sa pagpahiling nin konsiderasyon sa satong mga sister.

 5. Taano ta may mga sister na tibaad nasasakitan na magkaigwa nin marahay na asosasyon?

⁵ Gabos kita, brother man o sister, nangangaipo nin marahay na asosasyon. Pero minsan, tibaad masakitan an mga sister sa bagay na iyan. Taano? Mangnuhon an minasunod na mga komento. Sinabi kan sister na si Jordan,b “Dahil single ako, parati kong namamatian na garo mayo akong lugar sa kongregasyon, na garo bako akong parte kaiyan.” Si Kristen, na sarong payunir na nagbalyo tanganing pahiwason an saiyang ministeryo, nagsabi, “Pag bago ka sa sarong kongregasyon, tibaad mamatian mong nagsosolo ka.” May mga brother na tibaad arog man kaiyan an namamatian. An mga nakaistar kaiba kan saindang pamilya na iba an relihiyon tibaad makamati na bako sindang dayupot sa saindang literal na pamilya asin kasabay kaiyan makamati man na napapasuway sinda sa saindang espirituwal na pamilya. Tibaad makamati nin kamunduan an mga naghihilang na dai na nakakaluwas sa harong, pati man idtong may inaataman na mga kapamilyang may hilang. Sinabi ni Annette, “Dai ako nakakaiba sa mga pagtiripon-tipon dahil ako an panginot na nag-aataman sa sakong ina.”

 6. Sigun sa pagkasaysay sa Lucas 10:38-42, paano tinabangan ni Jesus si Marta asin Maria?

⁶ Nagtao nin panahon si Jesus sa mga tugang niyang babayi sa espirituwal, asin nagi siyang tunay na amigo sa sainda. Pag-isipan an pagigin mag-amigo niya asin ni Maria saka Marta, na minalataw na parehong daing agom. (Basahon an Lucas 10:38-42.) Paagi sa saiyang mga tataramon asin gibo, malinaw na ipinamati ni Jesus na dai sinda dapat mag-alangan saiya. Halimbawa, dai nag-alangan si Maria na magtukaw sa may pamitisan ni Jesus bilang disipulo.c Asin si Marta, na nauuyam na ki Maria ta dai ini nagtatabang, dai nag-alangan na sabihon ki Jesus an nasa isip niya. Sa pangyayaring idto, tinabangan ni Jesus an duwang babayi na makanuod nin mahalagang mga leksiyon. Asin ipinahiling niya na mahalaga sa saiya an duwang babaying ini asin an tugang nindang lalaki na si Lazaro paagi sa pagbisita sa sainda sa iba pang mga pagkakataon. (Juan 12:1-3) Kaya bakong makangalas na kan magkahilang nin grabe si Lazaro, aram ni Maria asin Marta na puwede sindang maghagad nin tabang ki Jesus.—Juan 11:3, 5.

 7. Ano an sarong paagi na mapapakusog ta an mga sister?

⁷ Para sa nagkapirang sister, an mga pagtiripon an panginot na oportunidad para makaibanan ninda an mga kapwa parasamba. Kaya gusto tang gamiton an mga pagkakataon na iyan para tara-tarahon sinda, kaulayon, asin ipahiling an satong pagmalasakit sainda. Si Jordan, na sinambit kasubago, nagsabi, “Napapakusog akong marhay pag kinokomendaran kan iba an mga komento ko, pag iniibanan ninda ako sa ministeryo, o pag ipinapahiling ninda sa iba pang mga paagi an pagmalasakit ninda sako.” Dapat niyatong ipahiling sa satong mga sister na mahalaga sinda sa sato. “Pag dai ako nakaatender sa sarong pagtiripon,” an sabi ni Kia, “aram ko na may ma-text sako para aramon kun okey lang ako. Ipinapahiling kaiyan na nagmamalasakit sako an mga tugang.”

 8. Sa ano pang mga paagi niyato maaarog si Jesus?

⁸ Arog ni Jesus, puwede kitang magtao nin panahon para makaibanan an mga sister. Tibaad puwede ta sindang imbitaran na magkakan sa satong harong o maglibang. Pag ginigibo niyato iyan, gusto tang siguraduhon na nakakapakusog an pag-urulay. (Roma 1:11, 12) Marahay na arugon kan mga elder an kaisipan ni Jesus. Aram niya na puwedeng magin dipisil para sa iba an pagigin daing agom, pero lininaw niya na an nagdadanay na kaugmahan dai nakadepende sa pagkaigwa nin agom o nin mga aki. (Luc. 11:27, 28) Imbes, an permanenteng kaugmahan resulta kan pag-inot sa paglilingkod ki Jehova.—Mat. 19:12.

 9. Ano an puwedeng gibuhon kan mga elder para tabangan an mga sister?

⁹ Kaipuhan na trataron lalo na kan mga elder an mga Kristiyana bilang saindang mga tugang na babayi asin ina sa espirituwal. (1 Tim. 5:1, 2) Marahay na magtao nin panahon an mga elder para makipag-ulay sa mga sister bago o pagkatapos kan mga pagtiripon. “Narisa nin sarong elder na sibot akong marhay asin gusto niyang masabutan an iskedyul ko,” an sabi ni Kristen. “Talagang naapresyar ko an saiyang pagmalasakit.” Pag regular na nakikipag-ulay an mga elder sa saindang mga tugang na babayi sa espirituwal, pinapatunayan ninda na nagmamalasakit sinda.d Idinuon ni Annette, na sinambit kasubago, an sarong pakinabang kan regular na pakikipag-ulay sa mga elder. Sinabi niya: “Mas namimidbid ko sinda, asin mas namimidbid man ninda ako. Kaya pag may inaagihan akong masakit na problema, mas pasil na sako na magdulok sainda para sa tabang.”

10. Ano an makakatabang sa mga sister na magin maugma?

¹⁰ Gabos kita, lalaki man o babayi, nauugma pag minimidbid kan iba an satong mga kakayahan asin pag sinasabi ninda sato na naaapresyar ninda an satong ginigibo. Sa kabaliktaran, nadidisganar kita kun binabaliwala an satong mga talento asin ginigibo. Inadmitir nin sarong daing agom na payunir na si Abigail na minsan namamatian niyang binabaliwala siya: “An hiling sana ninda sako, tugang ako ni ano o na aki ako ni ano. Minsan pagmati ko, mayo lang ako.” Pero mangnuhon an sinabi kan sister na si Pam. Sa panahon kan saiyang pagigin daing agom, dakul na taon siyang naglingkod bilang misyonera. Kan huri, nagbalik siya sainda para atamanon an saiyang mga magurang. Ngunyan na labi na siyang 70 anyos, payunir pa man giraray siya. Sinabi ni Pam: “An pinakanakakatabang sako iyo an pag sinasabi kan iba na naaapresyar ninda ako.”

11. Paano ipinahiling ni Jesus na pinahalagahan niya an mga babayi na inibanan siya sa saiyang ministeryo?

¹¹ Pinahalagahan ni Jesus an tabang na inako niya hali sa diyosnon na mga babayi na naglingkod sa saiya na “ginagamit an saindang mga pagsadiri.” (Luc. 8:1-3) Dai lang niya tinugutan na magkaigwa sinda kan pribilehiyong iyan kundi ihinayag niya man sainda an hararom na espirituwal na mga katotoohan. Halimbawa, sinabi niya sainda na magagadan siya asin bubuhayon liwat. (Luc. 24:5-8) Arog kan ginibo niya sa mga apostol, inandam niya an mga babaying ini para sa aatubangon nindang mga pagbalo. (Mar. 9:30-32; 10:32-34) Mahalagang mangnuhon na dawa ngani nagdulag an mga apostol kan inarestar si Jesus, an nagkapira sa mga babayi na nagsuportar sa saiya yaon kaidto kan naghihingagdan siya sa hariging pasakitan.—Mat. 26:56; Mar. 15:40, 41.

12. Anong gibuhon an ipinagkatiwala ni Jesus sa mga babayi?

¹² Pinagkatiwalaan ni Jesus nin mahalagang gibuhon an mga babayi. Halimbawa, an diyosnon na mga babayi an inot na nakahiling kan saiyang pagkabuhay liwat. Isinugo niya an mga babaying idto tanganing ibareta sa mga apostol na binuhay na siya liwat. (Mat. 28:5, 9, 10) Asin kan Pentecostes 33 C.E., posibleng may mga babayi na yaon kaidto kan ibubo an banal na espiritu. Kun iyo, an bagong lahidan na mga babaying iyan posible man na nag-ako kan milagrosong kakayahan na magtaram nin lain-lain na lengguwahe asin sabihon sa iba an manungod sa “makangangalas na mga bagay nin Diyos.”—Gibo 1:14; 2:2-4, 11.

13. Ano an ginigibo kan mga Kristiyanong babayi ngunyan, asin paano ta maipapahiling an satong pag-apresyar sa saindang mga ginigibo?

¹³ An satong mga sister maninigong komendaran sa gabos nindang ginigibo sa paglilingkod ki Jehova. Kaiba sa mga paglilingkod na iyan an pagtugdok asin pagmentenar nin mga edipisyo, pagsuportar sa mga grupo na iba an lengguwahe, asin pagboluntaryo sa mga pasilidad kan Bethel. Nagtatabang sinda sa pag-ayuda, sa pagtradusir kan mga publikasyon ta, asin naglilingkod bilang mga payunir saka misyonera. Arog kan mga brother, nag-aatender man sinda sa paadalan para sa mga payunir, School for Kingdom Evangelizers, asin sa Gilead School. Dugang pa, tinatabangan kan mga agom na babayi an saindang agom para maisaabaga an gabos na responsabilidad kaini sa kongregasyon asin sa organisasyon. An responsableng mga brother na ini dai lubos na makakapaglingkod bilang “mga balaog na tawo” kun bakong dahil sa suporta kan saindang agom na babayi. (Efe. 4:8) May naiisip ka daw na mga paagi para suportaran an satong mga sister sa saindang mga ginigibo?

14. Sigun sa sinasabi sa Salmo 68:11, ano an ginigibo kan madunong na mga elder?

¹⁴ Aram kan madunong na mga elder na an mga sister “sarong dakulang hukbo” nin mga boluntaryo asin sa parati kaiba sinda sa pinakamahuhusay na parahulit kan maugmang bareta. (Basahon an Salmo 68:11.) Kaya naghahanap nin mga paagi an mga elder tanganing makanuod sa eksperyensiya kan mga sister. Naaapresyar ni Abigail, na sinambit kasubago, pag hinahapot kan mga brother kun anong mga paagi an nahiling niyang epektibo para makapuon nin pag-uulay sa mga tawo sa teritoryo. Sinabi niya, “Nakakatabang iyan sako na mahiling na igwa si Jehova nin lugar para sa sako sa saiyang organisasyon.” Dugang pa, aram kan mga elder na an maimbod asin maygurang na mga sister epektibo sa pagtabang sa mas hoben na mga sister para maatubang an mga kadipisilan. (Tito 2:3-5) Tunay nanggad na maninigo niyatong apresyaron an satong mga sister!

15. Nuarin tibaad kaipuhan kan mga sister nin saro na madepensa sa sainda?

¹⁵ May mga pagkakataon na tibaad kaipuhan nin mga sister na may magdepensa sa sainda pag napapaatubang sa sarong espesipikong problema. (Isa. 1:17) Halimbawa, an sarong balo o idiniborsiyong sister tibaad mangaipo nin saro na magigin tagapagtaram niya asin matabang saiya sa pag-asikaso sa nagkapirang bagay na kaidto an agom niya an naggigibo. An sarong may edad nang sister tibaad mangaipo nin tabang sa pakikipag-ulay sa mga doktor. O an sarong sister na payunir na nagtatrabaho sa ibang teokratikong mga proyekto tibaad mangaipo nin saro na madepensa saiya pag kinukuwestiyon kan iba kun taano ta dai siya parating nakakaiba sa ministeryo arog kan ibang mga payunir. Paano ta pa matatabangan an satong mga sister? Pag-ulayan ta giraray an halimbawa ni Jesus.

16. Arog kan mababasa sa Marcos 14:3-9, paano idinepensa ni Jesus si Maria?

¹⁶ Idinedepensa tulos ni Jesus an saiyang mga tugang na babayi sa espirituwal pag namimis-interpretar sinda. Halimbawa, idinepensa niya si Maria kan pigkritikar ini ni Marta. (Luc. 10:38-42) Sa ikaduwang pagkakataon, idinepensa niya si Maria kan may mga nang-anggot digdi dahil sa hinuhuna nindang bakong marahay na desisyon kaini. (Basahon an Marcos 14:3-9.) Nasabutan ni Jesus an motibo ni Maria asin kinomendaran ini, na sinasabi: “Naggibo siya nin marahay sa sako. . . . Ginibo niya an saiyang makakaya.” Nagpropesiya pa ngani siya na an ginibong kabuutan ni Maria isasaysay “sain man sa bilog na kinaban ihulit an maugmang bareta,” arog mismo kan ginigibo kan artikulong ini. Interesante nanggad na sinabi ni Jesus na an maugmang bareta ihuhulit sa bilog na kinaban kan umawon niya si Maria sa ginibo kaining pagkabakong makasadiri! Siguradong nakapakusog nanggad ki Maria an sinabi niya pagkatapos ining mamis-interpretar!

17. Magtao nin halimbawa kun nuarin niyato tibaad kaipuhan na idepensa an sarong sister.

¹⁷ Idinedepensa mo daw an saimong mga tugang na babayi sa espirituwal pag kaipuhan ninda iyan? Halimbawa, pag-isipan an minasunod na eksena. Narisa nin nagkapirang tugang na may sarong sister, na bakong Saksi an agom, na parating huri sa mga pagtiripon asin naghahali tulos pagkatapos. Narisa man ninda na bihira niyang iiba an saiyang mga aki. Kaya kinuwestiyon ninda siya kun taano ta dai siya naninindugan na marhay sa saiyang bakong kapagtubod na agom, asin krinitikar ninda siya. Pero an dai ninda aram, ginigibo kan sister an pinakamakakaya niya. Dai niya lubos na kontrolado an iskedyul niya asin bako man siya an pinal na nagdedesisyon manungod sa mga aki niya. Ano an puwede mong gibuhon? Kun kokomendaran mo an sister asin sasabihon sa iba an marahay na mga ginigibo niya, tibaad mapapundo mo an negatibong urulay manungod saiya.

18. Sa ano pang ibang mga paagi kita makakatabang sa satong mga sister?

¹⁸ Maipapahiling ta sa satong mga sister kun gurano kita nagmamalasakit sa sainda paagi sa pagtao nin praktikal na tabang. (1 Juan 3:18) Si Annette, an sister na nag-aataman sa saiyang may hilang na ina, nagsabi: “Nagduduman sa harong an nagkapirang amigo tanganing salidahan ako sa pag-ataman sa sakong ina, o para magdara nin kakanon. Dahil kaiyan namatian ko na namumutan ninda ako saka parte ako kan kongregasyon.” Nag-ako man nin tabang si Jordan. Sarong brother an nagtao saiya nin mga tip sa pagmentenar nin awto. Sinabi niya: “Nakakaugmang maaraman na iniisip kan mga tugang kong lalaki saka babayi sa espirituwal an kaligtasan ko.”

19. Sa ano pang ibang mga paagi makakatabang an mga elder sa mga sister?

¹⁹ Hinihinguwa man kan mga elder na magin mapagrisa sa mga pangangaipo kan mga sister. Aram ninda na mahalaga ki Jehova kun paano tinatrato an mga sister. (Sant. 1:27) Kaya inaarog ninda an pagigin rasonable ni Jesus; dai sinda naggigibo nin mga susundon sa mga pagkakataon na mas angay na magpahiling nin kabuutan asin na magin mapagsabot. (Mat. 15:22-28) Pag nag-iinot an mga elder sa pagtao nin tabang, naipapamati ninda sa mga sister na nagmamalasakit sa sainda si Jehova asin an saiyang organisasyon. Kan maaraman kan paraataman kan saindang grupo na malipat si Kia nin istaran, iinareglo niya tulos na may magtabang digdi. “Nakabawas na marhay iyan sa stress ko,” an sabi ni Kia. “Paagi sa nakakapakusog na mga tataramon asin praktikal na tabang ninda, malinaw na ipinahiling sako kan mga elder na mahalaga akong parte kan kongregasyon asin na dai ako nagsosolo pag napapaatubang sa masakit na mga sitwasyon.”

20-21. Paano niyato maipapahiling na namumutan ta an gabos tang Kristiyanong mga sister?

²⁰ Sa mga kongregasyon ta ngunyan, makakahiling kita nin dakul na halimbawa nin mahigos na mga Kristiyana na maninigo kan satong suporta. Arog kan nanudan ta sa halimbawa ni Jesus, matatabangan ta sinda paagi sa pagtao nin panahon sa sainda asin pagmidbid sainda. Puwede niyatong ipahiling na inaapresyar ta an mga ginigibo ninda sa paglilingkod sa Diyos. Asin puwede niyato sindang idepensa pag kaipuhan.

²¹ Sa pagtatapos kan surat niya sa mga taga Roma, espesipikong sinambit ni apostol Pablo an siyam na Kristiyana. (Roma 16:1, 3, 6, 12, 13, 15) Siguradong napakusog an mga babaying idto kan madangog ninda an saiyang mga pangungumusta asin komendasyon. Dapat man niyatong suportaran an gabos na sister sa satong kongregasyon. Paagi kaiyan, ipinapahiling niyato na namumutan ta sinda bilang parte kan satong espirituwal na pamilya.