Mayo nin Makakapapundo sa mga Namumuot sa Katotoohan na Maglingkod ki Jehova

1-2. Ano an sinabi nin sarong parasurat, asin ano an pag-uulayan ta sa artikulong ini?

MINILYON ngunyan an naghihingako na nagtutubod sinda ki Jesus, pero dai man ninda inaako an mga itinukdo niya. (2 Tim. 4:3, 4) Sa katunayan, sinabi nin sarong parasurat: “Kun may saro pang ‘Jesus’ na nabubuhay ngunyan tapos nagsasabi siya nin mga bagay na arog kaidto kan mga sinabi kan orihinal na Jesus . . . , isisikwal ta daw siya arog kan ginibo ta dos mil na taon na an nakaagi? . . . An simbag: Iyo.”

² Dakul kan inot na siglo an nakahiling mismo na nagtutukdo si Jesus saka naggigibo nin mga milagro, pero dai sinda nagtubod saiya. Taano? Sa sinusundan na artikulo, pinag-ulayan ta an apat na dahilan kun taano ta isinikwal si Jesus kan mga tawo dahil sa mga sinabi saka ginibo niya. Pag-ulayan ta an apat pang dahilan. Mantang ginigibo ta iyan, maaaraman ta kun taano ta isinisikwal kan mga tawo ngunyan an mga parasunod ni Jesus asin kun paano ta masisigurado na mayong makakapapundo sato sa paglilingkod ki Jehova.

 3. Ano an ginibo ni Jesus na nagin dahilan kaya isinikwal siya kan nagkapira?

³ Kan yaon siya digdi sa daga, nakiiba-iba si Jesus sa gabos na klase nin tawo. Nagkakan siya kaiba kan mga mayaman saka makapangyarihan, pero nakiiba-iba man siya sa mga pobre saka mga daing kalaban-laban. Dugang pa, nagpahiling man siya nin pagmalasakit sa ibinibilang na “mga parakasala.” May mga mapagpakangmatanos na isinikwal si Jesus dahil sa ginibo niya. Hinapot ninda an mga disipulo niya: “Taano ta nagkakakan asin nag-iinom kamo kaiba nin mga parasingil nin buhis asin mga parakasala?” Sinimbag iyan ni Jesus: “An mga marahay an salud dai nangangaipo nin doktor, pero an mga may hilang iyo. Nagdatong ako tanganing apudon, bako an mga tawong matanos, kundi an mga parakasala tanganing magsulsol sinda.”—Luc. 5:29-32.

 4. Uyon ki propeta Isaias, ano dapat kuta an inasahan kan mga Judio manungod sa Mesiyas?

⁴ Ano an sinasabi kan Kasuratan? Haloy pa bago nag-abot an Mesiyas, sinabi ni propeta Isaias na dai siya aakuon kan kinaban. Sinabi kan propesiya: “Hinamak siya asin linikayan nin mga tawo . . . Garo man sana nakatago sa samo an lalawgon niya. Hinamak siya, asin ibinilang mi siyang daing halaga.” (Isa. 53:3, NWT) Lilikayan “nin mga tawo” an Mesiyas, kaya dapat kuta inasahan na kan mga Judiong idto kan inot na siglo na isisikwal si Jesus.

 5. Ano an paghiling kan dakul na tawo ngunyan sa mga parasunod ni Jesus?

⁵ Nahihiling ta daw ngunyan an problemang iyan? Iyo. Gustong-gusto kan dakul na klerigo na magin miyembro kan kongregasyon ninda an mga tawong prominente, mayaman, saka an mga ibinibilang na madunong sa kinaban. Ginigibo ini kan mga klerigong iyan dawa ngani an moralidad saka an istilo nin pamumuhay kan mga bagong miyembrong iyan sa parati bakong kauyon kan mga pamantayan nin Diyos. Minimenos man kan mga klerigong iyan an mga lingkod ni Jehova na maigot saka malinig sa moral dahil bakong importante an mga ini base sa mga pamantayan kan kinaban. Arog kan sinabi ni Pablo, pinili nin Diyos an mga tawong “pigmemenos.” (1 Cor. 1:26-29) Dawa arog kaiyan, para ki Jehova, mahalagang marhay an gabos niyang maimbod na lingkod.

 6. Ano an sinabi ni Jesus sa Mateo 11:25, 26, asin paano ta siya maaarog?

⁶ Ano an dapat tang gibuhon para masigurado na nungka kitang pumundo sa paglilingkod ki Jehova? (Basahon an Mateo 11:25, 26.) Dai magpaimpluwensiya sa paghiling kan kinaban sa mga lingkod nin Diyos. Akuon na mga tawong mapakumbaba sana an ginagamit ni Jehova para gibuhon an saiyang kabutan. (Sal. 138:6) Asin hurop-hurupon an dakulon na naisagibo niya paagi sa paggamit sa mga tawong para sa kinaban bakong madunong.

 7. Taano ta inapod ni Jesus na mapagsagin-sagin an mga Fariseo, asin ano an nagin reaksiyon ninda?

⁷ Kusog-buot na kinondenar ni Jesus an mga kaugalian nin relihiyon na dai man talaga inuuyunan ni Jehova. Halimbawa, ibinuyagyag niya an pagsagin-sagin kan mga Fariseo, na mas iniisip pa kun paano sinda naghuhugas nin kamot kisa sa kun paano ninda inaasikaso an saindang mga magurang. (Mat. 15:1-11) Posibleng nabigla an mga disipulo ni Jesus sa sinabi niya. Mala ta hinapot ninda siya: “Aram mo daw na nagkaaranggot an mga Fariseo kan madangog ninda su sinabi mo?” Nagsimbag si Jesus: “An lambang tanom na dai itinanom kan sakuyang langitnon na Ama gagabuton. Pabayai sinda. Mga buta sindang parakabit. Kaya, kun tawong buta an makabit sa sarong buta, pareho sindang mahuhulog sa kalot.” (Mat. 15:12-14) Dai tinugutan ni Jesus an negatibong reaksiyon kan mga lider nin relihiyon na idto na papunduhon siya sa pagsabi kan katotoohan.

 8. Paano ipinahiling ni Jesus na bakong gabos na relihiyosong paniniwala inaako nin Diyos?

⁸ Ibinuyagyag man ni Jesus an palsong mga katukduan nin relihiyon. Daing sinabi si Jesus na inaako nin Diyos an gabos na relihiyosong paniniwala. Imbes, sinabi niya na dakul an maralaog sa mahiwas na dalan pasiring sa kalaglagan, mantang dikit an maralaog sa piot na dalan pasiring sa buhay. (Mat. 7:13, 14) Malinaw niyang sinambit na may mga tawong magsasabi na naglilingkod sinda sa Diyos, pero an totoo dai man talaga sinda naglilingkod saiya. Nagpatanid siya: “Magin mapagbantay kamo sa mga bakong tunay na propeta na minadiyan sa saindo na may sulot na arog kan sa karnero, pero sa laog, sinda pasluon na mga lobo. Paagi sa saindang mga bunga mamimidbid nindo sinda.”—Mat. 7:15-20.

 9. Ano an nagkapirang palsong relihiyosong katukduan na ibinuyagyag ni Jesus?

⁹ Ano an sinasabi kan Kasuratan? Sinabi kan sarong propesiya sa Bibliya na an kaigutan kan Mesiyas maglalaad para sa harong ni Jehova. (Sal. 69:9; Juan 2:14-17) Pinahiro si Jesus kan kaigutan niya na ibuyagyag an palsong relihiyosong mga paniniwala asin mga kaugalian. Halimbawa, naniniwala an mga Fariseo na imortal an kalag. Pero itinukdo ni Jesus na an gadan nagtuturog. (Juan 11:11) Dai nagtutubod sa pagkabuhay liwat an mga Saduceo. Pero binuhay liwat ni Jesus an amigo niyang si Lazaro. (Juan 11:43, 44; Gibo 23:8) Para sa mga Fariseo, nangyayari an gabos na bagay dahil sa kapaladan asin sa Diyos. Pero itinukdo ni Jesus na puwedeng pumili an tawo kun baga maglilingkod siya sa Diyos o dai.—Mat. 11:28.

10. Taano ta dakul an habo sato dahil sa mga itinutukdo ta?

¹⁰ Nahihiling ta daw ngunyan an problemang iyan? Iyo. Dakul an habo sato dahil ibinubuyagyag kan mga katukduan tang basado sa Bibliya an palsong relihiyosong mga katukduan. Itinutukdo kan mga klerigo sa mga parasunod ninda na pinapadusahan nin Diyos sa impiyerno an mga maraot. Ginagamit ninda an palsong katukduan na iyan para kontrulon an mga tawo. Bilang mga lingkod ni Jehova, na nagsasamba sa Diyos nin pagkamuot, ibinubuyagyag ta an palsong katukduan na iyan. Itinutukdo man kan mga klerigo na an kalag imortal. Alagad ibinubuyagyag ta na pagano an ginikanan kan doktrinang iyan, dahil kun totoo iyan magigin daing saysay an pagkabuhay liwat. Itinutukdo kan dakul na relihiyon an paniniwala na nakatalaga na an mga mangyayari sa buhay ta, pero itinutukdo ta na may libertad na magdesisyon an tawo asin puwede niyang pilion na maglingkod sa Diyos. Ano an reaksiyon kan mga lider nin relihiyon? Sa parati, anggot sindang marhay!

11. Uyon sa sinabi ni Jesus na nasa Juan 8:45-47, ano an hinahagad nin Diyos sa saiyang mga lingkod?

¹¹ Ano an dapat tang gibuhon para masigurado na nungka kitang pumundo sa paglilingkod ki Jehova? Kun namumuot kita sa katotoohan, dapat tang akuon an mga tataramon nin Diyos. (Basahon an Juan 8:45-47.) Bakong arog ni Satanas na Diyablo, marigon kitang naninindugan sa katotoohan. Nungka tang ikinokompromiso an mga tinutubod ta. (Juan 8:44) Hinahagad nin Diyos sa mga lingkod niya na “kaungisan an maraot” asin “mangapot sa kun ano an marahay,” arog kan ginibo ni Jesus.—Roma 12:9; Heb. 1:9.

12. Taano ta an paagi nin kagadanan ni Jesus nagin dahilan na isikwal siya kan dakul na Judio?

¹² Ano pa an sarong dahilan kaya isinikwal si Jesus kan nagkapirang Judio? Sinabi ni Pablo: “Ihinuhulit niyato si Cristo na pinadusahan nin kagadanan sa harigi, na para sa mga Judio sarong bagay na dipisilon akuon.” (1 Cor. 1:23) Taano ta isinikwal si Jesus kan dakul na Judio dahil sa paagi nin kagadanan niya? Para sainda, an kagadanan ni Jesus sa harigi garo baga nagpapahiling na kriminal siya saka parakasala—bakong an Mesiyas.—Deut. 21:22, 23.

13. Ano an dai narealisar kan mga nagsikwal ki Jesus?

¹³ Dai narealisar kan mga Judiong nagsikwal ki Jesus na mayo siyang sala, na bakong totoo an mga akusasyon saiya, asin na trinato siya nin bakong makatanusan. Binasang-basang kan mga nagbista ki Jesus an hustisya. Dali-daling nagtiripon an Judiong korte suprema, saka dai ninda sinunod an mga ley sa pagbista. (Luc. 22:54; Juan 18:24) Imbes na dangugon nin mayong kinakampihan an mga sahot saka an mga ebidensiya laban ki Jesus, naghanap pa mismo an mga hukom nin “putik na testimonya laban ki Jesus tanganing maipagadan siya.” Kan dai iyan mag-aser, pinurbaran kan halangkaw na saserdote na dakupon si Jesus sa saiyang mga itinataram. Kontra nanggad iyan sa ley. (Mat. 26:59; Mar. 14:55-64) Pagkabuhay liwat ni Jesus, tinawan kan bakong matanos na mga hukom na idto “nin dakul na sinsilyong pirak” an Romanong mga suldados na nagbabantay kan lulubngan niya tanganing magpalakop nin bakong totoong istorya kun taano ta mayo nang laog an lulubngan.—Mat. 28:11-15.

14. Ano an ihinula kan Kasuratan manungod sa kagadanan kan Mesiyas?

¹⁴ Ano an sinasabi kan Kasuratan? Dai inaasahan kan dakul na Judio kan panahon ni Jesus na kaipuhan na magadan an Mesiyas, pero mangnuhon kun ano an iprinopesiya kan Kasuratan: “Ibinubo niya an saiyang buhay sagkod sa kagadanan asin ibinilang siyang saro sa mga paralapas; dinara niya an kasalan kan dakul na tawo, asin nangultanan siya para sa mga paralapas.” (Isa. 53:12, NWT) Kaya mayong dahilan na isikwal si Jesus kan mga Judio kan gadanon siya bilang parakasala.

15. Anong mga akusasyon laban sa mga Saksi ni Jehova an nagin dahilan kaya may mga tawong habo sainda?

¹⁵ Nahihiling ta daw ngunyan an problemang iyan? Iyo nanggad! Bakong makatanusan na inakusaran saka hinusgaran na nagkasala si Jesus, asin iyo man ngunyan an mga Saksi ni Jehova. Mangnuhon an pirang halimbawa. Durante kan dekada nin 1930 asin 1940 sa Estados Unidos, pauruutrong kinuwestiyon sa mga korte an satong katalingkasan sa pagsamba sa Diyos. May mga hukom na malinaw na pigdiskriminar kita. Sa Quebec, Canada, nagtinabangan an Simbahan asin an Estado para papunduhon an satong gibuhon. Dakul na parahayag an iprineso dahil lang sa ipinakipag-ulay ninda sa iba an manungod sa Kahadian nin Diyos. Sa Nazi Germany, dakul na maimbod na hoben na brother an ipinagadan kan rehimen na iyan na mayong pagtubod sa Diyos. Asin sa nakaagi pa sanang mga taon, dakul sa mga tugang ta sa Russia an hinusgaran na nagkasala saka iprineso dahil sa pakikipag-ulay manungod sa Bibliya, na ibinibilang na sarong “ekstremistang aktibidad.” Maski an New World Translation of the Holy Scriptures sa lengguwaheng Russian ipinagbawal saka ibinilang na “ekstremistang materyal” dahil ginagamit kaiyan an pangaran na Jehova.

16. Arog kan ipinapahiling kan 1 Juan 4:1, taano ta dai kita dapat magpadaya sa bakong totoong mga istorya manungod sa mga lingkod ni Jehova?

¹⁶ Ano an dapat tang gibuhon para masigurado na nungka kitang pumundo sa paglilingkod ki Jehova? Aramon kun ano an totoo. Sa saiyang Sermon sa Bukid, pinatanidan ni Jesus an mga nagdadangog na may mga ‘putik na mataram laban sa sainda nin gabos na klase nin maraot na bagay.’ (Mat. 5:11) Ki Satanas hali an mga kaputikan na iyan. Iniimpluwensiyahan niya an mga parakontra na magpalakop nin mga pakaraot manungod sa mga namumuot sa katotoohan. (Kap. 12:9, 10) Dapat tang isikwal an mga kaputikan kan mga nagkokontra sato. Dai ta nanggad dapat tugutan an mga kaputikan na iyan na magin dahilan na matakot kita o magluya an satong pagtubod.—Basahon an 1 Juan 4:1.

17. Paano posibleng nakadisganar sa iba an mga pangyayari bago magadan si Jesus?

¹⁷ Kan madali na an kagadanan niya, trinaydor siya kan saro sa 12 apostol niya. Tulong beses man na ninigaran si Jesus nin saro pang apostol, asin binayaan siya kan gabos niyang apostol kan banggi bago siya magadan. (Mat. 26:14-16, 47, 56, 75) Dai iyan ikinabigla ni Jesus. Ihinula pa ngani niya na mangyayari iyan. (Juan 6:64; 13:21, 26, 38; 16:32) Kan mahiling iyan kan iba, posibleng ikinadisganar ninda iyan, na iniisip, ‘Kun arog man sana ka’yan an mga apostol ni Jesus, habo kong magin saro sainda!’

18. Anong mga propesiya an nautob bago magadan si Jesus?

¹⁸ Ano an sinasabi kan Kasuratan? Ginatos na taon bago kaiyan, ihinayag ni Jehova sa saiyang Tataramon na an Mesiyas tatrayduron sa kantidad na 30 pidasong pirak. (Zac. 11:12, 13) An matraydor saro sa dayupot na mga amigo ni Jesus. (Sal. 41:9) Isinurat man ni propeta Zacarias: ‘Salakaya an pastor . . . tanganing magkawararak an mga karnero.’ (Zac. 13:7, BPVb) Imbes na madisganar sa mga pangyayaring idto, mapapakusog an mga tawong sadiyosan an puso kan mga propesiyang iyan na nauutob ki Jesus.

19. Ano an aram kan mga tawong sadiyosan an puso?

¹⁹ Nahihiling ta daw ngunyan an problemang iyan? Iyo. Sa presenteng panahon, may pirang prominenteng Saksi na nagbaya sa katotoohan, nagin apostata, tapos pinurbaran na italikod an iba. Nagpapalakop sinda nin negatibong mga bareta, mga impormasyon na may salak na salang mga detalye, asin mga kaputikan manungod sa mga Saksi ni Jehova paagi sa news media asin sa Internet. Pero dai nagpapadara diyan an mga tawong sadiyosan an puso. Sa kabaliktaran, aram ninda na ihinula kan Bibliya na mangyayari an mga bagay na iyan.—Mat. 24:24; 2 Ped. 2:18-22.

20. Paano ta malilikayan na madara kan mga nagbaya sa katotoohan? (2 Timoteo 4:4, 5)

²⁰ Ano an dapat tang gibuhon para masigurado na nungka kitang pumundo sa paglilingkod ki Jehova? Kaipuhan tang pagdanayon na makusog an satong pagtubod paagi sa regular na pag-adal, padagos na pagpamibi, asin paagi sa pagdanay na sibot sa gibuhon na itinao sato ni Jehova. (Basahon an 2 Timoteo 4:4, 5.) Kun may pagtubod kita, dai kita mariribaraw pag nakakadangog nin negatibong mga bareta. (Isa. 28:16) Makakatabang sato an pagkamuot ta ki Jehova, sa saiyang Tataramon, saka sa satong mga tugang tanganing dai kita madara kan mga nagbaya sa katotoohan.

21. Dawa ngani habo sa mensahe ta an kadaklan na tawo ngunyan, sa ano kita makakapagtiwala?

²¹ Kan inot na siglo, dakul an nagsikwal ki Jesus. Pero dakul man an nag-ako saiya. Kaiba sainda an kisiyera sarong miyembro kan Judiong Sanhedrin asin pati ngani an sarong “dakulang bilang nin mga saserdote.” (Gibo 6:7; Mat. 27:57-60; Mar. 15:43) Iyo man ngunyan, minilyon an nag-aako sa mensahe ta. Taano? Dahil aram saka namumutan ninda an katotoohan na nasa Kasuratan. Sinasabi kan Tataramon nin Diyos: ‘Dakulang katuninungan an nakakamtan kan mga namumuot sa saimong katugunan; mayo nin makakapasingkog sa sainda.’—Sal. 119:165, BPV.