Urog Pa sa Pagigin Doktor an Nanumpungan Ko

Kan 1941, namundag ako sa Paris, France. Bakong mayaman an pamilya mi. Gustong-gusto kong mag-adal, kaya munduon talaga ako kaidtong diyes anyos ako ta kinaipuhan kong magpundo sa pagklase! Nagkahilang kaya ako nin tuberkulosis. Sinabi kan doktor na magpahingalo lang daa ako sa harong ta dai kaya ako dapat mapagal ta maluya an baga ko. Kaya sa laog nin pirang bulan, nagparabasa ako nin diksiyonaryo saka nagparadangog sa mga programa na pigbobrodkast sa Radio Sorbonne kan Unibersidad nin Paris. Ugmahon talaga ako kan sabihon na kan doktor na rahay na ako saka puwede na akong magklase giraray. Sabi ko sa sadiri ko, ‘Pambihira talaga an piggigibo kan mga doktor!’ Puon kaidto, nagin pangarap ko nang magpaumay nin mga tawong may hilang. Kaya pag hinahapot ako kaidto kan ama ko kun ano an pangarap ko pagdakula ko, an simbag ko pirmi, “Gusto ko pong magin doktor.” Kaya an pagigin doktor an nagin pinakamahalaga sa buhay ko.

Katoliko an pamilya mi. Pero mayo akong gayong aram manungod sa Diyos, saka kadakul akong hapot na dai nasisimbag. Saka lang ako nakumbinsir na linalang an buhay kan nagpuon na akong mag-adal nin pagigin doktor sa unibersidad.

Nagirumduman ko kan primero kong naobserbaran sa mikroskopyo an mga selula kan burak na tulip. Napahanga ako kun paano pinoprotektaran kan selula an sadiri kaini sa init asin lipot. Naobserbaran ko man an cytoplasm (sarong substansiya na nasa laog nin selula) na minakurupos pag nababantad sa asin tapos minadakula pag ilinalaag sa tubig. Dahil sa kakayahan na iyan saka sa dakul na iba pa, nagigibo kan mga organismo na makaadaptar sa nagbabagong kapalibutan. Kan mahiling ko kun gurano kakomplikado kan lambang selula, nakumbinsir ako na an buhay dai sana basta naglataw.

Kan second year na ako, dakul pang ebidensiya an nahiling ko na igwa talaga nin Diyos. Sa subject mi sa anatomy, pig-adalan mi kun paano nagigibo kan takyag ta na maitiko saka maitanos an satong mga muro. Makangangalas talaga an pagkaareglar kan mga kalamnan, ligament, saka tendon. Halimbawa, nanudan ko na su mga tendon na nakakonektar sa mga kalamnan sa takyag pasiring sa ikaduwang tulang kan muro nababanga sa duwa, na nagigin garo mga tulay na diyan minaduplas an saro pang tendon na nakakonektar sa puro kan muro. Pinagdadanay man kan makusog na mga tissue an mga tendon na harani sa mga tulang kan muro. Kun bakong arog kaini an pagkadisenyo kan mga muro, magigin higot saka tindido an mga tendon asin dai makakahiro na marhay an mga muro niyato. Nagin malinaw sako na igwa talaga nin madunong na nagdisenyo kan hawak nin tawo.

Lalo pa akong naghanga sa Disenyador nin buhay kaidtong pinag-aadalan ko an proseso sa panahon na namumundag an umboy. Nanudan ko na mantang nasa tulak pa an umboy, nakakakua siya nin oksiheno sa saiyang ina paagi sa pusod. Buot sabihon, an alveoli, an garo saraditon na mga lobo sa laog kan baga, dai pa nalalagan nin duros. Mga pirang semana bago ipangaki an umboy, igwa nin espesyal na likido na inaapod na surfactant na nagpoposisyon sa mga alveoli. Dangan pagkamundag kan umboy asin sa inot na paghangos niya, igwa nin makangangalas na mga bagay na nangyayari. Minasara an labot sa puso kan umboy. Dahil diyan minabulos an dugo pasiring sa baga. Sa mahalagang marhay na panahon na ini, nakakatabang an surfactant na dai magdurukutan an palibot kan alveoli mantang napapano iyan tulos nin duros. Kaya nakakaya man tulos kan umboy na maghangos sa sadiri niya.

Gusto kong mamidbid an Saro na naglalang kan siring na makangangalas na mga bagay, kaya sineryoso ko an pagbasa nin Bibliya. Nagkainteres akong marhay sa mga katugunan manungod sa kalinigan na kaiba sa tipan na ginibo nin Diyos sa nasyon nin Israel labing 3,000 na taon na an nakaagi. Ininstruksiyunan nin Diyos an mga Israelita na italbong an mga udo ninda, regular na linigan an sadiri gamit an tubig, asin ikuwarantina an siisay man na may mga sintomas nin nakakaulakit na hilang. (Lev. 13:50; 15:11; Deu. 23:13) Haloy nang sinasabi kan Bibliya kun paano nakakaulakit an hilang bago pa man iyan madiskubre kan mga siyentista kaining nakaaging mga siglo. Nasabutan ko man kun paano nakatabang an mga katugunan manungod sa seksuwal na kalinigan na mababasa sa libro nin Levitico para magin marahay an salud kan bilog na nasyon nin Israel. (Lev. 12:1-6; 15:16-24) Kaya nagin malinaw sako na itinao kan Kaglalang an mga katugunan na ini sa mga Israelita para sa saindang kapakanan asin binendisyunan niya an mga nagsusunod sa mga pagbuot niya. Nakumbinsir ako na an Bibliya ipinasabong nin Diyos—an Diyos na dai ko pa midbid kan panahon na idto.

Mantang ipinagpapadagos ko an pagklase sa pagigin doktor, namidbid ko an daragang si Lydie, na namutan ko. Ikinasal kami kan 1965 kan nangangabangaan ako sa pag-eskuwela. Kan 1971, ipinangaki na kaidto an ikatulo sa anom ming aki. Nagin marahayon na katuwang sako si Lydie, sa trabaho ko bilang doktor saka sa pamilya mi.

Nagtrabaho ako sa ospital nin tulong taon bago ako nagbukas nin sadiri kong klinika. Dai nahaloy, may nagpabulong na mag-agom, su duwang pasyente na sinambit ko sa kapinunan. Kan nagrereseta na ako para sa agom na lalaki, sinabi kan agom niya: “Dok, su bulong tabi na warang dugo ha?” Napangalas ako, sabi ko: “Sigurado kamo? Ta’no man?” Sabi niya: “Mga Saksi ni Jehova kaya kami.” Pakadangog ko pa lang kaidto manungod sa mga Saksi ni Jehova saka sa paninindugan ninda manungod sa dugo. Kinua kan babayi an Bibliya niya dangan ipinahiling sakuya an basehan sa Bibliya kan saindang piniling paagi nin pagbulong na dai naggagamit nin dugo. (Gibo 15:28, 29) Dangan ipinaliwanag pa sako kan mag-agom an gigibuhon kan Kahadian nin Diyos; hahalion kaiyan an pagsakit, hilang, saka kagadanan. (Kap. 21:3, 4) Maugmahon kong nasabi, “Iyan su pangarap ko kan aki pa ako! Kaya ngani ako nagdoktor ta gusto kong tabangan an mga tawo sa mga pagsakit ninda.” Ugmahon talaga ako kaya inabot nin saro may kabangang oras an pag-uulay mi. Paghali kan mag-agom, sa buot-buot ko habo ko nang mag-Katoliko. Tapos nanudan ko na an Kaglalang na hinahangaan ko igwa palan nin pangaran—Jehova!

Tulong beses na nagduduman sa klinika ko su mag-agom na Saksi, asin sa kada pagduman ninda mga lampas sarong oras kaming nag-uurulay. Inimbitaran ko sinda sa harong mi para mas dakul an oras ming mapag-ulayan an Bibliya. Dawa ngani nag-uyon si Lydie na mag-iba samo sa pag-adal nin Bibliya, dai siya uyon na sala an nagkapira sa mga doktrina kan Katoliko na itinukdo samo. Kaya inimbitaran ko sa harong mi an sarong padi. Sagkod matangang banggi ming pinagdebatehan, na Bibliya sana an gamit, an manungod sa katukduan kan simbahan. Nakumbinsir si Lydie sa pag-urulay na iyan na an itinutukdo kan mga Saksi ni Jehova iyo an katotoohan. Pagkatapos kaiyan, mas lalo mi pang namutan an Diyos na Jehova sagkod sa punto na sabay na kaming nagpabawtismo kan 1974.

Dakula an nagin epekto sa mga priyoridad ko kan mga nanudan ko manungod sa katuyuhan nin Diyos para sa katawuhan. Nagin panginot sa buhay mi ni Lydie an paglilingkod ki Jehova. Determinado ming pinadakula an mga aki mi kauyon kan mga pamantayan kan Bibliya. Tinukduan mi sinda na mamutan an Diyos asin an satong kapwa. Huli kaiyan mas nagin dayupot kami sa kada saro bilang pamilya.—Mat. 22:37-39.

Nagigirumduman ko pa, parati kami kaidtong napapangirit ni Lydie sa kun paano naririsa kan mga aki mi na pirmi kaming magkauyon sa mga desisyon mi bilang mga magurang ninda. Aram nindang patakaran sa harong mi an instruksiyon ni Jesus na “siyertuhon . . . nindo na an saindong ‘Iyo’ mangahulugan nin iyo, asin an saindong ‘Dai,’ dai.” (Mat. 5:37) Halimbawa sarong beses, kaidtong 17 anyos na su pinakamatua ming aking babayi, dai siya tinugutan ni Lydie na magluwas kaiba kan sarong grupo nin mga hoben. Saro sa grupong idto an nagsabi sa aki mi, “Kun habo kang tugutan ni Mama mo, di ki Papa mo ika magpaaram!” Pero sabi kan aki mi: “Pareho man lang. Dai man ako kaiyan tutugutan ni Papa.” Iyo, aram kan anom ming aki na magkauyon kami ni agom sa pag-aplikar kan mga prinsipyo sa Bibliya. Nagpapasalamat kami ki Jehova na dakul sa mga kapamilya mi ngunyan an naglilingkod ki Jehova.

Maski ngani binago kan katotoohan an mga priyoridad ko, gusto ko man giraray na magamit an mga nanudan ko bilang doktor para makatabang sa mga lingkod nin Diyos. Kaya, nagboluntaryo ako na maglingkod bilang doktor sa Bethel sa Paris asin kan huri sa bagong Bethel sa Louviers. Haros 50 taon na akong commuter volunteer sa Bethel. Sa pagboboluntaryo ko, nagkaigwa ako nin nagkapirang dayupot na amigo sa pamilyang Bethel, na an pira sa sainda mga 90 anyos na. Tapos nasurpresa ako sarong aldaw kan may mabisto akong sarong baguhan na Bethelite. Naaraman ko na ako palan su nagpaaki ki Mama niya kan iminundag siya mga 20 taon na an nakaagi!

Sa paglihis nin mga taon, lalo ko pang namutan si Jehova mantang nahihiling ko kun paano niya ginigiyahan saka pinoprotektaran an saiyang banwaan paagi sa saiyang organisasyon. Sa kapinunan kan dekada nin 1980, nag-areglo an Namamahalang Grupo nin sarong programa sa Estados Unidos para matabangan an mga doktor asin medical personnel na mas masabutan an desisyon kan mga pasyenteng Saksi kun manungod sa pagbulong na may kalabot na dugo.

Dangan kan 1988, nagbilog an Namamahalang Grupo nin sarong bagong departamento sa Bethel na inaapod na Hospital Information Services. Kan primero, an departamentong ini an may superbisyon sa mga Hospital Liaison Committee (HLC) na binilog sa Estados Unidos para tabangan an mga pasyenteng Saksi na makahanap nin mga doktor na iginagalang an paninindugan ta manungod sa dugo. Kan magkaigwa na nin arog kaiyan na areglo sa iba pang mga nasyon, nagkaigwa na man nin mga HLC sa France. Napapahanga talaga ako pag nahihiling ko kun paano mamumuton na tinatabangan kan organisasyon ni Jehova an may hilang na mga tugang sa panahon na nangangaipo sinda nin tabang!

Dati, an pagigin doktor an pinakamahalaga sa buhay ko. Pero kan pinag-isipan ko an sakong mga priyoridad, narealisar ko na an pinakamahalagang pagpaumay bako sa pisikal kundi sa espirituwal—an pagtabang sa mga tawo na mamidbid asin paglingkudan an Burabod nin buhay, an Diyos na Jehova. Kan magretiro ako, dakul na oras kami ni Lydie na naghuhulit kan maugmang bareta kan Kahadian nin Diyos kada bulan bilang mga regular payunir. Sa ngunyan, nagpapartisipar pa man giraray kami sa abot kan makakaya mi sa nagliligtas-buhay na gibuhon na ini.

Padagos kong ginigibo an makakaya ko para magtao nin temporaryong tabang sa mga may hilang. Pero narealisar ko na dai kaya dawa kan pinakamahusay nang doktor na bulungon an gabos na hilang o pugulan an kagadanan. Kaya hinahalat-halat ko an panahon na mawawara na an kulog, hilang, asin kagadanan. Sa bagong kinaban na madali nang mag-abot, dakulon na akong panahon para pag-adalan an manungod sa mga linalang nin Diyos, pati na an makangangalas na pagkadisenyo niya kan hawak nin tawo. Iyo, may mga nagkatotoo na sa mga pangarap ko kan aki pa ako. Pero kumbinsido ako na may pinakamarahay pa na maabot!