“Papakusugon Niya Kamo”​—Paano?

 1. Paano pinakusog nin Diyos an mga parasamba niya kan suanoy na panahon?

SA PARATI ilinaladawan kan Tataramon nin Diyos an maimbod na mga lingkod niya bilang makusog na mga tawo. Pero dawa an pinakamakusog sa sainda dai pirming nakakamati na makusog sinda. Halimbawa, sa nagkapirang pagkakataon namati ni Hading David na ‘makusog siya arog sa sarong bukid,’ pero sa iba man na pagkakataon “natakot” siya. (Sal. 30:7) Minsan ngani pambihirang marhay an kusog ni Samson kan siya pinahiro kan espiritu nin Diyos, aram niya na kun mayo an kapangyarihan na hali sa Diyos, “mangruruluya [siya] asin magigin kapareho kan gabos na iba pang tawo.” (Huk. 14:5, 6; 16:17) An maimbod na mga lingkod na ini nagin makusog sana huling tinawan sinda ni Jehova nin kusog.

 2. Taano ta sinabi ni apostol Pablo na maluya siya saka makusog? (2 Corinto 12:9, 10)

² Sinabi ni apostol Pablo na kaipuhan niya man an kusog na hali ki Jehova. (Basahon an 2 Corinto 12:9, 10.) Arog kan dakul sa sato, napaatubang si Pablo sa mga problema sa salud. (Gal. 4:13, 14) Kun beses, nasakitan man siyang gibuhon an tama. (Roma 7:18, 19) Asin kun minsan, nahadit asin natakot siya sa kun ano an puwedeng mangyari saiya. (2 Cor. 1:8, 9) Alagad, kan maluya si Pablo, nagin siyang makusog. Paano? Itinao ni Jehova ki Pablo an kusog na kaipuhan kaini. Pinakusog niya si Pablo.

 3. Anong mga hapot an sisimbagon ta sa artikulong ini?

³ Nanunuga si Jehova na papakusugon niya man kita. (1 Ped. 5:10) Pero dai kita makakaasa na itatao niya an kusog na iyan kun dai kita magibo nin ano man na paghihinguwa. Para iilustrar, an sarong makina puwedeng magtao nin puwersa sa awto para dumalagan ini. Minsan siring, dapat na duunan kan drayber an silinyador para makaabot siya sa gusto niyang dumanan. Sa kaagid na paagi, andam si Jehova na itao sato an kusog na kaipuhan niyato, pero dapat kitang gumibo nin mga lakdang para makinabang diyan. Ano na an itinao ni Jehova sa sato para pakusugon kita? Asin ano an kaipuhan tang gibuhon para akuon an kusog na iyan? Maaaraman ta an simbag sa mga hapot na iyan paagi sa pagkonsiderar kun paano pinakusog ni Jehova an tulong karakter sa Bibliya​—si propeta Jonas, si Maria na ina ni Jesus, asin si apostol Pablo. Maaaraman ta man kun paano padagos na pinapakusog ni Jehova an saiyang mga lingkod ngunyan sa kaparehong mga paagi.

 4. Paano kita mag-aako nin kusog hali ki Jehova?

⁴ An sarong paagi na mag-aako kita nin kusog hali ki Jehova iyo an pagdulok sa saiya sa pamibi. Bilang simbag sa satong mga pamibi, puwedeng itao sa sato ni Jehova “an puwersa na urog kisa sa ordinaryo.” (2 Cor. 4:7) Mapapakusog man kita pag binabasa ta an saiyang Tataramon asin hinuhurop-hurop iyan. (Sal. 86:11) An mensahe ni Jehova sa sato na yaon sa Bibliya “igwa nin puwersa.” (Heb. 4:12) Pag namimibi ka ki Jehova asin binabasa an saiyang Tataramon, mag-aako ka kan kusog na kinakaipuhan mo para makatagal, para mapagdanay an saimong kaugmahan, o para magibo an sarong dipisil na asignasyon. Mangnuhon kun paano ni Jehova pinakusog si propeta Jonas.

 5. Taano ta kinaipuhan ni propeta Jonas nin kusog?

⁵ Si propeta Jonas nangaipo nin kusog. Dinulagan niya an sarong dipisil na asignasyon na itinao sa saiya ni Jehova. Bilang resulta, dikit-dikitan pa siyang magadan huli sa sarong makusugon na bagyo asin isinapeligro niya an buhay kan mga kairiba niya sa barko. Kan ihinulog siya sa dagat, napaduman siya sa sarong lugar na dai pa lamang niya nadudumanan​—sa laog kan madiklom na tulak nin sarong dakulaon na sira. Sa hiling mo, ano an namatian ni Jonas? Inasahan daw niya na magagadan siya duman? Inisip niya daw kun baga binayaan na siya ni Jehova? Siguradong nahadit na marhay si Jonas.

 6. Uyon sa Jonas 2:1, 2, 7, ano an nakapakusog ki Jonas mantang yaon siya sa tulak kan sira?

⁶ Ano an ginibo ni Jonas para mag-ako nin kusog kan yaon siya sa tulak kan sira? Namibi siya. (Basahon an Jonas 2:1, 2, 7.) Dawa ngani dai ni Jonas sinunod si Jehova, tiwala siya na dadangugon ni Jehova an mapakumbaba asin may pagsulsol na pamibi niya. Hinurop-hurop niya man an Kasuratan. Taano ta masasabi ta iyan? Sa saiyang pamibi na mababasa sa Jonas kapitulo 2, naggamit siya nin dakul na mga tataramon asin mga frase na kapareho kan yaon sa Mga Salmo. (Halimbawa, ikumparar an Jonas 2:2, 5 sa Salmo 69:1; 86:7.) Minalataw na aram na marhay ni Jonas an mga porsiyon na iyan kan Kasuratan. Asin paagi sa paghurop-hurop sa mga iyan durante kan saiyang pagsakit, naasigurar giraray siya na tatabangan siya ni Jehova. Dai nahaloy, ibinalik si Jonas sa baybayon, asin andam na niyang akuon saka utubon an sunod niyang asignasyon.​—Jon. 2:10–3:4.

7-8. Paano an sarong brother sa Taiwan nag-ako nin kusog kan mapaatubang siya sa mga problema?

⁷ An halimbawa ni Jonas makakatabang sa sato pag may inaagihan kitang manlain-lain na problema. Halimbawa, si Zhiming,b sarong brother sa Taiwan, nagsasakit huli sa grabeng mga problema sa salud. Apuwera kaiyan, kaipuhan niyang tagalan an madahas na pagkontra kan saiyang mga kapamilya huli sa pagtubod niya ki Jehova. Nagkukua siya nin kusog ki Jehova paagi sa pamibi asin pag-adal. “Kun minsan, pag may minalataw na mga problema,” an pag-admitir niya, “haditon akong marhay asin nasasakitan akong magin kalmado kaya dai ko magibo na mag-personal study.” Pero dai siya minasuko. “Inot, namimibi ako ki Jehova,” sabi niya. “Tapos, nag-e-earphone ako asin nagdadangog kan satong mga kantang pang-Kahadian. Kun beses, kinakanta ko pa ngani an mga iyan sa maluyang boses sagkod na magin kalmado na ako. Dangan nagpupuon na akong mag-adal.”

⁸ Paagi sa personal study, napakusog si Zhiming sa dai inaasahan na mga paagi. Halimbawa, mantang nagre-recover siya hali sa sarong mayor na operasyon, sarong nars an nagsabi saiya na dahil sa hababang bilang kan saiyang pulang mga selula nin dugo, kaipuhan niyang magpasalin nin dugo. Kan banggi bago siya operaran, binasa ni Zhiming an manungod sa sarong sister na nag-agi nin kaparehong operasyon. An bilang kan pulang mga selula nin dugo kan sister nagin mas hababaon pa ngani kisa kan sa saiya; alagad, dai ini nagpasalin nin dugo asin naka-recover ini. An eksperyensiyang iyan nakapakusog ki Zhiming na magdanay na maimbod.

 9. Kun nangluluya ka huli sa sarong pagbalo, ano an puwede mong gibuhon? (Hilingon man an mga ritrato.)

⁹ Durante nin pagbalo, nahadit ka na daw na marhay kaya haros dai mo na masabi sa pamibi an nasa buot mo? O nangruruluya ka nang biyo kaya dai ka na makapag-adal? Girumdumon na lubos na nasasabutan ni Jehova an saimong sitwasyon. Kaya dawa halipot lang an saimong pamibi, makakasigurado ka na itatao niya sa saimo an talagang kaipuhan mo. (Efe. 3:20) Kun magin masakit para saimo na magbasa o mag-adal dahil sa kulog na namamatian mo sa pisikal o emosyonal, tibaad puwede mong purbaran na magdangog nin mga audio recording kan Bibliya o kan basado sa Bibliyang mga publikasyon. Tibaad makatabang man saimo an pagdangog sa saro sa satong mga kanta o paghiling nin video sa jw.org. Paagi sa pagpamibi ki Jehova asin sa paghanap kan simbag sa espirituwal na mga probisyon na itinatao niya sato, hinahagad mo sa saiya na pakusugon ka.

10. Paano kita pinapakusog kan satong Kristiyanong mga tugang?

¹⁰ Puwedeng gamiton ni Jehova an satong Kristiyanong mga tugang para pakusugon kita. Puwede sindang magin “dakulang karangahan” pag napapaatubang kita sa pagbalo o nasasakitan kitang gibuhon an sarong dipisil na asignasyon. (Col. 4:10, 11) Kaipuhan ta nin mga amigo lalong-lalo na sa “mga panahon nin kasakitan.” (Tal. 17:17) Pag pinangluluyahan kita, matatabangan kita sa pisikal, emosyonal, asin espirituwal kan satong mga kapagtubod. Pag-isipan kun paano si Maria, na ina ni Jesus, nag-ako nin kusog hali sa iba.

11. Taano ta nangaipo nin kusog si Maria?

¹¹ Si Maria nangaipo nin kusog. Isipa na sana an grabeng namatian niya kan maresibi niya an sarong magabat na asignasyon hali sa anghel na si Gabriel. Mayo siyang agom; alagad, magbabados siya. Mayo siya nin eksperyensiya sa pagpadakula nin sadiri niyang aki, pero aatamanon niya an sarong aking lalaki na iyo an magigin Mesiyas. Asin huling dai pa lamang si Maria nakikidurog, paano niya ipapaliwanag an gabos na ini sa saiyang katratong si Jose?​—Luc. 1:26-33.

12. Uyon sa Lucas 1:39-45, paano si Maria nag-ako nin kusog na kaipuhan niya?

¹² Paano si Maria nag-ako nin kusog na kaipuhan niya para magibo an pambihira asin magabat na asignasyon na ini? Naghagad siya nin tabang sa iba. Halimbawa, naghagad siya ki Gabriel nin dagdag na impormasyon manungod sa asignasyon. (Luc. 1:34) Dai nahaloy pakalihis kaiyan, nagbaklay siya pasiring sa “mabulod na rehiyon” kan Juda para bisitahon an paryente niyang si Elizabeth. Nagin marahay an pagbisitang iyan. Kinomendaran ni Elizabeth si Maria asin pinasabngan siya ni Jehova na ihiras an sarong nakakapakusog na propesiya manungod sa dai pa namumundag na umboy ni Maria. (Basahon an Lucas 1:39-45.) Sinabi ni Maria na “ipinahiling [ni Jehova] an saiyang kapangyarihan paagi sa saiyang takyag.” (Luc. 1:46-51) Paagi ki Gabriel asin ki Elizabeth, pinakusog ni Jehova si Maria.

13. Paano nakinabang an sarong sister sa Bolivia huli sa paghagad niya nin tabang sa mga kapagtubod?

¹³ Arog ni Maria, puwede ka man na makakua nin kusog hali sa saimong mga kapagtubod. Si Dasuri, sarong sister sa Bolivia, nangaipo nin arog kaiyan na kusog. Kan an saiyang ama ma-diagnose na igwa nin nakakagadan na hilang asin maospital, nagin andam si Dasuri na akuon an responsabilidad na atamanon ini. (1 Tim. 5:4) Bako iyan pirming pasil. Inadmitir niya, “Dakul na beses na namatian kong garo dai ko na kayang magpadagos.” Naghagad daw siya nin tabang? Kan primero, dai. “Habo kong maabala an mga tugang,” an paliwanag niya. “An rason ko, ‘Si Jehova an matao sako kan tabang na kaipuhan ko.’ Pero narealisar ko na paagi sa pagsuway ko kan sakong sadiri sa iba, inaatubang ko nin solo an mga problema ko.” (Tal. 18:1) Nagdesisyon si Dasuri na magsurat sa pira sa mga amigo niya asin sabihon an saiyang sitwasyon. “Dai ko lubos na maipaliwanag kun gurano ako napakusog kan sakong namumutan na mga kapwa Kristiyano,” an sabi niya. “Nagdara sinda nin kakanon sa ospital saka naghiras sako nin nakakarangang mga teksto sa Bibliya. Magayunon nanggad sa pagmati na maaraman na dai kita nagsosolo. Kabilang kita sa dakulang pamilya ni Jehova​—sarong pamilya na andam na magtabang saimo, makidamay saimo, asin magsurog sa saimo.”

14. Taano ta dapat tang akuon an tabang kan mga elder?

¹⁴ An sarong paagi na nagtatao si Jehova nin kusog sa sato iyo an pagtabang kan mga elder. Mga balaog sinda na ginagamit niya para pakusugon asin paginhawahon kita. (Isa. 32:1, 2) Kaya pag nakakamati ka nin kahaditan, sabihon mo sa mga elder an manungod diyan. Pag nag-alok sinda nin tabang saimo, mapagpasalamat na akuon iyan. Paagi sainda, mapapakusog ka ni Jehova.

15. Anong paglaom an pinapahalagahan na marhay kan gabos na Kristiyano?

¹⁵ An satong paglaom na basado sa Bibliya makakapakusog sa sato. (Roma 4:3, 18-20) Bilang mga Kristiyano, igwa kita kan paglaom na daing kaagid an halaga​—an mabuhay nin daing sagkod sa ibinalik na paraiso sa daga o sa Kahadian sa langit. An satuyang paglaom nagpapakusog sa sato na tagalan an mga pagbalo, ihulit an maugmang bareta, asin gibuhon an manlain-lain na asignasyon sa laog kan kongregasyon. (1 Tes. 1:3) An paglaom man na iyan an nagpakusog ki apostol Pablo.

16. Taano ta kinaipuhan ni apostol Pablo nin kusog?

¹⁶ Kinaipuhan ni Pablo nin kusog. Sa saiyang surat sa mga taga Corinto, ikinumparar niya an saiyang sadiri sa mapapasaon na lalagan na dalipay. Siya ‘ginipit nin grabe,’ ‘naribaraw,’ ‘pinersegir,’ asin “bagsak na.” May mga pagkakataon pa ngani na nameligro an buhay niya. (2 Cor. 4:8-10) Isinurat ni Pablo an mga tataramon na iyan durante kan saiyang ikatulong pagbiyahe bilang misyonero. Tibaad dai pa niya aram kan panahon na idto na dakul pang masakit na sitwasyon an aatubangon niya. Mapapaatubang pa siya sa sururog na pag-atake, pag-arestar, paglubog nin barko, asin pagkapreso.

17. Uyon sa 2 Corinto 4:16-18, ano an nagpakusog ki Pablo para tagalan an mga pagbalo?

¹⁷ Nagkua si Pablo nin kusog para makatagal paagi sa pagpokus sa saiyang paglaom. (Basahon an 2 Corinto 4:16-18.) Sinabi niya sa mga taga Corinto na dawa “luway-luway na nangluluya” an saiyang pisikal na hawak, dai niya iyan tutugutan na makapadisganar sa saiya. Nagpokus si Pablo sa saiyang puturo. An saiyang paglaom na buhay na daing sagkod sa langit “lalong nag-uurog nin nag-uurog,” kaya sulit an ano man na pagsakit na inagihan niya. Hinurop-hurop ni Pablo an paglaom na iyan, asin bilang resulta, “[nagkaigwa siya] nin panibagong kusog sa kada aldaw.”

18. Paano napakusog kan paglaom si Tihomir saka an saiyang pamilya?

¹⁸ Si Tihomir, sarong brother na taga Bulgaria, nakakua nin kusog sa saiyang paglaom. Mga pirang taon na an nakaagi, an saiyang nguhod na tugang na lalaki, si Zdravko, nagadan sa sarong aksidente. Pagkatapos kaiyan, medyo haloy na nasakitan si Tihomir na labanan an grabeng pagmundo. Para makayanan iyan, inimahinar niya saka kan saiyang pamilya kun paano mangyayari an pagkabuhay liwat. Ipinaliwanag niya: “Halimbawa, pinag-uulayan mi kun sain mi sasabaton si Zdravko, kun anong pagkakan an ihahanda mi sa saiya, kun sairisay an mga iimbitaran sa pinakainot na party pag nagbalik na siya, asin kun ano an iiistorya mi saiya manungod sa huring mga aldaw.” Sinabi ni Tihomir na an pagpokus sa saindang paglaom an nagpapakusog sa saiyang pamilya na padagos na magtagal asin padagos na halaton an panahon na itinalaan ni Jehova para buhayon liwat an saiyang tugang.

19. Ano an puwede mong gibuhon para pakusugon an saimong paglaom? (Hilingon man an ritrato.)

¹⁹ Paano mo mapapakusog an saimong paglaom? Halimbawa, kun an paglaom mo iyo na mabuhay nin daing sagkod digdi sa daga, basahon an paglaladawan kan Bibliya manungod sa Paraiso asin hurop-hurupon iyan. (Isa. 25:8; 32:16-18) Isip-isipon kun ano an magigin buhay sa bagong kinaban. Imahinaron na yaon ka duman. Sairisay an nahihiling mo? Anong mga tanog an nadadangog mo? Ano an namamatian mo? Para mapukaw an saimong imahinasyon, hilingon an mga artwork sa satong mga publikasyon na ilinaladawan an Paraiso o hilingon an sarong music video, arog kan Sa Bagong Kinaban, Natatanaw Na, o Imahinara an Paglaom Ta. Kun padagos tang isinasaisip an paglaom manungod sa bagong kinaban, an satong mga problema ‘maagi sana asin magigin magian.’ (2 Cor. 4:17) Papakusugon ka ni Jehova paagi sa paglaom na itinatao niya sa saimo.

20. Dawa pag nangruruluya kita, paano kita makakakua nin kusog?

²⁰ Dawa pag nangruruluya kita, “paagi sa Diyos magkakamit [kita] nin puwersa.” (Sal. 108:13) Itinao na ni Jehova an kaipuhan mo para mag-ako ka nin kusog hali sa saiya. Kaya pag kaipuhan mo nin tabang para magibo an asignasyon, para matagalan an pagbalo, o para mapagdanay an saimong kaugmahan, dumulok ki Jehova paagi sa udok na pamibi asin hagadon an saiyang paggiya paagi sa personal na pag-adal. Akuon an pampakusog na hali sa saimong Kristiyanong mga tugang. Papagdanayon na malinaw asin buhay na buhay sa isip an saimong paglaom. Sa siring, “[tatawan] kamo kan gabos na kusog na kaipuhan nindo paagi sa . . . mamuraway na kapangyarihan [nin Diyos] tanganing lubos kamong makatagal na may pagpapasensiya asin kaugmahan.”​—Col. 1:11.