Ano an Sinasabi kan Bibliya Dapit sa Pasko nin Pagkabuhay (Easter)?

Bakong basado sa Bibliya an pagselebrar kan Pasko nin Pagkabuhay. Kun hihilingon an kasaysayan kaiyan, maririsa mo an tunay na kahulugan kan Pasko nin Pagkabuhay—tradisyon iyan na basado sa suanoy na mga ritwal sa pagkamainaki. Pag-isipan an minasunod:

1. Apod: An Encyclopædia Britannica nagsasabi: “Dai sigurado an pinaghalian kan terminong Ingles na Easter; sigun sa sarong pading Anglo-Saxon kan ika-8 siglo na si Venerable Bede, kinua iyan sa pangaran kan diyosa nin tigsuli na si Eostre.” Ikinokonektar man iyan kan iba sa diyosa nin pagkamainaki kan mga taga Fenicia na si Astarte, na igwa nin katumbas sa Babilonya, an diyosang si Istar.

2. Kuneho: Simbolo ini nin pagkamainaki na “hali pa sa suanoy na mga seremonya asin simbolismo nin paganong mga kapiyestahan nin tigsuli kan mga taga Europa asin mga taga Middle East.”—Encyclopædia Britannica.

3. Easter Egg: Sigun sa Funk & Wagnalls Standard Dictionary of Folklore, Mythology and Legend, an paghanap nin mga Easter egg, na sinasabing dara kan kuneho pag panahon nin Pasko nin Pagkabuhay, “bako sanang kurukarawat nin mga aki, kundi gira pa nin sarong ritwal sa pagkamainaki.” Sa ibang kultura, pinapaniwalaan na an mga sugok na linagan nin mga disenyo “puwedeng milagrosong magdara nin kaugmahan, prosperidad, marahay na salud, asin proteksiyon.”—Traditional Festivals.

4. Bagong bado pag Pasko nin Pagkabuhay: “Ibinibilang na kawaran nin paggalang asin malas kun bakong bago an bado nin saro pag binati niya an diyosa nin Tigsuli, o Eastre kan mga taga Scandinavia.”—The Giant Book of Superstitions.

5. Mga ritwal may koneksiyon sa pagsirang kan saldang: Ikinokonektar an mga ini sa mga ritwal kan suanoy na mga nagsasamba sa saldang na “ginigibo pag vernal equinox sa pagsabat sa saldang asin sa dakulang kapangyarihan kaiyan na magtao nin bagong buhay sa gabos na bagay na nagtatalubo.”—Celebrations—The Complete Book of American Holidays.

Malinaw an pagkapaliwanag kan The American Book of Days mapadapit sa ginikanan kan Pasko nin Pagkabuhay: “Mayong duda na sa mga inot na taon kan Simbahan, inako kaiyan an suanoy na paganong mga kaugalian asin ikinonektar an mga iyan sa Kristiyanismo.”

Nagpapatanid an Bibliya dapit sa pagsamba sa Diyos paagi sa pagsunod sa mga tradisyon o kaugalian na dai niya inuuyunan. (Marcos 7:6-8) Sinasabi kan 2 Corinto 6:17: “‘Isuway nindo an saindong sadiri,’ an sabi ni Jehova, ‘asin ipundo nindo an pagdutdot kan maating bagay.’” An Pasko nin Pagkabuhay sarong paganong selebrasyon na dai iseselebrar kan mga gustong mapaugma an Diyos.