Sarong Kakaibang Pantabang sa Pag-adal sa Bibliya

Kan Enero 2021, ipinaisi kan Namamahalang Grupo an pag-release kan bagong pantabang sa pag-adal sa Bibliya, an Mabuhay nin Maugma Sagkod Pa Man!a Ano an nagin reaksiyon mo sa paising iyan? Si Matthew, na taga Canada, nagsabi: “Excited ako! Tapos mas lalo pa akong nagin excited kan madangog ko an mga pahayag saka mahiling ko an mga video na nagpapaliwanag kun taano ta ginibo an publikasyon saka kun paano iyan pig-testing. Dai na ako makahalat na mahiling iyan saka punan na iyan na gamiton.”

Dahil sa Mabuhay nin Maugma Sagkod Pa Man! nagkaigwa nin bagong paagi nin pagkondukta nin mga pag-adal sa Bibliya. Pero, bako sana iyan an pagkakaiba kan bagong libro saka kan dating mga pantabang sa pag-adal. Kun naggagamit ka kan imprentadong kopya kan Mabuhay nin Maugma Sagkod Pa Man! puwedeng narisa mo na medyo naiiba an pagkadisenyo kaiyan. Para maaraman kun taano, aramon ta kun paano ginibo an libro.

Mas mahibog na papel. Taano ta kinaipuhan ini? An Mabuhay nin Maugma Sagkod Pa Man! igwa nin labing 600 na makukulor na ritrato, na haros sampulong beses na mas dakul kisa kan sa librong Itinutukdo Sato! An bagong libro igwa man nin mas dakul na white space—mga parte na mayo nin letra o artwork—sa mga pahina kaiyan. Huli sa duwang feature na iyan, nagkakaigwa nin problema: Pag manipis an papel, an mga ritrato sa likod kan pahina puwedeng masilag. Para malikayan iyan, an mga brother sa International Printing Department (IPD), sa Wallkill, New York, U.S.A., nagtesting nin apat na klase nin papel na ginagamit na sa satong mga imprentahan. Hiniling kan Writing Committee kan Namamahalang Grupo an kada sampol saka pinili an pinakabakong silag na papel. Dawa ngani an papel na ini mas mahal nin mga 16 porsiyento kisa sa papel na ginagamit ta sa kadaklan kan satong iba pang mga publikasyon, nakatabang iyan sa mga tinutukduan sa Bibliya na makapagpokus sa kada pahina kan Mabuhay nin Maugma Sagkod Pa Man! ta dai silag an mga ritrato sa likod kan papel.

Naiibang laminate kan cover. Pag kinaputan mo an cover kan bagong libro, maririsa mo na naiiba iyan sa mga cover kan iba ta pang mga libro dahil igwa iyan nin naiibang laminate, o protective film. Imbes na maggamit nin normal gloss laminate, an bagong libro igwa nin matte laminate, kaya nagin mas risang-risa an artwork sa cover. An laminate nakakatabang man na protektaran an libro tanganing dai tulos iyan maluma dawa parating ginagamit. Pero, an matte laminate puwedeng magin mas mahal nin limang doble kisa sa gloss laminate. Kaya an nagkapirang sangang opisina nagtarabangan para makabakal nin mas baratong matte laminate.

Taano ta pinili an mas mahal na mga materyales na ini? Ipinaliwanag kan sarong brother na nagtatrabaho sa IPD: “Inaasahan ming pirming gagamiton an librong ini, kaya gusto ming magdanay ini na presentable dawa na pauruutrong ginagamit.” Si Eduardo, na nagtatrabaho sa Printery Office sa sangang opisina sa Brazil, nagsabi: “Ugmahon kami na an organisasyon ni Jehova naggamit nin de-kalidad na mga materyales para magin magayon an librong ini, matagal, asin magayon gamiton, pero sa ibong kaiyan, nagamit an mga donasyon sa madunong na paagi.”

Pinunan mi kan Marso 2021 an pag-imprenta kan Mabuhay nin Maugma Sagkod Pa Man! May mga kadipisilan huling igwa nin COVID-19 na pandemya. Dahil naka-lockdown an Bethel, mayo nin mga Bethel commuter na nagtatabang sa satong mga imprentahan, asin dai man makaimbitar nin mga tugang para magin Bethelite. Bilang resulta, may mga imprentahan na kulang an mga matrabaho, asin an iba man temporaryong isinara dahil sa mga restriksiyon kan gobyerno.

Paano napangganahan an mga kadipisilan na iyan? Kan puwede nang gamiton an mga imprentahan, an mga tugang hali sa ibang departamento kan Bethel iinasignar nguna na magtabang sa pag-imprenta. “An pagigi nindang mapagsakripisyo saka an pagigin andam na mag-adal nin bagong mga asignasyon mahalagang marhay para magibo mi an trabaho,” an sabi ni Joel, na nagtatrabaho sa IPD.

Sa ibong kan mga kadipisilan, nakapag-imprenta na kita nin minilyon na kopya kan Mabuhay nin Maugma Sagkod Pa Man! An pag-imprenta kaiyan nangangaipo nin manlain-lain na materyales, kaiba na an mga printing plate, laminate film, papel, tinta, asin pandukot. Sa inot na limang bulan sana nin pag-imprenta, labing $2.3 milyon (U.S.) an nagastos sa mga materyales pa sana. Para makatipid, an bilang kan mga librong pig-imprenta mi iyo sana idtong talagang kaipuhan kan mga kongregasyon.

Ano an masasabi kan mga paratukdo sa Bibliya saka kan saindang mga tinutukduan manungod sa bagong pantabang na ini sa pag-adal sa Bibliya? Si Paul, sarong brother sa Australia, nagsabi: “Magayunon gamiton an Mabuhay nin Maugma Sagkod Pa Man! kaya nagin excited ako na magkondukta nin mga pag-adal sa Bibliya. Nakakaengganyar an layout kan libro asin talagang interactive iyan. Mahusayon an kumbinasyon kan malinaw na mga punto, nakakataros sa puso na mga hapot, mga video, ritrato, tsart, saka mga pasuhan para sa tinutukduan. Saro ining obra-maestra na nagmomotibar sa sako na pauswagon an pagtutukdo ko.”

Sarong tinutukduan sa Bibliya sa Estados Unidos an nagsabi: “Gustuhon ko an bagong libro. Nakakatabang sako an mga artwork na maintindihan an panginot na mga punto. Natataros an puso ko kan mga video saka namomotibar ako kaiyan na humiro.” An tinutukduan na iyan duwang beses na nag-aadal kada semana asin regular na nag-aatender sa mga pagtiripon kan kongregasyon.

Minilyon na kopya pa kan Mabuhay nin Maugma Sagkod Pa Man! an iimprentahon sa dakul na lengguwahe. Sa katunayan, sa ngunyan, inaprubaran kan Namamahalang Grupo an pagpublikar kan librong ini sa 710 na lengguwahe, na mas dakul nin 340 kisa sa librong Itinutukdo Sato!

Sain kinukua an panggastos sa mga pag-imprenta? Sa mga donasyon sa pambilog na kinaban na gibuhon, na an kadaklan idinodonar paagi sa donate.jw.org. Nagpapasalamat kami sa saindong pagigin bukas-palad, na nakakatabang samo na makaprodusir nin mga pantabang sa pag-adal sa Bibliya para sa mga gustong makanuod manungod ki Jehova asin “mabuhay . . . nin daing sagkod.”—Salmo 22:26.