Pag-andam nin mga Pahayag Para sa Kongregasyon

AN PROGRAMA kan Teokratikong Paadalan sa Pagmiministro ginibo tanganing makinabang an bilog na kongregasyon. May iinaatubang man na mahalagang impormasyon sa ibang pagtiripon kan kongregasyon saka sa mga asamblea asin kombension. Kun naasignaran kamo nin kabtang sa saro kan mga programang ini, tinawan kamo nin magabat na paninimbagan. Sinadol ni apostol Pablo an Kristianong paraataman na si Timoteo na pirmeng atenderan an saiyang pagtotokdo. (1 Tim. 4:16) An mga yaon sa Kristianong pagtiripon nagtagama nin mahalagang oras—asin an nagkapira naggibo nin dakulang paghihingoa—tanganing makaatender asin matokdoan sa mga bagay na manongod sa saindang relasyon sa Dios. An siring na pagtotokdo dakulaon nanggad na pribilehio! Paano daw nindo iyan magigibo nin toltol?

An kabtang na ini kan paadalan basado sa babasahon sa Biblia na asignado sa semanang iyan. An pagdodoon maninigo na sa kun paano kita apektado ngonyan kan materyales. Arog kan sinasabi sa Nehemias 8:8, binasa ni Esdras asin kan kairiba nia sa publiko an Tataramon nin Dios, na ipinaliliwanag iyan, ‘tinatawan iyan nin kahulogan,’ asin ipinasasabot iyan. An pagtao nindo kan tampok na mga kabtang kan Biblia nagtatao sa saindo kan oportunidad na gibohon man iyan.

Paano nindo aandamon an siring na asignasyon? Kun puede, mga saro o labi pang semana basahon na an asignadong kabtang kan Biblia. Dangan isip-isipon an saindong kongregasyon asin an mga pangangaipo kaiyan. Ipamibi iyan. Ano daw na hatol, anong mga halimbawa, anong mga prinsipyo sa kabtang na ini kan Tataramon nin Dios an nakapagpapanigo sa mga pangangaipong iyan?

Kaipuhan an pagsiyasat. Igwa daw kamo kan indise sa An Torrengbantayan kada katapusan kan taon? Kun igwa, gamiton iyan na marhay. Paagi sa pagsiyasat sa napublikar manongod sa mga bersikulong napili nindo na idoon, puede kamong makakua nin nakapagpapaliwanag na materyales sa likod, eksplikasyon kan kaotoban nin mga hula, pag-analisar sa ihinahayag nin nagkapirang teksto manongod ki Jehova, o pagtokar sa mga prinsipyo. Dai pakadakolon an punto. Magkonsentrar sa pira sanang piling bersikulo. Mas marahay na pira sanang bersikulo an trataron asin gibohon iyan nin toltol.

An asignasyon sa saindo tibaad maghagad man na imbitaran an mga nagdadangog na magkomento sa kun paano sinda nakinabang sa binasa sa Biblia kan semanang iyan. Ano an nanompongan ninda na pakikinabangan ninda sa saindang personal asin pampamilyang pag-adal o sa saindang ministeryo o pamumuhay? Anong mga kualidad ni Jehova an nahayag sa saiyang pagtratar sa mga tawo asin nasyon? Ano an nanodan kan mga nagdadangog na nakapakosog sa saindang pagtubod asin nakapatalubo sa apresasyon ki Jehova? Dai maghaloy sa mga detalye. Idoon an kahulogan asin praktikal na halaga nin piniling mga punto.

Ini basado sa napublikar na materyales, arog baga nin sarong artikulo sa An Torrengbantayan o Awake! o tibaad sarong kabtang nin libro. Sa kadaklan sobra an materyales para sa itinaong oras. Paano nindo gigibohon an asignasyon? Bilang sarong paratokdo, bako sanang bilang saro na nagtatratar nin materyales. An paraataman dapat na “kualipikadong magtokdo.”—1 Tim. 3:2.

Ponan an saindong pag-andam paagi sa pag-adal sa asignadong materyales. Basahon an mga teksto. Maghorophorop. Hingoahon na gibohon iyan haloy pa bago an petsa kan saindong pahayag. Girumdomon na an mga tugang ineenkaminar na basahon antes pa an napublikar na materyales na pagbabasaran kan pahayag. An asignasyon nindo bako sanang repasohon iyan o kondensaron iyan kundi itokdo kun paano iyan iaaplikar. Gumamit nin angay na mga kabtang kan materyales sa paagi na talagang pakikinabangan kan kongregasyon.

Kun paanong an kada aki may sadiring personalidad, an kada kongregasyon igwa man nin napapalaen na mga ugale. An magurang na epektibo an pagtotokdo dai sana sinasarosaro sa aki nia an moral na mga presepto. Nakikipangatanosan sia sa aki. Kinokonsiderar nia an personalidad kan aki asin an mga problemang inaatubang kan aki. Sa kaagid na paagi, an mga paratokdo sa kongregasyon naghihingoa na tawan nin atension an mga pangangaipo kan grupo na kaolay ninda. Minsan siring, lilikayan nin sarong may pagmansay na paratokdo an paggamit nin mga halimbawa na puedeng ikapasupog nin saro sa mga nagdadangog. Saiyang sasabihon an mga pakinabang na nakakamtan na bilang resulta kan paglakaw sa dalan ni Jehova asin tatawan nin pagdodoon an hatol hale sa Kasuratan na matabang sa kongregasyon na maresolberan an mga problemang inaatubang ninda.

An marahay na pagtotokdo nakapahihiro sa puso kan mga nagdadangog. An kaipuhan digdi bako sanang pagtaram nin mga detalye kundi pagpatalubo man nin apresasyon sa irinerepresentar kan mga ini. Kaipuhan kaiyan an tunay na pagmakolog sa mga tinotokdoan. Maninigo na midbid nin espirituwal na mga pastor an aripompon. Kun isasaisip ninda sa mamomoton na paagi an mga problemang inaatubang nin manlaenlaen na indibiduwal, sinda makapagpapahayag nin nakaparirigon sa boot, na nagpapaheling nin pakasabot, pakikidamay, asin empatiya.

Arog kan aram nin epektibong mga paratokdo, an pahayag dapat na may malinaw na obheto. Maninigong iatubang an materyales sa paagi na an mayor na mga punto malataw asin magigirumdoman. Maninigo na an mga nagdadangog may ikapuling praktikal na mga punto na makaaapektar sa saindang buhay.

Kun kamo nagpapahayag basado sa sarong artikulo sa An Satong Ministeryo sa Kahadean, tibaad medyo laen man an angat. Maheheling nindo digdi na sa parate hinahagad sa saindo na lubos na ipaabot sa mga nagdadangog an yaon dian, bakong pumili kan pinakaangay. Tabangan an mga nagdadangog na mangatanosan sa mga teksto na iyong pinakabasehan kan ano man na hatol na itinao. (Tito 1:9) Limitado an oras, na sa kadaklan dai nagtotogot sa dugang pang materyales.

Sa ibong na lado, tibaad ipaatubang sa saindo an materyales na mayo nin artikulo sa An Satong Ministeryo sa Kahadean. Tibaad nasambitan an sarong artikulo sa An Torrengbantayan, o tibaad pira sanang halipot na pasabot an asignasyon. Nasa saindo na bilang paratokdo an pagkonsiderar sa mga pangangaipo kan kongregasyon may koneksion sa asignadong materyales. Tibaad kaipuhan kamong gumamit nin halipot, deretso sa puntong ilustrasyon o magsaysay nin angay na eksperyensia. Girumdoma na an asignasyon nindo bako sanang magpahayag sa tema kundi ipahayag iyan sa paagi na matabangan an kongregasyon na mahaman an gibohon na itinatao kan Tataramon nin Dios asin magin magayagaya sa paggibo kaiyan.—Gibo 20:20, 21.

Mantang inaandam nindo an saindong asignasyon, isip-isipon an kamugtakan kan mga miembro kan kongregasyon. Omawon sinda sa dati na nindang ginigibo. Paano daw madudugangan an pagkaepektibo ninda asin an kagayagayahan ninda sa ministeryo kan saindang pag-aplikar kan mga suhestion na itinao sa asignadong materyales?

Naghahagad daw nin demonstrasyon o interbio an asignasyon nindo? Kun iyo, iyan maninigong planohon haloy pang marhay. Tibaad nakatetentar na hagadon na sana sa iba na iyong mag-areglo kaiyan, alagad iyan dai pirmeng nagkakaigwa kan pinakamarahay na resulta. Sagkod sa mapupuede, ensayohon an demonstrasyon o interbio bago an aldaw kan pagtiripon. Seguradohon na an parteng ini kan saindong kabtang magibo sa paagi na talagang nakadadagdag sa itinataong pagtotokdo.

An mga tugang na nakapagpapatalubo nin marahay na mga kualidad sa espirituwal asin nagigin epektibong mga nagpapahayag sa publiko asin paratokdo tibaad pag-abot nin panahon hagadan na makikabtang sa programa sa asamblea o kombension. An mga ini talagang espesyal na mga okasyon para sa teokratikong edukasyon. An siring na mga asignasyon puedeng nasa manuskrito, outline, instruksion para sa drama sa Biblia na may aplikasyon sa presenteng aldaw, o sarong parapo nin mga instruksion. Kun nagkapribilehio kamong maglingkod sa siring na programa, maingat na adalan an materyales na itinao sa saindo. Adalan iyan sagkod na maapresyar nindo an halaga kaiyan.

An mga naasignaran nin pahayag na an ginagamit manuskrito maninigong basahon an materyales termino por termino. Dai ninda liniliwat an pagkasabi o an pagkaareglar kan materyales. Inaadalan ninda iyan tangani na mamansayan nin malinaw kun ano an prinsipal na mga punto asin kun paano ini detalyadong ipinaliliwanag. Pinapraktis ninda an makosog na pagbasa sagkod na ikapahayag ninda iyan na may angay na istres sa kahulogan, entusiasmo, init, pagsaboot, pagigin odok, asin kombiksion, saka kosog nin boses asin puersa na angay sa dakol na nagdadangog.

An mga tugang na tinawan nin pahayag na an ginagamit outline may paninimbagan na bilogon an saindang materyales sa paagi na kompormeng marhay sa outline. Imbes na basahon an yaon sa outline durante kan pahayag o gibohon iyan na manuskrito, maninigo na iatubang kan nagpapahayag an materyales sa ekstemporanyong paagi, gikan sa puso. Importante na susogon an oras na itinao sa outline tangani na ikaatubang nin malinaw an balang prinsipal na punto na yaon dian. Maninigong gamiton na marhay kan nagpapahayag an mga ideya asin tekstong nalilista sa irarom kan prinsipal na mga punto. Dai nia maninigong iiba an dagdag na mga puntong gusto nia na maresulta sa pagkahale na logod kan yaon sa outline. Siempre, an pundasyon kan pagtotokdo iyo an Tataramon nin Dios. An paninimbagan nin Kristianong kamagurangan ‘ihulit an tataramon.’ (2 Tim. 4:1, 2) Kaya an nagpapahayag maninigong magtao nin espesyal na atension sa mga teksto sa outline—na nangangatanosan dian asin iinaaplikar iyan.

Naglilingkod daw kamo sa kongregasyon na dakol an oportunidad na magpahayag? Paano daw nindo matatawan nin igong atension iyan gabos? Likayan an pag-andam kan saindong mga kabtang sa ultima ora.

An mga pahayag na talagang pinakikinabangan kan kongregasyon nagkakaipo nin igong pagplano antes pa. Kun siring, ugaleon na basahon an materyales oras na maresibi nindo an kada asignasyon. Ini magpapangyari sa saindo na pirepensaron iyan mantang ginigibo nindo an ibang aktibidad. Sa mga aldaw o semana bago nindo itao an saindong pahayag, tibaad makadangog kamo nin mga komento na makatatabang sa saindong maaraman kun paano pinakamarahay na ikaaaplikar an impormasyon. Tibaad may lumataw na mga situwasyon na naghahayag kan pagigin napapanahon kaiyan. An pagbasa asin pag-isip-isip sa saindong asignasyon pagkaresibi tolos nindo kaiyan nagkakaipo nin panahon, alagad ini panahon na nagin kapakipakinabang nanggad. Kun sa katapustapusi tumukaw na kamo tanganing bilogon an outline, aanihon nindo an mga pakinabang sa amay pang marhay na pag-isip-isip dian. An pag-asikaso sa mga asignasyon sa paaging ini makababawas na marhay sa tension asin makatatabang sa saindo na iatubang an materyales sa paagi na praktikal asin nakatataros sa puso kan mga nasa kongregasyon.

Kun sagkod saen an pag-apresyar nindo sa balaog na ipinaniwala sa saindo may labot sa programa ni Jehova sa pag-edukar sa saiyang banwaan, sagkod man dian na kamo makatatao nin onra sa saiya asin magigin bendisyon sa mga namomoot sa saiya.—Isa. 54:13; Roma 12:6-8.