“Sabihon Mo sa Sainda an Tataramon na Ini”

 1. (a) Ano an pagkakapareho ni Jesus asin Jeremias? (b) Taano ta maninigo niatong arogon si Jeremias sa satong ministeryo?

SI Jesu-Cristo an pangenot na arogan na sinusunod niato sa paghuhulit kan maogmang bareta. Pero, mahalagang mangnohon na an mga tawo kan enot na siglo na nakaheling ki Jesus kun beses naghona na sia si propeta Jeremias. (Mat. 16:13, 14) Arog ni Jesus, si Jeremias tinawan nin Dios nin pagboot na maghulit. Halimbawa, sarong beses sinabihan sia nin Dios: “Sabihon mo sa sainda an tataramon na ini, ‘Ini an sinabi ni Jehova.’” (Jer. 13:12, 13; Juan 12:49) Asin sa ministeryo ni Jeremias nagpaheling sia nin mga kualidad na kapareho kan ipinaheling ni Jesus.

 2. Paano nagkakapareho an mga pangangaipo kan mga tawo ngonyan asin kan mga Judio kaidtong panahon ni Jeremias?

² Minsan siring, an nagkapirang Saksi tibaad magsabi: ‘An paghuhulit niato laen kisa kan ki Jeremias. Sia representante nin Dios sa pagtaram sa sarong nasyon na dusay sa Saiya, mantang an kadaklan sa mga hinuhulitan niato dai nakakamidbid ki Jehova.’ Totoo iyan. Alagad kan panahon ni Jeremias, an kadaklan na Judio nagin “bakong madonong” asin nagtalikod sa tunay na Dios. (Basahon an Jeremias 5:20-22.) Kaipuhan nindang magbago tanganing sambahon si Jehova sa paagi na inaako nia. Kaagid kaiyan, an mga tawo ngonyan—baga man naghihingakong Kristiano o bako—kaipuhan na makanood na matakot ki Jehova asin magsagibo nin tunay na pagsamba. Helingon niato kun paano kita makakapaglingkod sa tunay na Dios asin makakatabang sa mga tawo paagi sa pag-arog ki Jeremias.

 3. Ano an makahulogan na ginibo nin Dios ki Jeremias sa kapinonan kan saiyang gibohon, asin ano an namatean kan propeta dapit dian?

³ Girumdomon na sa kapinonan kan ministeryo ni Jeremias bilang propeta, nadangog nia an mga tataramon na ini: “Sa gabos na susugoan ko sa saimo, ika maninigong magduman; asin an gabos na ipagboboot ko sa saimo, maninigong itaram mo. Dai ka matakot huli sa saindang lalawgon, huli ta ‘ako kaibanan mo tanganing iligtas ka,’ an sabi ni Jehova.” (Jer. 1:7, 8) Dangan an Dios may ginibo na dai inaasahan. Sinasabi sa sato ni Jeremias: “Inunat ni Jehova an saiyang kamot asin idinoot iyan sa sakong ngoso. Dangan si Jehova nagsabi sa sako: ‘Uya ibinugtak ko an sakong mga tataramon sa saimong ngoso. Helinga, ika inasignaran ko sa aldaw na ini.’” (Jer. 1:9, 10) Poon kaidto, aram ni Jeremias na sia nagtataram bilang representante kan Makakamhan sa Gabos na Dios.a Paagi sa bilog Niang suporta, nag-orog pa an kaigotan ni Jeremias para sa sagradong paglilingkod.—Isa. 6:5-8.

 4. Anong mga halimbawa nin pambihirang kaigotan sa paghuhulit an ikakasaysay nindo?

⁴ Dai pisikal na dinodootan ni Jehova an siisay man sa mga lingkod nia ngonyan. Pero, paagi sa saiyang espiritu, talagang tinatawan nia sinda nin makosog na pagmawot na ihulit an maogmang bareta. Dakol sa sainda an may pambihirang kaigotan. Kuanon tang halimbawa si Maruja sa España. Labi nang 40 taon na paralisado an saiyang mga takyag asin tabay. Depisil para sa saiya na magharongharong, kaya naghanap sia nin ibang paagi na magin aktibo sa ministeryo. An sarong paagi iyo an pagsurat. Idinidikta ni Maruja sa saiyang aking babae kun ano an isusurat. Sa laog nin sarong bulan, nakapagpadara si Maruja asin an saiyang “sekretarya” nin labing 150 surat, na may kalakip na sarong pulyeto sa kada sobre. Paagi sa saindang paghihingoa, nakaabot an maogmang bareta sa kadaklan na harong sa kaharaning baryo. Sinabi ni Maruja sa saiyang aki, “Kun an saro sa satong mga surat maresibi nin saro na may tanos na puso, bebendisyonan kita ni Jehova nin sarong inaadalan sa Biblia.” An sarong lokal na magurang sa kongregasyon nagsurat, “Nagpapasalamat ako ki Jehova na may mga tugang na arog ni Maruja, na nagtotokdo sa iba na pahalagahan an talagang mahalaga.”

 5. (a) Paano napagdanay ni Jeremias an saiyang kaigotan dawa bakong interesado an mga tawo? (b) Paano nindo mapagdadanay an saindong kaigotan sa paghuhulit kan maogmang bareta?

⁵ Kan panahon ni Jeremias, an kadaklan sa mga nag-iistar sa Jerusalem ‘dai naogma’ sa katotoohan nin Dios. Nagpondo daw an propeta sa paghuhulit huling kadakol kan bakong interesado sa mensahe? Dai nanggad! Sinabi ni Jeremias: “Napano ako kan kabangisan ni Jehova. Napagal ako sa kapupugol.” (Jer. 6:10, 11) Paano kamo makakapagpadanay nin arog kaiyan na kaigotan? An sarong paagi iyo an paghorophorop sa daing kaagid na pribilehio nindo bilang representante kan tunay na Dios. Aram nindo na an ngaran kan tunay na Dios tinutuya kan mga prominente sa kinaban na ini. Isip-isipon man kun paano dinaya kan mga namomoon sa relihion an mga tawo sa saindong teritoryo, na ginibo man kan mga saserdote kan panahon ni Jeremias. (Basahon an Jeremias 2:8, 26, 27.) Sa kabaliktaran, an maogmang bareta kan Kahadean nin Dios na ipinapahayag nindo talagang kapahayagan kan pabor nin Dios sa katawohan. (Lam. 3:31, 32) Iyo, an paghorophorop kan siring na katotoohan makakatabang sa saindo na mapagdanay an saindong kaigotan sa pagpahayag kan maogmang bareta asin pagtabang sa mga arog-karnero.

 6. Anong grabeng mga kadepisilan an napaatubang ki Jeremias?

⁶ Posibleng marhay na maoyon kamo na bako pirmeng pasil na mapagdanay an kaigotan sa Kristianong ministeryo. Mantang si Jeremias naglilingkod ki Jehova, napaatubang man sia sa grabeng mga kadepisilan, na kaiba dian an falsong mga propeta. Mababasa nindo an sarong pangyayari sa Jeremias kapitulo 28. An kadaklan sa mga tawo dai naghimate sa saiyang mensahe, asin kun beses an pagmate nia garo sia nagsosolo. (Jer. 6:16, 17; 15:17) Dugang pa, may beses na kinaipuhan niang atubangon an mga kaiwal na naghuhumang gadanon sia.—Jer. 26:11.

7, 8. Sa anong kapakipakinabang na paagi “dinaya” nin Dios si Jeremias?

⁷ Durante nin sarong panahon na napaatubang si Jeremias sa pagtuya asin pang-iinsulto aroaldaw, ipinahayag nia sa Dios an saiyang namatean. Sa paghona nindo, paano nindo masasabi na “dinaya” ni Jehova an saiyang maimbod na propeta, na sinambit sa Jeremias 20:7, 8?—Basahon.

⁸ Dai nanggad linoko o dinaya ni Jehova si Jeremias paagi sa paggamit nin sarong tusong pakana tumang sa saiya. Imbes, “dinaya” nin Dios an saiyang propeta sa positibo asin kapakipakinabang na paagi. Namatean ni Jeremias na grabe nanggad an pagtumang, na kun sia sana dai na nia kayang otobon an asignasyon sa saiya nin Dios. Alagad talagang naotob nia iyan, paagi sa suporta asin tabang kan Makakamhan sa Gabos. Huli kaini, tibaad sabihon nindo na an kapangyarihan ni Jehova an nangibabaw sa saiya, na mas makosog nanggad kisa ki Jeremias asin sa saiyang mga tendensia bilang tawo. Kan iniisip kan lingkod na ini nin Dios na mayo na sia nin kosog asin dai na nia kaya, naggamit si Jehova nin nakakakombensir na puersa kaya si Jeremias nadaya, sabi ngani. An Dios mas makosog kisa sa mga kaluyahan kan propeta. Dawa sa ibong nin pagkadaing interes, dai pag-ako, asin kadahasan, si Jeremias nakapagpadagos sa paghuhulit.

 9. Taano ta makakapakosog sa boot nindo an mga tataramon kan Jeremias 20:11?

⁹ Si Jehova nagin siring sa “makangingirhat na makakamhan” na kaibanan ni Jeremias, na nagsuportar sa saiya. (Jer. 20:11) Asin mapapakosog man kamo nin Dios tanganing mapagdanay nindo an saindong kaigotan para sa tunay na pagsamba asin magpadagos sa ibong nin magabat na mga problema. Puede nindong isipon iyan siring kan pagkasabi sa saro pang traduksion—si Jehova magigin “sarong makosog na soldados” na nakatindog sa kataed nindo.—Contemporary English Version.

10. Ano an determinado nindong gibohon kun napapaatubang sa pagtumang?

¹⁰ Idinoon ni apostol Pablo an puntong iyan kan pinaparigon nia an mga Kristiano na napapaatubang sa pagtumang. Sia nagsurat: ‘Gumawe kamo sa paagi na angay sa maogmang bareta dapit sa Cristo, tangani na mabaretaan ko na kamo marigon na naninindogan sa sarong espiritu, na sa sarong kalag daramay na nagmamaigot para sa pagtubod sa maogmang bareta, asin sa ano man na paagi dai napapatakot kan saindong mga kaiwal.’ (Fil. 1:27, 28) Arog ni Jeremias asin kan mga Kristiano kan enot na siglo, puede asin maninigo kamong magsarig sa Makakamhan sa Gabos na Dios mantang ginigibo nindo an saindong ministeryo. Kun may magtuyatuya o mang-insulto sa saindo, girumdomon na kaibanan nindo si Jehova asin matatawan nia kamo nin kosog. Ginibo nia iyan ki Jeremias asin ginigibo nia iyan sa dakol sa saindong mga tugang; kaya magigibo man nia iyan sa saindo. Magngayongayo sa saiya na tabangan kamo, asin magtiwala na sisimbagon nia an saindong pamibi. Tibaad mamatean man nindo na kamo ‘dinadaya’ nin Dios mantang tinatawan nia kamo nin kosog na mapangganahan an mga olang, na may pagkapusoan imbes na takot. Iyo, orog pa nanggad an magigibo nindo kisa sa hinohona nindong kaya nindo.—Basahon an Gibo 4:29-31.

11, 12. (a) Anong mga pagliliwat an puede nindong gibohon tanganing makapaghulit sa mas dakol na tawo sa saindong ministeryo? (b) Anong mga posibilidad sa lokal na teritoryo an isinusuherir kan retrato sa pahina 39?

¹¹ An nababasa niato dapit sa paglilingkod ni Jeremias makakatabang sa sato sa manlaenlaen na paagi na magin epektibong ministro kan maogmang bareta. Pakapaglingkod nia nin labing 20 taon bilang propeta ni Jehova, sia nakapagsabi: “Ako padagos na nagtataram sa saindo, na minabangon nin amay asin nagtataram, alagad dai kamo naghinanyog.” (Jer. 25:3) Iyo, sia amay na nagpopoon imbes na udto na. May praktikal daw kitang manonodan sa halimbawa nia? Sa dakol na kongregasyon, may mga parahayag na minabangon nin amay tanganing maghulit sa mga tawo sa mga pondohan nin bus asin estasyon nin tren. Sa rural na mga lugar, ginagamit nin dakol na Saksi an mga oras sa amay na aga tanganing magpatotoo sa mga paraoma asin iba pa na may ginigibo na sa mga oras na iyan. May naiisip daw kamong iba pang paagi na personal nindong ikakaaplikar an leksion na ini na nanodan nindo sa maimbod na pagmiministeryo ni Jeremias? Puede daw kamong bumangon nin amay na marhay tanganing magin presente sa pagpopoon mismo kan nakaiskedyul na pagtiripon bago maglingkod sa langtad?

¹² Dugang pa, an pagharongharong sa hapon asin amay na mga oras sa banggi parateng nagkakaigwa nin marahayon na mga resulta sa dakol na lugar. May mga parahayag na naghuhulit pa ngani kun banggi na, na nagpapatotoo sa mga nagtatrabaho sa mga gasolinahan, restawran, asin iba pang lugar nin negosyo na bukas 24 oras kada aldaw. Puede daw nindong liwaton an saindong iskedyul tanganing makapaghulit kamo sa mga oras na posibleng marhay na may makakaolay kamo sa harong o iba pang lugar?

13, 14. (a) Paano konektado sa pagdalaw liwat an halimbawa ni Jeremias? (b) Anong halimbawa an nagpapaheling na kamo kaipuhan na magin maaasahan sa pagdalaw liwat?

¹³ May beses na pinagbotan ni Jehova si Jeremias na ipahayag an propetikong mga mensahe mantang nakatindog sa may tata kan templo o kan Jerusalem. (Jer. 7:2; 17:19, 20) Paagi sa siring na pagpahayag sa may tata, dakol an nahulitan ni Jeremias kan tataramon ni Jehova. Asin mantang nakaugalean na nin dakol na mag-agi sa iyo man sanang tata, kaiba an prominenteng mga lalaki sa siudad, paratinda, asin negosyante, posible na paorootrong nakaolay nia an nagkapirang tawo sa paghihingoang tabangan sinda na masabotan an nadangog ninda kan nakaagi. Ano an manonodan niato digdi manongod sa pagdalaw liwat sa mga nagpaheling nin interes?

¹⁴ Aram ni Jeremias na nakadepende an buhay nin mga tawo sa gibohon nia bilang propeta nin Dios. Sarong beses, kan dai nia magigibo an mga instruksion nin Dios na magtaram sa mga tawo, isinugo nia an katood niang si Baruc bilang kasalida nia. (Basahon an Jeremias 36:5-8.) Paano niato maaarog si Jeremias sa bagay na ini? Kun nagsasabi kita sa sarong kagharong na mabalik kita, inootob daw niato iyan? Kun kita dai makakadalaw liwat o makakaduman sa satong inaadalan sa Biblia, may kinakaolay daw kitang kasalida niato? Sinabi ni Jesus: ‘An saindong tataramon na Iyo mangahulogan nin Iyo.’ (Mat. 5:37) Mahalagang marhay na otobon an satong sinasabi, huling irinerepresentar niato an Dios nin katotoohan asin areglo.—1 Cor. 14:33, 40.

15, 16. (a) Paano sinusunod nin dakol an halimbawa ni Jeremias sa pagpahiwas kan saindang ministeryo? (b) Anong leksion an manonodan nindo sa eksperyensia sa Chile, na maheheling sa pahina 40?

¹⁵ Pinarigon ni Jeremias an mga Judio sa Babilonya paagi sa pagsurat sa sainda manongod sa “marahay na tataramon” ni Jehova dapit sa pagbabalik ninda. (Jer. 29:1-4, 10) Ngonyan, an “marahay na tataramon” dapit sa gigibohon ni Jehova sa dai na mahahaloy epektibo man na ikakalakop paagi sa surat asin telepono. Puede daw nindong gamiton an mga paaging iyan tanganing tabangan an saindong mga paryente o iba pa na nasa harayo o depisil makontak?

¹⁶ Paagi sa pagsunod sa halimbawa ni Jeremias na lubos na pag-otob kan saiyang ministeryo, an mga parahayag kan Kahadean ngonyan parateng nagkakaigwa nin positibong mga resulta. Sarong Saksi sa Chile an nagdolok sa sarong babae na paluwas sa subway station. Naogma an babae kan madangog an mensahe kan Biblia asin nag-oyon na makipag-olay dapit sa Biblia sa saiyang harong. Minsan siring, dai isinurat kan Saksi an adres kan babae. Pagkatapos kaiyan, huling narealisar an kahalagahan nin pagkultibar sa interes kan babae sa katotoohan, an satong tugang namibi na logod tabangan sia ni Jehova. Kan sunod na aldaw, nagbalik sia sa subway station sa kaparehong oras. Nanompongan nia giraray an babae. Sinegurado na nia na isurat an adres kan babae asin pagkatapos kaiyan dinalaw nia ini sa harong tanganing tabangan na masabotan an Kasuratan. Madali nang hokoman nin Dios an kinaban ni Satanas. Alagad igwa nin paglaom para sa mga nagsosolsol asin nagtutubod sa maogmang bareta. (Basahon an Lamentacion 3:31-33.) Huli kaini, ipaheling niato an katotoohan na iyan paagi sa maigot na paghuhulit sa satong teritoryo.

17. Sa saindong teritoryo, paano nindo maaarog an paagi ni Jeremias?

¹⁷ Habo ni Jehova na magadan an mga tawo. Mga sampulong taon bago laglagon an Jerusalem, ginamit nia si Jeremias tanganing sabihon an paglaom para sa mga idinistiero sa Babilonya. Mababasa niato: “Ituturuhok ko an sakong mga mata sa sainda sa marahay na paagi, asin papabalikon ko nanggad sinda sa dagang ini. Asin papakosogon ko sinda, asin dai ko gagabaon; asin itatanom ko sinda, asin dai ko gagaboton.” Masasabi ni Jeremias sa sainda: “Igwa nin paglaom para sa saindong ngapit.” (Jer. 24:6; 26:3; 31:17) Inarog ni Jeremias an pagmansay nin Dios sa mga tawo. Ginibo nia an saiyang ministeryo na may tunay na pagmakolog, na ipinahayag an mga pagsadol ni Jehova: “Tumalikod tabi kamo, an lambang saro sa saiyang maraot na dalan, asin pakarhayon an saindong mga gibo.” (Jer. 35:15) May naiisip daw kamong iba pang paagi na ipaheling an odok na personal na interes sa mga tawo sa saindong teritoryo?

18, 19. (a) Ano an dai dapat magin pagmansay niato kun kita naghuhulit kan maogmang bareta? (b) Anong saboot ni Jeremias an maninigo niatong arogon?

¹⁸ Nungkang naglipot an odok na pagkamoot ni Jeremias sa mga tawo. Kan malaglag an Jerusalem, padagos siang nagmalasakit sa sainda. (Basahon an Lamentacion 2:11.) An mga Judio mismo an dapat basolon sa saindang kapahamakan. Minsan siring, dai sinabi ni Jeremias, ‘Sabi ko na sa saindo.’ Imbes, ikinamondo niang gayo an kinaabtan ninda. Kaagid kaiyan, an satong ministeryo dai dapat magin mekanikal, na ginigibo sana huli sa obligasyon. An satong paghihingoa na magpatotoo maninigong magpatunay kun gurano an pagkamoot niato sa satong marahayon na Dios saka sa mga tawo, na linalang sono sa saiyang ladawan.

¹⁹ Mayo nin pribilehio o posisyon sa kinaban na ini na makakalabi sa pagpapatotoo para sa tunay na Dios. Arog kaiyan an nagin saboot ni Jeremias, na nagsurat: “Nakua an saimong mga tataramon, asin kinakan ko iyan; asin an saimong tataramon nagin para sa sako labi-labing kaogmahan asin kagayagayahan kan sakong puso; huli ta ako inapod sa saimong ngaran, O Jehova.” (Jer. 15:16) Mantang kita naghuhulit kan maogmang bareta, dakol pa an puedeng makamidbid asin mamoot sa Saro na pinagkakautangan ninda kan saindang buhay. Kun maglilingkod kita na may kaigotan asin pagkamoot, arog kan ipinaheling ni Jeremias paagi sa halimbawa, may ikakakontribwir kita sa katuyohan na iyan.