Mga Paagi nin Paghuhulit kan Maugmang Bareta

BILANG maigot na parabalangibog kan maugmang bareta, nagpahiling si Jesus nin halimbawa sa mga parasunod niya. Siya mismo an nagduman sa mga tawo para hulitan saka tukduan sinda sa saindang harong o sa pampublikong mga lugar. (Mat. 9:35; 13:36; Luc. 8:1) Nakipag-ulay si Jesus sa mga indibidwal, tinukduan an mga disipulo niya, asin nagpahayag sa atubangan nin ribo-ribong tawo. (Mar. 4:10-13; 6:35-44; Juan 3:2-21) Inaprobetsaran niya an gabos na angay na pagkakataon para magpakusog asin magtao nin paglaom. (Luc. 4:16-19) Dawa kan kaipuhan niyang magpahingalo asin magkakan, dai niya pinalampas an mga oportunidad na magpatotoo. (Mar. 6:30-34; Juan 4:4-34) Pag binabasa ta an ipinasabong na mga salaysay kan ministeryo ni Jesus, talagang napapahiro kitang arugon siya, arog kan ginibo kan mga apostol.—Mat. 4:19, 20; Luc. 5:27, 28; Juan 1:43-45.

² Pag-isipan an mga oportunidad na bukas sa mga Kristiyano ngunyan para makapartisipar sa gibuhon na pinunan ni Jesu-Cristo haros 2,000 na taon na an nakaagi.

³ Bilang Mga Saksi ni Jehova, aram ta an kahalagahan kan sistematikong paghuhulit kan maugmang bareta kan Kahadian sa harong-harong. Haloy ta nang ginagamit an paaging ini sa dakul na lugar kaya midbid na kita diyan. An nakakaugmang mga resulta kaiyan patunay na epektibo an paaging iyan para makaulay an milyon-milyon na tawo sa halipot na panahon. (Mat. 11:19; 24:14) An ministeryong pagharong-harong praktikal nanggad na paagi para maipahiling ta an satong pagkamuot ki Jehova asin sa satong kapwa.—Mat. 22:34-40.

⁴ An paghuhulit sa harong-harong bakong bagong ideya kan Mga Saksi ni Jehova sa modernong panahon. Nasambit ni apostol Pablo na nagtukdo siya sa mga tawo sa saindang harong. Manungod sa saiyang ministeryo, sinabi niya sa mga paraataman sa Efeso: “Puon kan inot na aldaw na nagtungtong ako sa probinsiya nin Asia, . . . ano man na bagay na ikakarahay nindo, sinabi ko iyan sa saindo asin mayo akong itinago, saka dai ako nag-alangan sa pagtukdo sa saindo . . . sa harong-harong.” Sa paaging ini asin sa iba pa, si Pablo “lubos [na] nagpatotoo sa mga Judio pati sa mga Griego manungod sa pagsulsol asin pagsamba sa Diyos asin sa pagtubod sa satuyang Kagurangnan na Jesus.” (Gibo 20:18, 20, 21) Kan panahon na idto, suportado kan mga emperador kan Roma an idolatriya, kaya dakul an may ‘debosyon sa mga diyos.’ Kaya kaipuhan nanggad na hanapon nin mga tawo “an Diyos na naggibo kan kinaban saka kan gabos na bagay na yaon diyan,” an Saro na kaidto ‘nagpapahayag sa gabos na tawo sain man na lugar na kaipuhan sindang magsulsol.’—Gibo 17:22-31.

⁵ Sa ngunyan, lalo nang kaipuhan na marhay na mapaabutan kan maugmang bareta an mga tawo. Marikas na nagdadangadang an katapusan kan maraot na sistemang ini nin mga bagay. Huli kaini, napapahiro kita na lalo pang maghinguwa. An pagharong-harong iyo nanggad an pinakamarahay asin prubado nang paagi tanganing mahanap an mga nagugutom sa katotoohan. Epektibo pa man giraray iyan ngunyan arog kan panahon ni Jesus asin kan mga apostol.—Mar. 13:10.

⁶ Lubos ka daw na nakikikabtang sa ministeryong pagharong-harong? Kun iyo, makakasiyerto ka na nauugma saimo si Jehova. (Ezeq. 9:11; Gibo 20:35) Pero tibaad bakong pasil para sa saimo an pagharong-harong. Tibaad igwa ka nin mga limitasyon sa pisikal, o tibaad naghuhulit ka sa teritoryo na dakul an habong magdangog. Tibaad may mga pagbabawal pa ngani an gobyerno. Tibaad masusupgon ka, asin dipisilon para sa saimo na magpuon nin pakikipag-ulay sa mga dai mo kabisto. Kaya kada magharong-harong ka, pignenerbiyos ka. Dai pangluyahan nin buot. (Ex. 4:10-12) Naeeksperyensiyahan man iyan kan mga tugang sa dakul na lugar.

⁷ Nanuga si Jesus sa mga disipulo: “Uya! kaibanan nindo ako sa gabos na aldaw sagkod sa pagtatapos kan sistema nin mga bagay.” (Mat. 28:20) Pinapakusog kan panugang iyan an determinasyon ta sa paggibo nin mga disipulo. Arog ni apostol Pablo, masasabi man niyato: “Kaya kong atubangon an gabos na bagay paagi sa saiya na nagtatao sa sako nin kusog.” (Fil. 4:13) Kaya lubos na suportaran an mga areglo kan kongregasyon sa pagpapatotoo sa harong-harong. Mapapakusog asin matatabangan ka kan mga tugang pag nagpapatotoo ka kaiba ninda. Mamibi na lugod tabangan kang makayanan an ano man na ulang na tibaad mapaatubang saimo, asin maigot na maghinguwa bilang parahulit kan maugmang bareta.—1 Juan 5:14.

⁸ Mantang ipinapakipag-ulay mo sa iba an maugmang bareta, may oportunidad kang magtao sa sainda ‘nin rason manungod sa saimong paglaom.’ (1 Ped. 3:15) Mas lalo mong mahihiling an pagkakalain kan mga may paglaom sa Kahadian asin kan mga mayo nin paglaom. (Isa. 65:13, 14) Mauugma ka ta aram mong nasusunod mo an pagbuot ni Jesus na ‘paliwanagon an saimong ilaw,’ saka puwede ka pa nganing magkapribilehiyo na tabangan an iba na mamidbid si Jehova asin maaraman an katotoohan na minagiya pasiring sa buhay na daing katapusan.—Mat. 5:16; Juan 17:3; 1 Tim. 4:16.

⁹ May mga areglo para sa pagharong-harong sa mga puro kan semana saka sa ibang mga aldaw. Sa mga lugar na an mga tawo dipisil maabutan sa harong pag aldaw, may mga kongregasyon na nag-aareglo nin pagpapatotoo sa banggi. Posibleng mas andam an mga tawo na makipag-ulay sa bandang mga huring oras kan hapon o pabanggi na kisa kun aga.

¹⁰ Pinagbutan ni Jesus an mga disipulo na “hanapon” an mga maninigo. (Mat. 10:11) Tanganing mahanap an mga andam na mag-ako kan katotoohan, bako sanang pagharong-harong an ginibo niya. Iyo, nagpatotoo man siya sa kada angay na pagkakataon, sa pormal asin impormal na paagi. (Luc. 8:1; Juan 4:7-15) Nagpatotoo man an mga apostol sa mga tawo sa manlain-lain na lugar.—Gibo 17:17; 28:16, 23, 30, 31.

¹¹ Sa ngunyan, katuyuhan man niyato na paabutan nin mensahe kan Kahadian an gabos na tawo sagkod na posible. Kaya inaarog ta an paagi ni Jesus asin kan mga apostol niya sa paggibo nin mga disipulo saka sa pakikibagay sa mga pagbabago asin iba-ibang kamugtakan kan mga tawo sa teritoryo. (1 Cor. 7:31) Halimbawa, may mga parahayag na epektibong nakakapagpatotoo sa mga lugar nin negosyo. Sa dakul na nasyon, epektibo man an pagpapatotoo sa mga tinampo, pati man sa mga parke, paradahan, o sain man may mga tawo. May mga kongregasyon na nagbubugtak nin lamesa o mga mobile display sa laog kan teritoryo ninda. May mga pagkakataon man na nag-oorganisar an sangang opisina nin special metropolitan public witnessing sa mga lugar sa darakulang siyudad kun sain kadakul nin tawong nag-aaragi, na an mga nagpapartisipar hali sa iba-ibang kongregasyon. Bilang resulta, napapaabutan nin maugmang bareta dawa an mga tawong dai naaabutan kan mga parahayag sa saindang harong.

¹² Pag nakakanumpong kita sa pampublikong mga lugar nin tawong interesado sa mensahe kan Bibliya, puwede kitang mag-alok nin angay na publikasyon. Para urog pa siyang matabangan, puwede mong itao an contact information mo asin sabihon na puwede mo siyang dalawon, itukdo saiya an jw.org, o itao saiya an adres kan pinakaharaning lugar kun sain may pagtiripon nin kongregasyon. Mahihiling mo na an pagpapatotoo sa pampublikong mga lugar sarong nakakaugmang paagi para mapahiwas mo an saimong ministeryo.

¹³ Pero bako sanang pagbalangibog kan maugmang bareta an gibuhon na itinao sa mga Kristiyano ngunyan. Para matabangan an iba na akuon an katotoohan na minagiya pasiring sa buhay, kaipuhan na pauruutro mong dadalawon an mga interesado tanganing umuswag sinda asin magin maygurang na mga Kristiyano.

¹⁴ Sinabi ni Jesus sa mga parasunod niya: “Kamo magigin mga saksi ko . . . sagkod sa pinakaharayong parte kan daga.” (Gibo 1:8) Pero sinabi man niya sa sainda: “Padumán kamo asin gumibo kamo nin mga disipulo sa mga tawo kan gabos na nasyon, . . . na tinutukduan sinda na utubon an gabos na bagay na ipinagbuot ko sa saindo.” (Mat. 28:19, 20) An mga pagdalaw liwat nagtatao sato nin kaugmahan sa paglilingkod ki Jehova. An mga nagpahiling nin interes sa maugmang bareta kan primero mong makaulay posibleng mauugma na makaulay ka giraray. Kun tatawan mo sinda nin dagdag pang impormasyon sa Bibliya, tibaad mapakusog mo an saindang pagtubod sa Diyos asin matabangan sindang mamatian na kaipuhan ninda nin espirituwal na mga bagay. (Mat. 5:3) Kun mapreparar kang marhay asin madalaw liwat sa oras na puwede sinda, tibaad makapuon ka nin pag-adal sa Bibliya. Sa parati, iyan an magigin pasuhan mo sa pagdalaw liwat. Dai sana niyato itinatanom an banhi nin katotoohan kundi binabaribi ta man iyan.—1 Cor. 3:6.

¹⁵ Tibaad dipisil para sa nagkapira an magdalaw liwat. Tibaad sanay ka na sa halipot na pakikipag-ulay manungod sa maugmang bareta, asin gustong-gusto mo an arog kaiyan na aspekto kan ministeryo. Pero tibaad ninenerbiyos ka pag iniisip mong balikan an kagharong tanganing maipadagos an pakikipag-ulay saiya sa Bibliya. Mákusog an buot mo kun nakapaghanda kang marhay. Hinguwahon na gamiton an praktikal na mga suhestiyon sa pagtiripon sa tahaw kan semana. Puwede kang magpaiba sa mas eksperyensiyadong parahayag.

¹⁶ Kan nakikipag-ulay an ebanghelisador na si Felipe sa sarong Judiong proselito na nagbabasa kan Tataramon nin Diyos, hinapot niya ini: “Nasasabutan mo an binabasa mo?” Nagsimbag an lalaki: “Paano ko man ini masasabutan kun mayo nin magtukdo sa sako?” Dangan, sinasabi sato kan Bibliya sa Gibo kapitulo 8 na puon sa parteng idto kan Kasuratan na binabasa kan lalaki, ‘ipinahayag sa saiya ni Felipe an maugmang bareta manungod ki Jesus.’ (Gibo 8:26-36) Dai ta aram kun gurano kahaloy nakipag-ulay si Felipe sa lalaki, pero ipinaliwanag niya saiya an maugmang bareta sagkod na nagtubod ini asin nakiulay na bawtismuhan. Nagin disipulo siya ni Jesu-Cristo.

¹⁷ Dakul ngunyan an bakong pamilyar sa Bibliya, kaya tibaad kaipuhan nin nagkapirang pagdalaw liwat asin detalyadong pag-adal sa laog nin dakul na semana, bulan, o sarong taon pa ngani o labi pa bago sinda magkaigwa nin makusog pagtubod asin makuwalipikar para sa bawtismo. Pero siyertong may balos an matiyaga asin mamumuton na pagtabang mo sa mga sadiyosan an puso na magin mga disipulo. Sinabi ni Jesus: “Igwang urog na kaugmahan sa pagtao kisa sa pag-ako.”—Gibo 20:35.

¹⁸ Siguradong gusto mong magkondukta nin pag-adal sa Bibliya gamit an saro sa mga publikasyon na partikular nang ginibo para diyan. Pag inaaplikar mo an mga instruksiyon sa pagtiripon sa tahaw kan semana asin nakikipartner ka sa eksperyensiyadong mga paratukdo sa kongregasyon nindo, magigin epektibo ka sa pagkondukta nin mga pag-adal sa Bibliya asin matatabangan mo an iba na magin disipulo ni Jesu-Cristo.

¹⁹ Kun kaipuhan mo nin tabang para makapuon asin makapagkondukta nin pag-adal sa Bibliya, dai mag-alangan na makipag-ulay sa saro sa mga paraataman o sa kapwa Saksi na mahusay sa pagkondukta nin pag-adal sa Bibliya. Makakatabang man sa saimo an mga suhestiyon na yaon sa Workbook sa Pagtiripon na Pamumuhay Asin Ministeryo na ipinepresentar sa pagtiripon. Magsarig ki Jehova, asin ipamibi mo sa saiya an saimong kamawutan. (1 Juan 3:22) Kaya sagkod sa mapupuwede, gibuhon mong pasuhan na magkaigwa nin tinutukduan sa Bibliya apuwera sa kapamilya mo na tibaad kinokonduktahan mo nin pag-adal. Magigin mas maugma ka sa ministeryo pag may kinokonduktahan kang mga pag-adal sa Bibliya.

²⁰ Pag tinatabangan ta an mga tawo na mamidbid si Jehova Diyos asin magin mga disipulo ni Jesu-Cristo, sinda nagigin parte kan kongregasyon. Magigin maygurang asin makusog sa espirituwal an mga tinutukduan sa Bibliya kun mamimidbid ninda an organisasyon ni Jehova asin makikipagtabangan diyan. Mahalagang tukduan sinda kun paano iyan gigibuhon. Ginibo an nagkapirang video asin an brosyur na Siisay an Naggigibo kan Kabotan ni Jehova Ngonyan? para sa katuyuhan na iyan. Makakatabang man an pirang impormasyon na yaon sa Kapitulo 4 kan librong ini.

²¹ Sa kapinunan pa sana kan saindong pag-adal sa Bibliya, tabangan an saimong tinutukduan na masabutan na may organisasyon na ginagamit si Jehova para maisagibo an paghuhulit digdi sa daga ngunyan. Ipaliwanag an kahalagahan kan mga pantabang na ginagamit ta sa pag-adal sa Bibliya asin kun paano iyan ginigibo saka idinidistribwir sa bilog na kinaban kan mga nagdusay sa Diyos na mga boluntaryo. Imbitaran an tinutukduan mo sa Bibliya na umiba sa saimo sa mga pagtiripon sa Kingdom Hall. Ipaliwanag kun paano ginigibo an mga pagtiripon, asin ipabisto siya sa mga tugang. Puwede mo man siyang ipabisto sa iba pang mga Saksi sa mga asembleya asin kumbensiyon. Sa mga pagtiripon na ini asin sa iba pang pagkakataon, maoobserbaran mismo kan baguhan kun paano ipinapahiling kan mga lingkod ni Jehova an pagkamuot, na iyo an midbidan kan tunay na mga Kristiyano. (Juan 13:35) Mantang lalo niyang napapahalagahan an organisasyon ni Jehova, lalo siyang napaparani ki Jehova.

²² An inot na mga Kristiyano nagin maigot na mga parahayag kan Tataramon nin Diyos. Naggibo sinda nin sadiring kopya kan Kasuratan asin nin kopya para sa pag-adal sa kongregasyon. Dinagka ninda an iba na basahon man an katotoohan na yaon sa Tataramon nin Diyos. Pipira sana an kopya ninda na mano-manong isinurat asin talagang pinahalagahan ninda iyan. (Col. 4:16; 2 Tim. 2:15; 3:14-17; 4:13; 1 Ped. 1:1) Sa ngunyan, naggagamit an Mga Saksi ni Jehova nin modernong mga paagi nin pag-imprenta para makaprodusir nin milyon-milyon na kopya nin Bibliya asin mga publikasyon na pantabang sa pag-adal nin Bibliya. Kaiba digdi an mga tract, brosyur, libro, asin magasin sa manlain-lain na lengguwahe.

²³ Pag ipinapaabot mo sa iba an maugmang bareta, gamiton an mga pantabang sa pag-adal sa Bibliya na itinatao kan organisasyon ni Jehova. Dahil dakula an naitabang mismo sa saimo kan pagbasa asin pag-adal kan mga publikasyon kan Mga Saksi ni Jehova, napapahiro kang ipaabot man iyan sa iba.—Heb. 13:15, 16.

²⁴ Padakul nang padakul an naggagamit nin Internet bilang panginot na makukuanan nin impormasyon. Kaya apuwera sa mga babasahon na basado sa Bibliya, an satong opisyal na website na jw.org nakakatabang man na marhay para maipalakop an maugmang bareta. Gamit an kompyuter, an mga tawo sa bilog na kinaban puwedeng magbasa o magdangog kan mga audio rekording kan Bibliya asin mga babasahon na basado sa Bibliya sa kadakul na lengguwahe. An mga nag-aalangan na makipag-ulay sa sato o nasa mga lugar na dikit an tsansang makaulay kan mga Saksi puwedeng magsiyasat sa satong mga paniniwala paagi sa paggamit kan jw.org sa sainda mismong harong.

²⁵ Kaya sa gabos na pagkakataon na puwede, sinasabi ta sa iba an manungod sa jw.org. Kun may kagharong na maghapot manungod sa mga paniniwala ta, puwede kitang gumamit nin mobile device o kompyuter para ipahiling sa saiya an simbag ora mismo. Kun may makaulay kita na iba an lengguwahe, kaiba na an lengguwaheng pasenyas, puwede tang sabihon sainda an manungod sa satong website para mahiling ninda sa sadiri nindang lengguwahe an Bibliya asin mga babasahon na basado sa Bibliya. Dakul na parahayag an naggagamit nin video sa satong website para makapuon nin pakikipag-ulay sa Bibliya.

²⁶ Sa mga nagdadangog sa tataramon ni Jesus, sinabi niya: “Kamo an ilaw kan kinaban. . . . Paliwanagon nindo an saindong ilaw sa atubangan nin mga tawo, tanganing mahiling ninda an marahay nindong mga gibo asin pamurawayon ninda an saindong Ama na nasa langit.” (Mat. 5:14-16) Isinabuhay kan mga disipulong idto an mga pamantayan nin Diyos paagi sa pag-arog ki Jesus, na nagsabi: “Ako an ilaw kan kinaban.” Nagpahiling si Jesus nin halimbawa sa mga Kristiyano kun paano papaliwanagon an “ilaw nin buhay” para makinabang an gabos na magdadangog.—Juan 8:12.

²⁷ Nagtao man si apostol Pablo nin halimbawa na puwede tang arugon. (1 Cor. 4:16; 11:1) Mantang nasa Atenas, nagpatotoo siya aroaldaw sa mga yaon sa saudan. (Gibo 17:17) Inarog kan mga Kristiyano sa Filipos an halimbawa niya. Kaya sa surat sainda ni Pablo, sinambit niya na “napapalibutan [sinda] nin sarong maraot asin makasalan na henerasyon,” na sa tahaw kaiyan sinda “nagliliwanag bilang mga ilaw sa kinaban.” (Fil. 2:15) Puwede ta man paliwanagon ngunyan an katotoohan kan Kahadian paagi sa satong mga tataramon asin gibo kada may oportunidad kitang sabihon sa iba an maugmang bareta. Totoo, dahil sa marahay tang halimbawa bilang onesto asin matanos na mga tawo, mahihiling na kan mga tawo an pagkakalain ta sa kadaklan na tawo. Pero kun makikipag-ulay kita sa sainda manungod sa maugmang bareta, maaaraman ninda kun taano ta iba kita.

²⁸ Dakul sa mga lingkod ni Jehova an nagpapaabot kan maugmang bareta sa mga nakakaulay ninda sa trabaho, eskuwelahan, pampublikong lunadan, o iba pang lugar mantang ginigibo an saindang mga aktibidad sa aroaldaw. Kun nagbibiyahe, tibaad magkaigwa kita nin pagkakataon na kaulayon an ibang pasahero. Kada saro sa sato dapat na magin alisto sa mga oportunidad na makapagpatotoo dawa sa simpleng pakikipag-ulay. Dapat na andam kitang magpatotoo sa iba sa lambang angay na pagkakataon.

²⁹ Mapapahiro kitang gibuhon iyan kun iisipon niyato na nauumaw ta an satong Kaglalang asin natatawan nin onra an saiyang pangaran. Saka puwede ta man matabangan an mga sadiyosan an puso na mamidbid si Jehova tanganing makapaglingkod man sinda sa saiya asin magkaigwa kan paglaom na mabuhay sagkod lamang paagi sa pagtubod ki Jesu-Cristo. Nauugma si Jehova sa satong mga paghihinguwa asin ibinibilang niya iyan na sagradong paglilingkod.—Heb. 12:28; Kap. 7:9, 10.

³⁰ Kabutan ni Jehova na maihulit an mensahe kan Kahadian sa bilog na kinaban, sa mga siyudad saka sa hararayong lugar. Huli kaiyan, nag-aasignar an sangang opisina nin mga teritoryo sa mga kongregasyon saka sa mga naglilingkod sa hararayong mga lugar. (1 Cor. 14:40) Kauyon ini kan areglo na may paggiya nin Diyos kaidtong inot na siglo. (2 Cor. 10:13; Gal. 2:9) Marikas an paghiwas kan gibuhon na pang-Kahadian sa huring mga aldaw na ini. Dakul an magigibo kun organisadong marhay an pagkobre sa teritoryo kan kongregasyon.

³¹ An paraataman sa paglilingkod an may superbisyon sa mga areglong ini. Puwedeng sarong ministeryal na lingkod an mag-asignar nin teritoryo. May duwang klase nin teritoryo—an panggrupo asin an personal na teritoryo. Kun limitado an teritoryo, tatawan nin panggrupong teritoryo an kada paraataman nin grupo para kobrehan kan grupo niya. Pero kun dakul an teritoryo, puwedeng maghagad nin personal na teritoryo an mga parahayag.

³² An parahayag na may personal na teritoryo igwa nin teritoryong mahuhulitan dawa mayo nin inareglong pagtiripon bago maglingkod sa langtad o kun bakong praktikal na makaiba siya sa grupo. Halimbawa, may mga parahayag na naghahagad nin teritoryo na harani sa pinagtatrabahuhan ninda asin naghuhulit diyan pag breaktime sa udto o pagluwas sa trabaho. May mga pamilya na naghahagad nin personal na teritoryo na harani sa harong ninda, asin naghuhulit sinda diyan pag banggi. An pagkaigwa nin haraning personal na teritoryo makakatabang sa sarong parahayag na magamit niya nin lubos an oras na maitatao niya sa paglilingkod. Siyempre, an personal na mga teritoryo puwede man hulitan kan grupo. Kun gusto mong magkaigwa nin personal na teritoryo, puwede kang maghagad sa territory servant nindo.

³³ Panggrupong teritoryo man iyan na kapot kan paraataman nin grupo o personal na teritoryo na kapot nin sarong parahayag, an may kapot kaiyan magibo nin rasonableng paghihinguwa na mahulitan an kada residensiya. Sa mga areglo sa paghuhulit sa teritoryo, dapat magsunod sa aplikadong mga ley manungod sa pag-iingat sa gabos na klase nin impormasyon (data protection law). An mga paraataman nin grupo o parahayag na may kapot nin teritoryo dapat na maghinguwang mahulitan iyan sa laog nin apat na bulan. Pag matapos na iyan, dapat niyang impormaran an territory servant. Depende sa sitwasyon, puwedeng ipagpadagos kan paraataman nin grupo o kan parahayag an pagkobre sa teritoryo o ibalik na iyan sa territory servant.

³⁴ Kun nakikipagtabangan an gabos na kabilang sa kongregasyon, lubos na makokobrehan an teritoryo. Malilikayan ta man na magkadoroble an paghuhulit sa sarong lugar na puwedeng ikairitar kan mga kagharong. Pagpahiling iyan nin konsiderasyon sa satong mga tugang saka sa mga tawo sa teritoryo.

³⁵ Kaipuhan na maaraman kan gabos an manungod ki Jehova Diyos, sa saiyang Aki, asin sa saiyang Kahadian. (Kap. 14:6, 7) Gusto tang tabangan an mga tawo, ano man an saindang lengguwahe, na mag-apod sa pangaran ni Jehova para maligtas asin maipahiling an Kristiyanong personalidad. (Roma 10:12, 13; Col. 3:10, 11) Ano an mga kadipisilan pag naghuhulit kan maugmang bareta sa mga lugar na may iba-ibang lengguwahe? Ano an puwedeng gibuhon para dakul pa an makadangog kan mensahe kan Kahadian sa lengguwahe na mas nasasabutan ninda?—Roma 10:14.

³⁶ Inaasignar an teritoryo sa kada kongregasyon sigun sa lengguwahe. Kaya sa mga lugar na iba-iba an lengguwahe, an mga parahayag sa iba-ibang kongregasyon naghuhulit sa sarong lugar. Sa arog kaiyan na kamugtakan, pinakamarahay na magpokus an mga parahayag kan kada kongregasyon sa paghulit sa mga kalengguwahe ninda. Aplikado man ini sa taunan na mga kampanya nin pagdistribwir nin imbitasyon. Pero kun nasa pampubliko asin impormal na pagpapatotoo, an mga parahayag puwedeng makipag-ulay sa siisay man asin mag-alok nin literatura sa ano man na lengguwahe.

³⁷ Kun minsan, dai nagigibo nin regular kan mga kongregasyon na iba an lengguwahe an mas hararayong teritoryo ninda. Sa arog kaiyan na sitwasyon, an mga paraataman sa paglilingkod kan imbuweltong mga kongregasyon dapat na mag-urulay para mapagkasunduan ninda an mga paagi nin pagkobre kan teritoryo. Matatawan kaini nin oportunidad an lambang tawo na madangog an mensahe kan Kahadian asin malilikayan na magkadoroble an paghuhulit.—Tal. 15:22.

³⁸ Ano an dapat tang gibuhon kun makanumpong kita nin kagharong na iba an lengguwahe? Dai ta dapat pag-isipon na madadalaw man siya kan mga parahayag na nagtataram kan lengguwahe niya. May mga parahayag na nag-aadal nin simpleng presentasyon sa lengguwahe nin mga tawo na parati nindang nanunumpungan sa teritoryo. Puwede tang ipahiling sa kagharong kun paano siya makakabasa o makaka-download nin literatura sa lengguwahe niya sa satong opisyal na website na jw.org, o puwede tang sabihon na dadarahan ta siya nin literatura sa lengguwahe niya.

³⁹ Kun an kagharong talagang interesado, humanap nin sarong parahayag na kuwalipikadong tumabang sa saiya sa lengguwaheng nasasabutan niya. Puwede ta man itukdo saiya kun sain may haraning pagtiripon sa lengguwahe niya. Kun gusto niyang bisitahon siya nin Saksi na nagtataram kan lengguwahe niya, puwede ta siyang tukduan kun paano i-enter sa jw.org an saiyang contact information. Dangan, hihinguwahon kan sangang opisina na makakua nin haraning parahayag, grupo, o kongregasyon na urog pang makakatabang sa saiya.

⁴⁰ Dapat tang padagos na dalawon an interesado sagkod na makontak na siya nin sarong parahayag na nagtataram kan lengguwahe niya. May mga pagkakataon na tibaad impormaran kan sangang opisina an mga elder na mayo sindang makuang tugang na nagtataram kan lengguwahe kan interesado. Sa arog kaiyan na sitwasyon, dapat tang gibuhon an satong pinakamakakaya na padagos siyang tabangan. Kun posible, konduktahan ta siya nin pag-adal sa Bibliya, puwedeng gamit an sarong publikasyon sa lengguwahe niya. Kun gagamiton tang marhay an mga ritrato asin ipapabasa sa saiya an sitadong mga teksto, maski paano masasabutan niya an panginot na mga katukduan kan Bibliya. Tibaad may kapamilya siya na puwedeng magin interpreter nindo.

⁴¹ Tanganing magiyahan an interesado pasiring sa organisasyon nin Diyos, dapat ta siyang imbitaran sa satong mga pagtiripon, dawa ngani posibleng dai niya lubos na masasabutan an programa. Kun may binabasang mga teksto, puwede ta siyang tabangan na mahanap iyan sa Bibliya sa lengguwahe niya, kun igwa. An pakikiasosyar niya sa kongregasyon makakapakusog na sa saiya asin makakatabang sa saiya na umuswag sa espirituwal.

⁴² Pregroup: An pregroup kompuwesto nin nagkapirang parahayag na naghuhulit sa mga tawo na an lengguwahe iba sa lengguwahe kan kongregasyon ninda, dawa mayo nin kuwalipikadong elder o ministeryal na lingkod para magkondukta nin semanal na pagtiripon sa lengguwaheng iyan. Puwedeng tugutan kan sangang opisina an sarong kongregasyon na mag-host nin pregroup kun naaabot an minasunod na mga kahagadan:

1. (1) Dakul na tawo sa teritoryo an nagtataram nin lengguwahe na iba sa lengguwaheng ginagamit kan kongregasyon.

2. (2) May kisiyera nagkapirang parahayag na tatao o gustong makanuod kan lengguwaheng iyan.

3. (3) Andam an grupo kan kamagurangan na manginot sa pag-organisar nin paghuhulit sa lengguwaheng iyan.

Kun gusto kan grupo kan kamagurangan na mag-host nin pregroup, dapat konsultahon kan mga elder an paraataman nin sirkito. Tibaad may aram siyang ibang kongregasyon na nagpaplano man na maghulit sa mga tawo sa lengguwaheng iyan saka makakatao siya nin impormasyon na makakatabang para madeterminaran kun arin na kongregasyon an pinakamarahay na mag-host kan pregroup sa lengguwaheng iyan. Pag makapili na nin kongregasyon na ma-host, an mga elder dapat na magsurat sa sangang opisina para maghagad nin permiso na magin host congregation nin sarong pregroup.

⁴³ Grupo: Puwedeng tugutan kan sangang opisina an sarong kongregasyon na mag-host nin sarong grupo kun naaabot an minasunod na mga kahagadan:

1. (1) Igwa nin supisyenteng bilang nin mga interesado asin potensiyal na pag-uswag sa sarong partikular na lengguwahe sa teritoryo.

2. (2) May kisiyera nagkapirang parahayag na tatao o nag-aadal kan lengguwaheng iyan.

3. (3) Igwa nin sarong kuwalipikadong elder o ministeryal na lingkod na puwedeng manginot asin magkondukta nin kisiyera sarong semanal na pagtiripon​—o sarong porsiyon kan semanal na pagtiripon, arog kan pampublikong diskurso o Pag-adal sa Torrengbantayan​—sa lengguwaheng iyan.

Kun rasonableng naaabot an mga kahagadan na ini, an grupo kan kamagurangan dapat na magsurat sa sangang opisina para itao an kumpletong detalye asin maghagad nin permiso na magin host congregation nin sarong grupo. An elder o ministeryal na lingkod na manginginot asin maasikaso sa grupo aapudon na “paraataman kan grupo” o “lingkod kan grupo.”

⁴⁴ Pag nabilog na an grupo, an grupo nin kamagurangan kan host congregation an masabi kun puwede nang magdagdag nin ibang porsiyon kan pagtiripon asin kun gurano kaparating gigibuhon an mga pagtiripon kada bulan. Puwede man na mag-areglo nin mga pagtiripon bago maglingkod sa langtad para sa grupo. An gabos na miyembro kan grupo nasa pangangataman kan grupo nin kamagurangan kan host congregation. Matao an mga elder nin balanseng superbisyon asin sinda an maasikaso sa pangangaipo kan grupo. Kun inibanan kan paraataman nin sirkito an grupo sa semana kan dalaw niya sa host congregation, matao siya nin halipot na report sa sangang opisina manungod sa pag-uswag asin sa ano man na espesipikong pangangaipo kan grupo. Pag-abot nin panahon, an grupo tibaad puwede nang magin kongregasyon. Kun susunudon kan gabos na imbuwelto diyan an teokratikong mga areglo, mauugma si Jehova.—1 Cor. 1:10; 3:5, 6.

⁴⁵ An lambang nagdusay na Kristiyano may paninimbagan na ipaabot sa iba an maugmang bareta. Kadakul nin paagi para magibo ini, pero gusto kan kadaklan sa sato na maglingkod sa ministeryo kaiba kan mga tugang. (Luc. 10:1) Kaya sa mga puro kan semana saka sa iba pang aldaw, an mga kongregasyon nagtitiripon nguna bago maglingkod sa langtad. Marahayon man na oportunidad na magpatotoo bilang grupo pag mga holiday, huling dakul na tugang an daing laog sa trabaho. An Komite sa Paglilingkod kan Kongregasyon nag-aareglo nin mga pagtiripon bago maglingkod sa langtad sa kumbenyenteng mga oras saka lugar pag aldaw asin sa mga banggi.

⁴⁶ Huli sa paghuhulit bilang grupo, iribang nakakapaglingkod an mga parahayag asin napapakusog ninda an kada saro. (Roma 1:12) Nakakanuod an baguhan na mga parahayag sa pagpartner sa eksperyensiyadong mga parahayag. May mga lugar na tibaad mas ligtas kun duwa o labi pa sa duwang parahayag an magkaibanan sa paglilingkod. Dawa kun nagpaplano kang maghulit nin solo, mapapakusog ka asin an iba kun maduman ka nguna sa pagtiripon kan grupo bago maglingkod. Magkakaigwa ka nin kusog nin buot ta aram mong may kasabay kang naghuhulit man sa laog kan saindong teritoryo. Dai dapat mamati kan mga payunir asin kan iba pa na obligado sindang suportaran an kada pagtiripon bago maglingkod sa langtad na inareglo kan kongregasyon, lalo na kun igwa nin arog kaiyan na pagtiripon kada aldaw. Minsan siring, tibaad puwede nindang suportaran an pira sa mga pagtiripon na iyan kada semana.

⁴⁷ Lugod na arugon niyato gabos an halimbawa na itinao ni Jesus asin kan saiyang mga apostol! Siyertong bebendisyunan ni Jehova an satong mga paghihinguwa na lubos na magpartisipar sa mahalagang marhay na gibuhon na paghuhulit kan maugmang bareta kan Kahadian.—Luc. 9:57-62.