An Tamang Paagi nin Pagsamba sa Diyos

1. Siisay sana an makakapagsabi sa sato kan tamang paagi nin pagsamba sa Diyos?

SINASABI kan kadaklan na relihiyon na itinutukdo ninda an katotoohan manungod sa Diyos. Pero dai puwedeng mangyari iyan ta ibang marhay an itinutukdo ninda mapadapit sa kun siisay an Diyos asin kun paano siya dapat sambahon. Paano ta maaaraman an tamang paagi nin pagsamba sa Diyos? Si Jehova sana an makakapagsabi sa sato kun paano ta siya dapat sambahon.

2. Paano mo maaaraman an tamang paagi nin pagsamba sa Diyos?

² Itinao sa sato ni Jehova an Bibliya para maaraman ta an tamang paagi nin pagsamba sa saiya. Kaya pag-adalan mo an Bibliya, asin tatabangan ka ni Jehova na makinabang sa mga itinutukdo niya huling nagmamalasakit siyang marhay sa saimo.—Isaias 48:17.

3. Ano an gusto nin Diyos na gibuhon ta?

³ May mga nagsasabi na inaako nin Diyos an gabos na relihiyon, pero bako iyan an itinukdo sa sato ni Jesus. Sinabi niya: “Bakong gabos na nagsasabi sa sako, ‘Kagurangnan, Kagurangnan,’ makakalaog sa Kahadian kan kalangitan, kundi an naggigibo sana kan kabutan kan sakuyang Ama.” Kaya kaipuhan niyatong maaraman kun ano an kabutan nin Diyos dangan gibuhon iyan. Seryosong bagay ini huling an mga tawong dai nagsusunod sa Diyos iinagid ni Jesus sa mga kriminal, na “mga paragibo nin karatan.”—Mateo 7:21-23.

4. Ano an sinabi ni Jesus manungod sa paggibo kan kabutan nin Diyos?

⁴ Nagpatanid si Jesus na kun gusto niyatong gibuhon an kabutan nin Diyos, maagi kita nin mga kadipisilan. Sinabi niya: “Magralaog kamo sa hayakpit na trangkahan, huli ta halakbang an trangkahan saka mahiwas an dalan pasiring sa kalaglagan, asin dakul an nag-aaragi diyan; mantang hayakpit an trangkahan asin piot an dalan pasiring sa buhay, asin dikit an nakakakua kaiyan.” (Mateo 7:13, 14) An piot na dalan, o an tamang paagi nin pagsamba sa Diyos, pasiring sa buhay na daing katapusan. An mahiwas na dalan, o an salang paagi nin pagsamba sa Diyos, pasiring sa kagadanan. Pero habo ni Jehova na magadan an siisay man. Tinatawan niya nin oportunidad an gabos na tawo na makanuod manungod sa saiya.—2 Pedro 3:9.

5. Paano mo mamimidbid kun sairisay an nagsasamba sa Diyos sa tamang paagi?

⁵ Sinabi ni Jesus na puwede tang mamidbid kun sairisay an nagsasamba sa Diyos sa tamang paagi. Magigibo ta iyan kun oobserbaran ta an mga paniniwala asin ginigibo ninda. Sinabi niya: “Paagi sa saindang mga bunga mamimidbid nindo sinda.” Sinabi pa niya: “An lambang marahay na kahoy namumunga nin marahay na bunga.” (Mateo 7:16, 17) Dai man iyan nangangahulugan na perpektong mga tawo an mga nagsasamba sa Diyos. Pero pirming hinihinguwa kan mga lingkod nin Diyos na gibuhon an tama. Aaramon ta ngunyan kun ano an makakatabang sa sato na maaraman kun siisay an mga nagsasamba sa Diyos sa tamang paagi.

6, 7. Taano ta sa Bibliya nakabase an tunay na pagsamba? Ano an manunudan ta sa halimbawa ni Jesus?

⁶ An satong pagsamba dapat base sa Bibliya. Sinasabi kan Bibliya: “An bilog na Kasuratan ipinasabong nin Diyos asin kapaki-pakinabang sa pagtukdo, sa pagsaway, sa pagtanos kan mga bagay-bagay, sa pagdisiplina uyon sa matanos na pamantayan, tanganing an lingkod nin Diyos magin lubos na may kakayahan, lubos na nasangkapan para sa gabos na marahay na gibo.” (2 Timoteo 3:16, 17) Nagsurat si apostol Pablo sa mga Kristiyano: “Kan inako nindo an tataramon nin Diyos, na saindong nadangog sa samuya, inako nindo iyan bako bilang tataramon nin mga tawo, kundi inako nindo iyan sa kun ano talaga iyan, bilang tataramon nin Diyos.” (1 Tesalonica 2:13) An tunay na pagsamba nakabase sana sa Tataramon nin Diyos, an Bibliya, bako sa mga ideya nin tawo, tradisyon, o iba pa.

⁷ Base sa Tataramon nin Diyos an gabos na itinukdo ni Jesus. (Basahon an Juan 17:17.) An saiyang mga sinasabi parati niyang pigkokotar, o kinukua, sa Kasuratan. (Mateo 4:4, 7, 10) An tunay na mga lingkod nin Diyos nagsusunod sa halimbawa ni Jesus asin ibinabase sa Bibliya an gabos na itinutukdo ninda.

8. Ano an itinukdo ni Jesus sa sato mapadapit sa pagsamba ki Jehova?

⁸ Si Jehova sana an dapat tang sambahon. Sinasabi kan Salmo 83:18: “Ika, na an pangaran Jehova, ika sana an Kahuruhalangkawi sa bilog na daga.” (NW) Gusto ni Jesus na maaraman kan mga tawo kun siisay talaga an tunay na Diyos, asin itinukdo niya sa mga tawo an pangaran nin Diyos. (Basahon an Juan 17:6.) Sinabi ni Jesus: “Si Jehova na saimong Diyos an dapat mong sambahon, asin sa saiya mo sana dapat itao an sagradong paglilingkod.” (Mateo 4:10) Kaya bilang mga lingkod nin Diyos, sinusunod niyato an halimbawa ni Jesus. Si Jehova sana an sinasamba niyato, ginagamit ta an pangaran niya, asin itinutukdo ta sa mga tawo an pangaran nin Diyos saka an gigibuhon niya para sa sato.

9, 10. Paano ta ipinapahiling an pagkamuot sa lambang saro?

⁹ Dapat na igwa kita nin tunay na pagkamuot sa mga tawo. Itinukdo ni Jesus sa saiyang mga disipulo na kamutan an lambang saro. (Basahon an Juan 13:35.) Bakong importante kun taga sain kita, kun ano an kultura ta, o kun mayaman o tios kita. An pagkamuot ta sa lambang saro an dapat na magpahiro sa sato na magkasararo bilang magturugang. (Colosas 3:14) Kaya dai kita nakikigiyera o nanggagadan nin tawo. Sinasabi kan Bibliya: “An mga aki nin Diyos asin an mga aki nin Diyablo namimidbid sa bagay na ini: An siisay man na dai nagsasagibo nin katanusan bakong gikan sa Diyos, ni an siisay man na dai namumuot sa saiyang tugang.” Sinasabi pa kaiyan: “Dapat niyatong kamutan an lambang saro; bakong arog ni Cain, na naggikan sa saro na maraot asin ginadan an saiyang tugang.”—1 Juan 3:10-12; 4:20, 21.

¹⁰ Ginagamit niyato an satong panahon, kusog, asin materyal na mga bagay para tabangan saka pakusugon an lambang saro. (Hebreo 10:24, 25) ‘Naggigibo kita nin marahay sa gabos.’—Galacia 6:10.

11. Taano ta sinusunod ta si Jesus bilang dalan pasiring sa Diyos?

¹¹ Dapat kitang magsunod ki Jesus huling siya an dalan pasiring sa Diyos. Sinasabi kan Bibliya: “Mayo nin kaligtasan paagi sa kiisay pa man, huli ta daing ibang ngaran sa sirong nin langit na itinao sa mga tawo na paagi kaiyan kita maliligtas.” (Gibo 4:12) Nanudan ta sa Kapitulo 5 kan librong ini na sinugo ni Jehova si Jesus tanganing itao an buhay niya bilang pantubos para sa masinunod na mga tawo. (Mateo 20:28) Pinili ni Jehova si Jesus na mamahala bilang Hadi sa bilog na daga. Iyan an dahilan kaya sinasabi sa sato kan Bibliya na dapat tang sunudon si Jesus kun gusto niyatong mabuhay nin daing sagkod.—Basahon an Juan 3:36.

12. Taano ta dai kita nakikilabot sa pulitika?

¹² Dai kita dapat makilabot, o makiambit, sa pulitika. Dai si Jesus nakilabot sa pulitika. Kan pigdadangog an saiyang kaso, sinabi niya sa Romanong tagapamahala na si Pilato: “An sakuyang Kahadian bakong kabtang kan kinaban na ini.” (Basahon an Juan 18:36.) Arog ni Jesus, maimbod kita sa Kahadian nin Diyos sa langit. Kaya sain man kita nakaistar, dai kita nakikilabot sa pulitika. Pero, ipinagbubuot sa sato kan Bibliya na magsunod sa “haralangkaw na awtoridad,” buot sabihon, mga gobyerno. (Roma 13:1) Nagsusunod kita sa mga ley, o pagbuot, kan nasyon kun sain kita nakaistar. Pero siyempre, kun an pagbuot kan gobyerno kontra sa pagbuot nin Diyos, inaarog niyato an mga apostol, na nagsabi: “An Diyos an dapat niyamong sunudon bilang tagapamahala imbes na an mga tawo.”—Gibo 5:29; Marcos 12:17.

13. Ano an ihinuhulit niyato manungod sa Kahadian nin Diyos?

¹³ Nagtutubod kita na an Kahadian nin Diyos sana an solusyon sa mga problema sa kinaban. Sinabi ni Jesus na an ‘maugmang bareta kan Kahadian’ ihuhulit, o ipapaabot, sa bilog na kinaban. (Basahon an Mateo 24:14.) Dai kaya kan ano man na gobyerno nin tawo na gibuhon an mga gigibuhon kan Kahadian nin Diyos para sa sato. (Salmo 146:3) Tinukduan kita ni Jesus na ipamibi an Kahadian nin Diyos. Sinabi niya: “Dumatong lugod an Kahadian mo. Mangyari lugod an buot mo, kun paano sa langit, siring man sa daga.” (Mateo 6:10) Sinasabi sa sato kan Bibliya na hahalion kan Kahadian nin Diyos an gabos na gobyerno nin tawo asin na an Kahadian nin Diyos na sana ‘an magdadanay sagkod nuarin pa man.’—Daniel 2:44.

14. Sa hiling mo, siisay an nagsasamba sa Diyos sa tamang paagi?

¹⁴ Pagkatapos mong pag-adalan an mga puntong ini, haputon an saimong sadiri: ‘Siisay an naggagamit kan Bibliya bilang basehan kan mga itinutukdo ninda? Siisay an nagpapamidbid sa iba kan pangaran nin Diyos? Siisay an nagpapahiling nin tunay na pagkamuot sa lambang saro asin nagtutubod na sinugo nin Diyos si Jesus para iligtas kita? Siisay an dai nakikilabot sa pulitika? Siisay an naghuhulit na an Kahadian nin Diyos sana an makakatao nin solusyon sa satong mga problema?’ Daing iba kundi an mga Saksi ni Jehova sana.—Isaias 43:10-12.

15. Ano an dapat tang gibuhon kun gusto tang akuon nin Diyos an satong pagsamba?

¹⁵ Kulang an basta lang maniwala na may Diyos. Maski an mga demonyo nagtutubod na igwang Diyos, pero dai sinda nagsusunod sa saiya. (Santiago 2:19) Kun gusto tang akuon nin Diyos an satong pagsamba, dapat na dai sana kita nagtutubod na may Diyos, kundi dapat man na gibuhon ta kun ano an sinasabi niya.

16. Taano ta dapat kitang humali sa palsong relihiyon?

¹⁶ Tanganing akuon nin Diyos an satong pagsamba, dapat na humali kita sa palso, o bakong tunay, na relihiyon. Si propeta Isaias nagsurat: “Humali kamo diyan, magdanay kamong malinig.” (Isaias 52:11, NW; 2 Corinto 6:17) Iyan an dahilan kaya kaipuhan tang halion asin likayan an ano man na may koneksiyon sa palsong pagsamba.

17, 18. Ano an “Dakulang Babilonya,” asin taano ta dapat ka nang humali tulos diyan?

¹⁷ Ano an palsong relihiyon? Ano man na relihiyon na nagtutukdo nin paagi nin pagsamba sa Diyos na kontra sa saiyang Tataramon. Sa Bibliya, an gabos na palsong relihiyon inaapod na “Dakulang Babilonya.” (Kapahayagan 17:5) Taano? Huling pagkatapos kan Baha kan panahon ni Noe, an dakul sa salang katukduan nin relihiyon nagpuon sa siyudad nin Babilonya. An salang mga katukduan na idto luminakop sa bilog na daga. Halimbawa, an mga nakaistar sa Babilonya nagsasamba sa mga tuluhan na Diyos. Ngunyan, dakul man na relihiyon an nagtutukdo na an Diyos sarong Trinidad, pero malinaw na itinutukdo kan Bibliya na saro sana an tunay na Diyos, si Jehova, asin na si Jesus Aki niya. (Juan 17:3) An mga nakaistar kaidto sa Babilonya naniniwala man na pag nagadan an sarong tawo, may minasuhay sa hawak na padagos na nabubuhay asin puwede iyan na magsakit sa impiyerno. Bako iyan totoo.—Hilingon an Dagdag na Impormasyon 14, 17, asin 18.

¹⁸ Ihinula nin Diyos na madali nang halion an gabos na palsong relihiyon. (Kapahayagan 18:8) Nasasabutan mo daw kun taano ta dapat ka nang humali tulos sa palsong relihiyon? Gusto kan Diyos na Jehova na gibuhon mo iyan bago magin huri an gabos.—Kapahayagan 18:4.

19. Pag nagdesisyon ka na maglingkod ki Jehova, ano an gigibuhon niya para sa saimo?

¹⁹ Pag nagdesisyon kang humali sa palsong relihiyon para maglingkod ki Jehova, tibaad dai maintindihan kan iba mong amigo o kapamilya an desisyon mo. Tibaad kontrahon ka pa ngani ninda. Pero dai ka papabayaan ni Jehova. Magigin parte ka nin sarong pambilog na kinaban na pamilya na milyon-milyon an miyembro asin tunay na nagkakaminuruutan, saka magkakaigwa ka kan paglaom na mabuhay nin daing sagkod sa bagong kinaban nin Diyos. (Marcos 10:28-30) Dai mo aram, tibaad pag-abot nin panahon an mga amigo o kapamilya mong nagkokontra sa desisyon mong maglingkod ki Jehova magdesisyon man na mag-adal nin Bibliya.

20. Taano ta importanteng sambahon an Diyos sa tamang paagi?

²⁰ Madali nang paraon nin Diyos an gabos na karatan asin mamamahala na an saiyang Kahadian sa bilog na daga. (2 Pedro 3:9, 13) Maugmahon nanggad na panahon iyan! Sasambahon si Jehova kan gabos na tawo sa paaging gusto Niya. Kaya importanteng humiro ka na ngunyan asin sambahon an Diyos sa tamang paagi.