An Balos ki Job​—Sarong Gikanan nin Paglaom

‘Binendisyonan ni Jehova an kasagkodan ni Job nin labi pa sa saiyang kapinonan.’​—JOB 42:12.

1. Ano an ginigibo ni Jehova para sa saiyang banwaan, dawa kun pinapanluluya sindang marhay nin mga pagbalo?

SI Jehova “an parabalos sa mga maigot na naghahanap sa saiya.” (Hebreo 11:6) Minomotibar man nia an saiyang debotadong banwaan na mapusong magpatotoo, dawa kun an mga pagbalo nagpangyari sainda na lumuya arog nin mga gadan. (Job 26:5; Kapahayagan 11:​3, 7, 11) Iyan napatunayan na totoo sa kaso kan nagsasakit na si Job. Minsan ngani pinakaraot kan tolong falsong pararanga, dai sia napasilensio kan pagkatakot sa mga tawo. Imbes, sia nagtao nin mapusong patotoo.

2. Minsan ngani nagtios sinda nin mga paglamag asin kasakitan, paano an mga Saksi ni Jehova nakapanggana sa mga pagbalo sa sainda?

² Dakol na Saksi ni Jehova sa presenteng aldaw an nagtios nin siring kadakulang paglamag asin kasakitan na sinda haros magadan na. (2 Corinto 11:23) Alagad, arog ki Job, sinda nagpaheling nin pagkamoot sa Dios asin naggibo nin katanosan. (Ezequiel 14:​14, 20) Nakapanggana man sinda sa mga pagbalo sa sainda na determinadong paogmahon si Jehova, naparigon na magtao nin mapusong patotoo, asin napano nin tunay na paglaom.

Si Job Nagtao nin Mapusong Patotoo

3. Anong klaseng patotoo an itinao ni Job sa saiyang ultimong pahayag?

³ Sa saiyang ultimong pahayag, si Job nagtao nin orog pa ngani kadakulang patotoo kisa kan itinao nia kan nakaagi. Biyo niang napasilensio an falsong mga pararanga sa saiya. Paagi sa makolog na pagtuya, sia nagsabi: “O kanigoan na tabang an ikinatao mo sa saro na mayo nin kosog!” (Job 26:2) Inomaw ni Job si Jehova, na an kapangyarihan binibitin an satong globong daga sa mayo sa espasyo asin nagpopogol sa nagdadara nin tubig na mga panganoron sa itaas kan daga. (Job 26:​7-9) Minsan siring, si Job nagsabi na an siring na mga ngangalasan ‘mga gilid sana kan mga dalan ni Jehova.’​—Job 26:14.

4. Ano an sinabi ni Job manongod sa integridad, asin taano ta puwede niang ipahayag an saiyang sadiri sa paaging iyan?

⁴ Nakaseseguro sa saiyang pagkadaing sala, si Job nagpahayag: “Sagkod na ako magadan dai ko hahaleon sa sakuyang sadiri an sakuyang integridad!” (Job 27:5) Kabaliktaran sa falsong mga sahot tumang sa saiya, mayo siang ginibong ano man tanganing balosan kan nangyari sa saiya. Aram ni Job na si Jehova dai nagdadangog sa mga pamibi kan mga apostata pero babalosan nia an mga nagdadanay sa integridad. Puwedeng magpagirumdom nanggad ini sa sato na sa dai na mahahaloy an bagyo nin Armagedon hahaleon an mga maraot sa saindang lugar nin kapangyarihan, asin dai sinda makakadulag sa dai nagpapalibreng kamot nin Dios. Sagkod sa panahon na iyan, an banwaan ni Jehova maglalakaw sa saindang integridad.​—Job 27:​11-23.

5. Paano tinawan ni Job nin kahulogan an tunay na kadonongan?

⁵ Imahinara an tolong kinabanon an kadonongan na naghihinanyog mantang ipinapaheling ni Job na an tawo naggamit kan saiyang mga abilidad sa paghanap nin bulawan, pirak, asin iba pang kayamanan sa daga asin sa dagat. “Alagad,” sabi nia, “an sarong bag na pano nin kadonongan orog kahalaga kisa saro na pano nin mga perlas.” (Job 28:18) An falsong mga pararanga ni Job dai makakabakal nin tunay na kadonongan. An gikanan kaiyan iyo an Kaglalang kan doros, oran, kikilat, asin dagoldol. Tunay nanggad, an may paggalang na “pagkatakot ki Jehova​—iyan an kadonongan, asin an pagtalikod sa karatan pakasabot.”​—Job 28:28.

6. Taano si Job ta nagtaram manongod sa buhay nia kan nakaagi?

⁶ Sa ibong kan saiyang mga kasakitan, si Job dai uminontok sa paglilingkod ki Jehova. Imbes na tumalikod sa Kaharohalangkawe, minawot kan may integridad na tawong ini an saiyang dating “kadayupotan sa Dios.” (Job 29:4) Si Job dai nagpapaabaw-abaw kan isaysay nia kun paano sia ‘nagligtas sa mga nagsasakit, naggubing nin katanosan, asin sarong tunay na ama sa mga dukha.’ (Job 29:​12-16) Imbes, sinasambit nia an mga katunayan kan saiyang buhay bilang maimbod na lingkod ni Jehova. Nakagibo na daw kamo nin siring kagayon na rekord? Siyempre, ibinuyagyag man ni Job an pagigin falso kan mga sahot na ginibo kan tolong debotadong impostor.

7. Nagin anong klaseng tawo si Job?

⁷ Pinagngirisihan si Job nin mas nguhod na mga lalaki ‘na an mga ama dai man lamang nia ibubugtak na kasaro kan mga ayam sa saiyang aripompon.’ Ikinaongis asin linutaban sia. Minsan ngani grabe an pagsakit nia, si Job dai pinahelingan nin konsiderasyon. (Job 30:​1, 10, 30) Minsan siring, huling lubos siang debotado ki Jehova, sia igwa nin malinig na konsensia asin nakasabi: “Titimbangon nia ako sa eksaktong timbangan asin maaaraman nin Dios an sakuyang integridad.” (Job 31:6) Si Job bakong parasambay o parapakana, asin dai sia nasudya sa pagtabang sa mga dukha. Minsan ngani sia nagin mayaman, nungka siang nagsarig sa materyal na kayamanan. Saro pa, si Job dai nakikabtang sa idolatriya paagi sa pagtao nin debosyon sa daing buhay na mga bagay, na arog baga nin bulan. (Job 31:​26-28) Nagsasarig sa Dios, sia nagtao nin marahay na halimbawa bilang nagpapadanay nin integridad. Sa ibong kan gabos niang kasakitan asin kan presensia nin falsong mga pararanga, si Job naggibo nin ekspertong pagdepensa asin nagtao nin magayon na patotoo. Sa pagtapos kan saiyang mga tataramon, naglaom sia sa Dios bilang saiyang Hokom asin Parabalos.​—Job 31:​35-40.

Nagtaram si Eliu

8. Siisay si Eliu, asin paano sia nagpaheling kapwa nin paggalang asin kapusoan?

⁸ Nasa kataed an solterong si Eliu, sarong gikan kan aki ni Nacor na si Buz asin sa siring sarong harayong paryente kan katood ni Jehova na si Abraham. (Isaias 41:8) Si Eliu nagpaheling nin paggalang sa mga gurang na lalaki paagi sa paghinanyog sa lambang lado kan debate. Pero, sia mapusong nagtaram manongod sa mga bagay na sinda sala. Halimbawa, naglaad an saiyang kaanggotan sa “pagpahayag [ni Job] kan saiya mismong kalag na matanos imbes na an Dios.” Nangorognang nakasentro an kangirhatan ni Eliu tumang sa falsong mga pararanga. An saindang mga pahayag garo baga nag-oomaw sa Dios pero an totoo naglalanghad sa saiya paagi sa pagkampi sa lado kan kontrobersiya ni Satanas. “Pano nin mga tataramon” asin napahiro kan banal na espiritu, si Eliu sarong dai nagpapalaen na saksi ni Jehova.​—Job 32:​2, 18, 21.

9. Paano ipinarisa ni Eliu an pagrahay ni Job?

⁹ Mas inisip ni Job, an pagbindikar sa saiyang sadiri kisa kan sa Dios. Sa katunayan, nakisuhay sia sa Dios. Alagad, mantang naghihingagdan an kalag ni Job igwa nin maririsang pagrahay. Paano daw iyan? Bueno, si Eliu napahirong magsabi na biniyayaan ni Jehova si Job kan mensaheng ini: “Ilikay sia sa pagkaholog sa kotkot! Nakakua ako nin sarong pantubos! An saiyang laman magigin mas malomoy kisa kan sa aki; mabalik sia sa aldaw kan saiyang kosog sa pagkaaki.”​—Job 33:​24, 25.

10. Sagkod saen babaloon si Job, pero sa ano kita makakasierto kun kokonsideraron an 1 Corinto 10:13?

¹⁰ Itinanos ni Eliu si Job huli sa pagsabing mayo nin pakinabang sa pag-ogma sa Dios paagi sa pagpapadanay nin integridad. Nagsabi si Eliu: “Harayo sa tunay na Dios na gumibo nin maraot, asin sa Makakamhan sa gabos na gumibo nin bakong makatanosan! Huli ta sono sa gawe nin tawo na babalosan nia sia.” Nagin pabiglabigla si Job sa pagdodoon kan saiyang sadiring katanosan, pero ginibo nia iyan na mayo nin igong kaaraman asin pagmansay. Idinagdag ni Eliu: “Lubos na baloa si Job huli sa saiyang mga simbag sa tahaw kan mga tawo nin kaliwagan.” (Job 34:​10, 11, 35, 36) Kaagid kaiyan, an satong pagtubod asin integridad lubos na mapapatunayan kun kita ‘lubos na binabalo’ sa sarong paagi. Minsan siring, dai itotogot kan satong mamomoton na langitnon na Ama na kita masugotan nin labi sa satong makakaya.​—1 Corinto 10:13.

11. Kun makuring binabalo, ano an maninigo niatong girumdomon?

¹¹ Mantang nagpapadagos si Eliu, ipinaheling nia giraray na sobra an pagdodoon ni Job sa saiyang sadiring katanosan. An atension maninigong nakasentro sa satong Kadarudakulaing Kaggibo. (Job 35:​2, 6, 10) “Dai [nin Dios] papagdadanayon na buhay an siisay man na maraot, alagad itatao nia an paghokom sa mga nasasakitan,” an sabi ni Eliu. (Job 36:6) Mayo nin siisay man na puwedeng kumustion sa paagi nin Dios asin magsabi na sia nagin bakong matanos. Sia orog na inoomaw kisa sa puwedeng aram niato, asin an saiyang mga taon dai marorop an pagkadaing katapusan. (Job 36:​22-26) Kun makuring binabalo, girumdomon na an satong daing sagkod na Dios matanos asin babalosan kita sa satong maimbod na mga aktibidad sa saiyang ikaoomaw.

12. Ano an ipinaririsa kan pantapos na mga tataramon ni Eliu manongod sa paghokom nin Dios sa mga maraot?

¹² Mantang nagtataram si Eliu, sarong bagyo an nabibilog. Mantang iyan paparani, an saiyang puso nagpoon na magkubakuba. Nagtaram sia manongod sa darakulang bagay na ginibo ni Jehova asin nagsabi: “Maghinanyog ka kaini, O Job; tumindog kang daing hiro-hiro asin ipaheling mo an saimong sadiri na nagmamasid dapit kan makangangalas na mga gibo nin Dios.” Siring ki Job, kaipuhan niatong horophoropon an makangangalas na mga gibo asin makangingirhat na dignidad nin Dios. “Kun manongod sa Makakamhan sa gabos, dai niato sia naabot,” an sabi ni Eliu. “Sia halangkaw sa kapangyarihan, asin an hustisya asin kadakolan nin katanosan dai nia mimenuson. Kaya matakot sa saiya an mga tawo.” (Job 37:1, 14, 23, 24) An pantapos na mga tataramon ni Eliu nagpapagirumdom sa sato na kun sa dai mahahaloy hokoman na nin Dios an mga maraot, dai nia hahalean nin halaga an hustisya asin katanosan asin ililigtas nia an mga natatakot sa saiya bilang mga may paggalang na parasamba sa saiya. Pribilehiyo nanggad na mapabilang sa siring na mga nagpapadanay nin integridad na nagmimidbid ki Jehova bilang an Unibersal na Soberano! Magtagal arog kan ginibo ni Job, asin nungkang togotan an Diablo na irayo kamo sa saindong binendisyonan na kabtang sa tahaw kan maogmang kaburunyogan na ini.

Sinimbag ni Jehova si Job

13, 14. (a) Manongod sa ano na pinonan ni Jehova na hapoton si Job? (b) Anong mga punto an manonodan sa iba pang hapot nin Dios ki Job?

¹³ Sierto nanggad na napangalas si Job kan kaolayon sia ni Jehova gikan sa ariporos! An ariporos na iyan sarong gibo nin Dios, bakong arog kan makosog na doros na ginamit ni Satanas sa paggaba kan harong asin paggadan sa mga aki ni Job. Si Job dai nakataram kan maghapot an Dios: “Haen ka kan lalangon ko an daga? . . . Siisay an nagbugtak kan gapong pangeskina kaiyan, kan an mga bitoon nin kaagahan maogmang nagkukururahaw, asin an gabos na aki nin Dios nagkukururahaw sa pag-omaw?” (Job 38:​4, 6, 7) Nag-atubang si Jehova nin sunod-sunod na hapot ki Job manongod sa dagat, sa gubing na panganoron kaiyan, sa kaagahan, sa mga tata nin kagadanan, liwanag asin kadikloman, asin sa mga konstelasyon. Mayong ikasabi si Job kan hapoton: “Naaraman mo daw an mga pagboot kan kalangitan?”​—Job 38:33.

¹⁴ An iba pang hapot nagparisa na bago linalang an tawo asin tinawan nin pagsakop sa mga sira, gamgam, hayop, asin nagkakanap na mga bagay, an Dios nagtatagama na para sa sainda​—na mayo nin ano man na tabang o suhestion nin tawo. Nasambitan sa dugang pang mga hapot ni Jehova an mga linalang na siring baga sa layas na toro, ostrich, asin kabayo. Hinapot si Job: “Sa saimong pagboot daw na minalayog paitaas an agila asin na iyan minagibo kan tataghan kaiyan sa itaas?” (Job 39:27) Siyempre dai! Imahinara an reaksion ni Job kan hapoton sia nin Dios: “Maninigo daw na makisuhay an sarong parahanap nin sala sa Makakamhan sa gabos?” Bakong makangangalas na si Job nagsabi: “Uya! Ako nagin daing halaga. Ano an isisimbag ko sa saimo? Ibinugtak ko an sakuyang kamot sa sakuyang ngoso.” (Job 40:​2, 4) Mantang si Jehova perming tama, kun kita masugotan man na magreklamo tumang sa saiya, maninigo niatong ‘ibugtak an satong kamot sa satong ngoso.’ An mga hapot nin Dios nagpamuraway man sa saiyang kahalangkawan, dignidad, asin kosog, na ipinaheling sa paglalang.

Behemot Asin Leviatan

15. An Behemot sa kagabsan ibinibilang na anong hayop, asin ano an nagkapirang karakteristiko kaiyan?

¹⁵ Sunod na nasambitan ni Jehova an Behemot, na sa kagabsan sinasabing iyo an hipopotamo. (Job 40:​15-24) Pambihira sa kadakulaan, dakulang timbang, asin matagas na anit kaiyan, an pananom an kinakakan na hayop na ini ‘nagkakakan nin berdeng doot.’ An puwersa asin kosog kaiyan naggigikan sa mga piad asin mga ngalungaluan kan tulak kaiyan. An mga tolang kan bitis kaiyan siring kakosog nin “tubong kalongkaki.” An Behemot dai natatakot sa baha kundi pasil na minalangoy pasabat sa bolos nin tubig.

16. (a) An paglaladawan sa Leviatan tamang-tama sa anong linalang, asin ano an nagkapirang katunayan manongod kaiyan? (b) An puwersa nin Behemot asin Leviatan puwedeng magsuherir nin ano manongod sa pag-otob sa mga asignasyon sa paglilingkod ki Jehova?

¹⁶ Hinapot man nin Dios si Job: “Makakakua ka daw nin Leviatan paagi sa banwit, o paagi sa pisi mapopogolan mo daw an dila kaiyan?” An paglaladawan sa Leviatan tamang-tama sa buwaya. (Job 41:​1-34) Dai iyan makikipagtipan nin katoninongan sa siisay man, asin mayo nin madonong na tawo na mangangahas na gayo na mapukaw nia an reptilyang ini. An mga bosog dai nakakapadulag kaiyan, asin “pinagngingisihan kaiyan an sagitsit kan garod.” An maringis na Leviatan napapabuladbukad an mga kararoman nin tubig siring sa nagkakalakagang panhaplas sa laog nin koron. An bagay na an Leviatan asin Behemot orog kakosog kisa ki Job nakatabang na papakumbabaon sia. Maninigo man niatong mapakumbabang midbidon na bako kitang makosog sa sato man sana. Kita nangangaipo kan itinatao nin Dios na kadonongan asin kosog tanganing likayan an mga tingo ni Satanas, an Halas, asin tanganing otobon an satong mga asignasyon sa paglilingkod ki Jehova.​—Filipos 4:13; Kapahayagan 12:9.

17. (a) Paano ni Job ‘naheling an Dios’? (b) Ano an pinatunayan kan mga hapot na dai nahimong simbagon ni Job, asin paano ini makatatabang sa sato?

¹⁷ Biyong napakumbaba, minidbid ni Job an saiyang salang punto-de-vista asin inaadmitir nia na sia nagtaram na mayo nin pakaaram. Minsan siring, ipinahayag nia an pagtubod na saiyang ‘maheheling an Dios.’ (Job 19:​25-27) Paano iyan puwedeng mangyari, mantang mayo nin tawong makakaheling ki Jehova asin mabuhay? (Exodo 33:20) Aktuwalmente, naheling ni Job an kapahayagan nin banal na kapangyarihan, nadangog an tataramon nin Dios, asin nabuklat an saiyang mga mata nin pakasabot tanganing maheling an katotoohan manongod ki Jehova. Kaya ‘binawi ni Job an saiyang isinabi asin nagsolsol sa kabokabo asin abo.’ (Job 42:​1-6) An dakol na hapot na dai nia nahimong simbagon nagpatunay sa pagigin halangkaw nin Dios asin ipinaheling an pagigin sadit nin tawo, pati nin saro na debotado ki Jehova arog ni Job. Tinatabangan kita kaini na masabotan na an satong mga interes dai dapat na ipaorog sa pagpakangbanal sa ngaran ni Jehova asin pagbindikar sa saiyang soberaniya. (Mateo 6:​9, 10) Maninigo na an satong pangenot na pag-isipon iyo an pagpapadanay nin integridad ki Jehova asin pagtaong onra sa saiyang ngaran.

18. Ano an kinaipuhan na gibohon kan falsong mga pararanga ni Job?

¹⁸ Alagad, kumusta man an nagpapakangmatanos sa sadiring falsong mga pararanga? Tama kutanang ginadan ni Jehova si Elifaz, Bildad, asin Zopar huli sa dai pagtaram kan katotoohan manongod sa saiya, siring kan ginibo ni Job. “Kumua kamo nin pitong besero asin pitong karnero patin paduman kamo sa sakong lingkod na si Job,” sabi nin Dios, “asin kamo kaipuhan na magdolot nin atang na tinotong para sa saindo man sana; asin si Job na sakuyang lingkod an mamimibi para sa saindo.” An tolo kaipuhan na magpakumbaba mismo sa pagsunod. An nagpapadanay nin integridad na si Job an mamimibi para sa sainda, asin inako ni Jehova an saiyang pamibi. (Job 42:​7-9) Pero kumusta man an agom ni Job, na nagsadol saiyang sumpaon an Dios asin magadan? Malinaw na sia nakipag-uli sa saiya paagi sa pagkaherak nin Dios?

An Ipinanugang mga Balos Nagtatao Sato nin Paglaom

19. May koneksion ki Job, paano ipinaheling ni Jehova an Saiyang pagigin mas halangkaw sa Diablo?

¹⁹ Kan matapos na si Job sa paghadit manongod kan saiyang mga kasakitan asin ikinabalik sa paglilingkod sa Dios, liniwat ni Jehova an mga bagay para sa saiya. Pakapamibi ni Job para sa tolo, ‘hinale nin Dios an saiyang kasakitan’ asin itinao saiya ‘an gabos na rogaring nia kaidto nin doble.’ Ipinaheling ni Jehova an Saiyang pagigin mas halangkaw sa Diablo paagi sa pagpaontok sa nagpapahelang na kamot ni Satanas asin sa milagrosong pagpaomay ki Job. Pinalayas man nin Dios an grupo nin mga demonyo asin pinogolan sinda paagi sa pagtao liwat nin proteksion ki Job paagi kan Saiyang kampamento nin mga anghel.​—Job 42:10; Salmo 34:7.

20. Sa anong mga paagi ni Jehova binalosan asin binendisyonan si Job?

²⁰ An mga tugang na lalaki, tugang na babae, asin dating mga katood ni Job padagos na minaarabot tanganing kumakan sa kaibanan nia, makidamay sa saiya, asin rangahon sia sa kalamidad na itinogot ni Jehova na mamatean nia. An kada saro sa sainda nagtao ki Job nin kuwarta asin sarong bulawan na singsing. Binendisyonan ni Jehova an kasagkodan ni Job nin labi pa sa saiyang kapinonan, kaya sia nagkaigwa nin 14,000 na karnero, 6,000 na kamelyo, 1,000 padis nin baka, asin 1,000 asna. Si Job nagkaigwa man nin pitong aking lalaki asin tolong aking babae, na kaparehong bilang kan mga aki nia kaidto. An saiyang mga aking babae​—Jemima, Kesia, asin Keren-hapuc—​iyo an pinakamagayon na mga babae sa daga, asin pinamanahan sinda ni Job kaiba kan saindang mga tugang na lalaki. (Job 42:​11-15) Saro pa, si Job nabuhay pa nin 140 taon asin naheling an apat na kapag-arakian kan saiyang banhi. Minatapos an tala: “Luway-luway si Job nagadan, gurang na asin kontento sa mga aldaw.” (Job 42:​16, 17) An ikinalawig kan saiyang buhay iyo an milagrosong gibo ni Jehova Dios.

21. Paano kita tinatabangan kan Makakasuratan na tala manongod ki Job, asin ano an maninigo niatong determinadong gibohon?

²¹ An Makakasuratan na tala manongod ki Job nagpapangyari sato na magin orog na magmaan sa mga pakana ni Satanas asin tinatabangan kitang masabotan kun paanong konektado an unibersal na soberaniya sa integridad nin tawo. Arog ki Job, an gabos na namomoot sa Dios mababalo. Pero puwede kitang makatagal arog kan ginibo ni Job. Nakapanggana sia sa mga pagbalo sa saiya na may pagtubod asin paglaom, asin dakol an balos sa saiya. Bilang mga lingkod ni Jehova ngonyan, igwa kita nin tunay na pagtubod asin paglaom. Asin kanigoan kamamuraway na paglaom an itinagama sa lambang saro sa sato kan Dakulang Parabalos! An pagpapadanay sa isip kan langitnon na balos makakatabang sa mga linahidan na maimbod na maglingkod sa Dios sa natatada nindang buhay digdi sa daga. An dakol na igwa nin paglaom digdi sa daga dai na noarin man magagadan, pero an mga magagadan babalosan nin pagkabuhay liwat sa Paraiso digdi sa daga, kaibanan ni Job mismo. Nasa puso asin isip an tunay na paglaom na iyan, patunayan kan gabos na namomoot sa Dios na si Satanas putikon paagi sa paninindogan nin marigon sa lado ni Jehova bilang mga nagpapadanay nin integridad asin maimbod na mga parasuportar sa saiyang unibersal na soberaniya.

Paano Kamo Masimbag?

◻ Ano an nagkapirang punto na ginibo ni Job sa saiyang ultimong simbag sa saiyang falsong mga pararanga?

◻ Paano si Eliu napatunayan na dai nagpapalaen na saksi ni Jehova?

◻ Ano an nagkapira sa mga hapot nin Dios ki Job, asin ano an nagin epekto kan mga iyan?

◻ Paano kamo nakinabang sa Makakasuratan na tala manongod ki Job?

[Mga ritrato sa pahina 18]

An mga tataramon ni Jehova manongod sa Behemot asin Leviatan nakatabang na papakumbabaon si Job