Ginibo Ninda an Kabotan ni Jehova

Si Moises Asin Aaron—Mapusong mga Parabalangibog kan Tataramon nin Dios

IMAHINARA an pangyayari: An otsenta anyos na si Moises asin an saiyang tugang, si Aaron, nagtitindog sa atubangan kan pinakamakapangyarihan na tawo sa daga​—si Faraon kan Egipto. Para sa mga Egipcio an lalaking ini labi pa sa representante kan mga dios. Sinda nagtutubod na sia mismo sarong dios. Sia minimidbid bilang an enkarnasyon ni Horus, sarong dios na may payo nin kulago. Si Horus, kaiba ni Isis asin Osiris, an nagkompuesto kan pangenot na trinidad sa mga dios asin diosa kan Egipto.

Maririparo nanggad kan siisay man na minadolok ki Faraon an tanda nin maraot na maabot na porma nin payo nin kobra na nakatakod sa tahaw kan saiyang korona. Hinohona na an halas na ini makabubuga nin kalayo asin kalaglagan sa siisay man na kaiwal kan Faraon. Ngonyan si Moises asin Aaron duminolok sa atubangan kan dios-hade na ini dara an kahagadan na dai pang kabaing kan nakaagi​—na butasan nia an inoripon na mga Israelita tanganing ikaselebrar ninda an kapiestahan para sa saindang Dios, si Jehova.​—Exodo 5:1.

Patienot nang sinabi ni Jehova na magigin matagas an puso ni Faraon. Kun siring, si Moises asin Aaron dai nagngalas sa saiyang masuwayon na simbag: “Siisay man si Jehova, tanganing kuyogon ko an saiyang tingog na pahaleon an Israel? Dai ko man lamang namimidbid si Jehova asin, saro pa, dai ko totogotan na humale an Israel.” (Exodo 4:21; 5:2) Sa siring, ikinaandam an kamugtakan para sa dramatikong komprontasyon. Durante kan suminunod na paghampangan, iinatubang ni Moises asin Aaron an makangangalas na ebidensia ki Faraon na irinerepresentar ninda an tunay asin makakamhan sa gabos na Dios.

An Sarong Milagro Nangyari

Siring sa instruksion ni Jehova, si Aaron naggibo nin milagro na nagpatunay na si Jehova mas makapangyarihan kisa sa mga dios kan Egipto. Idinaklag nia an saiyang sogkod sa atubangan ni Faraon, asin tolos-tolos na iyan nagin dakulang halas! Nataranta kan milagrong ini, ipinaapod ni Faraon an saiyang mga saserdoteng nagmamahika.a Sa tabang kan kapangyarihan nin mga demonyo, an mga lalaking ini nakagibo nin kaagid na bagay sa sadiri nindang mga sogkod.

Kun si Faraon asin an saiyang mga saserdote nag-ogma, iyan temporaryo sana. Imahinara an mga lalauogon ninda kan saro-sarong hamilon kan halas ni Aaron an saindang mga halas! Naheling kan gabos na presente na an mga dios nin Egipto dai makapapareho sa tunay na Dios, si Jehova.​—Exodo 7:​8-13.

Minsan siring, dawa pakatapos kaini, an puso ni Faraon nagdanay na matagas. Kan an Egipto padarahan nin Dios nin sampulong nakalalaglag nin biyo na mga kalamidad, o damat, saka sana nagsabi si Faraon sa katapustapusi ki Moises asin Aaron: “Tindog kamo, lumuwas kamo sa tahaw kan sakong banwaan, kamo asin an iba pang aki ni Israel, asin lakaw kamo, paglingkod kamo ki Jehova, siring sa saindong sinabi.”​—Exodo 12:31.

Mga Leksion Para sa Sato

Ano an nagpangyari ki Moises asin Aaron na makadolok sa makapangyarihan na Faraon nin Egipto? Sa primero, si Moises nagpahayag nin kadaihan nin kompiansa sa saiyang abilidad, na nagsasabing sia “maluway sa ngoso asin maluway sa dila.” Minsan ngani inasegurar na kan tabang ni Jehova, sia nakimaherak: “Sugoan, tabi, sa kamot kan saro na saimong susugoon.” Sa ibang pananaram, nakimaherak si Moises na sugoon nin Dios an iba. (Exodo 4:​10, 13) Minsan siring, ginamit ni Jehova an mahoyong si Moises, na tinatawan sia kan kinakaipong kadonongan asin kosog tanganing magibo nia an saiyang asignasyon.​—Bilang 12:3.

Ngonyan, an mga lingkod ni Jehova Dios asin ni Jesu-Cristo naggigibo kan pagboot na ‘gumibo nin mga disipulo sa mga tawo kan gabos na nasyon.’ (Mateo 28:​19, 20) Tanganing magibo an satong kabtang sa pag-otob kan sugong ini, maninigo niatong gamiton sa pinakamarahay an Makakasuratan na kaaraman asin an ano man na abilidad na igwa kita. (1 Timoteo 4:​13-16) Imbes na pagparaisipon an satong mga kakulangan, akoon ta na may pagtubod an ano man na asignasyon na itinao sa sato nin Dios. Puede nia kitang kualipikaron asin pakosogon na gibohon an saiyang kabotan.​—2 Corinto 3:​5, 6; Filipos 4:13.

Mantang nakilaban si Moises sa nagtutumang na tawo asin demonyo, kaipuhan nia nanggad an lihis sa tawong tabang. Huli kaiyan, inasegurar sia ni Jehova: “Helinga, ginibo takang Dios ki Faraon.” (Exodo 7:1) Iyo, si Moises tinabangan asin tinawan nin autoridad nin Dios. Huling an espiritu ni Jehova nasa saiya, si Moises mayong rason na matakot ki Faraon o sa mga kaibahan kan mapalangkaw na namamahalang iyan.

Kita kaipuhan man na manarig sa banal na espiritu, o puersa aktiba, ni Jehova tanganing maotob an satong ministeryo. (Juan 14:26; 15:​26, 27) Igwa kan tabang nin Dios puede tang otrohon an mga tataramon ni David, na nag-awit: “Sa Dios ako nanarig. Dai ako matatakot. Ano an magigibo sakuya nin daganon na tawo?”​—Salmo 56:11.

Sa saiyang kabootan dai pinabayaan ni Jehova si Moises na magsolosolo sa saiyang asignasyon. Imbes, an Dios nagsabi: “An tugang mong si Aaron magigin propeta mo. Ika​—ika an masabi kan gabos na ipagboboot ko sa saimo; asin an tugang mong si Aaron an makikipag-olay ki Faraon.” (Exodo 7:​1, 2) Kanigoan kamamomoton ni Jehova na humiro sa abot kan makakaya ni Moises!

An Dios nagtatao sato nin asosasyon nin kapwa mga Kristiano na nag-ako kan angat nin pagigin Mga Saksi ni Jehova, an Kaharohalangkawe. (1 Pedro 5:9) Kun siring, sa ibong kan mga kaolangan na tibaad mapaatubang sato, magin kitang arog ni Moises asin Aaron​—mapusong mga parabalangibog kan tataramon nin Dios.

[Nota sa Ibaba]

[Retrato sa pahina 25]

Mapusong irinepresentar ni Moises asin Aaron si Jehova sa atubangan ni Faraon