Mga Hapot Hale sa mga Parabasa

Ano an kahulogan kan pagkaigwa nin “buhay sa saiya man sana”?

Nasasambitan kan Biblia na si Jesu-Cristo igwa nin “buhay sa saiya man sana” asin na an saiyang mga parasunod igwa nin ‘buhay sa sainda man sana.’ (Juan 5:26; 6:53) Minsan siring, bakong pareho an kahulogan kan duwang tekstong ini.

“Kun paanong an Ama igwa nin buhay sa saiya man sana,” an sabi ni Jesus, “itinao man nia sa Aki na magkaigwa nin buhay sa saiya man sana.” Bago pa sabihon an pambihirang deklarasyon na ini, si Jesus nagsabi: “Totoong-totoo na sinasabi ko sa saindo, An nagdadangog sa sakong tataramon asin nagtutubod sa saiya na nagsugo sa sako igwa nin buhay na daing katapusan . . . An oras madatong, asin iyan ngonyan na, na an mga gadan makakadangog sa tingog kan Aki nin Dios asin an mga naghinanyog magkakaburuhay.” An sinasabi digdi ni Jesus iyo an ekstraordinaryong kapangyarihan na itinao sa saiya kan Ama​—an kakayahan na tawan an mga tawo nin marahayon na kamugtakan sa atubangan nin Dios. Dugang pa, kaya ni Jesus na buhayon liwat an mga nagtotorog sa kagadanan asin tawan sinda nin buhay. Para ki Jesus, an pagkaigwa nin “buhay sa saiya man sana” nangangahulogan na tinawan sia kan kapangyarihan na ini. Arog kan Ama, an Aki man igwa “sa saiya man sana nin balaog nin buhay.” (Juan 5:24-26; nota sa ibaba) Kumusta man an saiyang mga parasunod?

Pakalihis nin mga sangtaon, kinaolay ni Jesus an mga nagdadangog sa saiya, na nagsasabi: “Totoong-totoo na ako nagsasabi sa saindo, Kun dai kamo magkakan kan laman kan Aki nin tawo asin mag-inom kan saiyang dugo, mayo kamo nin buhay sa saindo man sana. An minakakan kan sakong laman asin minainom kan sakong dugo igwa nin buhay na daing katapusan, asin bubuhayon ko sia liwat sa huring aldaw.” (Juan 6:​53, 54) Digdi ipinapareho ni Jesus an pagkaigwa nin “buhay sa saindo man sana” sa pagkakamit nin “buhay na daing katapusan.” An ekspresyon na may parehong gramatikong porma na arog kan pagkaigwa nin “buhay sa saindo man sana” manonompongan man sa ibang parte kan Griegong Kasuratan. An duwang halimbawa iyo an, “Magkaigwa kamo nin asin sa saindo man sana” asin “nag-aako sa sainda man sana kan bilog na kabayadan.” (Marcos 9:50; Roma 1:27) Sa mga halimbawang ini, an mga frase dai nangangahulogan nin kapangyarihan na magtao nin asin sa iba o na magtao nin maninigong kabayadan sa kiisay man. Imbes, panlaog na pagkakompleto, o kalubosan, an ipinaririsa digdi. Sa siring, an ekspresyon na “buhay sa saindo man sana” na ginamit sa Juan 6:53 nangangahulogan sana nin pagkamit kan mismong kalubosan nin buhay.

Sa pagsabi na an saiyang mga parasunod igwa nin buhay sa sainda man sana, sinambit ni Jesus an saiyang laman asin an saiyang dugo. Sa huri, kan establisaron an Pamanggihan nin Kagurangnan, si Jesus nagtaram giraray manongod sa saiyang laman asin dugo patin sinabihan an saiyang mga parasunod na dadarahon sa bagong tipan na makikabtang sa mga emblema na tinapay na daing lebadura asin arak. Nangangahulogan daw ini na an linahidan na mga Kristiano sana, na nasa bagong pakipagtipan ki Jehova Dios, an malaog sa siring na kalubosan nin buhay? Dai. An duwang pangyayaring iyan may pag-oltanan na sangtaon. An mga nakadangog kan mga tataramon ni Jesus na nakasurat sa Juan 6:​53, 54 daing aram manongod sa taonan na selebrasyon na may mga emblema na nagrerepresentar sa laman asin dugo ni Cristo.

Oyon sa Juan kapitulo 6, ikinomparar nguna ni Jesus an saiyang laman sa mana, na nagsasabi: “An saindong mga apoon nagkarakan kan mana sa kaawagan alagad nagkagaradan. Ini iyo an tinapay na naghihilig hale sa langit, tanganing an siisay man kumakan kaiyan asin dai magadan. Ako iyo an nabubuhay na tinapay na naghilig hale sa langit; kun an siisay man kumakan sa tinapay na ini sia mabubuhay sagkod lamang.” An laman ni Jesus, kaiba an saiyang dugo, nakaoorog kisa literal na mana. Paano? Sa dahelan na an saiyang laman itinao para sa “buhay kan kinaban,” na pinapangyaring magin posible an buhay na daing katapusan.a Huli kaini, an deklarasyon manongod sa pagkaigwa nin “buhay sa saindo man sana” sa Juan 6:53 minapanongod sa gabos na mag-aako kan buhay na daing katapusan​—sa langit o sa daga.​—Juan 6:48-51.

Noarin maaako kan mga parasunod ni Cristo an buhay sa sainda man sana, o makakamtan an mismong kalubosan nin buhay? Para sa linahidan na mga paramana kan Kahadean, mangyayari ini sa pagkabuhay liwat ninda sa langitnon na buhay bilang inmortal na espiritung mga linalang. (1 Corinto 15:​52, 53; 1 Juan 3:2) An “ibang karnero” ni Jesus makaeeksperyensia nin pagkamit nin kalubosan nin buhay pagkatapos kan saiyang Sangribong Taon na Paghade. Sa panahon na iyan, nabalo na sinda, nanompongan na fiel, asin ipinahayag na matanos para sa buhay na daing katapusan sa Paraisong daga.​—Juan 10:16; Kapahayagan 20:​5, 7-10.

[Nota sa Ibaba]

[Mga Ritrato sa pahina 31]

An gabos na tunay na Kristiano puedeng magkaigwa nin ‘buhay sa sainda man sana’