Mamotan an Katanosan sa Bilog Nindong Puso

“Namomoot ka sa katanosan.”—SAL. 45:7.

 1. Ano an makakatabang sa sato na sundan “an mga dalan nin katanosan”?

PAAGI sa saiyang Tataramon asin banal na espiritu, ginigiyahan ni Jehova an banwaan nia sa “mga dalan nin katanosan.” (Sal. 23:3) Minsan siring, huling bako kitang sangkap, may tendensia kitang sumuway sa dalan na iyan. Tanganing magibo giraray an tama, kaipuhan an desididong paghihingoa. Ano an makakatabang sa sato na magin mapanggana? Arog ni Jesus, dapat na mamotan niato an paggibo kan tama.—Basahon an Salmo 45:7.

 2. Ano “an mga dalan nin katanosan”?

² Ano “an mga dalan nin katanosan”? An “mga dalan” na ini iyo an paagi nin pamumuhay na basado sa pamantayan ni Jehova sa katanosan. Sa lenguaheng Hebreo asin Griego, an “katanosan” nanonongod sa saro na “tanos,” na nagpaparisa nin estriktong pagsunod sa moral na mga prinsipyo. Huling si Jehova iyo “an pinag-eerokan nin katanosan,” an mga parasamba nia maogmang nag-aasa sa saiya tanganing maaraman an dalan, na tanos sa moral, na maninigo nindang sundan.—Jer. 50:7.

 3. Paano kita orog na makakanood manongod sa katanosan nin Dios?

³ Lubos niatong mapapaogma an Dios solamenteng paagi sa pagmamaigot sa bilog niatong puso tanganing masunod an matanos na mga pamantayan nia. (Deut. 32:4) Nagpopoon iyan paagi sa paggibo kan pinakamakakaya niato na makanood manongod ki Jehova Dios sa saiyang Tataramon, an Biblia. Mientras na orog kitang nakakanood manongod sa saiya, na orog na minarani sa saiya aroaldaw, orog man niatong mamomotan an katanosan nia. (Sant. 4:8) Dapat man niatong akoon an paggiya kan ipinasabong na Tataramon nin Dios kun kaipuhan niatong gumibo nin mahahalagang desisyon sa buhay.

Hanapon an Katanosan nin Dios

 4. Ano an kalabot sa paghanap sa katanosan nin Dios?

⁴ Basahon an Mateo 6:33. Kalabot sa paghanap sa katanosan nin Dios bako sanang an satong pagtao nin panahon sa paghuhulit kan maogmang bareta kan Kahadean. Tanganing akoon ni Jehova an satong sagradong paglilingkod, an aroaldaw niatong paggawe dapat na kaoyon kan halangkaw na mga pamantayan nia. Ano an dapat gibohon kan gabos na naghahanap kan katanosan ni Jehova? Dapat sindang “magsulot kan bagong personalidad na linalang segun sa kabotan nin Dios sa tunay na katanosan asin kaimbodan.”—Efe. 4:24.

 5. Ano an makakatabang sa sato na mapangganahan an pagkadesganar?

⁵ Mantang nagmamaigot kita na gumawe sono sa matanos na mga pamantayan nin Dios, tibaad kun beses madesganar kita huli sa mga pagkukulang niato. Ano an makakatabang sa sato na mapangganahan an nakakapangluyang pagkadesganar asin makanood na mamotan saka isagibo an katanosan? (Tal. 24:10) Dapat pirme kitang magdolok ki Jehova sa pamibi “na igwa nin sinserong puso sa lubos na kasiertohan nin pagtubod.” (Heb. 10:19-22) Baga man kita linahidan na mga Kristiano o may daganon na paglaom, nagtutubod kita sa atang na pantubos ni Jesu-Cristo asin sa paglilingkod nia bilang satong dakulang Halangkaw na Saserdote. (Roma 5:8; Heb. 4:14-16) An pagigin epektibo kan pinabolos na dugo ni Jesus iinilustrar sa pinakaenot na isyu kan magasin na ini. (1 Juan 1:6, 7) An artikulo nagsabi: “Sarong katunayan nanggad na kun an sarong bagay na kolor eskarlata o karmesi [mapulahon] sinisilag sa may liwanag paagi sa pulang salming, an bagay na iyan puti na sa pagheling; kaya, dawa an mga kasalan niato kolor eskarlata o karmesi, kun hehelingon niato iyan oyon sa pagheling nin Dios paagi sa dugo ni Cristo, nagigin puti iyan.” (Hulyo 1879, p. 6) Makangangalas nanggad na probisyon an ginibo ni Jehova para sa sato paagi sa atang na pantubos kan saiyang namomotan na Aki!—Isa. 1:18.

Siyasaton an Saindong Espirituwal na Pangalasag

 6. Taano ta mahalagang marhay na siyasaton niato an satong espirituwal na pangalasag?

⁶ Sa gabos na panahon, kaipuhan na sulot niato “an takop sa daghan na katanosan,” huling iyan mahalagang marhay na kabtang kan espirituwal na pangalasag hale sa Dios. (Efe. 6:11, 14) Baga man kasuarin pa sana kita nagdusay kan satong sadiri ki Jehova o mga dekada na sa sagradong paglilingkod, mahalagang marhay na aroaldaw niatong siyasaton an satong espirituwal na pangalasag. Taano? Huling an Diablo asin an saiyang mga demonyo ihinulog na sa daga. (Kap. 12:7-12) Anggot si Satanas, asin aram nia na halipot na sana an panahon nia. Huli kaini, mas pinakosog nia an saiyang mga pag-atake sa banwaan nin Dios. Nasasabotan daw niato an kahalagahan kan pagkaigwa nin “takop sa daghan na katanosan”?

 7. Paano kita magawe kun satong nasasabotan na kaipuhan niato “an takop sa daghan na katanosan”?

⁷ An takop sa daghan nagpoprotehir sa literal na puso. Huli sa satong pagkabakong sangkap, may tendensia an piguratibong puso niato na magin madaya asin desperado. (Jer. 17:9) Huling an puso niato may tendensiang gumibo nin sala, mahalagang marhay na sanayon asin disiplinahon iyan. (Gen. 8:21) Kun nasasabotan niato na kaipuhan niato “an takop sa daghan na katanosan,” dai niato iyan temporaryong hahaleon paagi sa pagpili nin aling-alingan na ikinakaongis nin Dios; ni magpapantasia man kita manongod sa paggibo nin sala. Dai kita magsasayang nin dakol na mahalagang oras sa pagdalan nin telebisyon. Imbes, padagos kitang magmamaigot na gibohon an nakakapaogma ki Jehova. Dawa kun nasingkog kita huling temporaryo kitang nadara nin maraot na makalaman na kaisipan, mabangon giraray kita sa tabang ni Jehova.—Basahon an Talinhaga 24:16.

 8. Taano ta kaipuhan niato “an dakulang kalasag nin pagtubod”?

⁸ Kabtang man kan satong espirituwal na pangalasag “an dakulang kalasag nin pagtubod.” Paagi kaiyan, ‘masisigbo niato an gabos na naglalaad na busog kan marigsok.’ (Efe. 6:16) Huli kaini, an pagtubod asin odok sa pusong pagkamoot ki Jehova nakakatabang sa sato na isagibo an katanosan asin magdanay sa dalan pasiring sa buhay na daing katapusan. Mientras na orog niatong namomotan si Jehova, orog man niatong papahalagahan an katanosan nia. Alagad, kumusta man an satong konsensia? Paano kita kaiyan tinatabangan sa satong paghihingoa na mamotan an katanosan?

Papagdanayon an Marahay na Konsensia

 9. Paano kita nakikinabang sa pagpadanay nin marahay na konsensia?

⁹ Kan bautismohan kita, naghagad kita ki Jehova nin “marahay na konsensia.” (1 Ped. 3:21) Huling nagtutubod kita sa pantubos, tinatahoban kan dugo ni Jesus an satong mga kasalan asin sa siring nagigin malinig kita sa atubangan nin Dios. Minsan siring, tanganing magdanay kita sa malinig na kamugtakan, kaipuhan niatong papagdanayon an marahay na konsensia. Kun pinapatanidan kita kun beses kan satong konsensia, maninigo kitang magpasalamat huling nagpupunsionar iyan nin tama. An nagigibong iyan kan konsensia nagpapaheling na bako pa ining bagol kun dapit sa matanos na mga dalan ni Jehova. (1 Tim. 4:2) Alagad may dugang pang papel an konsensia para sa mga gustong mamotan an katanosan.

10, 11. (a) Magsaysay nin eksperyensia na nagpapaheling kun taano ta maninigo kitang maghimate sa sinasabi kan satong konsensia na sinanay sa Biblia. (b) Taano ta an pagkamoot sa katanosan makakatao sa sato nin dakulang kaogmahan?

¹⁰ Kun sala an ginigibo niato, puede kitang kondenaron o pasakitan kan satong konsensia. Sarong hoben an naparayo sa “mga dalan nin katanosan.” Nagin adikto sia sa pornograpiya asin naggamit nin marihuana. Nakokonsensia sia kun nag-aatender sa mga pagtiripon asin namamatean nia na sia garo mapagsaginsagin kun naglilingkod sa langtad, kaya nagpondo sia sa Kristianong mga aktibidad na ini. “Alagad,” an sabi nia, “dai ko naisip na papanimbagon ako kan sakong konsensia sa mga ginibo ko.” Sinabi pa nia, “An kamangmangan ko inabot nin mga apat na taon.” Dangan pinag-isipan nia na magbalik sa katotoohan. Minsan ngani sa paghona nia dai dadangogon ni Jehova an saiyang pamibi, namibi man giraray sia asin naghagad nin tawad. Pakalihis nin mayo pang sampulong minuto, binisita sia kan saiyang ina asin dinagka na mag-atender giraray sa mga pagtiripon. Nagpa-Kingdom Hall sia asin nakiolay sa sarong magurang sa kongregasyon na tokdoan sia sa Biblia. Nabautismohan sia pag-abot nin panahon, asin nagpapasalamat sia ki Jehova sa pagligtas sa buhay nia.

¹¹ Bako daw na dakulang kaogmahan nanggad an makukua niato sa paggibo kan tama? Mientras na nanonodan niatong mamotan an katanosan asin isagibo iyan nin lubos, orog kitang maggagayagaya sa paggibo kan nakakapaogma sa satong langitnon na Ama. Asin isip-isipa na sana! Maabot an panahon na an maeeksperyensiahan na sana kan gabos na tawo iyo an marahay na pagmate huli sa malinig na konsensia; sangkap na mababanaag sa sainda an ladawan nin Dios. Kun siring, itadom niato ngonyan sa satong puso an pagkamoot sa katanosan asin pagayagayahon si Jehova.—Tal. 23:15, 16.

12, 13. Paano niato masasanay an satong konsensia?

¹² Ano an magigibo niato tanganing sanayon an satong konsensia? Kun pinag-aadalan niato an Kasuratan asin an mga publikasyon na basado sa Biblia, mahalagang girumdomon na “an puso kan matanos naghohorophorop tanganing makasimbag.” (Tal. 15:28) Isip-isipa kun paano ini kapakipakinabang nanggad kun napapaatubang kita sa mga hapot dapit sa trabaho. Kun an sarong klase nin trabaho malinaw na kontra sa mga kahagadan sa Kasuratan, an kadaklan sa sato tolos na naghihimate sa mga instruksion na itinatao paagi sa grupong maimbod asin mapagmansay na oripon. Minsan siring, kun bakong malinaw an simbag sa sarong hapot dapit sa trabaho, maninigo kitang magsiyasat nin mga prinsipyo sa Biblia asin mapagngayongayong horophoropon iyan.a Aplikado ini sa mga prinsipyo na siring kan paglikay na makakolog sa konsensia nin iba. (1 Cor. 10:31-33) Nangorognang maninigo kitang magin interesado sa mga prinsipyo na may koneksion sa relasyon niato sa Dios. Kun totoo si Jehova para sa sato, an pangenot na ihahapot niato sa satong sadiri iyo an, ‘An paglaog ko daw sa trabahong ini makakakolog sa boot ni Jehova?’—Sal. 78:40, 41.

¹³ Kun nag-aandam para sa Pag-adal sa Torrengbantayan o Pag-adal sa Biblia kan Kongregasyon, dapat niatong girumdomon na kaipuhan kitang maghorophorop sa mga ipinepresentar na impormasyon. Pirme daw kitang naghihidali sa pagkurit kan simbag sa hapot dangan minabalyo na sa sunod na parapo? An siring na pag-adal posibleng marhay na dai makakapararom kan satong pagkamoot sa katanosan asin dai makakapatalubo sa sato nin sensitibong konsensia. Kun gusto niatong mamotan an katanosan, kaipuhan niatong mag-adal nin maigot asin maghorophorop sa satong nababasa sa nasusurat na Tataramon nin Dios. An pakanood na mamotan an katanosan sa bilog niatong puso nangangaipo nin paghihingoa!

Pagkagutom Asin Pagkapaha sa Katanosan

14. Ano an gusto ni Jehova Dios asin ni Jesu-Cristo na mamatean niato manongod sa sagradong paglilingkod?

¹⁴ Gusto ni Jehova Dios asin ni Jesu-Cristo na magin maogma kita mantang ginigibo niato an sagradong paglilingkod. Ano an makakakontribwir sa kaogmahan niato? Iyo, an pagkamoot sa katanosan! Sa Sermon sa Bukid, si Jesus nagsabi: “Maogma an mga nagugutom asin napapaha sa katanosan, huli ta sinda mababasog.” (Mat. 5:6) Ano an kahalagahan kan mga tataramon na ini sa mga may pagmawot na mamotan an katanosan?

15, 16. Sa anong mga paagi mapapanigoan an espirituwal na pagkagutom asin pagkapaha?

¹⁵ An kinaban na iniistaran niato pinamamahalaan kan saro na maraot. (1 Juan 5:19) Kun magheling kita nin diaryo saen man na nasyon, makakabasa kita dian nin karingisan asin kadahasan na dai pa nangyari kaidto. Para sa saro na matanos, an karingisan nin tawo sa saiyang kapwa nakakapurisaw na horophoropon. (Ecl. 8:9) Bilang mga namomoot ki Jehova, aram niato na sia sana an makakapanigo kan espirituwal na pagkagutom asin pagkapaha kan mga nagmamawot na manodan an katanosan. An mga bakong diosnon madali nang haleon, asin an mga namomoot sa katanosan dai na masasakitan huli sa mga masinuway sa ley asin sa maraot na mga gibo kaini. (2 Ped. 2:7, 8) Dakulang kaginhawahan nanggad iyan!

¹⁶ Bilang mga lingkod ni Jehova asin parasunod ni Jesu-Cristo, nasasabotan niato na an gabos na nagugutom asin napapaha sa katanosan “mababasog.” Lubos sindang mapapanigoan paagi sa areglo nin Dios na bagong kalangitan asin bagong daga na dian “magdadanay an katanosan.” (2 Ped. 3:13) Kaya, dai kita madesganar o magngalas na huli sa pang-aapi asin kadahasan mayo na an katanosan sa grabe karaot na kinaban na ini. (Ecl. 5:8) Aram kan Kaharohalangkaweng si Jehova an nangyayari, asin ililigtas nia sa dai na mahahaloy an mga namomoot sa katanosan.

Makinabang sa Pagkamoot sa Katanosan

17. Ano an nagkapira sa mga pakinabang sa pagkamoot sa katanosan?

¹⁷ Idinodoon kan Salmo 146:8 an sarong pambihirang pakinabang kan pagsunod sa dalan nin katanosan. An salmista nag-awit: “Si Jehova namomoot sa mga matanos.” Imahinara na sana! An Soberano kan uniberso namomotan kita huli sa pagkamoot niato sa katanosan! Huli sa pagkamoot ni Jehova, kompiado kita na itatao nia an mga pangangaipo niato mantang ineenot niato sa satong buhay an intereses kan Kahadean. (Basahon an Salmo 37:25; Talinhaga 10:3.) Sa mga namomoot sa katanosan, mapapasainda an bilog na planetang ini pag-abot nin panahon. (Tal. 13:22) Para sa kadaklan kan mga lingkod nin Dios, an magigin balos sa pagsagibo kan katanosan iyo an dakulaon na kagayagayahan asin buhay na daing katapusan sa magayon na paraisong daga. Dawa ngonyan, an mga namomoot sa katanosan nin Dios may balos nang panglaog na katoninongan na nakakakontribwir sa pagkakaoroyon sa saindang pamilya asin kongregasyon.—Fil. 4:6, 7.

18. Anong positibong mga bagay an magigibo niato mantang hinahalat an aldaw ni Jehova?

¹⁸ Mantang hinahalat niato an dakulang aldaw ni Jehova, dapat na padagos niatong hanapon an katanosan nia. (Sof. 2:2, 3) Kun siring, ipaheling niato an tunay na pagkamoot sa tanos na mga dalan ni Jehova Dios. Kaiba dian an danay na pagsulot kan “takop sa daghan na katanosan” tanganing maprotehiran an satong piguratibong puso. Kaipuhan man niatong papagdanayon an marahay na konsensia, na matao nin kaogmahan sa sato asin mapagayagaya sa puso kan satong Dios.—Tal. 27:11.

19. Ano an maninigong magin determinasyon niato, asin ano an totokaron sa sunod na artikulo?

¹⁹ An ‘mga mata ni Jehova naglilibot sa bilog na daga tanganing ipaheling an saiyang kosog para sa mga bilog an puso para sa saiya.’ (2 Cron. 16:9) Nakakaranga nanggad sa sato an mga tataramon na iyan mantang ginigibo niato an tama sa ibong kan nag-oorog na kawaran nin kasegurohan, kadahasan, asin karatan sa maribok na kinaban na ini! Totoo, an satong matanos na mga dalan tibaad makapangalas sa dakol na tawo na siblag sa Dios. Alagad nakikinabang na marhay kita paagi sa pagsunod sa katanosan ni Jehova. (Isa. 48:17; 1 Ped. 4:4) Kaya, magin determinado kitang padagos na mamotan an katanosan sa bilog na puso niato asin isagibo iyan, na magtatao sa sato nin kaogmahan. Minsan siring, kaiba man sa pagkaigwa nin bilog na puso an pagkaongis sa katampalasanan. Ipapaheling sa sato kan sunod na artikulo kun ano an kahulogan kaini.

[Nota sa Ibaba]

Ano an Isisimbag Nindo?

• Taano ta kaipuhan an pagpahalaga sa pantubos tanganing mamotan an katanosan?

• Taano ta mahalagang marhay na sulot niato “an takop sa daghan na katanosan”?

• Paano niato masasanay an satong konsensia?

[Ritrato sa pahina 26]

An sinanay na konsensia nakakatabang sa sato na masimbag an mga hapot dapit sa trabaho