Tinokdoan Ako ni Jehova na Gibohon an Kabotan Nia

Isinaysay ni Max Lloyd

Sarong matangang banggi kaidto kan 1955. Ako asin an kapwa ko misyonero nasa samong destino sa Paraguay, Amerika del Sur, kan an harong na kinamumugtakan mi palibotan nin anggot na magkakasurog na nagkukururahaw: “Paha sa dugo an dios mi, asin gusto nia an dugo kan mga gringo.” Paano napadigdi kaming mga gringo (dáyo)?

KUN dapit sa sako, iyan nagpoon dakol na taon na an nakaagi sa Australia, an lugar na dinakulaan ko, asin duman ako pinonan na tokdoan ni Jehova na gibohon an kabotan nia. Kan 1938, inako kan sakong ama an librong Enemies hale sa sarong Saksi. Sinda ni Nanay dati nang diskontento sa lokal na klero, na nagsasabi na eroestorya sana an pirang kabtang kan Biblia. Pakalihis nin mga sangtaon, nabautismohan an mga magurang ko bilang simbolo kan pagdusay ki Jehova. Poon kaidto, an paggibo kan kabotan ni Jehova an nagin pinakamahalaga sa pamilya mi. An tugang kong si Manay Lesley, na matua sa sako nin limang taon, an sunod na nabautismohan, asin ako man kan 1940 kan ako nuebe anyos.

Dai nahaloy pakapoon kan Giera Mundial II, ipinagbawal sa Australia an pag-imprenta asin pagdistribwir kan mga babasahon sa Biblia kan Mga Saksi ni Jehova. Kaya, aki pa nakanood na akong ipaliwanag an basehan kan pagtubod ko, na Biblia sana an gamit. Nagin ugale kong magdara nin Biblia sa eskuelahan tanganing ipaliwanag kun taano ta dai ako nagsasaludo sa bandera o nagsusuportar sa pakikigiera kan mga nasyon.—Ex. 20:4, 5; Mat. 4:10; Juan 17:16; 1 Juan 5:21.

Dakol sa mga kaeskuela ko an dai nakikiiba sa sako huli ta inaapod akong “espiyang Aleman.” Kaidto, nagpapasale nin mga pelikula sa eskuelahan. Bago ponan an pasale, an gabos dapat na tumindog asin kumanta kan himno nasyonal. Kun dai ako magtindog, duwa o tolong aking lalaki an minabutong kan buhok ko tanganing patindogon ako. Sa kahurihurihi pinahale ako sa eskuelahan huli sa paninindogan sa sakong mga paniniwalang basado sa Biblia. Minsan siring, nakapag-eskuela ako paagi sa correspondence school.

SARONG PASOHAN NA NAABOT KO

Personal kong pasohan na maglaog sa bilog na panahon na ministeryo bilang payunir pag-edad kong 14. Kaya grabe an pagkadesganar ko kan sabihon kan mga magurang ko na maghanap nguna ako nin trabaho. Iininsistir ninda na magbayad ako para sa sakong arkila asin kakanon sa harong mi, pero nangako sinda na pag-edad kong 18, puede na akong magpayunir. Huli kaini, pirme kaming nagdidiskusyon dapit sa sueldo ko. Nangatanosan ako na gusto kong tiponon iyan para sa sakong pagpayunir, pero kinukua ninda iyan.

Kan mapayunir na ako, kinaolay ako kan mga magurang ko asin ipinaliwanag na idineposito ninda sa bangko an kuartang itinao ko. Dangan, ibinalik ninda iyan gabos sa sako tanganing ibakal ko nin bado asin iba pang mga kaipuhan para sa pagpayunir. Tinotokdoan ninda ako na sustentohan an sadiri ko asin dai mag-asa sa iba. Sa paggirumdom sa nakaagi, mahalagang marhay an pagsasanay na iyan.

Mantang nagdadakula kami ni Manay, parateng nagdadagos sa harong mi an mga payunir, asin naoogma kaming makaibanan sinda sa ministeryo. An mga Sabado asin Domingo ginagamit mi sa pagharongharong, paghuhulit sa tinampo, asin pagkondukta nin mga pag-adal sa Biblia. An pasohan na oras para sa mga parahayag kaidto 60 oras kada bulan. Haros pirmeng naaabot iyan ni Nanay, na nagtao sa samo ni Manay nin marahay na halimbawa.

PAGPAPAYUNIR SA TASMANIA

An primero kong asignasyon sa pagpapayunir iyo an isla nin Tasmania sa Australia, na duman nakaibanan ko si Manay asin an saiyang agom. Minsan siring, naghale sinda dai nahaloy pagkatapos kaiyan tanganing mag-atender sa ika-15 klase kan Paadalan nin Gilead. Masusupgon akong marhay asin dai pa lamang naparayo sa pamilya. Naghona an nagkapira na dai ako makakatagal nin labing tolong bulan. Pero, sa laog nin sangtaon, kan 1950, ninombrahan ako bilang company servant, na inaapod ngonyan na parakoordinar kan grupo nin kamagurangan. Dai nahaloy, ninombrahan akong espesyal payunir, asin saro pang hoben na brother an nagin kapartner ko.

An destino mi sarong harayong banwaan na may minahan nin tanso, na duman mayong Saksi. Pabanggi na kan mag-abot kami sakay nin bus. Nagdagos kami sa sarong lumang hotel kan primerong banggi. Kan suminunod na aldaw mantang naghuhulit kami sa harong-harong, hinahapot mi an mga kagharong kun may aram sindang bakanteng kuarto. Kan mabanggi na, may nagsabi na bakante an harong kan ministro na kataed kan simbahan nin Presbiteriano asin sinabi nia na kaipuhan ming kaolayon an diakono. Makiamigo an diakono asin ipinagamit sa samo an harong. Garo bakong normal na aroaldaw maluwas kami sa harong kan ministro tanganing maghulit.

Mabunga an teritoryo. May mga naghimate sa pakikipag-olay mi asin nakapoon kami nin dakol na pag-adal sa Biblia. Kan mabaretaan kan mga autoridad kan simbahan sa kabisera an manongod dian asin maaraman ninda na mga Saksi ni Jehova an nakaistar sa harong kan ministro, pinagbotan ninda an diakono na pahaleon tolos kami. Mayo na naman kaming dadagosan!

Kan suminunod na aldaw pagkatapos na maghulit sagkod sa hapon, naghanap kami nin matotorogan. An grandstand kan istadyum sa isport an pinakamarahay na nahanap mi. Itinago mi dian an samong mga maleta asin naghulit giraray. Padiklom na, pero nagdesisyon kami na dumanan an pira pang harong tanganing matapos an sarong kalye. Sa sarong harong, may lalaking nag-alok sa samo na mag-istar sa sadit na harong na may duwang kuarto na nasa likod kan saiyang lote!

PANSIRKITONG GIBOHON ASIN GILEAD

Pakalihis nin mga walong bulan sa destinong ini, nakaresibi ako nin imbitasyon hale sa sangang opisina sa Australia na magin paraataman nin sirkito. Nabigla ako huling 20 anyos pa sana ako. Pagkatapos nin mga pirang semana nin pagsasanay, pinonan ko an regular na pagdalaw tanganing pakosogon an mga kongregasyon. Haros gabos mas matua sa sako, pero dai ninda ako minenos dawa hoben pa ako; imbes, iginalang ninda an gibohon ko.

Manlaenlaen an sinakayan ko sa pagbiahe pasiring sa mga kongregasyon! Sarong semana nagsakay ako sa bus, sunod na semana sa trambia, dangan sa auto o sa motorsiklo, na binabalanse an sarong maleta asin bag na pang-service. Maogma talaga na makidagos sa mga kapwa Saksi. Sarong company servant an gustong-gusto na padagoson ako dawa ngani dai pa tapos an saiyang harong. Kan semanang iyan, ginibohan ako nin higdaan sa bathtub, alagad nakakagayagaya nanggad sa espirituwal an semanang iyan para sa samo!

Saro pang sorpresa an nag-abot kan 1953 kan makaresibi ako nin aplikasyon sa ika-22 na klase kan Paadalan nin Gilead. Alagad an kagayagayahan ko may kaibang kahaditan. Pagkagradwar kaya sa Gilead ni Manay asin kan saiyang agom kan Hulyo 30, 1950, idinestino sinda sa Pakistan. Mayo pang sangtaon pagkatapos kaiyan, nagkahelang si Manay asin duman nagadan. Naisip ko, ano an mamamatean kan mga magurang ko kun pagkatapos tolos kaini maduman ako sa ibang parte kan kinaban? Minsan siring, sinabi ninda: “Sige, paglingkodan mo si Jehova saen ka man nia idestino.” Dai ko na nahiling giraray si Tatay. Nagadan sia kan huring kabtang kan dekada nin 1950.

Dai nahaloy, naglunad ako sa barko kaiba an lima pang Saksing Australiano, asin anom na semana kaming nagbiahe pa-New York City. Mantang nagbibiahe, nagbabasa kami nin Biblia, nag-aadal, asin nagpapatotoo sa mga kapwa pasahero. Bago magpa-amihanan pasiring sa pasilidad kan paadalan sa South Lansing, New York, nag-atender kami sa internasyonal na kombension kan Hulyo 1953 sa Yankee Stadium. An pinakahalangkaw na bilang nin nag-atender 165,829!

An klase mi na may 120 estudyante sa Gilead naggikan sa manlaenlaen na parte kan daga. Kaidto sanang aldaw kan gradwasyon kami sinabihan kun saen kami idedestino. Kan may oportunidad na kami, dali-dali kaming nagduman sa libreriya nin Gilead tanganing maaraman an manongod sa nasyon na duman kami idedestino. Naaraman kong an destino ko, an Paraguay, sarong nasyon na kaidto pa pirmeng may politikal na mga rebolusyon. Dai nahaloy pagkaabot duman, hinapot ko sarong aga an ibang mga misyonero kun ano an “selebrasyon” kan nakaaging banggi. Sinda nguminirit asin nagsabi: “Idto an enot na rebolusyon na naeksperyensiahan mo. Hilinga sa luwas.” May mga soldados maski saen!

SARONG DAI MALILINGAWAN NA EKSPERYENSIA

Sarong beses, inibanan ko an paraataman nin sirkito sa pagdalaw sa sarong napapasuway na kongregasyon tanganing ipasale an pelikulang The New World Society in Action. Nagbiahe kami nin walo o siyam na oras, sa tren nguna, dangan sa karetelang guyod nin kabayo asin sa katapustapusi sa karetang guyod nin baka. May dara kaming generator asin movie projector. Pakaabot sa destinasyon mi, ginamit mi an sunod na aldaw sa pagduman sa mga plantasyon tanganing imbitaran an gabos sa pagpasale kan pelikula sa bangging idto. Mga 15 katawo an nagduman.

Pakalihis nin mga 20 minutos na pagpasale kan pelikula, sinabihan kami na lumaog tolos sa harong. Kinua mi an projector asin nagkuyog. Dangan may mga lalaking nagkururahaw, nagpaputok nin badil, asin paorootrong nagsabi: “Paha sa dugo an dios mi, asin gusto nia an dugo kan mga gringo.” Duwa sana an gringo duman, asin saro ako sa sainda! An mga naghiling kan pasale pinugolan an pagprobar kan magkakasurog na makalaog sa harong. Alagad an mga paratumang nagbalik nin mga alas tres nin aga, na nagpapaputok nin badil asin anggot na nagsasabing aabangan kami pagbalik mi sa sentro kan aldaw na idto.

Kinontak kan mga tugang an sheriff, asin nag-abot sia kan hapon na may darang duwang kabayo tanganing darahon kami sa sentro. Mantang nasa dalan, kun napaparani kami sa mga palongpong o mga kahoy, binubulnot nia an saiyang badil asin minaenot sa samo tanganing inspeksionon an lugar. Nahiling kong an kabayo mahalagang paagi nin transportasyon, kaya dai nahaloy nagbakal ako nin saro.

MAY NAG-ABOT PANG MGA MISYONERO

An paghuhulit padagos na nagin mapangganang marhay sa ibong kan pirmeng pagkontra kan klero. Kan 1955, limang bagong misyonero an nag-abot, kaiba an sarong sister na taga Canada na si Elsie Swanson, na naggradwar sa ika-25 klase nin Gilead. Nagkaibanan kami nin dikit na panahon sa sangang opisina bago sia idinestino sa ibang banwaan. Idinusay nia an saiyang buhay sa paglilingkod ki Jehova na haros mayo nin tabang hale sa saiyang mga magurang, na nungkang nag-ako kan katotoohan. Kan Disyembre 31, 1957, ikinasal kami ni Elsie, asin kami sana an nakaistar sa sarong istaran nin mga misyonero sa timog na parte nin Paraguay.

An harong mi mayong gripo; pero, igwa nin bubon sa likod kaiyan. Kaya mayong shower o kubeta sa laog, mayong washing machine, o maski repridyeretor. Nagbabakal kami aroaldaw nin pagkakan na dai puedeng pahaloyon. Alagad huli sa simpleng buhay asin mamomoton na relasyon mi sa mga tugang sa kongregasyon, nagin maogmahon an panahon na ini kan samong pag-agoman.

Kan 1963, inatake sa puso an sakong ina dai nahaloy pagkaabot mi sa Australia tanganing bisitahon sia, asin iyan garo baga huli sa kaogmahan na mahiling giraray an saiyang aki pakalihis nin sampulong taon. Mantang nagrarani na an panahon kan samong pagbalik sa Paraguay, napaatubang kami sa saro sa pinakadepisil na mga desisyon sa buhay mi. Babayaan mi daw an sakong ina sa ospital, na naglalaom na may maasikaso sa saiya, asin mabalik sa samong namomotan na asignasyon sa Paraguay? Pakapamibi nin dakol na beses, nagdesisyon kami ni Elsie na asikasohon si Nanay. Nagibo mi iyan asin nakapagdanay kami sa bilog na panahon na ministeryo sagkod na magadan sia kan 1966.

Sarong pribilehio na gamiton sa pansirkito asin pandistritong gibohon sa Australia sa laog nin nagkapirang taon asin sa pagtokdo sa Pang-Kahadean na Paadalan sa Pagmiministro para sa mga elder. Dangan nag-abot an saro pang pagliliwat sa buhay mi. Inasignaran akong maglingkod bilang miembro kan enot na Komite kan Sangay sa Australia. Dangan, kan matogdok kami nin bagong sangang opisina, ninombrahan akong tsirman kan komite sa pagtogdok. Sa tabang kan dakol na may kabatidan asin nakikikooperar na mga trabahador, sarong magayon na sangang opisina an nagibo.

Sunod, iinasignar ako sa Departamento sa Paglilingkod, na nangangataman kan paghuhulit sa nasyon. Nagkapribilehio man ako na magdalaw sa iba pang mga sangay sa bilog na kinaban bilang paraataman nin sona, tanganing magtabang asin magparigon. Nakakapakosog nanggad sa pagtubod ko an pagdalaw sa mga nasyon na an mga tugang nabilanggo nin dakol na taon—dekada pa ngani—sa mga presohan asin kampo de konsentrasyon huli sa saindang maimbod na pagkuyog ki Jehova.

AN SAMONG PRESENTENG ASIGNASYON

Pagkabalik hale sa sarong mapagal na pagbiahe sa sona kan 2001, nakaresibi ako nin surat nin imbitasyon na magpa-Brooklyn, New York, tanganing maglingkod bilang miembro kan bagong mabilog na Komite kan Sangay sa Estados Unidos. Mapagngayongayo ming pinag-isipan ni Elsie an imbitasyon, asin maogma ming inako an asignasyon. Pakalihis nin labing 11 taon, nasa Brooklyn pa kami.

Ogmahon ako na igwa ako nin agom na maogmang ginigibo an ano man na hinahagad ni Jehova. Kami ngonyan ni Elsie labi nang 80 anyos asin medyo marahay pa an salud. Inaantisipar ming akoon an pagtotokdo ni Jehova sagkod lamang saka an abundang bendisyon para sa mga padagos na naggigibo kan kabotan nia.

[Blurb sa pahina 19]

Sarong semana nagsakay ako sa bus, sunod na semana sa trambia, dangan sa auto o sa motorsiklo, na binabalanse an sarong maleta asin bag na pang-service

[Blurb sa pahina 21]

Inaantisipar ming akoon an pagtotokdo ni Jehova sagkod lamang

[Mga Ritrato sa pahina 18]

Sa wala: Mantang nasa pansirkitong gibohon sa Australia

Sa Too: Kami kan mga magurang ko

[Ritrato sa pahina 20]

Kan aldaw kan samong kasal, Disyembre 31, 1957