100 na Taon na Pamamahala kan Kahadian—Ano an Epekto Kaiyan sa Saimo?

1, 2. Ano an gigibuhon kan Kahadian nin Diyos, asin taano ta makakapagtiwala kita na madatong an Kahadian na iyan?

KAN tigsuli nin 31 C.E., sa sarong bukid harani sa Capernaum, tinukduan ni Jesu-Cristo an mga parasunod niya na mamibi: ‘Dumatong lugod an Kahadian mo.’ (Mat. 6:10) Ngunyan, dakul an nagdududa kun baga madatong pa an Kahadian. Minsan siring, nagtitiwala kita na sisimbagon an sinsero tang pamibi na dumatong lugod an Kahadian nin Diyos.

² Gagamiton ni Jehova an Kahadian para pagkasararuon an pamilya niya sa langit asin sa daga. Mauutob an katuyuhan na iyan nin Diyos. (Isa. 55:10, 11) Sa katunayan, si Jehova nagin Hadi na sa satong panahon! Pruweba kaini an nakakaugmang mga pangyayari sa nakaaging 100 na taon. Naggigibo an Diyos nin dakula asin makangangalas na mga bagay para sa minilyon na maimbod na sakop niya. (Zac. 14:9; Kap. 15:3) Alagad, an pagigin Hadi ni Jehova lain sa pagdatong kan Kahadian nin Diyos na itinukdo sa sato ni Jesus na ipamibi. Paano magkalain an duwang pangyayaring ini, asin ano an epekto kaini sa sato?

 3. (a) Kasuarin si Jesus pinatukaw bilang Hadi, asin sain? (b) Paano mo papatunayan na inestablisar an Kahadian kan 1914? (Hilingon an nota sa ibaba.)

³ Sa pagtatapos kan ika-19 siglo, nagin maliwanag an kahulugan kan hula na isinurat ni Daniel labing 2,500 na taon na an nakaagi: ‘Sa mga aldaw kan mga hading ini, mapatindog an Diyos sa langit nin sarong kahadian na dai [nanggad] malalaglag.’ (Dan. 2:44) Nagkapirang dekada na sinasabi kan Mga Estudyante sa Bibliya na magigin makahulugan an taon 1914. Dakul kaidto an may marahay na linalauman. Arog kan pagkasabi nin sarong parasurat: “An kinaban kan 1914 pano nin paglaom asin panuga.” Minsan siring, nautob an hula sa Bibliya kan biglang mangyari an Giyera Mundiyal I sa huring kabtang kan taon na iyan. An suminunod na mga tiggutom, linog, asin peste siring man an kautuban kan iba pang hula sa Bibliya malinaw na nagpapatunay na si Jesu-Cristo nagpuon nang mamahala sa langit bilang Hadi kan Kahadian nin Diyos kan 1914.a Tunay nanggad na si Jehova nagin Hadi sa sarong lain na paagi kan patukawon niya an saiyang Aki bilang an Mesiyanikong Hadi!

 4. Ano tulos an ginibo kan bagong patukawon na Hadi, asin sairisay an sunod na tinawan niya nin atensiyon?

⁴ An inot na ginibo kan bagong patukawon na Hadi nin Diyos iyo an makigiyera ki Satanas, an panginot na Kaiwal kan saiyang Ama. Kaiba ni Jesus an mga anghel kan palayason niya sa langit an Diyablo asin mga demonyo. Huli kaini, nagkaigwa nin dakulang paggaya-gaya sa langit pero daing kaagid na pagsakit sa daga. (Basahon an Kapahayagan 12:7-9, 12.) Sunod kaiyan, tinawan nin atensiyon kan Hadi an mga sakop niya sa daga para dalisayon, tukduan, asin organisaron sinda sa paggibo kan kabutan nin Diyos. Pag-ulayan ta kun paano an positibong reaksiyon ninda sa tulong katuyuhan na ini kan pamamahala kan Kahadian nagtatao nin marahay na halimbawa sa sato ngunyan.

 5. Anong paglinig an nangyari sa pag-ultanan kan 1914 asin inot na kabtang kan 1919?

⁵ Pagkatapos na linigon kan pinatukaw na Hadi an langit sa nakakaraot na impluwensiya ni Satanas asin kan mga demonyo, pinagbutan ni Jehova si Jesus na inspeksiyunon saka dalisayon an espirituwal na kamugtakan kan mga parasunod niya sa daga. Ilinadawan ini ni propeta Malaquias bilang espirituwal na paglinig. (Mal. 3:1-3) Ipinapahiling kan kasaysayan na nangyari ini sa pag-ultanan kan 1914 asin inot na kabtang kan 1919.b Para magin kabtang kan unibersal na pamilya ni Jehova, dapat na kita malinig, o banal. (1 Ped. 1:15, 16) Dapat na dai kita nin ano man na impluwensiya kan palsong relihiyon o pulitika kan kinaban na ini.

 6. Paano itinatao an espirituwal na kakanon, asin taano ta mahalagang marhay ini?

⁶ Dangan ginamit ni Jesus an awtoridad niya bilang hadi para magnombra nin ‘maimbod asin mapagmansay na uripon.’ An uripon na ini an matao nin regular na suplay nin masustansiyang espirituwal na kakanon sa gabos na kabilang sa ‘sarong aripumpon’ na nasa pangangataman ni Jesus. (Mat. 24:45-47, NW; Juan 10:16) Puon 1919, maimbod na isinasaabaga nin sadit na grupo nin linahidan na tugang na mga lalaki an magabat na responsabilidad na pagpakakan sa “mga lingkod sa harong.” An abundang espirituwal na kakanon na itinatao paagi sa sainda nagpapakusog sa sato para magtalubo kita sa pagtubod. Pinapakusog kaiyan an desisyon ta na magdanay na malinig sa espirituwal, moral, mental, asin pisikal. Tinutukduan asin iinaandam man kita kaini para lubos na makikabtang sa pinakamahalagang gibuhon ngunyan sa daga. Lubos mo daw na inaaprobetsaran an mga probisyon na ini?

 7. Anong mahalagang gibuhon an pinunan ni Jesus kan siya nasa daga pa, asin sagkod nuarin iyan magpapadagos?

⁷ Kan punan ni Jesus an saiyang ministeryo sa daga, sinabi niya: ‘Ako kaipuhan na maghulit kan marahay na bareta kan Kahadian nin Diyos sa ibang mga banwa man, huli ta dahil kaini ako isinugo.’ (Luc. 4:43) Sa laog nin tulo may kabangang taon, an gibuhon na ini an nagin panginot sa buhay niya. Ininstruksiyunan niya an mga disipulo: ‘Pagduman nindo, maghulit kamo na nagsasabi, An kahadian nin langit harani na.’ (Mat. 10:7) Pagkatapos siyang buhayon, ihinula niya na papalakupon kan saiyang mga parasunod an mensaheng ini ‘sagkod sa kapuro-puruhi nin daga.’ (Gui. 1:8) Nangako siya sa sainda na susuportaran niya mismo an mahalagang marhay na gibuhon na ini sagkod sa panahon ta.—Mat. 28:19, 20.

 8. Paano pinukaw kan Hadi na humiro an saiyang mga sakop sa daga?

⁸ Kan 1919, nagkaigwa nin dugang pang kahulugan an ‘ebanghelyo nin kahadian.’ (Mat. 24:14) Namamahala na sa langit an Hadi, asin natipon na niya an sarong sadit na grupo nin lininig na mga sakop sa daga. May kaigutan sindang naghimati sa nakakapukaw sa buot na instruksiyon ni Jesus: Ihulit sa bilog na daga an maugmang bareta dapit sa inestablisar na Kahadian nin Diyos! (Gui. 10:42) Halimbawa, haros 20,000 na parasuportar sa Kahadian an nagtiripon sa internasyonal na kumbensiyon sa Cedar Point, Ohio, E.U.A., kan Setyembre 1922. Isip-isipa na sana an kaugmahan ninda kan itao ni Brother Rutherford an pahayag na may temang “An Kahadian” asin magdeklarar: “Uya, namamahala na an Hadi! Kamo an saiyang mga representante sa pagpaisi. Kun siring ipaisi, ipaisi, ipaisi, an Hadi asin an saiyang kahadian.” Dos mil na delegado an naghimati paagi sa pakikikabtang sa espesyal na “Aldaw nin Paglilingkod,” na nagharong-harong sagkod sa rayong 72 kilometros hali sa lugar kan kumbensiyon. Huling napahiro kaiyan, sarong delegadong sister an nagsabi: “Nungka kong malilingawan an pangapudan na ipaisi an Kahadian asin an kaigutan kan nagtiripon na kadaklan!” Arog man kaiyan an pagmati nin dakul na iba pa.

9, 10. (a) Anong mga areglo an ginibo para sanayon an mga parabalangibog kan Kahadian? (b) Paano ka personalmenteng nakikinabang sa pagsasanay na ini?

⁹ Kan 1922, labing 17,000 na parabalangibog kan Kahadian an aktibo sa 58 kadagaan sa bilog na kinaban. Minsan siring, kaipuhan ninda nin pagsasanay. Kan inot na siglo, nagtao an Itinalagang Hadi nin malinaw na instruksiyon sa mga disipulo dapit sa kun ano an ihuhulit, asin kun sain saka kun paano mahulit. (Mat. 10:5-7; Luc. 9:1-6; 10:1-11) Bilang pagsunod sa arugan na ini ngunyan, sinisiyerto ni Jesus na an gabos na nakikikabtang sa paghuhulit kan Kahadian tinatawan nin mga instruksiyon asin may mga gamit na kaipuhan para epektibong makapaghulit. (2 Tim. 3:17) Paagi sa Kristiyanong kongregasyon, sinasanay ni Jesus para sa ministeryo an mga sakop niya. An sarong paagi na ginagamit niya iyo an Teokratikong Paadalan sa Pagmiministro, na ginigibo sa labing 111,000 na kongregasyon sa bilog na daga. Huli sa pag-aprobetsar sa pagtutukdong ini, labing pitong milyon na parahulit an andam ngunyan na maghulit asin magtukdo sa paaging nakakaakit sa ‘gabos na tawo.’—Basahon an 1 Corinto 9:20-23.

¹⁰ Apuwera sa Teokratikong Paadalan sa Pagmiministro, inestablisar man an iba pang paadalan sa Bibliya para sanayon an mga elder sa kongregasyon, payunir, brother na daing agom, Kristiyanong mag-agom, miyembro kan Komite kan Sangay kaiba an saindang agom, nagbibiyaheng paraataman saka an saindang agom, asin misyonero.c Arog kaini an pag-apresyar sa paadalan kan mga estudyante sa sarong klase kan Bible School for Christian Couples: “Pinararom kan espesyal na pagsasanay samo an pagkamuot mi ki Jehova asin mas iinandam kami para makatabang sa iba.”

11. Paano nakakapagpadagos an mga parabalangibog kan Kahadian sa ibong nin pagkontra?

¹¹ Nahihiling kan kaiwal na si Satanas an dakulang paghihinguwang ini sa paghuhulit asin pagtutukdo kan Kahadian. Naggagamit siya nin direkta siring man tusong pagsalakay sa mensahe kan Kahadian asin sa mga mensahero kaiyan para mapapundo an paghuhulit. Pero dai magigin mapanggana an paghihinguwa kan kaiwal. Pinatukaw ni Jehova sa trono an Aki niya na “mas halangkaw na marhay kisa sa lambang gobyerno asin awtoridad saka kapangyarihan patin pagkakagurangnan.” (Efe. 1:20-22, NW) Bilang Hadi, ginagamit ni Jesus an awtoridad niya para protektaran asin giyahan an mga disipulo tanganing masiyerto na ginigibo an kabutan kan saiyang Ama.d Ihinuhulit an maugmang bareta, asin minilyon na sadiyosan an puso an tinutukduan sa mga dalan ni Jehova. Sarong pribilehiyo nanggad na makikabtang kita sa marahayon na gibuhon na ini!

12. Iladawan an pira sa ginibong mga pagpakarhay sa organisasyon puon kan establisaron an Kahadian.

¹² Puon kan establisaron an Kahadian kan 1914, pinapakarhay kan Hadi an pagkaorganisar kan mga lingkod nin Diyos para gibuhon an kabutan kan saiyang Ama. (Basahon an Isaias 60:17.) Kan 1919, sarong direktor sa paglilingkod an ninonombrahan sa kada kongregasyon para manginot sa paghuhulit. Kan 1927, inorganisar an regular na pagharong-harong pag Domingo. Napahiro an mga parasuportar kan Kahadian para sa mas dakulang gibuhon kan 1931 kan gamiton ninda an basado sa Kasuratan na pag-apod na Mga Saksi ni Jehova. (Isa. 43:10-12) Kan 1938, an demokratikong eleksiyon, o pagpili paagi sa pagboto, nin mga lalaking nanginginot sa kongregasyon sinalidahan nin teokratikong pagnombra. Kan 1972, iinasignar an pangangataman sa kongregasyon sa sarong grupo nin kamagurangan imbes na sa sarong paraataman sa kongregasyon. Dinagka an gabos na kuwalipikadong magin elder asin ministeryal na lingkod na magin andam na tumabang sa pagpastor sa kongregasyon. (1 Ped. 5:2) Kan 1976, inorganisar an Namamahalang Grupo sa anom na komite para panginutan an gibuhon na pang-Kahadian sa bilog na kinaban. Puon kaidto, progresibong inoorganisar kan ninombrahan ni Jehova na Hadi an mga sakop kan Kahadian sa teokratikong paagi, o sa paagi na pinamamahalaan nin Diyos.

13. Ano an epekto sa saimo kan mga nagibo kan 100 na taon na pamamahala kan Kahadian?

¹³ Isip-isipa kun ano an nagibo kan Mesiyanikong Hadi sa inot na 100 na taon kan pamamahala niya. Lininig niya an sarong banwaan na inaapod sa pangaran ni Jehova. Giniyahan niya an paghuhulit kan maugmang bareta kan Kahadian sa 239 kadagaan asin tinukduan an minilyon dapit sa mga dalan ni Jehova. Pinagkasararo niya an labing pitong milyon na maimbod na sakop, na an kada saro gikan sa buot na nagpresentar kan sadiri para gibuhon an kabutan kan saiyang Ama. (Sal. 110:3) Dakula asin makangangalas nanggad an mga ginibo ni Jehova paagi sa Mesiyanikong Kahadian. Sa maabot na panahon, may mas nakakaugma pa nganing mga mangyayari!

14. (a) Ano an ipinapakiulay ta na gibuhon nin Diyos kun namimibi kita na ‘Dumatong lugod an Kahadian mo’? (b) Ano an satong teksto para sa taon 2014, asin taano ta angay ini?

¹⁴ Dawa ngani kinoronahan ni Jehova an saiyang Aki, si Jesu-Cristo, bilang an Mesiyanikong Hadi kan 1914, bako ini an lubos na simbag sa satong pamibi na ‘dumatong lugod an Kahadian mo.’ (Mat. 6:10) Ihinula sa Bibliya na si Jesus ‘maghahadi sa tahaw kan saiyang mga kaiwal.’ (Sal. 110:2, An Marahay na Bareta Biblia) An mga gobyerno nin tawo na kontrolado ni Satanas nagtutumang pa man giraray sa Kahadian. Kun namimibi kita na dumatong lugod an Kahadian nin Diyos, ipinapakiulay ta sa Diyos na tapuson na kan Mesiyanikong Hadi asin kan kairiba niyang namamahala an pamamahala nin tawo saka halion na an mga nasa daga na paratumang sa Kahadian. An aksiyon na ini an magigin kautuban kan sinabi sa Daniel 2:44 na an Kahadian nin Diyos an ‘matipak asin maubos kan gabos na kahadian na ini.’ Hahalion kaiyan an pulitikal na mga kaiwal kan Kahadian. (Kap. 6:1, 2; 13:1-18; 19:11-21) Madali nang mangyari iyan. Angay nanggad na an satong teksto para sa taon 2014, an ika-100 na anibersaryo kan pagkaestablisar kan Kahadian nin Diyos sa langit, iyo an Mateo 6:10: ‘Dumatong lugod an Kahadian mo’!

15, 16. (a) Ano an nakakaugmang mga mangyayari durante kan Sangribong Taon na Paghadi? (b) Ano an ultimong gigibuhon ni Jesus bilang Mesiyanikong Hadi, asin ano an magigin kahulugan kaiyan dapit sa katuyuhan ni Jehova para sa gabos niyang linalang?

¹⁵ Pagkatapos na laglagon kan Mesiyanikong Hadi an mga kaiwal nin Diyos, ihuhulog niya sa bûngaw si Satanas asin an mga demonyo para ibilanggo diyan nin sangribong taon. (Kap. 20:1-3) Huling dai na an maraot na impluwensiyang iyan, mahiro na an Kahadian para itao an mga pakinabang kan pantubos na atang ni Jesus asin halion an mga epekto kan kasalan na minana ki Adan. Bubuhayon kan Hadi an minilyon na gadan na nasa lulubngan asin oorganisaron an mahiwas na programa nin pagtutukdo sa sainda dapit ki Jehova. (Kap. 20:12, 13) Magigin paraiso an bilog na daga arog kan hardin nin Eden. Magigin nang perpekto an gabos na maimbod na tawo.

¹⁶ Sa katapusan kan Sangribong Taon na Paghadi ni Cristo, nagibo na kan Mesiyanikong Kahadian an katuyuhan kaiyan. Dangan itatao ni Jesus an Kahadian sa saiyang Ama. (Basahon an 1 Corinto 15:24-28.) Dai na mangangaipo nin parapangultanan ki Jehova asin sa mga aki niya digdi sa daga. Magkakasararo an gabos na aki nin Diyos sa langit asin sa daga kaiba kan saindang langitnon na Ama bilang kabtang kan unibersal na pamilya niya.

17. Ano an determinado mong gibuhon para sa Kahadian?

¹⁷ Sinisiyerto sa sato kan nakakaugmang mga pangyayari sa 100 na taon na pamamahala kan Kahadian na kontrolado ni Jehova an mga bagay-bagay asin mauutob an katuyuhan niya para sa daga. Padagos lugod kitang magin maimbod na mga sakop niya asin ipaisi an Hadi saka an saiyang Kahadian. Ginigibo ta ini na may lubos na pagtitiwala na dai mahahaloy sisimbagon na ni Jehova an satong udok sa buot na pamibi na ‘Dumatong lugod an Kahadian mo’!