Hapot

◼ Paano puwedeng pamahalaan kan paraataman sa paglilingkod an trabaho kan ministeryal na mga lingkod na nagkakapot nin mga departamento sa literatura asin magasin?

An paninimbagan kan paraataman sa paglilingkod bakong limitado sa pagdalaw sa mga grupo nin pag-adal sa libro bulan-bulan asin pag-areglo nin regular na mga pagtiripon para sa paglilingkod sa langtad. An magurang na ini interesadong gayo sa gabos na bagay na makaaapektar sa gibohon na paghuhulit sa teritoryo kan kongregasyon.

Sisiertohon nia na kada bulan may bastanteng suplay nin pankampanyang literatura asin magasin asin na an mga iyan nasa marahay na kamugtakan. Sa katuyohan na ini pinamamahalaan nia an kadakol na paninimbagan kan ministeryal na mga lingkod na iinasignar na magkapot nin literatura asin magasin.

Nagtatao nin partikular na atension an paraataman sa paglilingkod sa mga paisi nin nagdadangadang na mga kampanya sa literatura kun an mga ini maglataw sa An Satong Ministeryo sa Kahadean. Sisiertohon nia asin kan tugang na nangangataman sa literatura na bastante an suplay nin literatura na magagamit, pero maninigo sindang magin maingat na dai magkua nin sobra. Kun an sarong publikasyon gagamiton sa langtad sa kaenot-enote o kun iyan pag-aadalan dai na mahahaloy sa kongregasyon, ini maninigong konsideraron kun an pedido ipadadara sa Sosyedad. Kun an literatura iinalok na kaidto, ipaheheling kan report nin paglilingkod sa langtad kan kongregasyon para sa nakaaging kampanya kun baga an presenteng suplay magkakaigo pa. Siyempre, kaipuhan man na konsideraron kun pirang parahayag an maglilingkod bilang auxiliary payunir para sa bulan siring man an pag-oswag kan bilang kan mga parahayag asin regular payunir poon kan pinakahuring panahon na iinalok an literatura. Kaipuhan na bukas an literatura bago asin pagkatapos kan mga pagtiripon sa kongregasyon. Maninigo na sarayon nin tama an mga literatura sa malinig, mamarang lugar tanganing malikayan an ano man na danyos.

An paraataman sa paglilingkod makikokooperar man sa tugang na nangangataman sa departamento nin magasin. Sa panapanahon, an paraataman sa paglilingkod asin an tugang na nagkakapot kan magasin kaipuhan na ikomparar an bilang kan mga magasin na pinipedido kada bulan sa bilang kan mga magasin na aktuwal na ikinakapasakamot sa ministeryo. Puwede gayod na an ibang parahayag kaipuhan na inaan an saindang kinukuang suplay na magasin kun an mga ini natatambak sa harong. Dai maninigong sayangon an mga magasin.

Sa paggirumdom sa kaparehong prinsipyo, kaipuhan na personal na siyasaton kan paraataman sa paglilingkod an kantidad kan pankampanyang literatura na hinahagad kan kongregasyon sa Literature Order Form (S-14). Dangan itatao nia an porma sa sekretaryo kan kongregasyon, na maingat na magsisiyasat kan iba pa sa porma, na nagtatao nin partikular na atension sa bilang nin espesyal na mga kahagadan na ilinista.

Siyempre, kun an iinasignar na mga tugang igwa nin mga hapot may koneksion sa saindang paggamit kan mga porma asin pagsaray nin rekord, an sekretaryo maoogma na tumabang sa kabtang na ini kan saindang gibohon.