Mga Hapot Hale sa mga Parabasa

May nagkapirang Saksi ni Jehova na inalokan nin trabaho na may labot sa relihiosong mga edipisyo o propiedad. Ano an pagmansay kan Kasuratan dapit sa siring na trabaho?

An isyung ini tibaad mapaatubang sa mga Kristiano na odok sa boot na gustong iaplikar an 1 Timoteo 5:8, na nagdodoon kan halaga nin pagsustento sa materyal sa mga kasararo sa harong. Minsan ngani tunay nanggad na maninigong iaplikar nin mga Kristiano an hatol na iyan, dai kaiyan tinatawan nin katanosan an pag-ako ninda nin ano man asin gabos na klase nin sekular na trabaho. Nasasabotan kan mga Kristiano an pangangaipong magin mapagmansay sa iba pang pagparisa kan kabotan nin Dios. Halimbawa, an pagmawot nin sarong lalaki na sustentohan an saiyang pamilya dai matao nin katanosan sa pagbalga nia kan sinasabi kan Biblia manongod sa inmoralidad o paggadan. (Ikomparar an Genesis 39:4-9; Isaias 2:4; Juan 17:14, 16.) Mahalaga man na marhay na an mga Kristiano humiro kaoyon kan pagboot na lumuwas sa Dakulang Babilonya, an pankinaban na imperyo nin falsong relihion.—Kapahayagan 18:4, 5.

Sa bilog na globo, an mga lingkod nin Dios napapaatubang sa dakol na situwasyon sa trabaho. Daing saysay asin mayo sa samuyang autoridad na probaran na ilista an gabos na posibilidad asin gumibo nin absolutong mga susundon. (2 Corinto 1:24) Pero sambiton ta an nagkapirang bagay na maninigong horophoropon nin mga Kristiano sa paggibo nin personal na mga desisyon dapit sa trabaho. An mga bagay na ini itinao sa halipot sa The Watchtower na Hulyo 15, 1982, sa sarong artikulo manongod sa pagkinabang sa satong konsensia na tao nin Dios. Ibinangon sa sarong kahon an duwang mahalagang hapot dangan ilinista an iba pang nakatatabang na mga bagay.

An enot na mahalagang hapot iyo ini: Kinokondenar daw sa Biblia an sekular na trabaho mismo? Sa pagkomento manongod digdi, sinabi kan The Watchtower na kinokondenar kan Biblia an paghabon, salang paggamit nin dugo, asin idolatriya. Maninigo na likayan nin Kristiano an sekular na trabaho na direktang nagsusuportar sa mga aktibidad na dai inooyonan nin Dios, arog kan mga sinambit pa sana.

An ikaduwang hapot: An paggibo daw kan trabahong ini magibo sa saro na komplise sa sarong kinokondenar na gibo? Malinaw nanggad, an saro na nagtatrabaho sa sarong sugalan, klinika sa pag-aborsion, o establisimiento nin prostitusyon magigin komplise sa sarong gibo na bakong sono sa Kasuratan. Dawa kun an saiyang trabaho sa aroaldaw duman paglinig sana sa salog o pagsimbag sa telepono, magkokontribwir sia sa sarong gibo na kinokondenar kan Tataramon nin Dios.

Nanompongan nin dakol na Kristianong napapaatubang sa mga pagdedesisyon may koneksion sa trabaho na an pag-analisar sa mga hapot sanang iyan nakatatabang sa sainda na makagibo nin personal na desisyon.

Halimbawa, basado sa duwang hapot na iyan, masasabotan nin saro kun taano an tunay na parasamba ta dai magigin direktang empleyado nin sarong organisasyon nin falsong relihion, na nagtatrabaho para sa asin sa sarong simbahan. An Kapahayagan 18:4 nagboboot: “Lumuwas kamo sa saiya, banwaan ko, kun habo nindong makikabtang sa saiyang mga kasalan.” An saro makikikabtang sa mga gibo asin kasalan kan Dakulang Babilonya kun sia regular na empleyado nin sarong relihion na nagtotokdo nin falsong pagsamba. Baga man an empleyado sarong hardinero, dyanitor, parahirahay, o akauntant, an saiyang trabaho magsusuportar sa pagsamba na kontra sa tunay na relihion. Dugang pa, an mga tawong makakaheling sa empleyadong ini na nagpapagayon kan simbahan, nagmamantenir kaiyan, o naggigibo kan relihiosong mga aktibidad kaiyan rasonable sanang ikonektar sia sa relihion na iyan.

Pero kumusta man an saro na bakong regular na empleyado nin sarong simbahan o relihiosong organisasyon? Tibaad inapodan sana sia para sa emerhensiang paghirahay kan naraot na tubo nin tubig sa sirong nin simbahan. Bako daw na iyan laen man sa pagpostor nia sa sarong kontrata, na arog baga nin pagbugtak nin ladrilyo o insulasyon sa atop kan simbahan?

Sa giraray, kadakol na laen-laen na situwasyon an puedeng maisip. Kaya repasohon ta an lima pang bagay na sinabi kan The Watchtower:

1. An trabaho daw serbisyong pantawo sana na iyan mismo bakong kontra sa Kasuratan? Kuanon na halimbawa an kartero. An paghatod nia nin mga surat dai nanggad mangangahulogan na sinusuportaran nia an sarong gibo na kinokondenar kun an sarong edipisyo sa lugar na hinahatodan nia sarong simbahan o klinika sa pag-aborsion. Itinatao nin Dios an saldang na nagtataong liwanag sa mga bintana nin gabos na edipisyo, kabale an simbahan o klinikang iyan. (Gibo 14:16, 17) An Kristiano na sarong kartero puedeng magkonklusyon na an ginigibo nia serbisyong pantawo sa gabos, aroaldaw. Puedeng kapareho iyan nin sarong Kristiano na minaresponde sa sarong emerhensia—sarong tubero na inapodan tanganing pongpongon an pagbaha sa sarong simbahan o sarong nagtatrabaho sa ambulansia na inapodan tanganing paomayan an sarong nadismayo durante nin seremonya sa simbahan. Puedeng ibilang nia ini na saro sanang insidental na pagsukoro sa tawo.

2. Sagkod saen an autoridad nin saro manongod sa trabaho? An sarong Kristiano na kagsadiri nin tindahan dai nanggad maoyon na magpedido asin magpabakal nin mga idolo, espiritistikong mga anting-anting, sigarilyo, o longganisa na gibo sa dugo. Bilang kagsadiri sia an nagkokontrol. Tibaad sadolon sia kan mga tawo na magtinda nin mga sigarilyo o idolo asin magganar, alagad mahiro sia kaoyon kan saiyang mga paniniwala na sono sa Kasuratan. Sa ibong na kampi, an sarong Kristianong empleyado sa sarong dakulang tindahan nin mga pagkakan tibaad iasignar na magkapot kan kaha, maglampaso, o magin bookkeeper. Bako sia an nagkokontrol kun anong mga produkto an pinepedido asin ipinapabakal, dawa kun dai puede an pira kaini, arog baga kan mga sigarilyo o paninda para sa relihiosong mga piesta.a (Ikomparar an Lucas 7:8; 17:7, 8.) Konektado ini sa sunod na punto.

3. Sagkod saen an pagkaimbuelto nin saro? Balikan ta an halimbawa nin sarong tindahan. Posible na an empleyadong inasignaran na magkapot kan kaha o magbugtak nin mga paninda sa mga estante paminsanminsan sanang inaasikaso an mga sigarilyo o relihiosong mga paninda; iyan sadit na kabtang kan saiyang kabilogan na trabaho. Pero kabaliktaran nanggad ini sa sarong empleyado sa iyo man sanang tindahan na duman nagtatrabaho sa counter nin mga sigarilyo! An gabos niang trabaho, sa bilog na aldaw, nakasentro sa sarong bagay na kontra sa mga paniniwalang Kristiano. (2 Corinto 7:1) Ipinaheheling kaini kun taano ta dapat na pagturotimbangon kun sagkod saen an pagkaimbuelto o koneksion kun nagdedesisyon manongod sa mga hapot dapit sa trabaho.

4. Saen naghahale an sueldo o an lugar kan trabaho? Horophoropa an duwang situwasyon. Tanganing maparahay an impresyon kaiyan sa publiko, an sarong klinika sa pag-aborsion nagdesisyon na bayadan an sarong tawo na linigan an mga tinampo sa komunidad. An sueldo nia naghahale sa klinika sa pag-aborsion, alagad bako sia duman nagtatrabaho, asin mayo nin nakakaheling sa saiya sa klinika sa bilog na aldaw. Imbes, namamasdan sia ninda na naggigibo nin trabahong pampubliko na iyan mismo bakong kontra sa Kasuratan, dawa kun siisay an nagbabayad sa saiya. Ngonyan an kalaenan. Sa sarong nasyon kun saen legal an prostitusyon, an serbisyo sa salud-publiko binabayadan an sarong nars na magtrabaho sa mga establisimiento nin prostitusyon, na nag-eeksamin sa salud sa katuyohan na limitaran an paglakop nin mga helang na ikinaoolakit paagi sa pagdodorog. Minsan ngani an serbisyo sa salud-publiko an nagbabayad sa saiya, an saiyang trabaho enterong yaon sa mga establisimiento nin prostitusyon, na ginigibo an inmoralidad na mas ligtas sa peligro, mas inaako. Ipinaheheling kan mga halimbawang ini kun taano ta dapat na konsideraron an pinaghahalean kan sueldo nin saro asin an lugar kan trabaho.

5. Ano an epekto kan pagtrabaho; makakokolog daw iyan sa mismong konsensia nin saro o makasisingkog sa iba? Maninigo na konsideraron an konsensia, kapwa an sato asin kan iba. Dawa kun an sarong trabaho (kabale an lugar kaiyan asin pinaghahalean kan sueldo) garo baga puede para sa kadaklan na Kristiano, tibaad mamatean kan indibiduwal na iyan makariribok sa saiyang sadiring konsensia. Si apostol Pablo, na nagtatao nin marahay na halimbawa, nagsabi: “Kami nagtitiwala na kami igwa nin sadiosan na konsensia, mantang minamawot niamo na gumawe nin sadiosan sa gabos na bagay.” (Hebreo 13:18) Dapat niatong likayan an trabaho na makariribok sa sato; pero, maninigo man na dai niato pagtatsaran an iba na laen an konsensia. Sa kabaliktaran, an sarong Kristiano tibaad mayo man nin naheheling na kontra sa Biblia sa saiyang trabaho, alagad narerealisar nia na iyan makariribok na marhay sa dakol sa kongregasyon asin sa komunidad. Ipinaheling ni Pablo an tamang aktitud sa saiyang mga tataramon: “Dai kami sa ano man na paagi nagtatao nin ano man na dahelan nin pagkasingkog, tanganing an samong ministeryo dai makuanan nin sala; kundi sa lambang paagi irinerekomendar niamo an samong sadiri bilang mga ministro nin Dios.”—2 Corinto 6:3, 4.

Ngonyan balikan ta an pangenot na hapot dapit sa pagtrabaho sa sarong edipisyo nin simbahan, arog baga nin pag-instalar nin bagong mga bintana, paglinig nin alpombra, o paghirahay kan alisabwan. Paano puedeng mapalabot an mga bagay na sinambit sa enotan?

Girumdoma an aspekto dapit sa autoridad. An Kristiano daw an kagsadiri o manedyer na iyo an puedeng magdesisyon kun baga aakoon an siring na trabaho sa simbahan? An Kristiano daw na igwa kan autoridad na iyan boot na makikabtang sa Dakulang Babilonya paagi sa pagpostor sa sarong trabaho o paglaog sa kontrata na tabangan an sarong relihion sa pagpalakop nin falsong pagsamba? Bako daw na kaagid iyan kan pagdesisyon na magtinda nin mga sigarilyo o idolo sa sadiring tindahan nin saro?—2 Corinto 6:14-16.

Kun an Kristiano sarong empleyado na bakong iyo an nagdedesisyon kun baga anong trabaho an aakoon, may iba pang bagay na dapat konsideraron, arog baga kan lugar asin kun sagkod saen an pagkaimbuelto. An empleyado daw hinahagadan sana na maghatod o mag-areglar nin bagong mga tukawan sa sarong okasyon o magtao nin serbisyong pantawo, arog baga kan pagpongpong kan bombero sa solo sa sarong simbahan bago iyan maglakop? Para sa dakol laen man ini sa sarong empleyado nin sarong negosyo na halawig na panahon an ginagamit sa pagpinta sa simbahan o regular na naghahardinero tanganing pagayonon iyan. An siring na regular o haloy na koneksion orog na magtatao nin posibilidad na an Kristianong iyan ikokonektar kan dakol sa relihion na sinasabi niang dai man nia inaaprobaran, na puedeng makapasingkog sa sainda.—Mateo 13:41; 18:6, 7.

Dakol kitang ibinangon na mahalagang bagay na dapat konsideraron kun dapit sa trabaho. An mga ini iinatubang may koneksion sa sarong espesipikong hapot may labot sa falsong relihion. Pero, iyan puede man na konsideraron may koneksion sa iba pang klase nin trabaho. Sa lambang kamugtakan, maninigo na gumibo nin mapagngayongayong pag-analisar, na kinokonsiderar an espesipiko—asin posibleng napapalaen—na mga aspekto kan presenteng situwasyon. An mga bagay na iinatubang sa enotan nakatabang na sa dakol na sinserong Kristiano na gumibo nin basado sa konsensia na mga desisyon na nagpapabanaag kan saindang kamawotan na lumakaw nin diretso asin tanos sa atubangan ni Jehova.—Talinhaga 3:5, 6; Isaias 2:3; Hebreo 12:12-14.

[Nota sa Ibaba]