Puede daw na Ini an Magin Pinakamarahay na Karera Para sa Saimo?

KUN ika sarong bautisadong Kristiano, daing duda na an pagkamoot sa Dios an nagpapahiro sa saimo na gibohon an saiyang kabotan. Apuera dian, an ministeryo sierto nanggad na iyo an saimong okupasyon. Total, sinugo ni Jesu-Cristo an gabos niang parasunod na magin paragibo nin mga disipulo. (Mateo 28:​19, 20) Iyo, tibaad nagtatrabaho ka ngonyan nin sekular tanganing suportaran an saimong sadiri. Alagad bilang parasunod ni Jesus asin saro sa Mga Saksi ni Jehova, enot sa gabos ika sarong Kristianong ministro​—saro na tinatawan nin prioridad sa buhay an paghuhulit kan Kahadean.​—Mateo 24:14.

Tibaad ika nasa huring mga taon na kan saimong pagkatinedyer o labi pa sanang 20 anyos. Posibleng pinagparaisip mo na kun ano an pag-aaaboton mo sa buhay. Sa pagturotimbang sa mga opsion na nasa saimo, an personal na satispaksion an posibleng marhay na magigin importante.

Kun siring, estudyare an sinasabi ni Jørgen sa Dinamarca manongod sa pinili nia. Ilinaladawan iyan ni Jørgen bilang “sarong pinakamarahay na pamumuhay na dian makakokonsentrar ka sa pinakamahalagang gibohon.” Si Eva, 31 anyos na babae sa Grecia, nagsasabi: “Kun ikokomparar an buhay ko sa buhay kan mga kaedad ko, pirmeng ikinokonklusyon ko na iyan mas makahulogan, mas nakakokontento, asin mas nakaoogma.” Anong karera an nagtatao kan siring na satispaksion? Paano mo maaabot an siring na pamumuhay?

Naggigiya daw an Dios?

An pagpili nin karera puedeng depisil na marhay. Sa katunayan, tibaad mawot nin nagkapira na ipaheling nin eksakto nin Dios an gusto niang ipagibo sa sainda.

Kan si Moises nasa Midian, pinagbotan sia ni Jehova na bumalik sa Egipto asin pangenotan an mga Israelita paluwas sa pagkaoripon. (Exodo 3:​1-10) An anghel nin Dios nagpaheling ki Gedeon, na ninombrahan na magligtas kan Israel sa pan-aapi. (Hokom 6:​11-14) Si David nagpapastor sa mga karnero kan sabihan nin Dios si Samuel na lahidan sia bilang masunod na hade kan Israel. (1 Samuel 16:​1-13) Dai kita ginigiyahan sa siring na mga paagi ngonyan. Imbes, kaipuhan niatong turotimbangon an mga bagay-bagay asin magdesisyon kun paano gagamiton an satong mga abilidad na tao nin Dios.

Binuksan ni Jehova “an sarong dakulang tata na pasiring sa gibohon” para sa hoben na mga Kristiano ngonyan. (1 Corinto 16:9) Paano man? Sa nakaaging dekada, an kabilangan kan mga parabalangibog kan Kahadean nadagdagan nin labing 2,125,000 na nagin labing 6,000,000 sa bilog na daga. Siisay an nagtatabang sa pagtao kan minilyon na Biblia, libro, brosyur, magasin, asin pulyeto na kaipuhan para sa espirituwal na pagkakan asin para sa pambilog na globong paghuhulit kan maogmang bareta? Ini an maogmang pribilehio kan mga miembro kan pambilog na kinaban na pamilyang Bethel.

Sarong Nakakokontentong Buhay

An Bethel nangangahulogan “Harong nin Dios,” asin an mga erokan na Bethel iyo an istaran kan Kristianong mga boluntaryo na naglilingkod sa opisina prinsipal asin sa mga sangang opisina kan Watch Tower Society. (Genesis 28:​19, nota sa ibaba) An mga pamilyang Bethel sa presenteng panahon puedeng iagid sa organisadong marhay na ‘kasararo sa harong na pinakosog paagi sa kadonongan’ asin nakatogdok sa pagkamoot ki Jehova.​—Talinhaga 24:3.

Ano an masasabi manongod sa arog-pamilyang kamugtakan sa Bethel? An sarong 25 anyos na miembro kan pamilyang Bethel sa Estonia nagsasabi: “Naoogma akong mamatean an pagigin yaon sa tahaw kan mga katood ni Jehova sa gabos na panahon. Sagkod ngonyan ini an pinakamahalagang bagay para sa sako sa Bethel.”​—Salmo 15:​1, 2.

Sa bilog na kinaban, mga 19,500 na indibiduwal ngonyan an nasa pribilehio nin paglilingkod sa Bethel. (Salmo 110:3) Sa Estados Unidos, an 46 porsiento kan mga nasa Bethel nasa pag-oltanan nin edad na 19 asin 29. Arog ki Isaias, sinda nagsabi: “Uya ako! Sugoa ako.” (Isaias 6:8) Si Isaias​—na dusay na ki Jehova​—nagboboluntaryo kaidto sa saro pang dagdag na pribilehio nin paglilingkod. Minalataw na ini nangahulogan nin pagsakripisyo nin pirang personal na bentaha. Binayaan kan mga nasa Bethel an saindang harong asin kinatodan nang mga kamugtakan, siring man an saindang ina, ama, mga tugang na lalaki, mga tugang na babae, asin mga katood. An mga sakripisyong ini gikan sa boot na ginigibo “huli sa maogmang bareta.”​—Marcos 10:​29, 30.

Kadakol man nanggad kan espirituwal na bendisyon sa Bethel! An sarong hoben na miembro kan pamilyang Bethel sa Rusya nagpapaliwanag: “Paagi sa pagigin mapagsakripisyo, dakol kitang manonodan na makatatabang sa sato na mamuhay sa bagong kinaban. Masasabi ko na sa sakong kamugtakan an mga bendisyon ni Jehova orog pa kadakula kisa mga sakripisyo ko.”​—Malaquias 3:10.

An Buhay sa Bethel

Anong klase an buhay sa Bethel? An mga miembro kan pamilyang Bethel minaoyon na iyan kapakipakinabang asin nakakokontento, nakaoogma pa ngani. Si Jens, 43 anyos, naoogma sa paglilingkod sa Bethel. Taano? An sabi nia: “Huli sa pagmate na kita kabtang nin sarong dakulang paghihingoa na gibohon an sarong mahalagang trabaho. Namamatean ko kun sagkod saen asin gurano kahalaga an gibohon ni Jehova.”

Poon Lunes sagkod Sabado, an aldaw sa Bethel minapoon paagi sa pan-agang pagsamba. Pagtokar ini sa Biblia, na pinamamayohan nin sarong may kabatidan na magurang sa Bethel. Kada Lunes na banggi sarong oras an idinudusay sa pampamilyang pag-adal sa Biblia sa tabang kan An Torrengbantayan, na may panahon na sinusundan nin pahayag na basado sa sarong tema na sono sa Kasuratan na espesyalmenteng sinadya para sa pamilyang Bethel.

Ano an nangyayari paglaog nin saro sa Bethel? Tanganing iintrodusir sa buhay sa Bethel an bagong mga miembro, igwa nin maygurang na mga tugang na lalaki sa pamilya na nagtatao nin mga lektura mapadapit sa laen-laen na aspekto kan paglilingkod sa Bethel. Sa laog nin dakol na semana durante kan enot na taon, an sarong bagong miembro kan pamilyang Bethel nag-aatender sa marahayon na semanal na paadalan na dinisenyo tanganing pahiwason an saiyang pakasabot sa Kasuratan. An mga bagong laog igwa man nin espesyal na programa nin pagbasa sa Biblia. Durante kan enot na taon ninda sa paglilingkod sa Bethel, binabasa kan bagong mga miembro kan pamilya an bilog na Biblia.

Ano an epekto kan gabos na pagsasanay na ini? Si Joshua, 33 anyos na miembro kan pamilyang Bethel sa Hong Kong, minasimbag: “Talagang pinararom kan Bethel an pag-apresyar ko ki Jehova. Nakakaasosyar ko an dakol na may kabatidan na tugang na ginagamit an kadaklan na kabtang kan saindang buhay sa paglilingkod ki Jehova. Nangorognang nagugustohan ko an espirituwal na mga programa, arog baga kan pan-agang pagsamba asin an pampamilyang Pag-adal sa Torrengbantayan. Dugang pa, nagugustohan ko an areglado asin simpleng pamumuhay. Pinalilibre ako kaini sa dai kaipuhan na kahaditan. Nanonodan ko man na asikasohon an mga bagay-bagay sa Kristianong paagi, asin ini pirmeng nagigin kapakipakinabang.”

An mga miembro kan pamilyang Bethel ginagamit an kadaklan kan saindang panahon asin paghihingoa sa paggibo kan binoluntaryohan ninda. An boot sabihon, na gamiton an saindang pisikal asin mental na mga rekurso sa pangenot sa pag-asikaso sa asignasyon na itinao sa sainda sa Bethel. Dakol na laen-laen na bagay an kaipuhan na gibohon. An nagkapira nagpapadalagan nin imprentahan o nagtatrabaho sa pagbugtak kan tutob nin libro, na naggigibo nin mga libro na ipinadadara sa dakol na kongregasyon. An iba naglilingkod sa kusina, sa komedor, o sa labahan. Kabale sa mga asignasyon an paglinig, pag-oma, pagtogdok, asin iba pa. An nagkapira may paninimbagan sa pag-asikaso kan mga kasangkapan sa mga departamentong ini. An iba nag-aasikaso sa salud o nagtatrabaho sa mga opisina. An gabos na asignasyon na trabaho sa Bethel may kaibang nakagagayagayang mga angat asin nakakokontentong gayo. An trabaho sa Bethel nangorognang nakakokontento huli ta iyan nagpapaoswag kan intereses kan Kahadean asin ginigibo huli sa pagkamoot sa Dios.

An mga miembro kan pamilyang Bethel nakaasignar sa mga kongregasyon, kun saen naeeksperyensiahan ninda nin direkta an mga pakinabang sa saindang ginigibo. Naoogma sinda sa pag-atender sa mga pagtiripon kan kongregasyon asin pakikikabtang sa paghuhulit. Bilang resulta, an mga miembro kan pamilyang Bethel napapadayupot na marhay sa saindang mga tugang na lalaki asin babae sa lokal na mga kongregasyon.​—Marcos 10:​29, 30.

Si Rita, sarong miembro kan pamilyang Bethel sa Britania, nagsasabi: “Nagpapasalamat na marhay ako sa kongregasyon! Kun ako nasa mga pagtiripon asin nasa ministeryo, napapakosog na marhay an sakong pagtubod na maheling dian an namomotan na mga tugang na lalaki, babae, mga aki, asin mga may edad na! Ano man an mangyari, yaon sinda. Nakatatabang iyan sa sako na magin mas maigot sa paglilingkod ko sa Bethel.”

An buhay sa Bethel bakong gabos trabaho, pagtiripon, paglilingkod sa langtad, asin pag-adal. An pamilya igwa man nin mga panahon nin pagpaharohayahay. Sa panapanahon, igwa nin nakaaaling asin nakararahay sa espirituwal na mga programa sa “Banggi kan Pamilya,” na nagtatao nin mga oportunidad na maogma sa mga talento kan dakol asin makanood nin nakaparirigon sa boot na mga bagay manongod sa buhay kan iba pang naglilingkod sa Bethel. Nakaoogma man an nakararahay asin nakapakokosog na sosyal na mga pakikipag-estorya sa iba. Puedeng igwa man nin mga pasilidad sa pag-aling-aling, siring man nin mga libreriya para sa personal na pagbasa asin pagsiyasat. Asin dai man puedeng lingawan an maogmang orolay sa lamesa sa panahon nin pagkakan.

Si Tom, miembro kan pamilyang Bethel sa Estonia, nagsasabi: “Harani sa Bethel an dagat, asin sa kaharani igwa nin magayon na kadlagan kun saen kaming mag-agom naoogmang maglakawlakaw. Kun minsan nakikikawat man ako nin golp, hockey, asin tenis sa mga katood sa kongregasyon asin sa Bethel. Asin kun itinotogot kan panahon, kami nagbibisikleta.”

Ano an Puede Mong Gibohon Tanganing Makualipikar?

Siempre, an Bethel sa pangenot sarong lugar kun saen an maygurang na mga Kristiano nagtatao nin sagradong paglilingkod ki Jehova asin nagtatrabaho para sa mga kapagtubod sa bilog na kinaban. An mga nagigin miembro kan pamilyang Bethel dapat na makaabot sa nagkapirang kualipikasyon. Ano an puede mong gibohon tanganing makualipikar sa paglilingkod sa Bethel?

Arog ki Timoteo, na naglingkod kaiba ni apostol Pablo, an mga inaako na maglingkod sa Bethel dapat na igwa nin marahay na kamugtakan sa kongregasyon. (1 Timoteo 1:1) Si Timoteo ‘marahay an patotoo kan mga tugang sa Listra asin Iconio.’ (Gibo 16:2) Minsan ngani sia hoben pa, aram ni Timoteo an Kasuratan asin marahay an pundasyon sa katotoohan. (2 Timoteo 3:​14, 15) Kaagid kaiyan, an mga inaako na maglingkod sa Bethel linalaoman na may kaaraman sa Biblia.

An mga miembro kan pamilyang Bethel kaipuhan na igwang espiritu nin pagkamapagsakripisyo. Risang-risa an espiritu nin pagsakripisyo sa sadiri ni Timoteo asin an saiyang pagigin gikan sa boot na enoton an intereses kan Kahadean kisa kapakanan nia kaya nasabi ni Pablo dapit sa saiya: “Mayo na ako nin iba na may kaisipan na arog kan sa saiya na mangangataman nin tunay sa mga bagay mapadapit sa saindo. Huli ta an gabos na iba pa naghahanap sa sadiri nindang kapakanan, bakong ki Cristo Jesus. Alagad aram nindo an patotoo na saiyang itinao manongod sa saiya man sana, na siring sa aki sa kaibanan nin ama sia naglingkod sa kaibanan ko sa pagpalakop kan maogmang bareta.”​—Filipos 2:​20-22.

An paglilingkod sa Bethel nagkakaipo nin espirituwal na mga lalaki asin babae. An mga areglong ginigibo para sa mga miembro kan pamilyang Bethel pinagigin posible na sinda umoswag sa espirituwal paagi sa pag-adal sa Biblia, pagigin regular sa Kristianong mga pagtiripon asin sa ministeryo sa langtad, asin pakikiasosyar sa maygurang na mga Kristiano. Sa siring an mga nasa Bethel natatabangan na sundon an hatol ni Pablo: “Padagos kamong maglakaw na kasaro [ni Cristo Jesus], na nakagamot asin itinitindog dian sa saiya patin pinaririgon sa pagtubod, siring sa pagkatokdo sa saindo, na nagsosopay sa pagtubod na may pagpasalamat.”​—Colosas 2:​6, 7.

Huli sa klase kan trabaho sa Bethel, an mga inaako sa pribilehiong ini nin paglilingkod dapat na makosog sa pisikal asin marahay an salud. Kun ika nakakaabot sa mga kualipikasyon na nasambitan niamo, 19 anyos o labi pa, asin kisuerra sangtaon nang bautisado, dinadagka mi ika na pag-isipan an paglilingkod sa Bethel.

Kita Gabos May Kabtang

Bilang mga Kristiano, sierto nanggad na kita gabos nagmamawot na enoton sa buhay an intereses kan Kahadean asin magin bilog na puso sa satong paglilingkod ki Jehova. (Mateo 6:​33; Colosas 3:23) Puede man niatong parigonon an boot kan mga naglilingkod sa Bethel na magpadagos sa pagtao nin sagradong paglilingkod dian. Asin an hoben na mga tugang na lalaki na kualipikadong maglingkod sa Bethel nangorognang maninigo na sadolon na maghingoang maabot an maogmang pribilehio na ini.

An paglilingkod sa Bethel sarong pamumuhay na nakakokontento sa espirituwal​—pamumuhay na puede nanggad na magin an pinakamarahay na karera para sa saimo. Totoo iyan ki Nick, na nagpoon na maglingkod sa Bethel sa edad na 20. Pakalihis nin sampulong taon na paglilingkod sa Bethel, sia nagsasabi: “Parate akong namimibi ki Jehova tanganing pasalamatan sia sa saiyang dai na kutana maninigong kabootan. Ano pa an hahagadon ko? Digdi, kami napalilibotan nin fiel na mga Kristiano na naggigibo kan saindang pinakamakakaya na paglingkodan si Jehova.”

[Kahon/Ritrato sa pahina 22]

ANO AN PUEDENG GIBOHON KAN KAMAGURANGAN ASIN MGA MAGURANG?

An kamagurangan asin nagbibiaheng mga paraataman maninigo na partikularmenteng mandagka sa hoben na mga lalaki na mag-aplay sa Bethel. Kasuarin pa sana, an sarong impormal na paghapot sa hoben na mga miembro kan pamilyang Bethel nagpaheling na an 34 porsiento sa sainda sa pangenot dinagka nin Kristianong mga paraataman na gibohon na pasohan ninda an paglilingkod sa Bethel. Iyo, tibaad hanaphanapon sinda kan saindang lokal na kongregasyon. Alagad marahay na girumdomon na minsan ngani si Timoteo siertong nagkaigwa nin nakararahay na impluwensia sa ibang mga hoben sa Listra asin Iconio, an kamagurangan duman dai sia pinogolan na maglingkod kaiba ni Pablo. Dai ninda ikinonklusyon na kun papaibanon si Timoteo sa apostol dakulaon na kawaran sa saindang kongregasyon an ibubunga.​—1 Timoteo 4:14.

An Kristianong mga magurang nangorognang maninigo na maghingoang magin positibong impluwensia sa saindang mga aki sa bagay na ini. Sa surbey na nasambitan pa sana, an 40 porsiento kan mga hinapot nagsabi na an saindang mga magurang iyo an pangenot na gikanan nin pagdagka na lumaog sa paglilingkod sa Bethel. An sarong tugang na babae na pirang taon nang naglilingkod sa Bethel nagsabi: “An buhay kan sakong mga magurang sa paglilingkod ki Jehova iyo an makosog na nagpahiro sa sako na lumaog sa paglilingkod sa Bethel. Sa pakaheling sa saindang halimbawa sa bilog na panahon na ministeryo, aram ko nanggad na ini an magigin pinakamarahay asin pinakanakakokontentong pamumuhay na dapat pilion.”

[Kahon sa pahina 24]

PINAHAHALAGAHAN NINDA AN PAGLILINGKOD SA BETHEL

“Mahal ko an sakong paglilingkod sa Bethel. Nakakokontentong maaraman na napaglingkodan ko si Jehova sa bilog na aldaw asin na iyo man an gigibohon ko sa aga, sa masunod sa aga, asin sa mga masunod pa. Nagtatao ini sa sako nin marahay na konsensia asin pinapano an sakong isip nin positibong mga kaisipan.”

“An Bethel sarong lugar na dian puede mong idusay an gabos mong panahon asin kosog sa paglilingkod ki Jehova na mayo nin disturbo. Ini nagtatao nin panlaog na kagayagayahan. Alagad puede mo man na maheling an organisasyon ni Jehova gikan sa ibang anggulo. An pagmate mo mas harani ka sa sentro kan organisasyon na iyan, asin ini an minagibo kaiyan na nakaoogmang marhay.”

“An paglaog sa Bethel iyo an pinakamarahay na bagay na nangyari kasuarin man sa sako. Digdi an edukasyon daing katapusan. Asin digdi an edukasyon, bakong para sa sakong sadiring personal na nahaman, kundi para ki Jehova. Digdi an ginigibo ko nungkang magigin basang sana.”

“An paggamit kan sakong mga talento sa Bethel nagpapamate sa sako nin pagkakontento asin katoninongan huli ta an mga iyan ginagamit para ki Jehova asin para sa mga tugang.”

“Dai ako nakanonompong nin tunay na satispaksion asin kaogmahan sa dati kong karera. Dakol na taon kong pinangarap an maglingkod sa kaibanan asin para sa sakong mga tugang na lalaki asin babae. Kaya ngani ako naglaog sa Bethel. Nakanonompong ako nin tunay na satispaksion sa pakaaram na an gabos kong paghihingoa matao nin espirituwal na pakinabang sa iba asin matao nin kaomawan ki Jehova.”